Killuutiginninneq — ulluni kingullerni inuunitsinnut ilisarnaataasoq!

“[Atillugu] inuttut pissuseq nutaaq Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitaq.” — EFESOSIMIUT 4:24, NV.

PINGAARNERIT UKU EQQUMAFFIGIKKIT:

Dalilap, Absalomip, Judasi Iskariotillu killuutiginninnerat qanoq ilinniutigisinnaavavut?

Jonatanip Petrusillu ilumoorfiginninnerat qanoq ilaarsinnaavavut?

Aappatsinnik Jehovamillu qanoq ilumoorfiginnittuarsinnaavugut?

1-3. (a) Ulluni kingullerni inuunitsinnut suut ilisarnaataappat, taakkualu qanoq ersersitsippat? (b) Apeqqutit pingasut suut sammissavavut?

SUNA Dalilap, Absalomip, Judasi Iskariotillu assigiissutigaat? Ilumoorfiginninngillat. Dalilap asasini, eqqartuussisoq Samsoni, ilumoorfiginngilaa; Absalomi ataataminik, kunngimik Daavimik, ilumoorfiginninngilaq Judasillu naalakkani, Jiisusi Kristusi, ilumoorfiginngilaa. Inuit taakkua assuarnartuliornerat allanik ajoqusiingaartarlunilu allanut aliasuutaangaartarpoq! Sooq eqqartorneqartut taakku misissornissaat soqutigisariaqarpavut?

² Arnaq atuakkiortoq allassimavoq ullutsinni killuutiginninneq inuit sanngiiffigisaasa nalinginnaanerpaat ilagigaat. Tamanna tupaallaatigisariaqanngilarput. Jiisusi ‘silarsuup naggatissaani’ nalunaaqutit pillugit siulittuigami oqarpoq: ‘Amerlasuut . . . imminnut killuutigeqattaakkumaartut.’ (Matthæusi 24:3, 10) “Killuutiginninneq” isumaqarpoq ilumoorfiginninnani inummik allamik akeqqamut tunniussineq. Paulusip siulittuineratorluinnaq inuit ilumoorfiginninngitsuunerisa ersersippaat “ullussani kingullerni” inuusugut, oqarami inuit ‘[ilumoorfiginninngitsuussasut, NV], . . . killuussisuussasut.’ (2 Timotheusi 3:1, 2, 4) Atuakkiortut isiginnaagassiortartullu ilumoorfiginninnginneq pissanganartutut asanninnilersaarutitullu takutinniartarpaat, piviusulli taamaanngillat. Tassami ilumoorfiginninnginneq aliasuutaasarlunilu naalliuuttaasarpoq. Taamatut pissuseqarnerit ulluni kingullerni inuunitsinnut ilisarnaataapput!

³ Itsaq ilumoorfiginninngitsut pillugit Biibilimi allaaserineqarsimasut qanoq ilinniutigisinnaavavut? Inuit itsaq maligassaalluartut allanik ilumoorfiginnittut qanoq ilaarsinnaavavut? Kimik ilumoorfiginninniarluta aalajangiusimasariaqarparput? Apeqqutit taakku sammeriartigit.

 ITSAQ PISIMASUT MIANERSOQQUSSUTAASUT

4. Dalila qanoq ililluni Samsonimik killuutiginnippa, aamma sooq taama ajortigisumik iliorpa?

⁴ Misissugassarput siulleq tassaavoq Dalila tatiginanngitsoq, eqqartuussisup Samsonip asannilersoorfigisaa. Samsoni Guutip innuttaasa filisterinut sorsunneranni siulersuerusuppoq. Filisterit naalagartaasa tallimat ilisimasimannguatsiarpaat Dalilap Samsonimik ilumoorfiginninnginnera, taamaattumik nakuussusersua sumit pisuunersoq paasiniaqqullugu aningaasarpassuarnik akilerumavaat Samsoni toqunniassagamikku. Dalila piumatuujugami akuersivoq, Samsonilli isertugaataa pingasoriarluni qulaanngitsoorpaa. Kimigiiserfigiuarpaa “Samsoni qasusorujussuanngorpoq” naggataatigullu oqaluttuarpoq nujaajarneqanngisaannarsimalluni nujaajartikkunilu nukeerutissalluni. * Dalilap tamanna ilisimaleramiuk Samsoni uppatimi qaannut innartillugu sinitsippaa nujai kipitippai akeraanullu tunniullugu iluarisaminnik iliorfiginiassammassuk. (Eqqartuussisut 16:4, 5, 15-21) Ila ajussusia! Dalilap piumatuujugami asasini killuutigaa.

5. (a) Absalomi Daavimik qanoq ilumoorfiginninngila, tamannalu Absalomip qanoq ittuuneranik ersersitsiva? (b) Akitofeli illuatungiliuttunngormat Daavi qanoq misigiva?

⁵ Sammisassatta tullia tassaavoq Absalomip ilumoorfiginninnginnera. Taassuma pissaaneqalernissani oqartussaassuseqalernissanilu qamuuna kissaatigingaarpai. Absalomip ataatani kunngiussusianik arsaarusuppaa namminerlu kunnginngorluni. Siullermik Absalomip inuit asasuusaarlugit, neriorsortuusaarlugit, eqitarlugit kunittarlugillu pisariaqartitaallu soqutigisuusaarlugit Israelikkut “uummataat tillippai”. (2 Samueli 15:2-6) Absalomip allaat Daavip ikinngutigilluagaa Akitofeli Daavimut illuatungiliuttunngortippaa pikitsitseqataalersillugulu. (2 Samueli 15:31) Tussiaat 3-mi 55-imilu Daavip ilumuunngitsuliorfigineqarnini qanoq nanertuutigitigalugu allaaseraa. (Tussiaat 3:2-9; Atuakkit Tussiaat 55:13-15). Absalomip Jehovap kunngiusussatut qinersimasaanut pilersaarutipiloqarnermigut ersersippaa Jehovap kunngimik toqqaasinnaatitaanera ataqqinagu. (1 Nalunaarsuutit 28:5) Pikitsitseriaraluarnera iluatsinngilaq Daavilu Jehovap tanitaatut kunngiuinnarpoq.

6. Judasip Jiisusi qanoq killuutigaa, Judasillu aqqa sumut tunngatinneqartalerpa?

⁶ Maanna killuussisoq Judasi Iskarioti Kristusimut qanoq iliornersoq eqqarsaatigeriaruk. Jiisusip ajoqersukkani aqqaneq-marluk naggammik poorskisioqatigigamigit ima oqarfigai: “Ilumut oqarfigaassi: Ilassi killuutigiumaarpaanga.” (Matthæusi 26:21) Unnummi tamatumani kingusinnerusukkut naatsiivimmi Getsemanemi Jiisusi Petrusimut, Jaakumut Johannesimullu ima oqarpoq: “Takuat, uannik killuussisoq tikiutereerpoq.” Taamaalisorlu Judasip ilagisani naatsiivimmut iseqatigai “erniinnarlu Jiisusi ornippaa ilassillugulu: “Rabbi!” kunillugulu.” (Matthæusi 26:46-50; Lukasi 22:47, 52) Judasip ‘Jiisusip pinngitsuusup aava killuutigaa’ akeraanullu toqutserusuttunut tunniullugu. Judasi piumatooq aningaasanik qassinik akilersilluni taamaaliorpa? Taamaallaat sølvinik 30-nik akilersippoq! (Matthæusi 27:3-5) Taamanimiilli ateq Judasi killuussinermut tunngatinneqartalerpoq, ingammik inummut ikinngutiminik killuussisumut. *

7. Ukua inuunerat qanoq ilinniutigaavut (a) Absalomip Judasillu (b) aamma Dalilap?

⁷ Mianersoqqussutitut allaaserineqarsimasut taakku qanoq ilinniutigaavut? Absalomi Judasilu Jehovap tanitaanik killuutiginnikkamik kanngusullutik toqupput. (2 Samueli 18:9, 14-17; Apustilit Suliaat 1:18-20) Inuit Dalilap aqqa tusaraangamikku ilumoorfiginninnginnera asannittuusaarneralu eqqaasarpaat.  (Tussiaat 119:158) Pingaaruteqarpoq piumatunermik pissaaneqarusussusermillu sumilluunniit, Jehovamik ikinnguteqarunnaassutigisinnaasatsinnik, akiuiuarnissarput! Allaaserineqarsimasut taakku ilumoorfiginninngikkunnaassutigisinnaasatsinnik sumilluunniit itigartitsisarnissatsinnut ilinniutissaalluarput.

ILUMOORFIGINNITTUT ILAAKKIT

8, 9. (a) Sooq Jonatanip Daavi ilumoorfiginiarlugu neriorsorpaa? (b) Jonatani qanoq ilaarsinnaavarput?

⁸ Biibilimi inuit arlallit ilumoorfiginnittut allaaserineqarput. Allaaserineqartut marluk qanoq ilinniarfigisinnaanerlutigik sammissavarput, Daavimillu ilumoorfiginnittoq aallarniutigalugu. Jonatani, kunngip Saulip angajulliliaa, Israelimut kunngitut naalakkersuisussatut tullinnguussimagunarpoq. Jehovalli Daavi Israelimi kunnginngortussatut toqqarsimavaa. Jonatanip Guutip aalajangiinera ataqqivaa Daavilu sinngaginagu. “Jonatanip Daavi assut qanitarisutut misigisimavaa” neriorsorpaalu ilumoorfiginiarlugu. Allaat atisani, panani, pisissini qiterunnilu Daavimut tunniullugit ataqqinninnini ersersippaa. (1 Samueli 18:1-4) Jonatanip sapinngisani tamaat atorlugu Daavi tapersersorpaa allaallu imminut navianartorsiortilluni Saulimit saassunneqatsaalivaa. Jonatani Daavimik ilumoorfiginnippoq imalu oqarfigalugu: “Israelimi kunnginngorumaarputit, uangalu tullersortaassaanga.” (1 Samueli 20:30-34; 23:16, 17) Tupinnanngilaq Daavi Jonatani toqummat aliasunnerminik taassumunngalu asanninnerminik erinarsuusiornermigut ersersitsimmat. — 2 Samueli 1:17, 26.

⁹ Jonatanip kimik ilumoorfiginnissalluni qularutiginngilaa. Jehovamik, Kisimi Oqartussaasumik, ilumoorfiginnilluinnarpoq Daavilu Jehovap tanitaatut tapersersorlugu. Uaguttaaq ullumikkut qatanngutinik uagutsinnik siulersuisussatut toqqarneqarsimasunik tapersersuinissamut piumassuseqartariaqarpugut, aamma ilagiinni immikkut akisussaaffilerneqarsimanngikkaluaruttaluunniit. — 1 Thessalonikamiut 5:12, 13; Hebræerit 13:17, 24.

10, 11. (a) Sooq Petrusip Jiisusi ilumoorfigalugulu qimanngilaa? (b) Petrusi qanoq ilaarsinnaavarput, tamannalu qanoq iliornissatsinnut kajumississutigisariaqarparput?

¹⁰ Ilaarsinnaasatta aappaat tassaavoq apustili Petrusi, Jiisusi ilumoorfiginiarlugu neriorsuisimasoq. Kristusip ajoqersukkani uinimminik aamminillu pilliutigineqangajalersumik upperinninnissaasa pingaaruteqassusiannik oqaluttuukkamigit assersuusiorpoq. Assersuusiaali ajoqersugaasa amerlanersaasa ajuallaatigalugu qimappaat. (Johannesi 6:53-60, 66) Taamaattumik Jiisusip apustilini aqqaneq-marluk ima aperai: “Aamma ilissi qimanniarpisinga?” Petrusilu ima akivoq: “Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit, upperpugullu nalunagulu illit tassaasutit Guutip illernartua.” (Johannesi 6:67-69) Imaappa Petrusip Jiisusip imminut pilliutiginissani pillugu aatsaannguummat oqaasii tamaasa paasilluinnarsimagai? Taamaagunanngilaq. Petrusili  aalajangerpoq Jiisusimik, Guutip erneranik tanitamik, ilumoorfiginninniarluni.

¹¹ Petrusi eqqarsanngilaq Jiisusi eqqunngitsumik paasinnittaaseqarluni taama oqartoq kingusinnerusukkullu imminut naqqikkumaartoq. Petrusi maniguuppoq nalunagulu Jiisusi ‘oqaatsinik naassaanngitsumik inuussutaasunik pigisaqartoq’. Ullumikkuttaaq Biibililersaarutaativut ‘pilittaasumit ilumoortumit’ saqqummersinneqartartut paasiuminaatsut imaluunniit uagut isummatsinnut naapertuutinngitsut qanoq isumaqarfigisarpavut? Sapinngisarput tamaat atorlugu paasiniartariaqarpavut naatsorsuutigiinnarnagu isummatsinnut naapertuuttumik allannguummik takkuttoqarumaartoq. — Atuaruk Lukasi 12:42.

AAPPAT ILUMOORFIGIUARUK

12, 13. Aapparisamik ilumuunngitsuliorfiginninneq sumik pissuteqarsinnaava, aamma taamaaliornissamut ukiut sooq utoqqatsissutaasinnaanngillat?

¹² Killuutiginninneq qanorluunniit ikkaluartoq iliuusiuvoq ajortoq, taamaammat killuutiginninneq kristumiuni ilaqutariinni ilagiinnilu eqqissinermik ataasiussusermillu ajoqusiitissanngilarput. Maanna aappatsinnik Guutitsinnillu ilumoorfiginninnerput qanoq nakussatsissinnaanerlutigu sammissavarput.

¹³ Allasiorneq ilumoorfiginninnginnerit aserorsartaanerpaasut ilagaat. Allasiortoq aapparminik ilumoorfiginnikkunnaartarpoq inummillu allamik soqutiginnilertarlunilu asannilertarpoq. Aappaasoq ilumoorfigineqanngitsoq kisimiileriataartarpoq inuuneralu allanngorluinnartarluni. Aappariinnut siornatigut imminnut asaqatigiissimagaluartunut qanoq taamatut pisoqarsinnaagami? Taamatut pisoqartarpoq aappariit misigissutsitik soqutigiunnaaraangatigik. Inooqatigiinneq pillugu immikkut ilinniarsimasoq Gabriella Turnaturi nassuiaavoq aappariit sapinngisartik tamaat aappariinnerminnik nukittorsaaniarunnaaraangata ilumoorfiginnittoqarunnaarsinnaasartoq. Taamatut allaat sivisuumik aappariissimasunut pisoqarsinnaasarpoq. Assersuutigalugu angutip 50-inik ukiullip nuliani aalajaatsoq ukiuni 25-ni aapparisimasani qimassimavaa arnaq kajungerisani inooqatigilersinnaaniassagamiuk. Oqartoqartarpoq tamanna inunnut tamatuma nalaani ukiulinnut nalinginnaasuusoq. Ukiulli taamatut pissusilersornissamut utoqqatsissutaasinnaanngillat. Allasiorneq nalinginnaasuunngilaq, aapparisamik ilumuunngitsuliorfiginninneruvoq. *

14. (a) Aapparminnik ilumoorfiginninngitsut Jehovap qanoq isigai? (b) Aappariinnermi ilumoorfiginninnginneq pillugu Jiisusi qanoq oqarpa?

¹⁴ Biibilimik tunngaveqanngitsumik aapparminnik qimatsisut Jehovap qanoq isigai? Guutitta avinneq uumigaa, aapparminnillu ajortumik pinnittartut qimatsisullu assuarai. (Atuakkit Malaki 2:13-16). Jiisusi ataatamisut aapparmik ilumoorfiginninnginnermut isiginnittaaseqarpoq. Ajoqersuivoq aappaasoq pisuussuteqanngitsoq narrugilerneqassananilu qimanneqassanngitsoq qimakkaluaruniullu susoqarsimanngitsutut pissusilersortoqassanngitsoq. — Atuakkit Matthæusi 19:3-6, 9.

15. Katissimasut qanoq ilillutik aapparminnik ilumoorfiginninnertik nakussatsissinnaavaat?

¹⁵ Katissimasut aapparminnik ilumoorfiginninnertik qanoq ilillutik nakussatsissinnaavaat? Guutip oqaasiani ima allassimavoq: “Tipaatsuutigiuk inuusunninni nuliarilikkat [imaluunniit uigilikkat]” aamma “nuliat [imaluunniit uiit] asasat peqatigalugu” inuuneq nuannaarutigiuk. (Ussatit 5:18; Oqaluussisartup oqaasii 9:9, 1990) Aappariit utoqqaliartortillutik sapinngisartik tamaat aappariinnertik nakussatsittuartariaqarpaat, timikkut misigissutsikkullu. Tamanna qanoq paasisariaqarpa? Aappariit ikinngutinnersuunermikkut imminnut qanittariaqarput, marluullutik pisariaqartitaminnik isumassueqatigiittariaqarput imminnullu piffissaqarfigisariaqarlutik.  Aappariinnertik Jehovamullu attaveqarnertik innarlitsaaliniarlugit tamaviaartariaqarput. Taamaaliorsinnaajumallutik aappariit Biibilimik atuaqqissaaqatigiittariaqarput, akuttunngitsumik oqaluusseqatigiittariaqarput Jehovamillu pilluaqquneqarumallutik qinoqatigiittariaqarlutik.

JEHOVA ILUMOORFIGIUARUK

16, 17. (a) Guutimik ilumoorfiginninnerput ilaqutariit ilagiillu iluanni qanoq misilinneqarsinnaava? (b) Oqaluttuamit sumit ersersinneqarpa ilaquttat ilaajunnaarsitaasimasut attaveqarfigisannginnissaannik Guutip peqqussutaanik maleruaagaangatta iluaqutaasartoq?

¹⁶ Ilagiinni ilaasortaasut ilaat ingasattumik ajortuliorsimapput ‘sakkortuumillu naqqissorneqartariaqarsimallutik uppernerminni peqqissuuleqqullugit’. (Titusi 1:13) Ilaat pissusilersornertik pissutigalugu ilaajunnaarsitaasimapput. “Sungiusagaasut” imminut naalakkersinnaanermikkut Jehovamut attaveqarlualeqqissinnaapput. (Hebræerit 12:11, 1936) Taavami ilaqutarput ikinngutigilluagarpulluunniit ilaajunnaarsitaasimappat? Taamatut pisoqarpat inummut taassumunnga imaluunniit Guutimik ilumoorfiginninnerput misilinneqassaaq. Jehovamik ilumoorfiginnittariaqarpugut. Jehovap alaatsinaattarpaatigut ilaajunnaarsitaasimasumik kimilluunniit attaveqarfiginninnginnissatsinnik peqqussutiminik malinninnersugut paasiniarlugu. — Atuakkit 1 Korinthimiut 5:11-13.

¹⁷ Jehovap ilaajunnaarsitaasimasunik attaveqarfiginnittannginnissamik peqqussutaanik ilaqutariit maleruaanermikkut angusaqarluarsimasut sammissavavut. Angut inuusuttoq ukiut qulit sinnerlugit ilaajunnaarsitaaqqasimavoq ukiunilu taakkunani angutaata, arnaata qatanngutaasalu sisamat ‘ilagisarsimanngilaat’. Taassuma ilaatigooriarluni ilageriaraluartarpai ilaqutaali tamarmik ilumoorfiginnittuarput attaveqarfiginngilluinnarlugulu. Ilagiinnut ilanngutiteqqinneqarnermi kingorna oqaluttuarpoq ilaquttani maqaasiuartarsimallugit, ingammik unnukkut kisimiileraangami. Nangilluni oqaluttuarpoq ilaquttami sivikitsunnguamilluunniit ilagilaartarsimagaluarpanni maqaasiunnaarsimassagaluarlugit. Attaveqarfiginngilluinnartarpaalli. Jehovamut attaveqarlualeqqinnissaminut kajumississutaasa ilagaat ilaquttami ilageqqittalernissaannik kissaateqangaarnini. Ilaquttavit ilaajunnaarsitaasimasut attaveqarfigisannginnissaannik Jehovap peqqussutaanik unioqqutitsinissamut ussernartorsioraangavit oqaluttuaq tamanna eqqaamasaruk.

18. Ilumoorfiginninneq ilumoorfiginninnginnerlu pillugit oqaluttuat misissoreerlugit qanoq iliussavit?

¹⁸ Silarsuarmi inuuffigisatsinni inuit imminnut ilumuunngitsuliorfigeqattaattarlutillu killuutigeqattaattarput. Uagulli ilagiinniittut ilumoorfiginnittut ilaarsinnaasavut amerlaqaat. Taakku inooriaatsimikkut ersersittarpaat: ‘Inuttut pissutsimik nutaamik Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitamik atissisimallutik.’ (Efesosimiut 4:24, NV) Qanortoq tamatta sapinngisarput tamaat Guutimik inoqatitsinnillu ilumoorfiginnittuarta.

[Quppernerup ataani ilanngussat]

[Atuaqqissaarnermi apeqqutit]

[Qupp. 16-mi assiliartaq]

Jiisusi allanit qimanneqaraluarmat Petrusip Jiisusi Guutip ernera tanitaq ilumoorfigiuarpaa