Ag-inkamatoor​—Mapeligron Tanda na Kaunoran Iran Agew!

“Nagmaliw kamin matoor tan matunong tan anggapoy pakabalawan.”​—1 TES. 2:10.

ANAPEN IRAYAN MANUNAN PUNTO:

Antoy naaralan tayod impantraidor di Delila, Absalom, tan Judas Iscariote?

Panon tayon naalig so katooran nen Jonatan tan Pedro?

Panon tayon napansiansiay katooran ed asawa tayo tan ed si Jehova?

1-3. (a) Antoy sakey a mapeligron tanda na kaunoran iran agew, tan antoy lalanoren na satan? (b) Anton taloran tepet so ebatan tayo?

ANTOY nampaparaan di Delila, Absalom, tan Judas Iscariote? Amin da et agnanmatoor. Si Delila et diad si Samson, say lakin angarod sikato; si Absalom et diad si Arin David, say ama to; si Judas et diad si Jesu-Kristo, say Katawan to. Say mauges a ginawa ra et nanresultad gulo tan impakagonigon na arum. Akin et importantin imanoen tayo iya?

² Unong ed sakey ya author, say ag-inkamatoor et sakey ed saray maslak a kakapuyan na totoo. Agtayo la pankelawan itan. Sanen impropesiya nen Jesus so tanda na “kasampotan na sistema na mundo,” imbaga ton: ‘Dakel so mangiyawat ed sakey tan sakey.’ (Mat. 24:3, 10) Say ‘pangiyawat’ et kabaliksan toy “pangisuko ed sakey diad lima na kalaban panamegley na pantraidor odino agpanmatoor.” Say ag-inkamatoor a nanenengneng natan et tanda ya manbibilay tayo lad “kaunoran iran agew,” unong ya impropesiya nen Pablo. Imbaga ton saray totoo et ‘aliwa ran matoor, traidor ira.’ (2 Tim. 3:1, 2, 4) Mabetbet a papawayen na saray writer na libro tan pelikula ya makapasagyat tan romantiko so ag-inkamatoor. Balet aliwan realistiko iratan. Diad katuaan to, say ag-inkamatoor tan panagtraidor et sengegay irap tan sakit na linawa. Pakapatnagan iyan manbibilay tayo lad kaunoran iran agew!

³ Anto ran leksion ed Biblia so naaralan tayod saramay agnanmatoor nensaman? Panon tayon aligen iramay angipatnag na katooran ed arum? Siopay lawas tayon panmatooran? Nengnengen tayoy ebat ed sarayan tepet.

 ALIMBAWAN MANGITER NA PASAKBAY

4. Panon ya trinaidor nen Delila si Samson, tan akin ya agaylay uges na sayan ginawa to?

⁴ Say unona et say manamalikdon si Delila, ya inad-aro nen Ukom ya Samson. Labay ya idaulo nen Samson so pibakal na saray totoo na Dios sumpad saray Filisteo. Nayarin naimano na limaran arari na saray Filisteo ya agmet talaga inaro nen Delila si Samson, kanian inopresian day Delila na baleg a kantidad pian amtaey sekreto na nikadkaduman biskeg nen Samson pian napatey da. Lapud inkaagum nen Delila, inawat to itan. Amitlo ton sinalin amtaey sekreto nen Samson balet ta sinmaew. Ginonigon nen Delila si Samson ‘ya inagew-agew ed saray salita to, tan sikato so pinilit to.’ Kanian “say kamarerwa to apairap ya angga ed patey.” Imbaga nen Samson ya agnin balot akatlian so buek to ta no nagawa itan, naandi so biskeg to. * Sanen naamtaan itan nen Delila, impakatli toy buek nen Samson legan a naugip ed akwalan to. Insan to inter si Samson ed saray kalaban to tan inabuloyan ton gawaen da lay labay da. (Uko. 16:4, 5, 15-21) Agaylay uges na ginawa to! Lapud inkaagum to, trinaidor toy lakin mangaarod sikato.

5. (a) Panon ya agnanmatoor si Absalom ed si David, tan antoy impatnag na impanrebelde to? (b) Antoy alikna nen David ed impantraidor nen Ahitopel?

⁵ Say onsublay et say agmatoor ya si Absalom. Lapud alablabas ya ambisyon, sikatoy determinadon manamsam ed trono na ama ton si Arin David. Say unonan ginawa nen Absalom et “tinakew to so kapusoan na saray lalaki na Israel.” Nilalakap tan inaangoban to ra, a singa no sikatoy peteg ya interesadod sikara. (2 Sam. 15:2-6) Akombinse ni ingen nen Absalom so panmamatalkan a kaaro nen David a si Ahitopel a mila ed rebelyon. (2 Sam. 15:31) Diad Salmo 3 tan 55, deneskribe nen David so liknaan tod sayan ag-impanmatoor. (Sal. 3:1-8; basaen so Salmo 55:12-14.) Satan a mauges a plano nen Absalom et sumpad nilanaan nen Jehova ya ari. Impatnag na impanrebelde to ya imbaliwala toy kanepegan na Dios a mamili na ari. (1 Awa. 28:5) Balet atalo si Absalom, tan nantultuloy a nanuley si David, say nilanaan nen Jehova.

6. Panon a trinaidor nen Judas si Jesus, tan antoy kabaliksan na ngaran ya Judas?

⁶ Natan et nengnengen tayoy ginawa na traidor a si Judas Iscariote ed si Kristo. Diad unor lan impanselebra nen Jesus na Paskua a kaibay 12 apostol to, imbaga tod sikara: “Tua kuan ko ed sikayo, Sakey ed sikayo so mangiyawat ed siak.” (Mat. 26:21) Diad saman lanlamang a labi, inkuan tod si Pedro, Santiago, tan Juan ed hardin na Getsemani: “Nia! Nitan lay mangiyawat ed siak.” Legan a mansasalita ni, sinmabi si Judas kaibay dakel a totoo. Tan “dinago ton tampol si Jesus tan inkuan to: ‘Maabig a labi ed sika, Rabbi!’ insan inangoban to.” (Mat. 26:46-50; Luc. 22:47, 52) ‘Inyawat nen Judas so matunong a too’ sanen insuko toy Jesus diad saramay malabay a mamatey ed sikato. Pigay bili na impantraidor nen Judas ed si Jesus? Talomplon pilak labat! (Mat. 27:3-5) Manlapud saman, say ngaran ya Judas et mankabaliksay “traidor,” lalo la no say sakey et agnanmatoor ed kaaro to. *

7. Antoy naaralan tayod si (a) Absalom tan Judas tan (b) Delila?

 ⁷ Antoy naaralan tayod sarayan manamasakbay ya alimbawa? Makapabaing so impatey di Absalom tan Judas lapud trinaidor da ray nilanaan nen Jehova. (2 Sam. 18:9, 14-17; Gawa 1:18-20) Ontan met, sano nabibitlay ngaran nen Delila, say nanonotan et say kunkunwarin panangaro to. (Sal. 119:158) Importante sirin ya ipulisay tayoy inkaagum tan pilalek a nawalaay autoridad, a sengegay pakabalang tayoy panangabobon nen Jehova! Sarayan alimbawa et mamabiskeg ed determinasyon tayon paliisay agpanmatoor.

ALIGEN IRAMAY NANMATOOR

8, 9. (a) Akin et insipan nen Jonatan a sikatoy manmatoor ed si David? (b) Panon tayon naalig si Jonatan?

⁸ Nabasa met ed Biblia so alimbawa na saray nanmatoor. Konsideraen tayoy duara ed saraya tan nengnengen no antoy naaralan tayod sikara. Say unona et si Jonatan, say lakin nanmatoor ed si David. Sikatoy panguloan ya anak nen Arin Saul, tan nayarin onsublay ya ari na Israel. Balet, say pinili nen Jehova et si David. Nirespeto nen Jonatan so desisyon na Dios tan agnan-imon ed si David. Imbes, “say kamarerwa nen Jonatan et nisiglaot ed kamarerwa nen David,” tan insipan ton sikatoy manmatoor ed kaaro to. Inter to ni ingen so kawes, kampilan, pana, tan balkes tod si David bilang paneknek na katooran to. (1 Sam. 18:1-4) Ginawa toy anggaay nayarian to pian ‘pabiskegen so lima nen David,’ tan inrisga to ni ingey bilay to pian protektaan iyan kaaro to manlapud si Saul ya ama to. Oniay insipan nen Jonatan ed si David: “Sika so manari ed Israel, tan siak so saginonor ed sika.” (1 Sam. 20:30-34; 23:16, 17) Agla sirin pankelawan ya nen inatey si Jonatan, imbalikas nen David so ermen tan panangaro to diad sakey a kansion.​—2 Sam. 1:17, 26.

⁹ Amta nen Jonatan no siopay panmatooran to. Sikatoy lawas a nampasakop ed inkasoberano nen Jehova, tan sigpot ton sinuportaay David bilang nilanaan na Dios. Ontan met natan, anggan agtayo naikdan na espisyal a pribilehyo ed kongregasyon, kaukolan a mabulos tayon suportaan iray agagin tinuro a mangidaulod sikatayo.​—1 Tes. 5:12, 13; Heb. 13:17, 24.

10, 11. (a) Akin a nansiansian matoor si Pedro ed si Jesus? (b) Panon tayon naalig si Pedro, tan antoy mamakiwas ed sikatayon gawaen itan?

¹⁰ Say sakey nin maabig ya alimbawa et si apostol Pedro, ya angibagan sikatoy manmatoor ed si Jesus. Sanen angusar na ilustrasyon si Jesus pian idanet so kaimportantian na panisiad laman tan dala to a magano to lan ibagat, dakel ed saray disipulo to so abigla tan agla akiulop ed sikato. (Juan 6:53-60, 66) Kanian tinepetan  nen Jesus iray 12 apostol to: “Sikayo ey, labay yo met lay ontaynan?” Inmebat a tampol si Pedro: “Katawan, siopa ni so laen mi? Walad sika iray salita a mangitonton ed bilay ya andi-anggaan, tan anisia kami tan naamtaan mi a sika so Masanto na Dios.” (Juan 6:67-69) Kasin sigpot ya atalosan nen Pedro so amin ya imbaga nen Jesus nipaakar ed gawaen ton sakripisyo? Nayarin andi. Balet determinadoy Pedro ya manmatoor ed nilanaan ya Anak na Dios.

¹¹ Ag-inisip nen Pedro ya ompan nalilingoy Jesus, tan diad saginonor et babawien to lanlamang so imbaga to. Mapaabeban binidbir nen Pedro a walad si Jesus iray “salita a mangitonton ed bilay ya andi-anggaan.” Ontan met ed sikatayo natan. Antoy reaksion tayo no walay nabasa tayod saray publikasyon a nanlapud “matoor tan makabat ya aripen” ya mairap a talosan odino duma ed panmoria tayo? Panseetan tayon talosan itan, imbes ya ilaloan ya umanen so eksplinasyon na satan pian mitunosan ed panmoria tayo.​—Basaen so Lucas 12:42.

MANMATOOR ED ASAWA YO

12, 13. Panon ya onggapo so ag-inkamatoor ed kapareha, tan akin et aliwan rason so edad diad panggawa na satan?

¹² Mauges so anggan dinan a klase na agpanmatoor, kanian agtayo aabuloyan itan a maneral ed kareenan tan pankakasakey na pamilya tan kongregasyon. Aralen tayo no panon a napansiansiay katooran tayod asawa tayo tan ed Dios.

¹³ Say pikakalugoran et sakey ed saray ansakisakit a klase na ag-inkamatoor. Say akikalugoran et agnanmatoor ed asawa to tan sananey lay iimanoen to. Bukbukor la na asawan tinaynan tan bigla met lan manguman so bilay to. Panon itan ya agawa ed sanasawan datin manaaroan? Mabetbet a say gapoan na satan et sano ibabaliwala la na sakey so liknaan na kapareha to. Impaliwawa nen Gabriella Turnaturi, propesor na Sociology ya nayarin onggapo so agpanmatoor sano itunda la na sanasawan pabiskegey relasyon da. Posiblin nagawa iya anggan ed saray abayag lan sanasawa. Alimbawa, indiborsyo na sakey ya 50 años a laki so asawa ton kaiba tod 25 lan taon pian miasawad sananey a biin agustoan to. Ibabaga na arum ya normal labat itan parad ontan iran edad. Balet, aliwan rason so edad pian agmanmatoor, tan aliwa itan a normal a kagagawa. Panagtraidor itan! *

14. (a) Antoy panmoria nen Jehova ed saramay agnanmatoor ed asawa ra? (b) Antoy imbangat nen Jesus nipaakar ed agpanmatoor ed asawa?

¹⁴ Anto kasi panmoria nen Jehova ed saramay mangisian ed kaasawaan da ya anggapoy Makasulatan a rason? ‘Kagula na Dios tayo so pansian,’ tan wala ray mapuersan salita to sumpad saramay aliwliway panagtrato tan anaynan ed asawa ra. (Basaen so Malaquias 2:13-16.) Parehoy panmoria nen Jesus tan na Ama to nipaakar ed agpanmatoor ed asawa. Imbangat ton agnayarin taynan o isian na sakey so kapareha to insan isipen ya singa anggapoy agawa.​—Basaen so Mateo 19:3-6, 9.

15. Panon a pansiansiaen na sanasawa so katooran dad sakey tan sakey?

¹⁵ Panon a napansiansia na sanasawa so katooran dad sakey tan sakey? Oniay ibabaga na Salita na Dios: “Manliket ka ed asawa na inkaugaw mo” tan, “Miamong ka a malikeliket ed asawa ya inarom.” (Uli. 5:18; Ecl. 9:9) Legan iran ontatatken, kaukolan dan gawaey anggaay nayarian dan  paeleten so relasyon da, namparan diad pisikal tan emosyonal. Kabaliksan na satan ya asikasoen day balang sakey, mangiganay panaon parad balang sakey, tan onapit ed balang sakey. Nepeg a protektaan na sanasawa so panamaley da tan say relasyon dad si Jehova. Pian nagawaan iya kaukolan a saniba ran manaral na Biblia, saniba ran mankimey a regular ed ministeryo, tan saniba ran manpikasid si Jehova.

MANSIANSIAN MATOOR ED SI JEHOVA

16, 17. (a) Panon a say katooran tayod Dios et nasubok sano walay adispelosip a kanayon odino kakongregasyon tayo? (b) Anton alimbawa so mamaneknek a say ganggan na Dios ya agmiulop ed saray adispelosip a kanayon et mansumpal ed maabig a resulta?

¹⁶ Wala ray agagin akagaway seryoson kasalanan tan adisiplinan “maong, pian magmaliw iran mabiskeg ed pananisia.” (Tito 1:13) Lapud mauges a kondukta na arum, kaukolan iran nadispelosip. Parad “saramay nipasal ed satan,” say disiplina so akatulong ed sikara pian nipawil so relasyon dad Dios. (Heb. 12:11) Panon to no walay kanayon odino maapit a kaaro tayon adispelosip? Natan nasubok so katooran tayo, aliwan diad samay too, noagta diad Dios. Iimanoen nen Jehova no kasin uunoren tayoy ganggan ton agmiulop ed siopaman ya adispelosip.​—Basaen so 1 Corinto 5:11-13.

¹⁷ Nengnengen tayoy maabig a resulta na impanumbok na sakey a pamilya ed ganggan na Dios ya agmiulop ed adispelosip iran kanayon. Walay sakey a kalangweran a laki ya adispelosip ed loob na samploy taon. Legan na saratan ya panaon ‘ag-akiulop’ ed sikato so ama, ina, tan apatiran agagi to. No maminsan et sasalien toy mibiang ed gagawaen da, balet mapekder so kada sakey ed sikara ya agmangibiang ed sikato. Sanen sikatoy akapawil la, imbaga ton il-iliwen toy piulop ed pamilya to, lalo la no bukbukor tod labi. Inamin ton no akiulop irad sikato anggan agano labat, magenap la itan ed sikato anggano agla ompawil. Balet, lapud ag-iran balot akitongtong ed sikato, say pilalek ton nakaulop ira lamet so sakey a rason ya amakiwas ed sikaton ipawil so relasyon tod si Jehova. Nonoten iyan alimbawa sano nasasagyat itayon sumlangey ganggan na Dios ya agmiulop ed saray adispelosip iran kakanayon tayo.

18. Kayari tayon inaral so resulta na katooran tan ag-inkamatoor, antoy determinado tayon gawaen?

¹⁸ Manbibilay itayod mundon saray totoo et mapalikdo tan agmatoor. Balet, diad Kristianon kongregasyon et dakel so agagin matoor ya sarag tayon aligen. Lapud maabig ya alimbawa ra, singa da ibabagan: “Natasian yo, ontan met na Dios, a nagmaliw kamin matoor tan matunong tan anggapoy pakabalawan mi diad sikayoran mananisia.” (1 Tes. 2:10) Komon ta mansiansia tayon matoor ed Dios tan ed balang sakey.

[Saray paimano ed leksab]

[Tepetepet Parad Panagaral]

[Litrato ed pahina 10]

Nanmatoor si Pedro ed nilanaan ya Anak na Dios anggaman sikatoy ag-anisiaan na arum