Zãmbã yaa yaoolem wakatã bãnde

“Tõnd da kẽnda ne pʋ-peelem la tɩrlem . . . tɩ rõdb kaẽ ye.”—1 TES. 2:10.

BAO-Y SOGS-KÃENSÃ LEOORE:

․․․․․

Yam bʋg la d tõe n dɩk a Delila ne a Absalom la a Zida sẽn yɩ zãmb dãmbã kibay pʋsẽ?

․․․․․

Wãn to la d tõe n dɩk a Zonatã ne a Pɩɛɛr togs-n-taar n yɩ pʋ-peelem dãmba?

․․․․․

Bõe n tõe n sõng sẽn kẽ-b kãadmã tɩ b kell n pelg b pʋs ne taaba, la ne a Zeova?

1-3. a) Zʋg bʋg n be rũndã-rũndã tɩ wilgdẽ tɩ d vɩɩ yaoolem wakatã? b) Sogs-bʋs la d na n leoke?

ZĨ-BƲG wɛɛngẽ la a Delila ne a Absalom la a Zida Iskariot wõnd taaba? B fãa yɩɩ zãmb rãmba. A Delila zãmba bʋ-kaood a Samsõ sẽn da nong-a wã. A Absalom zãmba rĩm a Davɩɩd sẽn yaa a ba wã. A Zida Iskariot yẽ zãmba a Zezi Kirist sẽn da yaa a Zusoabã. Wẽng ning b ned kam fãa sẽn maanã waa ne toog n kõ neb a taaba! La bõe yĩng tɩ b sẽn maan bũmb ningã pak tõndo?

² Seb-gʋlsd a yembr wilgame tɩ zãmbã yaa zʋg-wẽng a ye rũndã-rũndã nebã sẽn tar n yɩɩda. Woto pa segd n ling tõnd ye. A Zezi sẽn wa n bilgd bãnd ning sẽn na n wilg “dũniyã sɛɛb wakatã,” a yeela woto: “Neb wʋsg . . . na n zãmba taaba.” (Mat. 24:3, 10) “Zãmb ned” rat n yeelame tɩ “wẽg-a,” wall “maan sɩlem n kɩt t’a bɛ paam-a.” D sẽn ne rũndã-rũndã neb wʋsg sẽn zãmbd taabã wilgdame tɩ d vɩɩ “yaoolem wakatã.” Wa a Poll sẽn da pĩnd n togsã, nebã yaa “zãmb dãmba.” (2 Tɩm. 3:1, 2, 4) Sɛbã la filim-dãmbã pʋsẽ, b sẽn mi n gomd zãmbã yell to-to wã yaa wa a pa wẽng wʋsg ye. La zãmb sẽn wat ne sũ-sãams ninsã yaool n pa zem-zem ye. Sɩd me, zãmbã sẽn piuug woto wã yaa yaoolem wakatã bãnde!

³ Biiblã tara kibay sẽn gomd neb sẽn yɩ zãmb dãmb yelle. Yam-bʋg la d tõe n dɩk kiba-kãens pʋsẽ? Mak-sõng bʋg la neb nins sẽn wilg tɩ b yaa sɩd dãmbã kõ-do? Ne ãnda la d segd n maan pʋ-peelem wakat fãa? D na n baoa sogs-kãensã leoore.

PĨND WẼNDẼ NEB SẼN PA KÕ MAK-SÕNGO

4. Wãn to la a Delila zãmb a Samsõ, la bõe yĩng t’a sẽn maanã yaa wẽng wʋsgo?

⁴ Bɩ d reng n gom a Delila sẽn yaa pag ning bʋ- kaood a Samsõ sẽn da nongã yelle. A Samsõ ra segd n zaba ne Filisti nebã n sõng Wẽnnaam nin-buiidã. Tõe tɩ Filisti nebã nanambs a nu wã bãngame t’a Delila sɩd ra pa nong a Samsõ ye. B yeela a Delila t’a sã n sõng-b tɩ b bãng bũmb ning sẽn kɩt t’a Samsõ tar pãng wʋsgã tɩ b paam n tõog n kʋ-a, b na n kõ-a-la ligd wʋsgo. A Delila sẽn da nong ligdã yĩnga, a sakame. La a maka naoor a tãab fãa n pa tõog n bãng ye. A kell n “pẽdga a Samsõ n nams-a raar fãa.” A Delila pẽdg-a-la woto ‘hal t’a wa rat n ki.’ Rẽ kɩtame t’a Samsõ togs-a tɩ barg nan ka tik yẽ zugã, la tɩ b sã n põng a zugã, a pãn-kãsengã na n saame. * A Delila sẽn bãng woto wã, a basame t’a Samsõ wa gõe a naoã zug t’a kɩt tɩ rao wa wõrs a zoobdã. Rẽ poore, a basa a Samsõ a bɛɛbã nusẽ tɩ b maan-a b sẽn date. (Bʋk. 16:4, 5, 15-21) Ad a sẽn maanã sɩd yɩɩ wẽng wʋsgo! A Delila sẽn da yaa rat-tɩ-loog-soabã yĩnga, a zãmba ned ning sẽn da nong-a wã.

5. a) Wãn to la a Absalom zãmb a Davɩɩde, la rẽ wilga bõe? b) A Ahitofɛll zãmbã namsa a Davɩɩdã wãn-wãna?

⁵ Bɩ d gom zãmb soab a Absalom yell masã. A sẽn da rat naam ne a sũur fãa yĩng kɩtame t’a wa tʋlg a ba a Davɩɩd geerã. A Absalom deng n maana sɩlem n “kɩt tɩ Israyɛll nebã lebg n kẽ-a.” A ra maanda wa a nonga nin-buiidã, n pʋlemd-b bũmb toor-toore. A ra wae n mobgda kẽer n mokd-ba, n maand wa a rata b neere. (2 Sãm. 15:2-6) A Absalom tõogame meng t’a Ahitofɛll sẽn da yaa a Davɩɩd zo-nongrã kẽ-a. (2 Sãm. 15:31) Yɩɩl Sõamyã a 3 ne 55 soabã pʋgẽ, a Davɩɩd bilga rẽ sẽn nams-a to-to wã. (Yɩɩl 3:2-9; karm-y Yɩɩl Sõamyã 55:13-15.) Yaa a Zeova sẽn da yãk ned ning t’a yaa rĩmã la Absalom sẽn zãmbã. Woto wilgame t’a pa sak n deeg tɩ yaa Wẽnnaam n tar sor n na n yãk ned ning a sẽn dat tɩ yɩ rĩmã ye. (1 Kib. 28:5) A Absalom poorẽ dãmbã wa n konga zabrã, t’a Davɩɩd sẽn yaa ned ning a Zeova sẽn yãkã kell n pa naamẽ wã.

6. Wãn to la a Zida zãmb a Zezi, la buud-goam kẽer pʋsẽ, Zida rat n yeelame tɩ bõe?

⁶ Masã, tags-y-yã a Zida Iskariot sẽn zãmb Kiristã yelle. Yaoolem Pak ning a Zezi sẽn maan ne a tʋm-tʋmdb 12 wã yʋngo, a yeel-b-la woto: “Mam yeta yãmb sɩd tɩ yãmb ned a yembr n na n zãmb maam.” (Mat. 26:21) Yʋn-kãng me, a Zezi wa n yeela a Pɩɛɛr ne a Zak la a Zã Gɛtsemane tɩ-sulẽ wã woto: “Gese, sẽn zãmbd-a maamã kolgame.” Zĩig pʋgẽ, a Zida talla kʋʋng n wa tɩ-sulẽ wã, n “kolg a Zezi n yeele: ‘Karen-saamba, mam pʋʋsda yãmba.’ La yẽ moka bãmba.” (Mat. 26:46-50; Luk 22:47, 52) A Zida sẽn maan tɩ neb nins sẽn da rat a Zezi n kʋ wã paam n yõk-a wã, a “zãmba bʋʋm soaba.” La pʋd n yaa bõe poorẽ la a Zida sẽn da yaa ned sẽn nong ligdã zãmb a Zezi? Yɩɩ “wanzuri ligd pis-tã” yĩng bala! (Mat. 27:3-5) Buud-goam kẽer pʋsẽ, b sã n mi n gomd “zãmb soab” yelle, b yetame t’a yaa a Zida. Sẽn yɩɩd fãa sã n yaa ned sẽn zãmb a zoa. *

7. Yam-bʋg la d tõe n dɩk nin-kãensã kibayã pʋsẽ? a) A Absalom ne a Zida. b) A Delila.

⁷ Yam-bʋg la d tõe n dɩk kiba-kãensã fãa pʋgẽ? A Absalom ne a Zida fãa kii ne yãnde, b sẽn zãmb neb a Zeova sẽn da zae-yã yĩnga. (2 Sãm. 18:9, 14-17;  Tʋʋ. 1:18-20) Wakat buud fãa, nebã sã n wʋm yʋʋr ning sẽn yaa Delila wã, b tẽegda a zãmbã, la a sẽn da maand wa a nonga a Samsõ wã yelle. (Yɩɩl 119:158) Rat-tɩ-loogã la ziirã baoob tõe n kɩtame tɩ d kong a Zeova lohormã. Ad d sẽn zãagd d meng ne-b n são! Kiba-kãensã tara sagls sẽn tar pãng wʋsgo, n tõe n sõng-d tɩ d mogd n zãag d meng ne zãmb buudã fãa.

D RƖK PƲ-PEELEM DÃMBÃ NAOORE

8, 9. a) Bõe yĩng t’a Zonatã pʋlem t’a na n teela a Davɩɩde? b) Wãn to la d tõe n dɩk a Zonatã togs-n-taare?

⁸ Biiblã gomda neb sẽn yɩ pʋ-peelem dãmb yell me. D na n goma b sʋkã neb a yiib yelle, n bãng d sẽn tõe n dɩk yam ning b kibayã pʋsẽ. D na n deng n goma rao sẽn yɩ sɩd soab ne a Davɩɩd yelle. Yaa rĩm a Sayull bi-kãseng a Zonatã. Tõe tɩ yaa yẽ n da n na n wa lebg Israyɛll rĩm n led a ba wã. La a Zeova ra yãka a Davɩɩde. A Zonatã saka Wẽnnaam daabã. Sẽn paase, a ra pa maand sũ-kĩir ne a Davɩɩd ye. A “sũur tabenda a Davɩɩd” hal t’a yõg zood ne-a, n pʋlem t’a na n teel-a lame. A pʋd n waooga a Davɩɩd wa naaba, n yãk a fuugã, a sʋʋgã, a tãpã la a sẽbdgã n kõ-a. (1 Sãm. 18:1-4) A Zonatã maana a sẽn tõe fãa n ‘keng a Davɩɩd sũuri,’ n sak meng n gẽneg a yõor n kogl-a t’a Sayull pa paam-a ye. A Zonatã pelga a pʋg ne a Davɩɩd n yeel-a woto: “Yaa yãmb n na n lebg Israyɛll dĩma, tɩ m pʋgl yãmba.” (1 Sãm. 20:30-34; 23:16, 17) Dẽnd pa lingr la a Davɩɩd sẽn gʋls yɩɩl a Zonatã kũumã poore, n wilg a sẽn nong-a to-to la a kũumã sẽn sãam a sũur to-to wã ye.—2 Sãm. 1:17, 26.

⁹ A Zonatã ra mii a sẽn da segd n tũ a soabã. A ra sakda a Zeova sẽn yaa yĩngr la tẽng naabã, n da teend a Davɩɩd ne a sũurã fãa, a sẽn da yaa ned ning Wẽnnaam sẽn zae-yã yĩnga. Yaa woto me ne tõnd rũndã-rũndã. Baa d sã n pa paam tɩ b kõ-d tʋʋm-kãsems tigingã pʋgẽ, d segd n sakd n teenda saam-biis nins b sẽn yãk tɩ b lʋɩt d taoorã ne yamleoogo.—1 Tes. 5:12, 13; Heb. 13:17, 24.

10, 11. a) Bõe yĩng t’a Pɩɛɛr kell n tall tẽeb ne a Zezi? b) Wãn to la d tõe n dɩk a Pɩɛɛr togs-n-taare, la rẽ baooda bõe maanego?

¹⁰ Tʋmd-tʋmd a Pɩɛɛr me kõo tõnd mak-sõngo. A pʋlma a Zezi t’a pa na n bas-a ye. Kiristã ra rɩka makre, n na n sõng a karen-biisã tɩ b bãng tɩ b segd n talla tẽeb ne yẽ maoongã, rat n yeel t’a yĩngã la a zɩɩmã a sẽn da na n kõ wakat kãng poor bilf balã. A karen-biis wʋsg sẽn pa wʋm a goamã võor sõma wã, b gesame tɩ b reegr yaa toogo, n lebg n pa le tũ-a ye. (Zã 6:53-60, 66) Rẽ la a Zezi sok a tʋm-tʋmdb 12 wã yaa: “La yãmb me ka rat n bas maam la?” T’a Pɩɛɛr  leoke: “Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama. La tõnd tẽeme la d miime tɩ yãmb yaa Kirist sẽn yaa Wẽnnaam Sõng Soabã.” (Zã 6:67-69) Woto rat n yeelame t’a Pɩɛɛr da wʋmda a Zezi sẽn gom a sẽn da na n wa ki tɩ yɩ maoongã võor sõma bɩ? Tõe t’a ra pa wʋmd ye. La a Pɩɛɛr da yãka yam n na n tall tẽeb ne a Zezi sẽn yaa Wẽnnaam Biig a sẽn zae-yã.

¹¹ A Pɩɛɛr pa tags tɩ tõe t’a Zezi tudgame, la tɩ kaoosg zugẽ a na n wa bãnga rẽ n lebs a noorã poorẽ ye. A Pɩɛɛr sika a menga, n sak n deeg t’a Zezi tara “vɩɩm sẽn ka sɛt goama.” Yaa wãn yẽ ne tõnd rũndã-rũndã? D sã n karem bũmb “tʋm-tʋmd sẽn tũud sɩd la sẽn tar yamã” sɛbã pʋsẽ t’a võorã wʋmb yaa toogo, wall pa wõnd tõnd sẽn get yɛlã to-to wã, d manesem yaa wãna? D tog n modg n wʋma a võore, la d ra bas n tẽed tɩ tõe tɩ b na n wa toeema a bilgrã tɩ zems ne tõnd tagsgã ye.—Karm-y Luk 12:42.

KELL-Y N PELG-Y Y PƲG NE Y PAGÃ WALL Y SƖDÃ

12, 13. Sɩngda wãn tɩ neb sẽn kẽ kãadem wa zãmb taaba, la bõe n kɩt tɩ ned pa tar sor n na n maan woto a yʋʋm sẽn vẽsg yĩnga?

¹² Zãmb buudã fãa yaa wẽnga. D segd n zãaga d meng ne zãmbo, n da wa sãam laafɩ la zems-n-taar ning sẽn be d zagsẽ wã la d tigimsẽ wã ye. Bɩ d bao n bãng sẽn kẽ-b kãadmã sẽn tõe n maan to-to n maneg n pelg b pʋs ne b pagbã wall b sɩdbã, la d fãa sẽn tõe n maneg n sak Wẽnnaam to-to.

¹³ Yoob yaa zãmb buud sẽn zabd ned wʋsgo. Sẽn yo-a wã kaoa kaool ning a sẽn da maan ne a pagã wall ne a sɩdã, n bas t’a yam kẽ ned a to. Zĩig pʋgẽ, sẽn pa yo-a wã lebga a ye, t’a vɩɩmã sãam zãnga. Maanda wãn tɩ bũmb a woto wa paam neb sẽn da nong taaba? Naoor wʋsgo, sɩngda ne b ned kam fãa sẽn wat n pa le baood n bãngd bũmb nins sẽn pak a to wã. A Gabriella Turnaturi sẽn yaa porfesɛɛrã yeelame tɩ “neb sẽn kẽ kãadem sã n minim n geta taab yell sõma wakat-wakat bala, b tõe n wa baas n zãmba taaba.” Yel-kãngã buud zoe n paama neb sẽn zĩnd ne taab kãadem pʋgẽ n kaoos wʋsg menga. Wala makre, yʋʋm 50 rao n bas a pag sẽn pelg a pʋg n zĩnd ne-a n maan yʋʋm 25, n tɩ rɩk pag a to. Kẽer tikda neb a woto yʋʋmã n kõt b bʋʋm. La ned yʋʋm sẽn vẽsg pa kõt-a sor t’a tʋm woto ye. Ned sẽn basd a pag wall a sɩd ka bʋʋm ye. A buudã yaa zãmbo. *

14. a) A Zeova tagsg yaa wãn ne ned sẽn zãmb a pag wall a sɩda? b) Bõe la a Zezi yeel kãadmã kaoob wɛɛngẽ?

¹⁴ A Zeova tagsg yaa wãn ne ned ning sẽn bas a kãad-n-taagã tɩ pa zems ne Biiblã noyã? Tõnd Wẽnnaamã kisa kãadem kaoobo. A wilgame tɩ ned sã n zãmb a pag wall a sɩd n kao a kãadem, yẽ sũur sãamda wʋsg ne a soabã. (Karm-y Malaki 2:13-16.) A Zezi me tagsda wa a Ba wã. A wilgame tɩ ned pa tar sor n na n kao a kãadem wa a sẽn dat ye.—Karm-y Matɩe 19:3-6, 9.

15. Bõe n tõe n sõng sẽn kẽ-b kãadmã tɩ b kell n pelg b pʋs ne taaba?

¹⁵ Bõe n tõe n sõng sẽn kẽ-b kãadmã tɩ b kell n pelg b pʋs ne taaba? Wẽnnaam Gomdã yeela woto: “Maan sũ-noog ne f pag ning fo sẽn peeg f bi-bɩɩlem wakatã,” la a paas tɩ f “maan sũ-noog ne pag ning [wall rao ning] fo sẽn nongã.” (Yel. 5:18; Koɛ. 9:9) Pag ne  a sɩd sã n wa kʋʋndẽ, b tog n ket n maanda b sẽn tõe fãa tɩ zood ning sẽn be b sʋkã pãng paasdẽ. Woto rat n yeelame tɩ b ned kam fãa tog n ket n geta a to wã yell sõma. B tog n dɩkda sẽk n be ne taab la b paasd nonglem ning sẽn be b sʋkã pãnga. B segd n maoa b pãng tɛk n kogl b kãadmã la zood ning b sẽn tar ne a Zeova wã. Yɩl n tõog n maan dẽ, b tog n zãmsda Biiblã ne taaba, n moond koɛɛgã ne taab la b naagd taab n pʋʋsd n kot a Zeova sõngre.

D KELL N SAK A ZEOVA

16, 17. a) Bõe n tõe n wa zĩnd d zakã pʋgẽ wall tigingẽ wã tɩ yɩ toog ne-d tɩ d kell n sak Wẽnnaam? b) Mak-bʋg n wilgd tɩ d sã n sak Wẽnnaam sẽn yeel tɩ d ra maan tũud-n-taar ne d roagd b sẽn yiis tigingã pʋgã, tõe n woma bi-sõma?

¹⁶ Tigingã neb kẽer n da maan yel-wẽn-kãsemse, tɩ b leng-b ne “pãng” sẽn na yɩl tɩ b “paam tẽeb sẽn yaa sɩda,” bɩ sõma. (Tɩt 1:13) Yel-wẽn nins sãnda sẽn maan yɩɩ sabab tɩ b yiis-b tigingã pʋgẽ. La sõnga “neb nins sẽn paam remsgã” tɩ b maneg b yellã ne Wẽnnaam. (Heb. 12:11, Kãab-paalgã Koe-noogo) La b sã n yiis d roagd wall d zoa tigingã pʋgẽ, d maanda wãna? Tõnd manesem sẽn na n yɩ a soab yellã pʋgẽ wã na n wilga d sã n na n zĩnda d zoa wã poorẽ, bɩ d na n saka Wẽnnaam noyã. A Zeova geta d sã n na n tũu yẽ sẽn yeel tɩ d ra le tall tũud-n-taar ne tigingã ned b sẽn yiisã.—Karm-y 1 Korẽnt dãmb 5:11-13.

¹⁷ Ad makr sẽn wilgd tɩ zak neb sã n sak a Zeova sẽn yeel tɩ d ra maan tũud-n-taar ne tigingã ned b sẽn yiisã sɩd wata ne barka. Bi-bɩɩg a ye la b ra yiis tiging pʋgẽ tɩ maan sẽn yɩɩd yʋʋm piiga. Yʋʋm-kãens fãa pʋgẽ, a ba wã ne a ma wã la a kẽem-soabã ne a yaop a tã wã pa tol n “maan tũud-n-taar” ne-a ye. Sasa ninga, a baoome n na n naag a zakã nebã n maan yɛl sãnda, la b ned kam fãa tõdga fasɩ. B sẽn wa n lebs n deeg-a tigingã pʋgẽ wã, a yeelame tɩ yẽ sẽn da pa le paamd a zakã rãmb tũud-n-taarã ra namsd-a-la wʋsgo, sẽn yɩɩd fãa, yʋng a sẽn wat n yaa a ye wã. A sak n deegame tɩ yẽ zakã neb sã n da ket n pẽnegd-a baa yaa bilfu, ra na n sek-a lame. La b sẽn pa tol n sakã, a sẽn da rat ne a sũur fãa n paamd n sõsd ne-bã yĩnga, a maana a sẽn tõe fãa n maneg a yellã ne a Zeova. Y ned sã n wa be yel-kãngã pʋgẽ tɩ y rat n kɩɩs Wẽnnaam sẽn yeel tɩ d ra maan tũud-n-taar ne tigingã ned b sẽn yiisã, yɩta sõma tɩ d tẽeg kiba-kãngã.

18. D sẽn vaees neb sẽn yɩ pʋ-peelem dãmb la neb sẽn pa yɩ pʋ-peelem dãmb kibayã, bõe la yãmb yãk yam n na n maane?

¹⁸ Dũniyã pida ne zãmb dãmba. Tõnd tigimsã yẽ pida ne pʋ-peelem dãmba, tɩ d tõe n dɩk b naoore. D tẽed-n-taasã sẽn vɩ to-to wã wilgda vẽeneg tɩ b ‘kẽnda ne pʋ-peelem la tɩrlem tɩ rõdb kaẽ ye.’ (1 Tes. 2:10) Bɩ d fãa mao d pãng tɛk n ket n tũud Wẽnnaam ne pʋ-peelem, la d maand pʋ-peelem ne taab me.

[Tẽngr not rãmbã]

[Zãmsgã sogsgã]

[Foto seb-neng 16]

Baa kẽer sẽn wa n bas Wẽnnaam Biigã a sẽn zae-yã pʋgbã, a Pɩɛɛr kell n tũ-a lame