‘Ikatu ojejerovia orerehe, roiko hekopete ha oñeñeʼẽ vaiʼỹ hag̃uáicha orerehe.’ (1 TES. 2:10, NM)

ÑAMYESAKÃ UMI MBAʼE IÑIMPORTANTEVÉVA

¿Mbaʼépa ñaaprende Dalila, Absalón ha Judas Iscariote ojapovaʼekuégui?

¿Mbaʼéichapa ikatu jasegi Jonatán ha Pedro ehémplo?

¿Mbaʼépa jajapovaʼerã akóinte ñaneñeʼẽrendu hag̃ua Jehovápe ha ani hag̃ua ñatraisiona ñane ména térã ñane rembirekópe?

1-3. a) ¿Mbaʼeichagua héntepa oĩ heta hetave koʼág̃a rupi, ha mbaʼépa ojapo hikuái? b) ¿Mbaʼe porandúpa ñambohováita ko artíkulope?

 ¿MBAʼÉPEPA ojojogua Dalila, Absalón ha Judas Iscariote? Mbohapyvéva oporotraisionavaʼekue. Dalila otraisiona pe kuimbaʼe ohayhuetévape chupe, pe hués Sansón, Absalón katu itúvape, rréi David, ha Judas Imboʼehárape, Cristo Jesús. Ojapóvo upéicha, haʼekuéra oheja vai ha tuicha operhudika ambuépe. Péro, ¿mbaʼépa ñaaprendekuaa koʼã mbaʼe oikovaʼekuégui?

² Peteĩ profesóra heʼi koʼã tiémpope oĩha heta hetave umi oporotraisionáva. Péro ñande ndajahecharamói upéva. Oñeʼẽvo umi mbaʼe oikótavare oñemoag̃uívo “ko múndo ára pahaite”, Jesucristo heʼi oĩtaha heta “oñotraisionátava” (Mat. 24:3, 10, NM). Peteĩ oporotraisionáva ningo “ombotavy ha operhudika iñamígo térã peteĩ hapicha ojeroviávape hese”. Jahechaháicha, ojekuaa porã jaikoha umi “ára pahápe”, upéicha rupi heta hetave umi ohechaukáva ndaikatuiha ojejerovia hesekuéra, ha Pablo heʼi haguéicha oikotaha, umi hénte “oporombotavy” ha “itraisionérota” (2 Tim. 3:1, 2, 4, NM). Pyʼỹinte umi ojapóva lívro, rrevísta ha pelíkula, ohechauka pe traisión haʼeramoguáicha peteĩ mbaʼe igústova térã ndaivaíriva umi ojoayhúvape g̃uarã. Péro ndahaʼeiete hína upéicha. Ko mbaʼe oporombohasa asy ha oporomoñeñandu vai. Añetehápe, pe traisión peteĩ mbaʼe ivaietereíva ojehecháva opárupi ko tiémpope.

³ ¿Mbaʼe mbaʼépa ñaaprende umi tapicha yma guare oporotraisionavaʼekuégui? ¿Mbaʼépa ñanemboʼe umi tapicha ijeroviapýva ehémplo? ¿Ha mávapepa nañamboykeivaʼerã toiko la oikóva? Ñahesaʼỹijomína koʼã porandu.

 ANÍKE JASEGI UMI OPOROTRAISIONÁVAPE

4. ¿Mbaʼéichapa Dalila otraisiona Sansónpe, ha mbaʼérepa ivaiete pe ojapovaʼekue?

⁴ Ñepyrũrã jahechami mbaʼéichapa Dalila otraisionavaʼekue Sansónpe. Ko hués ou ohayhueterei chupe ha haʼe ojaprovecha upévare. Sansón odesidíma oñorairõtaha Jehová puévlo rehehápe umi filistéo kóntrape, upéicha rupi umi cinco mburuvicha Filisteaygua ojukase chupe. ¿Mbaʼépa ojapo hikuái upearã? Haʼekuéra ohechakuaáne raʼe Dalila ndohayhúi ni nomombaʼeiha Sansónpe, upévare oikuaveʼẽ chupe heta pláta oaverigua hag̃ua mbaʼérepa iména imbaretete. Ko kuña iplatarayhueterei ha opromete oñehaʼãtaha omeʼẽ chupekuéra pe informasión. Tres vése ningo oporandu Sansónpe, péro noguenohẽi chugui mbaʼeve. Dalila naikaneʼõi ha “manterei oporandu chupe. Hapykuéri niko oiko ha oporandu jey jey chupe, ha amo ipahápe omonguerairóma Sansónpe”. Upémarõ haʼe omombeʼu arakaʼeve noikytĩriha iñakãrague, ha sapyʼa rei oñeikytĩramo, opytataha ikangy. a Dalila oikuaávo upéva, omonge hypaʼũme Sansónpe, oikytĩka chugui iñakãrague, ha upéi ontrega chupe iñenemigokuéra pópe ojapo hag̃ua hikuái ojaposéva chugui (Jue. 16:4, 5, 15-21). ¡Ajépa ivaiete pe ojapóva! Haʼe iplatapota rupi otraisiona pe kuimbaʼe ohayhuetévape chupe.

5. a) ¿Mbaʼéichapa Absalón otraisiona Davídpe, ha mbaʼépa ohechauka ojapóva rupive? b) ¿Mbaʼéichapa oñeñandu David otraisiona haguére chupe Ahitofel?

⁵ Jahechamína koʼág̃a mbaʼépa ojapo Absalón. Haʼe ningo oipotaiterei pe autorida orekóva itúva, pe rréi David, ha oityse chupe ikatu hag̃uáicha omanda hendaguépe. Absalón oñepyrũ opromete heta mbaʼe umi Israelguápe oñemoĩ porã hag̃ua hendivekuéra. Oañuã ha ohetũmba guaʼu umi héntepe ojepyʼapyrõguáicha hesekuéra. “Upéicha opa Israelpegua ohayhueterei chupe.” (2 Sam. 15:2-6.) Absalón ogueraha hapykuéri hetápe, umíva apytépe Ahitofel, peteĩ David konsehéro. Upéi Ahitofel otraisiona ha opuʼãma avei pe rréi rehe (2 Sam. 15:31). David ohai umi Salmo 3 ha 55-pe mbaʼeichaitépa oñeñandu oñetraisiona haguére chupe (Sal. 3:1-8; elee Salmo 55:12-14). Opuʼãvo pe rréi Jehová oiporavovaʼekuére, Absalón ohechauka ndorrespetaiha Ñandejára odesidivaʼekue ha avei ojekuaa hese itaryrýi ha hovaʼatãha (1 Cró. 28:5). Amo ipahápe Absalón nosẽporãi, ha David osegi oisãmbyhy Jehová rembiporavóramo.

6. ¿Mbaʼéichapa Judas otraisiona Jesúspe, ha mbaʼe rehépa ñanemomanduʼa pe téra Judas?

⁶ Ñanemanduʼamína koʼág̃a Judas Iscariote ojapovaʼekuére. Pe última Páskua Jesús ojapovaʼekuépe umi 12 apóstol ndive, heʼi: “Añetehápe haʼe peẽme: Pende apytégui peteĩva chetraisionáta” (Mat. 26:21, NM). Upe pyhare, hardín de Getsemanípe, Jesús heʼi Pedro, Santiago ha Juánpe: “¡Péina!, og̃uahẽmahína pe chetraisionáva”. Upe rire Judas oñemboja oúvo umi héntendi, ha “derechoite oho Jesús rendápe ha heʼi: ‘¡Mbaʼéichapa Mboʼehára!’, ha ohetũ vevyimi chupe” (Mat. 26:46-50, NM; Luc. 22:47, 52, NM). Ohayhu rupi pe pláta, Judas “otraisiona” peteĩ “kuimbaʼe hekoporãvape” ha ontrega iñenemigokuéra pópe. ¿Mboýpa ojepaga chupe upévare? Saʼieterei, ¡30 monéda de plátante! (Mat. 27:3-5, NM.) Upe guive pe téra Judas ñanemomanduʼa peteĩ oporotraisionávare, koʼýte umi oñemoamigoitéva guaʼu ojapo hag̃ua upéva. b

7. ¿Mbaʼépa ñaaprende a) Absalón ha Júdasgui, ha b) Dalílagui?

 ⁷ ¿Mbaʼépa ñaaprende Absalón, Judas ha Dalila ojapovaʼekuégui? Absalón ha Judas osẽ vaieterei otraisiona rupi umi Jehová oiporavovaʼekuépe (2 Sam. 18:9, 14-17; Hech. 1:18-20). Ha heta tapicha ohendu jave pe téra Dalila katuete imanduʼa peteĩ oporohayhuete guaʼúvare ha upe rire katu oporotraisiona (Sal. 119:158). Ñañehaʼãmbaitevaʼerã ani ñandetaryrýi ha jaipota ñande rapichakuéra orekóva, upéicha ikatu hína ñañemomombyry Jehovágui. Koʼã ehémplo ñanepytyvõ ani hag̃ua arakaʼeve ñaporotraisiona.

ÑAHAʼANGÁKENA UMI IJEROVIAPÝVAPE

8, 9. a) ¿Mbaʼérepa David opromete Jonatánpe akóinte oĩtaha ijykére? b) ¿Mbaʼéichapa ikatu ñahaʼanga Jonatánpe?

⁸ La Biblia omombeʼu oĩ hague heta tapicha ohechaukáva ikatuha ojejerovia hesekuéra. Ñahesaʼỹijomína mokõi ehémplo ha jahecha mbaʼépa ikatu ñaaprende chuguikuéra. Ñepyrũrã ñañeʼẽta Jonatán rehe. Haʼe ohechauka ohayhuha iñamígo Davídpe. Jonatán ningo rréi Saúl raʼy ypykue ha ikatúkuri ogoverna Israel itúva rendaguépe. Upéicharamo jepe, Jehová oiporavo Davídpe rreirã. Péro Jonatán ndaipochýi upévare ha orrespeta Jehová odesidivaʼekue. Haʼe ndohechái chupe haʼerõguáicha irrivál, síno “oiko David irũ teéramo” ha opromete akóinte oĩtaha ijykére. Hiʼarive omeʼẽ chupe ijespáda, hiʼárko, isinturón ha heta ijao, ohechauka hag̃ua orrekonoseha ojeporavo hague Davídpe rreirã (1 Sam. 18:1-4). Ojapo opa ikatúva “omokyreʼỹ” hag̃ua Davídpe ha hekove jepe oapeligra odefende hag̃ua iñamígope itúva Saúl ojukasérõ guare chupe. Ohechauka oĩha ijykére ha heʼi chupe: “Nde ningo Israel retã ruvicharã, ha che aikóta nde rire mokõihápe” (1 Sam. 20:30-34; 23:16, 17, ÑÑB). Ndareíri omanórõ guare Jonatán, David omombeʼu peteĩ purahéipe mbaʼeichaitépa ohayhu iñamígope ha ombyasy omano haguére (2 Sam. 1:17, 26).

⁹ Jonatán oikuaa porã mávapepa iñeʼẽrenduvaʼerã. Haʼe ipyʼaite guive oñemoĩ Jehová poguýpe ha ohechauka omombaʼeha Davídpe, Ñandejára oiporavógui chupe. Ikatu ñande ndajarekói rresponsavilida tuicháva kongregasiónpe, upéicharõ jepe jarrespetavaʼerã ñande pyʼaite guive umi ermáno Jehová omoĩvape omoakã hag̃ua (1 Tes. 5:12, 13; Heb. 13:17, 24).

10, 11. a) ¿Mbaʼéichapa Pedro ohechauka ndohejamoʼãiha arakaʼeve Jesúspe? b) ¿Mbaʼéichapa ikatu ñahaʼanga Pédrope?

¹⁰ Jahechamína avei apóstol Pedro ehémplo. Haʼe oprometevaʼekue ndohejamoʼãiha arakaʼeve Jesúspe. Peteĩ jey, Cristo oiporu peteĩ ehémplo ohechauka hag̃ua mbaʼérepa tekotevẽte ojejerovia hete ha huguy omeʼẽtavare sakrifísioramo. Péro heta disípulo ojagarra vai Jesús heʼíva ha oheja rei chupe  (Juan 6:53-60, 66). Upémarõ Jesús oporandu umi 12 apóstolpe: “¿Peẽ piko ndapehoséi avei?”. Simón Pedro katu osẽ ombohovái: “Karai, ¿máva rendápe piko rohóta? Ne ñeʼẽ ningo omeʼẽ jeikove opaveʼỹva. Ha ore roguerovia ha roikuaa nde haʼeha Ñandejára Remimbou Marangatu” (Juan 6:67-69, NM). ¿Ikatúpa jaʼe Pedro ontende porã hague umi mbaʼe Jesús heʼivaʼekue isakrifísiore? Oiméne nontendeporãi raʼe. Upéicharamo jepe, Pedro odesidíma ni mbaʼevéicharõ nomboykemoʼãiha Ñandejára Raʼýpe.

¹¹ Upérõ haʼe nopensái Jesús ojavynteha ha amo gotyove okorrehitaha upe heʼivaʼekue, síno hekomirĩ ha orrekonose ‘iñeʼẽ omeʼẽha jeikove opaveʼỹva’. Sapyʼánte ikatu nañantendeporãi peteĩ mbaʼe pe “tembiguái jeroviaha” omoĩva puvlikasionkuérape, téra ndohói umi mbaʼe ñande ñapensáva rehe, ¿mbaʼépa jajapo upéicha jave? Ñañehaʼãmbaitevaʼerã ñantende ha ani ñaimoʼã amo gotyove oñekambia ha oñemyesakãtaha ñande jaipotaháicha (elee Lucas 12:42).

ANÍKENA REMBOTAVY NE MÉNA TÉRÃ NE REMBIREKÓPE

12, 13. ¿Mbaʼéichapa umi omendáva mbeguekatúpe oñepyrũ oñotraisiona, ha mbaʼérepa jaʼe pe traisión nodependeiha ñande eda rehe?

¹² Opaichagua traisión ningo ivaieterei, upévare aníke jaheja ombyai ñande rogapy ha kongregasión. Jahechamína mbaʼépa jajapovaʼerã ani hag̃ua ñambotavy ñane ména térã ñane rembirekópe ha ñaneñeʼẽrendu meme hag̃ua Ñandejárape.

¹³ Peteĩ oporomoakãratĩva tuichaiterei operhudika iména téra hembirekópe, hiʼarive nokumplíri pe promésa ojapovaʼekue hembiayhúpe omendárõ guare ha otraisiona chupe omañávo ambuére. Péicha, pe oñetraisionáva oñeñandu haʼeño ha opyta yvýre. ¿Mbaʼéicha rupípa oiko upéva peteĩ kuña ha kuimbaʼe ojoayhuetevaʼekuére? Pyʼỹinte oiko upéva umi omendáva oñemomombyry rupi ojuehegui ha nopenái oñandúvare hikuái. Pe profesóra de Sociología hérava Gabriella Turnaturi heʼi: “Sapyʼánte umi omendáva nopenaguasúi ojuehe oĩrõ jepe oñondive. Péicha jave ikatu peteĩva oikotevẽhína hembiayhúre, péro noñatendéi rupi ojuehe oñemoĩ oheka ambuépe, ha mbeguekatúpe otraisionáma iména térã hembirekópe”. Upéva ikatu avei oiko umi aréma omendavaʼekuére. Ñamoĩ chupe peteĩ karai orekóva 50 áño ojedivorsiaha hembirekógui ha oho ótro kuñándi, hiʼarive hembireko ojapóma 25 áño oĩ hague hendive omoakãratĩʼỹre chupe. Oĩ heʼíva koʼã mbaʼe oikonteha voi umi omendáva ijeda vove. Péro ndahaʼeiete upéicha. Koʼãichagua traisión rehe ndaikatúi ojeʼe vyroreiha umi oporomoakãratĩva ijeda haguérente. c

14. a) ¿Mbaʼépa Jehová opensa umi oheja reívare iména térã hembirekópe? b) ¿Mbaʼépa heʼi Jesús umi omendávare?

¹⁴ Oĩ nopenáiva la Biblia heʼívare ha oheja rei iména térã hembirekópe. ¿Mbaʼépa opensa Jehová koʼãichagua tapicháre? Haʼe ni mbaʼevéicharõ ndoipotái umi omendáva ojedivorsia, ha okondena umi otraisiona ha oheja reívape iména térã hembirekópe (elee Malaquías 2:13-16). Itúvaicha, Jesús omboʼe avei ndovaleiha peteĩ omendáva omosẽ ỹrõ oheja rei iména térã hembirekópe, ha oiko ku mbaʼeveʼỹrõguáicha (elee Mateo 19:3-6, 9).

15. ¿Mbaʼépa ojapovaʼerã umi omendáva ani hag̃ua oñombotavy?

¹⁵ ¿Mbaʼépa ojapovaʼerã umi omendáva ani hag̃ua oñombotavy? La Biblia ombohovái: “Evyʼaite ne rembireko teéva ndive, reikuaáva ndekariaʼy ára guive”. Avei heʼi: “Evyʼáke nde rekovépe ne rembireko [térã  ne ména] rehayhúva ndive” (Pro. 5:18, ÑÑB; Ecl. 9:9, ÑÑB). Ohasávo pe tiémpo, mokõivéva ohechakuaavaʼerã mbaʼépa oñandu ha oikotevẽ oĩ porã hag̃ua oñondive. Péva heʼise hína umi omendáva oñemoag̃ui ha oñangarekovaʼerãha ojuehe ha ohasavaʼerãha tiémpo oñondive. Ojapovaʼerã opa ikatúva akóinte oĩ porã hag̃ua hogapýpe ha Ñandejára ndive. Upearã tekotevẽ ohesaʼỹijo meme la Biblia oñondive, osẽ opredika oñondive ha oñemboʼe oñondive ikatu hag̃uáicha Jehová ovendesi chupekuéra.

ANÍKE ÑAMBOYKE JEHOVÁPE

16, 17. a) ¿Mbaʼérepa sapyʼánte ijetuʼu ñaneñeʼẽrendu Jehovápe ñande rogapýpe ha kongregasiónpe? b) ¿Mbaʼe ehémplopa ohechauka iporãha ndajajeheʼái umi oñemosẽvaʼekuére kongregasióngui?

¹⁶ Sapyʼánte oĩ ermáno hembiapo vaietereíva ha oñesensura ‘mbarete vaʼerã oĩ porã hag̃ua ijeroviápe’ (Tito 1:13). Péro oĩ avei oñemosẽmante vaʼerã kongregasióngui hembiapo vai haguére. Upéva ikatu oipytyvõ umi ‘upéicha oñehekomboʼévape’ oñemoĩ porã jey hag̃ua Jehovándi (Heb. 12:11, BNP). Péro, ¿mbaʼépa jajapovaʼerã oñemosẽramo kongregasióngui peteĩ ñane hénte térã ñane amigoite? Upépe jahechaukáta ñaimépa Jehová ndive, térãpa pe hembiapo vaíva ykére. Jehová ñanderechahína ha oikuaa ñaneñeʼẽrendúpa chupe ndajajeheʼáivo opavave oñemosẽvaʼekuére (elee 1 Corintios 5:11-13).

¹⁷ Jahechamína peteĩ ehémplo ohechaukáva mbaʼépa ikatu jahupyty ñaneñeʼẽrendúramo Jehovápe opavave ñande rogayguándi ha ndajajeheʼáirõ ñane hénte oñemosẽvaʼekuére. Peteĩ mitãrusu oñemosẽvaʼekue kongregasióngui ha diez áño rire ae ou jey. Upe aja itúva, isy ha umi cuatro iñermáno odesidi “ndojeheʼaiete hese”. Sapyʼánte haʼe omoirũse ifamíliape umi mbaʼe ojapóvape hikuái, péro enterovéva iñeʼẽrendu Jehovápe ha ndojeheʼái hese. Ou jey rire kongregasiónpe, omombeʼu heta ohechagaʼu hague ifamília ha oĩsetereími hendivekuéra, koʼýte pyharekue haʼeño jave. Péro heʼi ihentekuéra michĩmínte jepe ojeheʼárire hese, noñeñanduveivaʼerãmoʼã haʼeño. Haʼekuéra ningo ni noñeʼẽi hendive, ha upéva tuicha oipytyvõ chupe oñemoag̃ui jey hag̃ua Jehováre. Sapyʼánte jajecháramo avei koichagua situasiónpe iporã ñanemanduʼa ko ehémplore ha ani jajeheʼa umi oñemosẽvaʼekuére.

18. ¿Mbaʼépa jajapóta ñahesaʼỹijo rire umi mbaʼe jahupytýva ñandejeroviapýramo térã ñaporotraisionárõ?

¹⁸ Koʼã tiémpope ningo hetaiterei hénte itraisionéro ha ndaikatúi jajerovia hesekuéra. Péro kongregasiónpe oĩ heta ermáno ijeroviapýva ha ikatúva jasegi iñehémplo. Hembiasakue ohechauka hekoporãha hikuái, ha haʼete ku heʼíva: “Peẽ peikuaa, ha Ñandejára avei, ikatuha ojejerovia orerehe, roikoha hekopete ha oñeñeʼẽ vaiʼỹ hag̃uáicha orerehe peẽ pejeroviáva apytépe” (1 Tes. 2:10). Jahechaukákena koʼẽ koʼẽre ñande rapichakuéra ikatuha ojerovia ñanderehe ha jadesidimaha akóinte ñaneñeʼẽrendu Jehovápe.

[Nóta]

[Porandu ñahesaʼỹijóva]

[Nóta oĩva taʼanga ndive páhina 10]

Oĩramo jepe heta ohejáva Jesúspe, Pedro ndojapói upéva