4 JUUN KOI 10 JUUN

NYIMA: 63, 32

 Pëhë Inyipicikeu, Hatrene Hi La Itre Drai Hnapin!

“Hne huni hna thina ka ijiji Akötesie, me thina ka meköt, me pë ethan.”—1 THES. 2:10.

LAPA XOME JU LA ITRE MEKUNE KA TRU CELË:

Nemene la itre ini nyine tro sa hmekën qa ngöne la hna iwanaxoeë hnei Delila, me Abasaloma me Iuda Isakariota?

Tro sa nyitipune tune kaa la thiina ka nyipici Ionathana me Peteru?

Tro sa catre nyipici tune kaa kowe la föe së me koi Iehova?

1-3. (a) Nemene la ewekë ka iaxoueny nge ka nyi hatrene la hnedrai së enehila? (b) Nemene la köni hnyinge hne së hna troa ce wang?

 HETRENYI la ewekë ka casi hna kuca hnei Delila, me Abasaloma, me Iuda Isakariota. Tha hnei Delila kö hna nyipici koi Samasona atre amekötin, lo atre hnimi angeic; tha hnei Abasaloma kö hna nyipici koi Davita joxu, keme i angeic; nge ketre tha hnei Iuda Isakariota kö hna nyipici koi Iesu Keriso maseta i angeic. Hnene la itre aqane ujë i angatr, ene pe hetre ethanyine ju pë hë kowe la itre xa atr! Ngo pine nemene matre tro sa wange atrune la itre ewekë cili?

² Hna hane e la troa iwanaxoeë ngöne la itre thiina ka ngazo ka mama catre ngöne la hnedrai së. Tha sesëkötre kö së, ke, ame ngöne la Iesu a qeje pengöne la hatrene la ‘pune la fen,’ öni nyidrë: “Tro ha ala nyimu la angete . . . iawanaxoeë.” (Mat. 24:3, 10) Ame la atr ka “iwanaxoeë,” tre, “ka iaö me thoi kowe la sinee i angeic, matre nuaxöje pe la sinee i angeice kowe la ithupëjia.” Kolo lai a anyipicine laka easa melëne la “ite drai hnapin,” lo hnei Paulo hna ahnithe hë ka hape, tro ha mama la itre “tha metöte kö, . . . itete wanaxoe.” (2 Tim. 3:1, 2, 4) Ngacama hna majemine wange acone la itre aqane huliwa thoi hnine la itre itus maine itre film, ngo ame pe atraqatre la akötre hna nyipi melëne hnene la itre atr hna wanaxoeën. Eje hi laka, ketre ewekë lai ka iaxoueny nge ka nyi hatrene la hnedrai së enehila.

³ Nemene la itre ini hne së hna kapa qa hnine la Tusi Hmitrötre göi itre atr ka tha nyipici kö ekö? Tulu ne aqane mele nyipici drei la nyine tro sa xötrethenge? Nge tro sa catre nyipici koi drei? Itre hnyinge lai hne së hna troa ce wang.

ITRE TULU EKÖ NYINE TRO SA HMEKËN

4. Hnei Delila hna wanaxoeë Samasona tune kaa, nge pine nemene matre tha fene ngazo kö la aqane huliwa i angeic?

⁴ Tro sa pane ce wange la tulu i Delila, ketre atre ihnihni.  Ase hnyawa ha mekune hnei Samasona atre amekötin, troa isi me angetre Filisiti me isi göline la nöje i Akötresie; ngo hnimi Delila ha hnei angeic. Ma öhne jë hë lo faifi lao joxu ne Filisiti ka hape, tha nyipi hnimi Samasona kö hnei Delila; ame hnei angatre hna hamë angeice pi la mani ka tru matre troa atre la qaane la trenge catre i Samasona, ke, aja i angatre troa humuthi angeic. Hnene laka ka meciu mani Delila, ene pe hnei angeice hna kapa la sipo i angatr nge akönia thele jë kö angeice troa iaö Samasona; ngo tha ie pi kö. Ame hnei Delila hna thele jë troa “iele [Samasona] . . . o drai hnene la ite tenge ewekë i nyëne me huliwa angeic, nge meci hë angeice hnei aköt.” Haawe angeic a qaja jë ka hape, tha hna hane kö xöje la he i angeic, ke maine troa xöj, tre, tro ha patre la mene qaathei angeic. a Atre hë Delila e cili, ame hnei angeice hna xöje pi la itre pene he i Samasona ngöne la kola meköle hune la watingöne ca i angeic, nge thupene lai, Delila a nue Samasona ju pe kowe la itre ithupëjia me angeic. (A. ame. 16:4, 5, 15-21) Tha fene ngazo kö la aqane huliwa i angeic! Hnene la aqane meciu ewekë i Delila, ene pe hnei angeice hna wanaxoeëne la atre hnimi angeic.

5. (a) Hnei Abasaloma hna tha nyipici tune kaa koi Davita, nge nemene la hna qajaqaja hnene lai thiina i angeic? (b) Nemene la aliene hni Davita ngöne la kola wanaxoeë angeice hnei Ahithofela?

⁵ Tro pena sa ce wange la ketre atre iaö, ene Abasaloma. Hnene la pi hune fë aja, ame hnei angeice hna catre thele troa ithepe musi me keme i angeic, ene Davita Joxu. Hnei Abasaloma hna pane ‘ënöne la ite hni angete Isaraela.’ Hnei angeice hna nyi nyi loi koi angatr ngöne la kola qaja atrune la hnei angeice hna troa kuca koi angatre elany, me nyi ka ihnim. Angeice a dremi angatre ceitu me ketre atr ka wange atrunyi angatre me hnehengazo angatr. (2 Sam. 15:2-6) Goi iaöne fe Abasaloma la hni ne la atre hna mejiune kow hnei Davita, ene Ahithofela, matre hane pi fe Ahithofela wanaxoeë Davita. (2 Sam. 15:31) Ame ngöne la tusi Salamo 3 me Salamo55, Davita a qeje pengöne la aqane akötrë angeice hnene la ewekë celë. (Sal. 3:1-8; e jë la Salamo 55:12-14.) Hnei Abasaloma hna amamane la aqane pë metrötre i angeice kowe la aqane ië joxu i Akötresie, ngöne la angeice a thele troa eatrëne la itre sipu aja i angeic, me aqane thele angeice troa ithepe mus. (1 A. l. ite jo. 28:5) Ame hë la pun, tha ie ju kö la aja i angeic, ke Davita pala hi la ka mus, lo atre hna iëne hnei Iehova.

6. Hnei Iuda hna wanaxoeë Iesu tune kaa, nge nemene la ka canga mama cile hi ngöne la mekuna ne la itre atr, e qeje Iuda ha?

⁶ Pane mekune ju së enehila la aqane wanaxoeë Keriso hnei Iuda Isakariota. Ame ngöne lo Iesu a aca atrune pe hi la Paseka cememine la itre aposetolo ka ala truelof, öni nyidrëti jë hi koi angatre ka hape: “Nyipici ini a qaja koi nyipunie, laka tro la kete e nyipunie a wanaxoeë ni.” (Mat. 26:21) Ame hë e thupen ngöne lai jidri cili, Iesu ha ahnithe koi Peteru me Iakobo me Ioane ngöne la gatrane ne Gethesemane ka hape: “Hana wang, dei hë la ate wanaxoeë ni.” Nge kolo ju fe kö a traqa hnei Iuda ngöne la gatrane memine la itre sine ce thë la ngazo me angeic, “ame hnei angeice hna canga tro koi Iesu, me hape, Rabi ; me demi nyidë.” (Mat. 26:46-50; Luka 22:47, 52) Hnei Iuda “hna wanaxoeëne la madra ka pë ethan,” me nue Iesu kowe la itre ithupëjia me nyidrë. Matre, nemene la hnei Iuda hna isine troa kapa qaa ngön? Ene hi la 30 lao hnepe sileva! (Mat. 27:3-5) Qaane ju hi lai, e qeje Iuda ha, canga mama cile hi ngöne la mekuna ne la itre atr laka, “atre iwanaxoeë,” ene hi lo atre wanaxoeëne la sipu enehmu i angeic. b

7. Nemene la itre ini hne së hna kapa qaa ngöne la mele i (a) Abasaloma, me Iuda, me (b) Delila?

⁷ Nemene la ini hne së hna kapa qaa ngöne la itre tulu celë nyine tro sa hmekën? Hnei Abasaloma me Iuda hna menuë pune ka ngazo, pine la  hnei nyidroti hna wanaxoeëne la siana i Iehova. (2 Sam. 18:9, 14-17; Ite hu. 1:18-20) Nge e qeje Delila ha, tre, canga mama cile hi koi së la thiina ka iaö, me ihnimi ihnihni. (Sal. 119:158) Haawe, sisitria catre e tro sa thipetrije la meciu ewekë, maine sipu aja së kö, ke, itre ewekë lai ka sewe Iehova troa kepe së. Hapeu, tha itre tulu kö la ka amamane la enyipiewekëne la tro sa hmekëne la thiina ka iaö?

NYITIPUNE JË LA ITRE KA THIINA KA NYIPICI

8, 9. (a) Pine nemene matre hnei Ionathana hna nyi hatrene la hni ne nyipici angeice koi Davita? (b) Tro sa nyitipu Ionathana tune kaa?

⁸ Tusi Hmitrötre fe a qeje pengöne la itre atr ka thiina ka nyipici. Tro sa pane ce wange la tulu ne la lue atr ka nyipici, memine la ini hne së hna troa xome qaathei nyidro. Tro sa nyiqaane memine la ketre atr ka nyipici koi Davita. Maine ju, Ionathana la ka troa xome la hnanyijoxu thupei Saulo, Joxu ne Isaraela, ke, neköne haetra i angeic; ngo hetre ewekë ka traqa. Hnei Iehova hna ië Davita pena matre troa joxu i angetre Isaraela. Hnei Ionathana hna metrötrëne la hna axeciëne hnei Akötresie. Tha hnei angeice kö hna zalu koi Davita, ngo “hna isilixelë [angeice pe] me Davita,” a kola mama ngöne la Ionathana a nyi hatrene la hni ne nyipici angeice koi Davita. Hnei angeice mina fe hna hamëne la ixeetre i angeic, me taua i angeic, me tane pehna, me otrene hni angeic nyine atrunyi Davita, ka troa joxu. (1 Sam. 18:1-4) Hnei Ionathana hna kuca asë la hnei angeice hna atreine matre troa ‘thuecatre i Davita,’ me nyixöle i angeice qëmeke i Saulo, ngacama xönë hi tro angeice a meci pine lai. Öni Ionathana koi Davita: “Tro nyipëti a joxu ne Isaraela, nge tro ni a hnaaluene fe i nyipë.” (1 Sam. 20:30-34; 23:16, 17) Celë hi matre, tha sesëkötre kö së laka, thupene la meci Ionathana, hnei Davita hna fe amamane la hleuhleu i angeic, me ihnimi angeice koi Ionathana jëne la ketre nyima ne hnëmec.—2 Sam. 1:17, 26.

⁹ Pëkö luelue thei Ionathana, atre hnyawa hi angeice la atr nyine tro angeice a nyipici kow. Angeice a drengethenge Iehova Joxu Cile i angeic, me sajuë Davita, siana i Akötresie. Ketre tune mina fe enehila, ngacama pëkö hnëqa së e hnine la ekalesia, ngo nyipi ewekë tro sa sajuëne hnyawa la itre trejine hna acile matre troa elemekene la ekalesia.—1 Thes. 5:12, 13; Heb. 13:17, 24.

10, 11. (a) Pine nemene matre Peteru a catre nyipici koi Iesu? (b) Tune kaa la aqane tro sa nyitipu Peteru, nge nemene la ini nyine tro sa xome qaa ngöne lai?

¹⁰ Ame la ketre tulu ka lolo hne së hna troa wang, tre, ene la tulu i Peteru aposetolo, ka qaja amamane la hni ne nyipici angeice koi Iesu. Ame la Iesu a xome la ketre aqane ithanata nyine ceitun, matre troa amamane la enyipiewekëne la troa lapaune kowe la ngönetrei me madra hna troa huujëne hnei nyidrë, nyimutre la itretre drenge ka thixötr, me nuetriji nyidrëti pe. (Ioane 6:53-60, 66) Haawe, Iesu a xei jë kowe la itre aposetolo ka ala truelof, me hnyinge ka hape: “Aja i nyipunieti fe troa hmaca?” Nge Peteru la ka sa me hape: “Joxu, ithuëti nyihunieti koi deti ? thawai  cilieti la nöjei wesi ula ne shewengönie ka tha ase palua kö. Nyihunieti a lapaun, me wangate hmekune laka cilieti la Keriso la Hupuna i Akötesie ka shewengönie.” (Ioane 6:67-69) Hapeu, kolo kö lai a hape trotrohnine hnyawa hi Peteru la itre ewekë asë hnei Iesu hna qaja göne la huuje hnei nyidrëti hna troa hamën? Ohea. Ngacama tha trotrohnine kö Peteru, ngo xecie e kuhu hni angeice troa nyipici kowe la Hupuna i Akötresieti hna iën.

¹¹ Tha hnei Peteru kö hna mekune laka, ka tria la aqane wai ewekë i Iesu, maine tro hmaca kö Iesu elanyi a saze la ithanata i nyidrë. Atrehmekune pe Peteru cememine la hni ka ipië ka hape, thei Iesu “la nöjei wesi ula ne shewengönie ka tha ase palua kö.” Tune kaa fe së enehila, e qaja jë la ketre mekune hnine la itre itusi qaathei “ate thupe nyipici,” ngo jole koi së troa trotrohnine maine pena ka tha ihmeku kö memine la mekuna së? Tro sa thele troa trotrohnine ej, ngo tha tro pe sa treqene matre troa saze elany thenge la mekuna së.—E jë la Luka 12:42.

CATRE JË NYIPICI KOI FÖE HMUNË

12, 13. Pine nemene matre tha inyipicikeu hë e hnine la faipoipo, nge pine nemene matre tha aqane ujë ka loi kö la troa thë la inyipicikeu hnene hi laka traqa ha kowe la 50 lao macatre?

¹² Ame la troa tha nyipici koi ketre, tre, ketre ngazo ka tru lai, nge tha tro pi kö sa nue lai thiina cili troa thë la tingetinge me casi ne la hnepe lapa ne la Keresiano memine la ekalesia. Tro sa lapa fë la mekune cili, me ce wange la aqane tro sa catre nyipici kowe la föe së, me koi Akötresie.

¹³ Ame la ketre thiina ka hetre ethanyine catr nge ka amamane laka, tha nyipici kö ketre koi ketre, tre, ene la troa nyixetë. Ame la ka nyi xetë, tha nyipici hë angeice kowe la föi angeic, nge hnime pena ha angeice la ketre atr. Nge ame pena ha lai atr hna nyixetëne trij, tre, lapa casi ju pe hi angeice memine la akötre i angeic. Hnei nemene matre traqa pi lai ewekë cili kowe la lue atr ka ihnimi ekö? Ame laka traqa pi kowe la nyixetë, tre, hnene laka tha thele hmaca kö nyidroti la aja i ketre. Kola qeje pengöne hnene la ketre Porofesör Gabriella Turnaturi la ëjen, ka hape, ame laka traqa jë la ewekë cili, tre hnene laka tha kuca ha hnene la lue trefëne la nöjei ewekë nyine troa acatrene la imelekeu i nyidro; goi traqa fe lai kowe lo itre trefëne ka hekö hë faipoipo. Kola öhne thene la itre trahmanyi ka 50 lao macatre nge ka hetre föen, laka, ngacama 25 hë lao macatre ne faipoipo i angatr, ngo angatr a tro trij la itre föi angatr, matre ce lapa pena ha me ketre föe. Hnene laka ame ngöne la itre xa nöj, hna majemine öhne la aqane ujë cili thene la itre trahmanyi ka 50 lao macatre, ene pe kösë hna kapa lai hnene la itre atr. Ngo tha aqane ujë kö lai ka loi, ke, eje a thë la inyipicikeu ne la lue trefën.

14. (a) Tune kaa la aqane goeëne Iehova la itre atr ka mele hnihni e hnine la faipoipo? (b) Nemene la hnei Iesu hna qaja göne la inyipicikeu e hnine la faipoipo?

¹⁴ Tune kaa la aqane goeëne Iehova la itre atr ka tro trije la itre föi angatr, ngo pë pe kepine qaa hnine la Tusi Hmitrötre ka aijijë angatre troa ujë tune lai? ‘Methi [Akötresi së] la troa triji föe,’ celë hi kepin matre Nyidrëti a qaja la itre hnaewekë ka catre kowe la itre atr ka mele hnihni me ka tro trije la itre föi angatr. (E jë la Malaki 2:13-16.) Ketre, casi hi la mekuna i Iesu me Keme i nyidrë göi inyipicikeu, ene laka tha tro pi kö ketre a upetrije maine helëne pena la föi angeic, ngo pë pe ewekë ka ngazo hna kuca.—E jë la Mataio 19:3-6, 9.

15. Tune kaa la aqane tro la itre ka faipoipo a catre nyipici kowe la itre föi angatr?

¹⁵ Tune kaa la aqane tro la itre ka faipoipo a catre nyipici kowe la itre föi angatr? Wesi Ula i Akötresie a qaja ka hape: “Ce madinejë memine la föe [maine trahmanyi] ne thupëtesiji ’ö,” nge, “Mele madine jë ce memine la ifënekö [maine trahmany] i ’ö hnimina.” (Ite edomë 5:18; Ate cai. 9:9) Haawe, ame la kola qatre trootro la lue trefën, tre, nyipi ewekë tro nyidroti a kuca la nöjei ewekë nyine troa acatrene la imelekeu i nyidro ngöne la götrane ngönetrei, ngo ngöne mina  fe la troa amamane la ihnimi nyidro. Kolo lai a hape, troa wange atrune la aja i ketre me ketre, me ami traeme koi ketre me ketre, me easenyi catre koi ketre me ketre. Nyipi ewekë tro angatre a wange atrune la aqane troa cile huti la faipoipo i angatr, memine la aqane imelekeu i angatre me Iehova. Haawe, nyipi ewekë tro la itre trefëne a ce inine la Tusi Hmitrötr, me ce cainöje lapa, me ce thithi matre kapa la ixatua qaathei Iehova.

CATRE JË NYIPICI KOI IEHOVA

16, 17. (a) Nemene la ewekë ka tupath la aqane nyipici së koi Akötresie e hnine la hnepe lapa me hnine la ekalesia? (b) Nemene la tulu ka amamane ka hape, e tro sa drengethenge la hna amekötine hnei Akötresie, ene la tha tro kö a ce tro memine la itre sinee hna upetröne eë, tre, tro ha hetre thangane ka loi qaa ngön?

¹⁶ Hetrenyi la itre atrene la ekalesia ka kuca la ngazo, hna hajine me wameucën “mate tro angatr a cate kowe la lapaun.” (Tito 1:13) Hetre itre xan hna upetröne eën, ke, tha ietrane kö angatre la aqane ujë i angatr ka ngazo. Pine laka ame la itre atr cili, tre, “ange hna inine hnene [la wameuc],” ene pe hna xatua angatre troa hmaca me iloi me Akötresie. (Heb. 12:11) Nemene la nyine tro epuni a kuca e upetröne eëne ju la ketre sinee i epuni maine ketre enehmu pena? Ame e celë, tre, kola tupath la aqane nyipici së koi Akötresie. Iehova a wai pengö së me wang maine easë jë kö a troa mele thenge la hna amekötine hnei Nyidrë, ene la troa lapa ananyine la atr hna upetröne eë, maine tro pena sa fedre koi angeic.—E jë la 1 Korinito 5:11-13.

¹⁷ Tro sa pane ce wange la ketre tulu ka lolo, ene la ketre hnepe lapa ka nyipici, nge ka sajuëne la hna amekötine hnei Iehova, laka tha tro kö a ce tro memine la itre sinee hna upetröne eë. Hna upetröne eë la ketre nekö trahmanyi a treen hë lao macatre, nge ame ngöne la ijine cili, tha hna thele kö hnene la keme me thine me foa lao trejine me angeice troa ‘ce tro me angeic.’ Ame itre xa ijin, hnei angeice hna thele troa hane lö hnine la itre huliwa i angatr, ngo hna cile catre hnene la itre atrene la hnepe lapa, angatre isa ala cas, laka tha tro kö angatre a iöhnyi me angeic. Ame hë lo kola kepe angeice hmaca e hnine la ekalesia, öni angeice ka hape, catrehnine catre la aja i angeice troa imelekeu hmaca memine la hnepe lapa i angeic, nge goi tha meköle fe angeic e jidr. Atrehmekune hi angeice laka, maine hnene ju la hnepe lapa i angeice hna xome la hnepe ijine troa ce lapa me angeic, ijije hi tro lai a aejëne la aja i angeic. Ngo hnene laka tha hnene pi kö la hnepe lapa i angeice hna thele troa iöhnyi me angeic, ene pe atraqatre la aja i angeice troa imelekeu hmaca me angatr. The thëthëhmine kö la tulu celë e traqa ju koi epuni la ajane troa ena la wathebo i Akötresie celë, ene la tha tro kö a ce tro memine la itre sinee hna upetröne eë.

18. Thupene la hna ce wange la thangane la troa nyipici me tha nyipici, nemene hë la ka xecie koi epun?

¹⁸ Pëhë inyipicikeu ngöne la fene ka iaö celë. Ngo ame pe hetrenyi e hnine la ekalesia la itre atr ka nyipici, itre tulu ka lolo koi së. Kola anyipicine hnene la aqane mele i angatre la angatre a trongëne la eamo celë hna hape: “Nyipunie la angete anyipicine me Akötesieti fe, laka hne huni hna thina ka ijiji Akötesie, me thina ka meköt, me pë ethane koi nyipunie angete lapaun.” (1 Thes. 2:10) Epi tro sa catre nyipici koi Akötresie me koi ketre me ketre.

[Ithueamacany]

[Thying]