«Куыд иузӕрдион уыдыстӕм... куыд раст ӕмӕ куыд ӕнӕзӕрдӕхудтӕй архайдтам» (1 ФЕС. 2:10).

1–3. а) «Фӕстаг бонты» кӕй цӕрӕм, уый цавӕр хъуыддагӕй бӕрӕг у ӕмӕ уыцы хъуыддагмӕ цы хауы? ӕ) Цавӕр ӕртӕ фарстайӕн базондзыстӕм дзуапп?

ДАЛИДӔ, Авессалом ӕмӕ Иудӕ Искариотӕн иумӕйагӕй цы ис? Се ’ртӕ дӕр разындысты мӕнгард. Далидӕ гадзрахатӕй рацыд, цы адӕймаг ӕй уарзта, ууыл, тӕрхонгӕнӕг Самсоныл. Авессалом гадзрахатӕй рацыд йӕ фыдыл, паддзах Давидыл. Ӕмӕ Иудӕ Искариот та ауӕй кодта йӕ Хицауы, Йесо Чырыстийы. Ацы ӕртӕ адӕймаджы цы фыдхъуыддӕгтӕ сарӕзтой, уыдон иннӕтӕн цас зиан ӕмӕ маст ӕрхастой! Фӕлӕ уыцы хабӕрттӕ мах цӕмӕн хъӕуы зонын?

² Чидӕр кӕуылдӕр гадзрахатӕй кӕй рацӕуы, уымӕй иу фыссӕг загъта, зӕгъгӕ, уый у, абон адӕм арӕхдӕр цы ӕвзӕр хъуыддӕгтӕ аразынц, уыдонӕй иу. Ӕмӕ нӕм уый хъуамӕ диссаг дӕр ма фӕкӕса. Йесойы куы бафарстой, «ацы цардӕвӕрдӕн йӕ кӕрон кӕй ӕрхӕццӕ, уый цӕмӕй уыдзӕн бӕрӕг», зӕгъгӕ, уӕд дзуапп радта: «Бирӕтӕ... кӕрӕдзийыл гадзрахатӕй цӕудзысты» (Матф. 24:3, 10). «Гадзрахатӕй рацӕуын» нысан кӕны, адӕймаг мӕнгард кӕй разыны ӕмӕ искӕй знаджы къухмӕ кӕй ратты, кӕй йӕ ауӕй кӕны кӕнӕ йӕ кӕй банымудзы. Абон адӕм афтӕ кӕй кӕнынц, уымӕй бӕрӕг у, «фӕстаг бонты» кӕй цӕрӕм, Павел куыддӕриддӕр загъта, афтӕ. Уый ныффыста, адӕм кӕй «уыдзысты мӕнгард», «кӕрӕдзийыл гадзрахатӕй цӕудзысты» (2 Тим. 3:1, 2, 4). Чингуыты ӕмӕ киноты ахӕм хабӕрттӕ афтӕ февдисынц, цыма дзы ӕвзӕрӕй ницы ис, цыма рӕсугъд ӕмӕ бӕллиццаг хъуыддӕгтӕ сты. Фӕлӕ ӕцӕгӕй та ахӕм хъуыддӕгтӕ ӕрхӕссынц бирӕ рыст ӕмӕ маст, адӕймаджы зӕрдӕйы арф хъӕдгӕмттӕ ныууадзынц. Ахӕм хъуыддӕгтӕй бӕрӕг у, ӕцӕгдӕр фӕстаг бонты кӕй цӕрӕм!

³ Библийы цы мӕнгард адӕймӕгты кой ис, уыдоны хабӕрттӕ нын зондзонӕн куыд сты? Иузӕрдион чи уыд, уыдоны нӕ бон куыд у бафӕзмын? Алкӕддӕр иузӕрдион кӕуыл хъуамӕ уӕм? Цӕй ӕмӕ ацы фарстатӕн дзуапп базонӕм.

 ЗОНДЗОНӔН ХАБӔРТТӔ РАГЗАМАНТӔЙ

4. Далидӕ Самсоныл гадзрахатӕй куыд рацыд? Уый ӕнаккаг ми цӕмӕн ис схонӕн?

⁴ Фыццаг уал аныхас кӕнӕм мӕнгард Далидӕйыл, тӕрхонгӕнӕг Самсон кӕй бауарзта, уыцы сылгоймагыл. Самсон фӕнд кодта Хуыцауы адӕмы сӕрыл филистимӕгты ныхмӕ тох кӕнын. Фондз филистимаг паддзахы, ӕвӕццӕгӕн, зыдтой, Далидӕ Самсоны ӕнувыд уарзтӕй кӕй нӕ уарзта. Ӕмӕ йын ныфс бавӕрдтой, Самсонӕн йе стыр тых цӕй мидӕг ис, уый сын куы базона, уӕд ын бирӕ ӕхца кӕй ратдзысты. Далидӕ уыд зыд адӕймаг, ӕмӕ сразы ис. Фӕлӕ йын ӕртӕ хатты ницы рауад. Уӕд Далидӕ Самсоны «нал ӕмӕ нал уагъта, ӕдзух ын дзырдта уый тыххӕй ӕмӕ йын лӕгъстӕ кодта». Фӕстагмӕ дзы «Самсонӕн йӕ бон нал уыди, йӕхи марыны онг дзы сси». Ӕмӕ йын уӕд схъӕр кодта, йӕ сӕрыхъуынтӕ ӕлвыд кӕй никуы ӕрцыдысты ӕмӕ сӕ куы алвына, уӕд йӕ тых кӕй фесафдзӕн *. Далидӕ уый куы базыдта, уӕд Самсоны йӕ уӕрджытыл бафынӕй кодта ӕмӕ йын йӕ дзыккутӕ иу адӕймагӕн ралыг кӕнын кодта. Уый фӕстӕ йӕ радта йе знӕгты къухмӕ, зӕгъгӕ уӕ ныр цыдӕриддӕр фӕнды, уый йын кӕнут (Тӕрх. 16:4, 5, 15–21). Куыд ӕнаккаг ми бакодта! Далидӕ зыд адӕймаг кӕй уыд, уый тыххӕй гадзрахатӕй рацыд, уарзгӕ йӕ чи кодта, ууыл.

5. а) Авессалом Давидыл гадзрахатӕй куыд рацыд ӕмӕ уымӕй Авессаломы тыххӕй цы ис базонӕн? ӕ) Ахитофел дӕр Давиды ныхмӕ кӕй рацыд, уый Давидмӕ куыд фӕкаст?

⁵ Иннӕ мӕнгард адӕймаг та уыд Авессалом. Уый уыд кадмондаг адӕймаг ӕмӕ йӕ былы цъӕрттӕ хордта йӕ фыд Давиды бынат бацахсынмӕ. Ӕмӕ Авессалом цы бакодта? Райдыдта израилӕгты «зӕрдӕтӕ давын». Йӕхи афтӕ ӕвдыста, цыма сӕ тынг уарзы, ныфсытӕ сын ӕвӕрдта ӕмӕ сӕ сайдта. Адӕмӕн-иу хъӕбыстӕ ӕмӕ пъатӕ кодта, цыма сыл тынг тыхст, уыйау (2 Сам. 15:2–6, фип.). Авессалом ма суанг Давидӕн йе ’ввахс ӕмбал Ахитофелы дӕр йӕхирдӕм фӕкодта ӕмӕ уый дӕр Давидыл гадзрахатӕй рацыд (2 Сам. 15:31). Уыцы хабар Давидӕн куыд зын уыд, уый тыххӕй ныффыста 3-ӕм ӕмӕ 55-ӕм псаломты (Пс. 3:1–8; бакӕс Псалом 55:12–14). Авессалом фыдвӕнд скодта Йегъовӕйы ӕвӕрд паддзахы ныхмӕ ӕмӕ афтӕмӕй равдыста, Хуыцауы кӕй ницӕмӕ дардта (1 Аз. 28:5). Фӕлӕ йӕ фӕндтӕ фехӕлдысты, ӕмӕ паддзахӕй баззад Йегъовӕйы сӕрст лӕггадгӕнӕг Давид.

6. Иудӕ Йесойыл гадзрахатӕй куыд рацыд ӕмӕ абон Иудӕ кӕй фӕхонынц?

⁶ Ныр та ӕркӕсӕм, Иудӕ Искариот Йесо Чырыстийыл гадзрахатӕй куыд рацыд, уымӕ. Йесо йӕ дыууадӕс апостолимӕ фӕстаг хатт Куадзӕн куы бӕрӕг кодта, уӕд сын загъта: «Ӕцӕг уын зӕгъын: уӕ иу мӕ ауӕй кӕндзӕн» (Матф. 26:21). Фӕстӕдӕр уыцы ӕхсӕв Гефсиманийы дыргъдоны Йесо Петрӕн, Иаковӕн ӕмӕ Иоаннӕн загъта: «Уӕртӕ ӕрбацӕуы мӕ уӕйгӕнӕг». Раст уыцы рӕстӕг дыргъдоны фӕзынд Иудӕ бирӕ адӕмимӕ «ӕмӕ комкоммӕ Йесомӕ бацыд ӕмӕ йын загъта: „Дзӕбӕх у, Ахуыргӕнӕг!“ Ӕмӕ йын фӕлмӕн ба акодта» (Матф. 26:46–50; Лук. 22:47, 52). Иудӕ Йесойы радта йе знӕгты къухмӕ ӕмӕ афтӕмӕй «рӕстаг адӕймаджы ауӕй кодта». Ӕмӕ йӕ цымӕ ӕхцауарзаг Иудӕ цасыл ауӕй кодта? Дӕлӕмӕ дӕр, уӕлӕмӕ дӕр ӕртын ӕвзист ӕхцайыл! (Матф. 27:3–5). Ӕмӕ уӕдӕй фӕстӕмӕ, адӕймаг искӕй куы ауӕй кӕны, уӕлдайдӕр та йе ’мбалы, уӕд ыл арӕх Иудӕйы ном сбады *.

7. Зондзонӕн нын куыд у: а) Авессаломы ӕмӕ Иудӕ Искариоты хабар? ӕ) Далидӕйы хабар?

⁷ Ацы хабӕрттӕ нын зондзонӕн куыд сты? Авессалом дӕр ӕмӕ Иудӕ дӕр ӕгады мард акодтой, уымӕн ӕмӕ Йегъовӕйы сӕрст лӕггадгӕнджытыл гадзрахатӕй рацыдысты (2 Сам. 18:9, 14–17; Хъуыд. 1:18–20). Бирӕ рӕтты Далидӕйы ном куы фехъусынц, уӕд ахъуыды кӕнынц, мӕнгард чи уыд ӕмӕ ӕфсоны уарзт чи кодта, ахӕм сылгоймагыл (Пс. 119:158). Уӕдӕ куыд ахсджиаг у, цӕмӕй  нӕхи хизӕм зыд кӕнынӕй ӕмӕ кадмӕ бӕллынӕй ӕмӕ Йегъовӕйы хорзӕхӕй ӕнӕхай ма фӕуӕм! Ацы хабӕрттӕй ма нын хуыздӕр зондзонӕн цы хъуамӕ уа, цӕмӕй мӕнгард макуы разынӕм.

ИУЗӔРДИОН ЧИ УЫД, УЫДОНЫ ФӔЗМ

8, 9. а) Ионафан Давидӕн цӕмӕн расомы кодта, иузӕрдион ыл кӕй уыдзӕн? ӕ) Нӕ бон куыд у Ионафаны бафӕзмын?

⁸ Библийы фыст ис, иузӕрдион чи уыд, бирӕ ахӕм адӕмы тыххӕй дӕр. Ӕмӕ дзы ныртӕккӕ ӕркӕсдзыстӕм дыууӕйы хабармӕ ӕмӕ базондзыстӕм, фӕзминаг нын цӕмӕй сты, уый. Фыццаг уал аныхас кӕндзыстӕм Ионафаныл, Давиды иузӕрдион ӕмбалыл. Ионафан уыд паддзах Саулы хистӕр фырт ӕмӕ йӕ фӕстӕ паддзах дӕр хъуамӕ уый суыдаид. Фӕлӕ Йегъовӕ паддзахӕй равзӕрста Давиды. Ионафан разы уыд Хуыцауы фӕндонимӕ ӕмӕ Давидмӕ хӕлӕг дӕр нӕ кодта. Давид Ионафаны «зӕрдӕйӕн афтӕ адджын сси», ӕмӕ йын расомы кодта, иузӕрдион ыл кӕй уыдзӕн. Суанг ма Давиды паддзахау скадджын кодта, балӕвар ын кодта йӕ дарӕс, йӕ хъама, йе ’рдын ӕмӕ йӕ рон (1 Сам. 18:1–4). Ионафан Давидӕн ӕххуыс кодта, йӕ бон цӕмӕйдӕриддӕр уыд, уымӕй. Йӕхи цард дӕр ма тӕссаг уавӕры баппӕрста, Саулы раз Давиды сӕрыл куы рахӕцыд, уӕд. Ионафан Давидыл уыд иузӕрдион ӕмӕ йын загъта: «Ды уыдзынӕ Израилы паддзах, ӕз та уыдзынӕн дӕ фӕстӕ дыккаг лӕг» (1 Сам. 20:30–34; 23:16, 17). Уӕдӕ Давид Ионафаны мӕлӕтыл куыннӕ хъуамӕ маст кодтаид! Йӕ зӕрдӕ йыл куыд фӕрыст ӕмӕ йӕ куыд бирӕ уарзта, уый тыххӕй Давид зарӕджы дӕр ныффыста (2 Сам. 1:17, 26).

⁹ Ионафан хорз зыдта, кӕуыл хъуамӕ уа иузӕрдион. Уый алы хъуыддаджы дӕр иузӕрдион уыд Дунедарӕг Хуыцау Йегъовӕйыл, ӕмӕ Йегъовӕйы сӕрст лӕггадгӕнӕг Давидӕн дӕр алцӕмӕй ӕххуыс кодта. Махӕн дӕр нӕ бон у Ионафаны бафӕзмын: кӕд ӕмбырды нӕ бӕрны ницы хӕстӕ ис, уӕддӕр хъуамӕ, разамынд нын чи дӕтты, уыцы ӕфсымӕртӕн зӕрдиагӕй ӕххуыс кӕнӕм (1 Фес. 5:12, 13; Дзут. 13:17, 24).

10, 11. а) Петр Йесойы цӕуылнӕ ныууагъта ӕмӕ йыл иузӕрдион цӕмӕн уыд? ӕ) Нӕ бон куыд у Петры бафӕзмын?

¹⁰ Ноджы ма нын иу адӕймаг у фӕзминаг. Уый у апостол Петр. Петр ӕргом загъта, Йесойыл иузӕрдион кӕй уыдзӕн, уый тыххӕй. Иухатт Чырысти йӕ ахуыргӕнинӕгтӕн фӕсномыг ныхасӕй ӕмбарын кодта, куыд ахсджиаг уыд, цӕмӕй ӕууӕндыдаиккой, тагъд рӕстӕг цы нывонд хъуамӕ ӕрхастаид, ууыл, ома йӕ буар ӕмӕ йӕ туджы нывондыл. Йӕ ныхӕстӕ йын комкоммӕ ӕмбарын нӕ хъуыди, фӕлӕ йӕ ахуыргӕнинӕгтӕй бирӕтӕм тынг ӕнахуыр фӕкастысты, ӕмӕ Йесойы ныууагътой (Иоан. 6:53–60, 66). Уӕд Йесо йӕ 12 апостолӕн загъта: «Кӕд, мыййаг, сымах дӕр фӕнды ацӕуын». Ӕмӕ йын уӕд Петр дзуапп радта: «Хицау, кӕмӕ хъуамӕ ацӕуӕм? Дӕумӕ куы сты, ӕнусон цардмӕ чи кӕны, уыцы ныхӕстӕ. Ӕмӕ дыл мах баууӕндыдыстӕм ӕмӕ йӕ базыдтам, ды Хуыцауӕй ӕрвыст кӕй дӕ» (Иоан. 6:67–69). Цымӕ уӕд Петр Йесойы ныхӕстӕй алцыдӕр бамбӕрста? Ӕвӕццӕгӕн, нӕ. Фӕлӕ уӕддӕр Петр йӕхицӕн фидарӕй загъта, Хуыцауы  сӕрст Фыртыл алкӕддӕр иузӕрдион кӕй уыдзӕн.

¹¹ Петр афтӕ нӕ хъуыды кодта, ӕмӕ Йесо рӕдийгӕ фӕкодта ӕмӕ фӕстӕдӕр йӕ хъуыды аивдзӕн. Петр уыд сӕрныллӕг ӕмӕ йӕ зыдта, Йесомӕ кӕй ис, «ӕнусон цардмӕ чи кӕны, уыцы ныхӕстӕ». Абон «ӕууӕнкджын ӕмӕ зондджын хӕдзармӕгӕсӕг» цы литературӕ уадзы, уым нӕм исты хъуыды зынӕмбарӕн куы фӕкӕсы кӕнӕ йӕ нӕхӕдӕг ӕндӕрхуызон куы фембарӕм, уӕд мах та куыд бакӕнӕм? Хъуамӕ ма ӕнхъӕлмӕ кӕсӕм, мах куыд хъуыды кӕнӕм, фӕстӕдӕр ӕй афтӕ кӕй бамбарын кӕндзысты, фӕлӕ хъуамӕ ӕппӕт тыхтӕй бацархайӕм, цӕмӕй йӕ бамбарӕм. (Бакӕс Лукайы 12:42.)

ДӔ ЦАРДӔМБАЛЫЛ ИУЗӔРДИОН У

12, 13. Адӕймаг йӕ цардӕмбалыл арӕх гадзрахатӕй цӕмӕн рацӕуы ӕмӕ уымӕн адӕймаджы кар ӕфсон цӕуылнӕ у?

¹² Адӕймагыл цыфӕнды хъуыддаджы гадзрахатӕй ма рацӕуай, уӕддӕр уый у фыдракӕнд. Ӕмӕ хъуамӕ ахӕм мӕнгард митӕй нӕхи хизӕм, цӕмӕй, чырыстон бинонты ’хсӕн ӕмӕ ӕмбырды цы фарн ӕмӕ иудзинад ис, уый ма фехӕла. Уӕдӕ базонӕм, цы нын баххуыс кӕндзӕн, цӕмӕй нӕ цардӕмбалыл ӕмӕ нӕ Хуыцауыл алкӕддӕр иузӕрдион уӕм.

¹³ Адӕймаг гадзрахатӕй цы хъуыддӕгты рацӕуы, уыцы ӕвирхъаудӕр хъуыддӕгтӕй иу у, йӕ цардӕмбалӕй уӕлдай искӕимӕ ӕмуат куы ӕрцӕуы. Афтӕ чи бакӕны, уыцы адӕймаг, йӕ цардӕмбалӕн цы дзырд радта, уый фӕсайы ӕмӕ йе ’ргом аздахы ӕндӕр адӕймагмӕ. Гадзрахатӕй кӕуыл рацыдысты, уый ӕнӕнхъӕлӕджы иунӕгӕй аззайы. Йӕ цард бынтондӕр фӕивы. Фӕлӕ, кӕддӕр кӕрӕдзи чи уарзта, уыдоны ’хсӕн ахӕм хъуыддаг цӕмӕн рауайы? Арӕх фыццаг къахдзӕф вӕййы, кӕрӕдзийӕ кӕй адард вӕййынц ӕмӕ зӕрдӕйӕ-зӕрдӕмӕ кӕй нал фӕныхас кӕнынц, уый. Социологийы профессор Габриеллӕ Турнатури зӕгъы, зӕгъгӕ, дам, арӕх адӕймаг йӕ цардӕмбалыл гадзрахатӕй уымӕн рацӕуы, ӕмӕ лӕг ӕмӕ ус, сӕ бон цыдӕриддӕр у, уый нал фӕаразынц, цӕмӕй кӕрӕдзимӕ ӕнгомдӕр кӕной. Ахӕм хабар ӕрцӕуы, хистӕр кары чи ис ӕмӕ иумӕ рагӕй чи сты, суанг ахӕм лӕг ӕмӕ усыл дӕр. Зӕгъӕм, иу 50-аздзыд усджын нӕлгоймагӕн йӕ зӕрдӕмӕ фӕцыд ӕндӕр сылгоймаг, ӕмӕ йӕмӕ бацӕрыны тыххӕй йе ’нувыд цардӕмбалӕй ахицӕн, иумӕ та фӕцардысты 25 азы. Иуӕй-иутӕ зӕгъынц, зӕгъгӕ, ахӕм кары адӕймаг афтӕ арӕх бакӕны, ӕмӕ, дам, уым диссагӕй ницы ис. Фӕлӕ афтӕ зӕгъай, уыцы кары ӕндӕр гӕнӕн нал вӕййы, зӕгъгӕ, уыдон ӕфсӕнттӕ йеддӕмӕ ницы сты. Адӕймаг цыфӕнды кары ма бакӕна уыцы хъуыддаг, уӕддӕр уый у гадзрахатӕй рацӕуын *.

14. а) Йӕ цардӕмбалыл гадзрахатӕй чи рацӕуы, ахӕм адӕймагмӕ Йегъовӕ цы цӕстӕй кӕсы? ӕ) Лӕг ӕмӕ ус кӕрӕдзийыл куыд иузӕрдион хъуамӕ уой, уый тыххӕй Йесо Чырысти цы загъта?

¹⁴ Библимӕ гӕсгӕ бар кӕмӕн нӕ вӕййы, афтӕмӕй йӕ цардӕмбалы чи ныууадзы, уыдонмӕ Йегъовӕ цы цӕстӕй кӕсы? Нӕ Хуыцау «йе сӕфт уыны хицӕн кӕнынӕй» ӕмӕ карзӕй дзуры, йӕ цардӕмбалы чи ницӕмӕ дары ӕмӕ йӕ чи ныууадзы, уыдоны ныхмӕ. (Бакӕс Малахийы 2:13–16.) Йӕ цардӕмбалыл гадзрахатӕй чи рацӕуы, ахӕм адӕммӕ Йесо Чырысти дӕр йӕ Фыды цӕстӕй кӕсы. Уый дзырдта, адӕймагӕн йӕ бон кӕй нӕу, йӕ разы аххосджын чи ницӕмӕй у, уыцы цардӕмбалы ныууадзын ӕмӕ йӕхи афтӕ дарын, цыма ӕвзӕрӕй ницы сарӕзта. (Бакӕс Матфейы 19:3–6, 9.)

15. Лӕг ӕмӕ усӕн сӕ бон цы у аразын, цӕмӕй алкӕддӕр кӕрӕдзийыл иузӕрдион уой?

¹⁵ Лӕг ӕмӕ усӕн сӕ бон цы у аразын, цӕмӕй алкӕддӕр кӕрӕдзийыл иузӕрдион уой? Хуыцауы Ныхасы фыст ис, зӕгъгӕ, «цин кӕн дӕ усыл [кӕнӕ дӕ лӕгыл], де ’взонджы бонты дӕ цард кӕимӕ баиу кодтай, ууыл» ӕмӕ «дӕ уарзон усимӕ [кӕнӕ лӕгимӕ] цардӕй дӕ мондӕгтӕ ис» (Ӕмб. 5:18; Еккл. 9:9).  Лӕг ӕмӕ усыл азтӕ куыд цӕуынц, афтӕ хъуамӕ зӕрдиагӕй архайой, цӕмӕй кӕрӕдзиимӕ ӕнгом уой. Ӕмӕ цы хъуамӕ аразой? Хъуамӕ кӕрӕдзимӕ хӕларзӕрдӕ уой, кӕрӕдзийыл хъуыды кӕной ӕмӕ кӕрӕдзийӕн фаг рӕстӕг хицӕн кӕной. Хъуамӕ сӕ тых, сӕ бонӕй архайой, цӕмӕй сӕ бинонты цард ӕмӕ сын Йегъовӕимӕ цы хӕлардзинад ис, уый хъахъхъӕной. Уый тыххӕй та сӕ хъӕуы иумӕ Библи ахуыр кӕнын, ӕдзух иумӕ хъусын кӕнын ӕмӕ иумӕ Йегъовӕмӕ кувын ӕмӕ дзы арфӕдзинад курын.

ЙЕГЪОВӔЙЫЛ ИУЗӔРДИОН У

16, 17. а) Хуыцауыл иузӕрдион кӕй стӕм, уый бинонты ’хсӕн ӕмӕ ӕмбырды фӕлвӕрд куыд фӕцӕуы? ӕ) Ӕмбырдӕй кӕй ацух кодтой, уыимӕ уын иумӕйагӕй мацы уӕд, зӕгъгӕ, уыцы фӕдзӕхстӕн йӕ пайда цавӕр хабарӕй у бӕрӕг?

¹⁶ Ӕмбырды исчи уӕззау тӕригъӕд куы саразы, уӕд ын «карзӕй бауайдзӕф кӕнынц, цӕмӕй уырнындзинады фидар уа» (Тит. 1:13). Кӕйдӕрты та бахъӕуы ӕмбырдӕй дӕр ацух кӕнын. «Уыцы зондамындӕй цӕуылдӕр чи сахуыр вӕййы», уыдон уый фӕрцы фӕстӕмӕ сӕ къахыл слӕууынц ӕмӕ та Хуыцаумӕ баввахс вӕййынц (Дзут. 12:11). Зӕгъӕм, нӕ хиуӕттӕй кӕнӕ не ’мбӕлттӕй искӕй ӕмбырдӕй ацух кодтой, уӕд нӕхи куыд дардзыстӕм? Ахӕм уавӕры рабӕрӕг уыдзӕн, иузӕрдион кӕуыл стӕм, уый – уыцы адӕймагыл ӕви Хуыцауыл. Хъуамӕ иузӕрдион уӕм Йегъовӕйыл. Йегъовӕ бафӕдзӕхста, цӕмӕй, ӕмбырдӕй кӕйфӕнды ма ацух кӕной, уӕддӕр йемӕ ма ныхас кӕнӕм. Ӕмӕ йӕ уыны, уыцы фӕдзӕхст ӕххӕст кӕнӕм ӕви нӕ. (Бакӕс 1 Коринфӕгтӕм 5:11–13.)

¹⁷ Бинонтӕ Йегъовӕйыл иузӕрдион куы вӕййынц ӕмӕ, сӕ хиуӕттӕй ӕмбырдӕй кӕй ацух кодтой, уыимӕ сын иумӕйагӕй куы ницы вӕййы, уӕд уый стыр пайда ӕрхӕссы. Ӕмӕ уый бӕрӕг у иу хабарӕй. Иу ӕрыгон лӕппу ӕмбырдӕй цух уыд дӕс азӕй фылдӕр. Уыцы рӕстӕджы дӕргъы йӕ фыд, йӕ мад ӕмӕ йӕ цыппар ӕфсымӕры архайдтой, цӕмӕй сын йемӕ «иумӕйагӕй мацыуал уа». Иуӕй-иу хатт-иу архайдта, цӕмӕй-иу семӕ рӕстӕг арвыстаид, фӕлӕ бинонтӕй алчидӕр Хуыцауыл иузӕрдион уыд ӕмӕ йемӕ ныхас дӕр нӕ кодтой. Уыцы лӕппу фӕстӕмӕ Йегъовӕйы Ӕвдисӕн куы сси, уӕд загъта, йӕ бинонты алкӕддӕр кӕй мысыд, уӕлдайдӕр та-иу ӕхсӕвы иунӕгӕй куы баззад, уӕд. Уый загъта, йӕ бинонтӕ-иу йемӕ гыццыл рӕстӕг дӕр куы ӕрвыстаиккой, уӕд ын уый дӕр фаг кӕй уыдаид, цӕмӕй сӕ ма мысыдаид. Фӕлӕ уыдон йемӕ рӕстӕг ӕппындӕр не ’рвыстой. Ӕмӕ, семӕ уыдаид, уымӕ тынг кӕй бӕллыд, уый дӕр ын стыр ӕххуыс фӕци, цӕмӕй фӕстӕмӕ Йегъовӕмӕ раздӕхтаид. Уӕдӕ-иу дӕ искуы куы бафӕнда, ӕмбырдӕй кӕй ацух кодтой, ахӕм хионимӕ аныхас кӕнын ӕмӕ афтӕмӕй Хуыцауы фӕдзӕхсты сӕрты ахизын, уӕд-иу ацы хабар ӕрхъуыды кӕн.

18. Ацы статьяйы ӕркастыстӕм, иузӕрдион чи уыд ӕмӕ чи нӕ уыд, уыдоны хабӕрттӕм, ӕмӕ дӕ уый цӕмӕ разӕнгард кӕны?

¹⁸ Ацы дунейы адӕм сты мӕнгард, кӕрӕдзийыл гадзрахатӕй цӕуынц. Фӕлӕ ӕмбырды ис, иузӕрдион чи у ӕмӕ нӕ бон бафӕзмын кӕй у, бирӕ ахӕм адӕм. Куыд цӕрынц, уымӕй бӕрӕг у, «куыд иузӕрдион сты... куыд раст ӕмӕ куыд ӕнӕзӕрдӕхудтӕй архайынц» (1 Фес. 2:10). Цӕй уӕдӕ ӕппӕт тыхтӕй архайӕм, цӕмӕй Хуыцауыл ӕмӕ кӕрӕдзийыл алкӕддӕр иузӕрдион уӕм!

[Фиппаинӕгтӕ]

[Фарстатӕ ахуыр кӕнынӕн]

[Ныв 10 фарсыл]

Кӕд иннӕтӕ Хуыцауы сӕрст Фырты ныууагътой, уӕддӕр ыл Петр иузӕрдион уыд