“Kon leal, hustu i intachabel nos tabata.”—1 TES. 2:10.

1-3. (a) Kiko ta un señal ku nos ta bibando den e último dianan, i kiko esei ta enserá? (b) Kua ta e tres preguntanan ku nos lo kontestá?

KIKO Dalila, Absalon i Hudas tin en komun? Wèl, nan tur tabata desleal: Dalila tabata desleal na Hues Sámson, e hòmber ku a stim’é; Absalon tabata desleal na su tata, Rei David; i Hudas na su Maestro, Kristu Hesus. E echonan horibel di e personanan akí a kousa otro hende hopi daño i angustia. Pero pakiko nos ta interesá den e tópiko akí?

² Traishon òf deslealtat ta ser menshoná entre e fayonan di mas komun ku hende ta kometé awendia. I esei no ta nada straño, pasobra ora Hesus a duna e señal di e “konklushon di e era akí,” el a bisa ku “hopi hende . . . lo traishoná otro.” (Mat. 24:3, 10) Traishoná un persona ta nifiká ku bo ta desleal na dje òf ta entreg’é den man di enemigu. Pues, e falta di lealtat ku nos ta mira awendia ta prueba ku nos ta bibando den “e último dianan.” Apòstel Pablo tambe a profetisá ku den e último dianan hende lo ta “desleal, . . . traidor.” (2 Tim. 3:1, 2, 4) Hopi bes eskritornan di buki i di pelíkula ta dramatisá i presentá aktonan di traishon komo algu romántiko. Pero den bida real, deslealtat i traishon ta kousa hopi sufrimentu i doló. Sí, traishon en bèrdat ta un señal ku nos ta bibando den e último dianan!

³ Awor, ki lès nos por siña for di personahenan bíbliko ku tabata desleal? Ki ehèmpelnan di lealtat nos por imitá? Na ken nos mester keda semper leal? Laga nos ban wak.

EHÈMPELNAN KU NOS NO MESTER IMITÁ

4. Kon Dalila a traishoná Sámson, i pakiko esei tabata un akto baho?

⁴ Nos ta kuminsá ku Dalila, e muhé astuto ku  Hues Sámson a namorá di dje. Sámson tabata esun ku mester a guia e bataya pa libra e pueblo di Dios for di e filisteonan. Awor tabatin sinku prens filisteo ku podisé tabata sa ku Dalila no tabata stima Sámson di bèrdat, i nan a ofres’é un suma konsiderabel di plaka pa e bisa nan kon bini Sámson tabata asina fuerte pasobra nan kier a mat’é. Dalila, kende tabata golos pa plaka, a aseptá nan oferta. Pero e promé tres biahanan ku el a hasi intento pa deskubrí e sekreto di Sámson, e no a logra. No opstante, el a sigui pone preshon riba Sámson “ku su palabranan i tabata rog’é” te ku “Sámson a fada pa muri.” E ora ei, Sámson a bis’é ku nunka nabaha a pasa riba su kabes i ku si kòrta su kabei, lo e pèrdè tur su forsa. * Ora Dalila a haña sa esei, el a laga feita Sámson su kabes miéntras e tabata drumí riba su pia. Despues el a entreg’é na su enemigunan pa nan hasi kuné loke nan tabata ke. (Hues. 16:4, 5, 15-21) Ki un akto baho! Dalila su golosidat a poné traishoná e persona ku tabata stim’é.

5. (a) Kon Absalon a demostrá ku e no tabata leal na David, i kiko esei a bisa di Absalon? (b) Kon David a sinti ora Ahitofel a traishon’é?

⁵ Laga nos papia awor di Absalon. E hòmber ambisioso akí tabata determiná pa kita e trono for di su tata, Rei David. Pa logra esei, el a kuminsá hasi hopi kos pa “hòrta kurason di e hòmbernan di Israel.” Pa gana nan na su banda, e tabata primintí nan yen di kos i hasi komo si fuera e tabatin masha kariño pa nan. E tabata brasa nan i sunchi nan komo si fuera e tabata masha interesá den nan i kla pa yuda nan. (2 Sam. 15:2-6) Absalon a gana asta Ahitofel, David su hòmber di konfiansa, na su banda. Ahitofel tambe a bira un traidor i a uni ku nan den e gòlpi di estado. (2 Sam. 15:31) Den Salmo 3 i 55, David a mustra kon e deslealtat ei a afekt’é. (Sal. 3:1-8; lesa Salmo 55:12-14.) Absalon su plan malbado tabata kontra e rei ku Yehova a nombra. Asina, el a demostrá ku e no tabatin ningun klase di rèspèt pa Yehova su derecho di skohe ken lo a bira rei. (1 Kró. 28:5) Finalmente, e rebelion a frakasá, i David a sigui goberná komo esun ungí di Yehova.

6. Kon Hudas a traishoná Hesus, i di kua palabra Hudas a bira un sinónimo?

⁶ Awor, pensa riba loke e traidor Hudas Iskariot a hasi ku Kristu. Durante e último Pasku Hudiu ku Hesus a selebrá ku su 12 apòstelnan, el a bisa nan: “Di bèrdat mi ta bisa boso: Un di boso lo traishoná mi.” (Mat. 26:21) Mas lat riba e anochi ei, den e hòfi di Getsémani, Hesus a bisa Pedro, Santiago i Huan: “Esun ku ta traishoná mi a yega!” Sí, na e momento ei Hudas a yega e hòfi huntu ku su kómplisenan, i “el a kana bai stret riba Hesus i a bis’é: ‘Saludo, Rabi!’ i a dun’é un sunchi tierno.” (Mat. 26:46-50; Luk. 22:47, 52) Asina Hudas “a traishoná sanger hustu” i a entregá Hesus den man di su enemigunan. I ta pa kuantu plaka e hòmber golos ei a traishoná Hesus? Pa solamente 30 moneda di plata! (Mat. 27:3-5) Anto desde e tempu ei, e nòmber Hudas a bira sinónimo di “traidor,” i hende ta usa e nòmber ei spesialmente pa referí na un persona ku a traishoná un amigu. *

7. Kiko nos ta siña for di e ehèmpel di (a) Absalon i Hudas i (b) Dalila?

⁷ Kiko nos ta siña for di e ehèmpelnan akí? Wèl, tantu Absalon komo Hudas  a haña un fin bergonsoso pasobra nan a traishoná un ungí di Yehova. (2 Sam. 18:9, 14-17; Echo. 1:18-20) I semper ku nos tende e nòmber Dalila, nos ta pensa riba un persona desleal ku ta hasi komo si fuera e ta stima. (Sal. 119:158) P’esei, laga nos lucha kontra kualke tendensia ku nos por tin di ta ambisioso òf golos, pasobra e karakterístikanan akí por pone nos pèrdè Yehova su fabor. Anto e ehèmpelnan ku nos a kaba di konsiderá por yuda nos resistí kualke kos ku por pone nos bira desleal.

IMITÁ ESNAN KU TABATA LEAL

8, 9. (a) Dikon Jonatan a primintí di keda leal na David? (b) Kon nos por imitá Jonatan?

⁸ Beibel ta kontené hopi ehèmpel tambe di personanan ku tabata leal. Laga nos konsiderá dos ehèmpel i wak kiko nos por siña for di esakinan. Esun promé ta di un hòmber ku a demostrá ku e tabata leal na David: Jonatan, e yu mayó di Rei Saul. Despues di Saul, ta Jonatan mester a heredá e trono di Israel. Sinembargo, Yehova no a skohe Jonatan komo e siguiente rei sino David. I Jonatan a respetá e desishon di Yehova i no a bira yalurs riba David. Al kontrario, “alma di Jonatan a keda uní ku alma di David,” i el a primintí David ku lo el a keda leal na dje. El a asta duna David su paña, spada, bog i su faha, mustrando asina gran onor na David komo futuro rei. (1 Sam. 18:1-4) Jonatan a hasi tur loke e tabata por pa ‘enkurashá’ David. El a bai asina leu di riska su bida pa defendé David dilanti di Saul. Sí, Jonatan tabata leal, i el a bisa David: “Lo bo bira rei di Israel i ami lo ta na di dos lugá.” (1 Sam. 20:30-34; 23:16, 17, BPK) P’esei, ta di komprondé ku ora Jonatan a muri, David a ekspresá su tristesa i amor p’e den un kantika di lamento.—2 Sam. 1:17, 26.

⁹ Sin duda, Jonatan tabata sa na ken e mester a demostrá lealtat. E tabata kompletamente sumiso na Yehova, e Soberano, i a sostené David, e ungí di Dios, den tur kos. Di igual manera, maske nos mes no tin un privilegio spesial den kongregashon, nos tambe mester ta dispuesto pa apoyá e rumannan ku sí a ser nombrá pa dirigí asuntunan den kongregashon.—1 Tes. 5:12, 13; Heb. 13:17, 24.

10, 11. (a) Dikon Pedro a keda leal na Hesus? (b) Kon nos por imitá Pedro?

¹⁰ Un otro ekselente ehèmpel ku nos por siña for di dje ta esun di apòstel Pedro, kende a primintí di keda leal na Hesus. Ora Kristu a usa idioma figurativo pa yuda su disipelnan komprondé e importansia di pone fe den su karni i sanger ku lo a ser sakrifiká, hopi di su disipelnan a haña su palabranan ofensivo i a bandon’é. (Huan 6:53-60, 66) P’esei Hesus a bira puntra su 12 apòstelnan:  “Akaso boso tambe ke bai?” Pedro a kontest’é: “Señor, serka ken nos lo bai? Abo tin e palabranan ku ta hiba na bida eterno; i nos a kere i a haña sa ku abo ta e Santu di Dios.” (Huan 6:67-69) Akaso loke Pedro a bisa ei ta nifiká ku el a komprondé tur loke Hesus a kaba di bisa tokante e sakrifisio ku E tabata bai hasi? Probablemente ku nò. Pero apesar di esei, Pedro tabata determiná pa keda leal na Dios su Yu ungí.

¹¹ Pedro no a pensa ku Hesus mester tabata kiboká i ku lo el a bin realisá esei despues i rektifiká loke El a bisa. Al kontrario, humildemente Pedro a rekonosé ku Hesus tabatin “e palabranan ku ta hiba na bida eterno.” Kiko di nos awe? Kon nos ta reakshoná ora nos topa algu den un publikashon di “e mayordomo fiel” ku nos tin difikultat pa komprondé òf ku no ta kuadra ku loke nos ta pensa? Wèl, en bes di sinta spera ku lo bini un kambio ku ta apoyá nos punto di bista, nos mester hasi esfuerso sinsero pa komprondé e asuntu.—Lesa Lukas 12:42.

KEDA LEAL NA BO KASÁ

12, 13. Ki ora por surgi traishon den matrimonio, i dikon edat no ta un èksküs pa esaki?

¹² Tur traishon ta malu. Pues, nunka nos mester traishoná otro, pasobra esei por kousa desunion i kita e pas ku nos ta disfrutá di dje den nos famia i den kongregashon. Ku esei na mente, laga nos wak kon nos por keda semper leal na nos kasá i na nos Dios.

¹³ Adulterio ta ún di e aktonan di traishon di mas doloroso i ku ta kousa hopi daño. Un persona ku kometé adulterio ta bira infiel na su kasá i ta dirigí su atenshon na otro persona. Diripiente, esun ku el a traishoná ta hañ’é su so; i su bida ta kambia kompletamente. Pero, kon bini algu asina por pasa ku dos persona ku un tempu tabata stima otro? Hopi biaha, esei ta kuminsá ora parehanan kasá no ta mustra interes den otro su sintimentunan. Gabriella Turnaturi, un profèser di sosiologia, a splika ku ta ora parehanan kasá stòp di hasi esfuerso pa fortalesé nan relashon, bo por haña bo ku adulterio. Asta parehanan ku tin hopi aña kasá por kuminsá distansiá nan mes emoshonalmente for di otro. Por ehèmpel, despues di 25 aña kasá, un hòmber di 50 aña di edat ta divorsiá di su esposa fiel pa e por ta ku un otro hende muhé ku e ta gusta. Algun hende ta hustifiká su kondukta, bisando ku esaki ta algu normal pa hende di e edatnan ei. Pero en bes di hasi komo si fuera esaki ta algu inevitabel, laga nos yam’é na su nòmber, esta, traishon. *

14. (a) Kon Yehova ta mira traishon den matrimonio? (b) Kiko Hesus a bisa ku parehanan kasá no mester hasi?

¹⁴ Kon Yehova ta mira hende ku ta bandoná nan kasá sin base bíbliko? Yehova Dios ta “odia divorsio.” P’esei mes el a papia fuertemente ku esnan ku ta trata nan kasá malu i bandoná nan. (Lesa Malakías 2:13-16.) Hesus ta pensa meskos ku su Tata; el a siña hende ku nan no por kore ku nan kasá òf bandon’é pa kualke motibu i hasi komo si fuera nada no a pasa.—Lesa Mateo 19:3-6 i 9.

15. Kon parehanan kasá por keda leal na otro?

¹⁵ Kon parehanan kasá por keda leal na otro? E Palabra di Dios ta bisa: “Alegrá bo den e esposa [òf esposo] di bo hubentut” i “gosa di bida ku bo kasá ku bo ta stima.” (Pro. 5:18; Predikador [Ekl.]  9:9, BPK) Segun ku un pareha kasá ta bira grandi, nan tur dos mester sigui hasi tur loke nan por pa mantené nan relashon fuerte, tantu físikamente komo emoshonalmente. Kon asina? Wèl, nan mester ta bondadoso ku otro, kuida otro i pasa tempu ku otro. Nan mester traha duru pa protehá nan matrimonio i nan relashon ku Yehova. Pa logra esaki, nan mester studia Beibel huntu, traha regularmente den sirbishi huntu i hasi orashon huntu pidi Yehova su bendishon.

KEDA LEAL NA YEHOVA

16, 17. (a) Ki situashon na kas òf den kongregashon por pone nos lealtat na Dios na prueba? (b) Menshoná un ehèmpel ku ta mustra ku nos obedensia na Dios su mandamentu pa no anda ku miembronan di famia ku ta ekspulsá por duna bon resultado.

¹⁶ Algun ruman a yega di kometé piká serio i nan a ser reprendé “severamente pa nan por tin un fe firme” atrobe. (Tito 1:13) Algun mester a ser ekspulsá di e kongregashon kristian pa motibu di nan kondukta. Esnan ku a laga e disiplina fuerte ei “entrená” nan por a drecha nan relashon ku Yehova. (Heb. 12:11) Awor kiko si nos tin un famia òf un bon amigu ku ta ekspulsá? Wèl, nos echonan ta demostrá na ken nos ta leal: na e persona òf na Yehova. Naturalmente, nos mester keda leal na Yehova. I Yehova ta opservá nos pa wak si nos ta obedesé su mandamentu pa no anda ku ningun hende ekspulsá.—Lesa 1 Korintionan 5:11-13.

¹⁷ Ora miembronan di famia ta keda leal na Yehova i ta hasi kaso di su mandamentu pa no anda ku miembro di famia ku ta ekspulsá, esaki ta duna bon resultado. Laga nos wak djis ún ehèmpel: Un yònkuman tabatin mas ku dies aña ekspulsá. Durante e tempu ei, su tata, mama i su kuater rumannan a “stòp di anda” kuné. Algun biaha, e tabata purba partisipá den nan aktividatnan, pero henter e famia a para firme i a evitá tur kontakto kuné. Despues ku el a ser restorá, el a bisa ku e tabata sinti falta di ta huntu ku su famia, spesialmente anochi ora e tabata su so. El a bisa ku si nan lo a asosiá djis un ratu kuné, esei so lo tabata sufisiente. Pero debí ku niun di nan no tabata komuniká kuné, su deseo fuerte pa asosiá ku su famia tabata un di e kosnan ku a motiv’é pa drecha su relashon ku Yehova. Si un dia bo haña gana di anda ku un miembro di famia ku ta ekspulsá i asina kibra ku Dios su mandamentu, kòrda e ehèmpel akí.

18. Awor ku nos a kaba di mira e benefisionan di ser leal i e konsekuensianan di deslealtat, kiko abo ta determiná pa hasi?

¹⁸ Nos ta bibando den un mundu pèstá ku hende desleal i traidor. Pero den e kongregashon kristian sí tin hopi hende leal ku nos por imitá nan ehèmpel. E manera ku nan ta hiba nan bida ta mustra ku nan ta “leal, hustu i intachabel.” (1 Tes. 2:10) Pues, laga nos ta mas determiná ku nunka pa keda leal na Dios i na nos próhimo.

[Nota]

[Preguntanan di Estudio]

[Plachi na página 16]

Pedro a keda leal na Dios su Yu ungí aunke otronan sí a rechas’é