Pikikaa​—E Akairo Kino no Teia Tuatau!

‘Te tu tiratiratu, te tika anga, e te ara kore anga, o ta matou tuatua.’​—1 TESA. 2:10.

AKATAKA MAI I TEIA AU TUMU MANAKO:

Eaa te au apiianga akamatakiteanga ta tatou i kite mai mei te tu pikikaa o Delila, Abasaloma e Iuda Ikariota?

Akapeea tatou me aru i te tu tiratiratu tei akaariia mai e Ionatana raua ko Petero?

Akapeea tatou me vai tiratiratu ki to tatou tokorua akaipoipo e kia Iehova?

1-3. (a) Eaa te akairo kino o teia tuatau, e eaa te o maira? (e) Eaa te nga uianga e toru ka pau tatou?

EAA te tu aiteite i rotopu ia Delila, Abasaloma e Iuda Ikariota? Kua tiratiratu kore ratou pouroa. Kua tiratiratu kore a Delila ki te tangata tei inangaro iaia, te Akava ko Samasona. Kua tiratiratu kore a Abasaloma ki tona metua tane, te Ariki ko Davida. Kua tiratiratu kore a Iuda ki tona Pu, ki te Karaiti ko Iesu. Kua takino te au angaanga kino a teia aronga i tetai ke! Eaa ra tatou ka akamanako atu ei i teia?

² Kua akakite mai tetai vaine tata o teia tuatau i te pikikaa ei anganga kino matauia i teia tuatau. Kare ra te reira i te mea poitirere kia tatou. Te oronga anga i te akairo no “te openga o teianei ao,” kua akakite a Iesu e: ‘Manganui te ka pikikaa i tetai e tetai.’ (Mata. 24:3, 10) Te aiteanga o te “pikikaa” ko te “tuku anga i tetai ki roto i te rima o tetai enemi, na te ravenga kikite me kore tiratiratu kore.” Te akapapu maira taua tu tiratiratu kore ra e te noo nei tatou i teia “tuatau openga” i te totou anga a Paulo e ka tiratiratu kore te au tangata e ka “pikikaa.” (2 Timo. 3:1, 2, 4) Noatu kua akatutu mai te aronga tata e te aronga maani teata i te au tu akainangaro tiratiratu kore ei mea mataora, e tamamae ana ra te tu tiratiratu kore e te pikikaa i tetai ke. Tika rai, e akairo kino taua au angaanga ra no teia tuatau!

³ Eaa te au apiianga ta tatou i kite mai i roto i te Pipiria no te aronga tei tiratiratu kore ana i mua ana? Eaa te au akaraanga ta tatou ka aru no te au tangata tei tiratiratu ki tetai ke? E ka tiratiratu ua rai tatou kiaai? Ka akara ana tatou.

AU AKARAANGA AKAMATAKITEANGA I MUA ANA

4. Akapeea a Delila te pikikaa anga ia Samasona, e eaa ra te reira i kino ei?

⁴ Mea mua, akamanako ana i te vaine kikite ko  Delila, ta te Akava ko Samasona i inangaro. Kua akakoroia a Samasona kia tamaki atu i te ngati Philiseti no te iti tangata o te Atua. Penei kua kite te au tutara e rima o Philiseti e kare a Delila e inangaro ana ia Samasona, e e maata ta ratou moni i oronga kiaia kia kimi aia i te tumu o to Samasona ririnui kia rauka ia ratou i te takore atu iaia. Kua ariki te vaine noinoi ko Delila i te moni, inara e toru taime kare i kitea ana iaia te tumu o to Samasona ririnui. Kua raurau ua atu rai aia iaia “kare e rā e tivata, i te akaapoapo anga atu iaia.” I te openga ra, kua “mate rava akera [to Samasona] ngakau i te manamanata.” E kua akakite aia kia Delila e kare rava tona rouru i varuia ana e me ka varuia te reira ka ngaro tona ririnui. * Te kite anga a Delila i te reira, kua akaue aia kia varuia te rouru o Samasona iaia e moe ra i runga i tona nga ua, e kua tuku atu iaia ki te au enemi kia rave i ta ratou ka inangaro i te rave kiaia. (Aka. 16:4, 5, 15-21) E mea kino tikai tana i rave! No tona tu noinoi, kua pikikaa a Delila i te tangata tei inangaro iaia.

5. (a) Akapeea a Abasaloma te tiratiratu kore anga kia Davida, e eaa ta te reira i akakite mai no runga iaia? (e) Eaa to Davida manako te riro anga a Ahitopheta ei tangata pikikaa?

⁵ Aru mai, akamanako ana i te tangata kikite ko Abasaloma. No tona inangaro maata i te taoonga teitei, kua tauta aia i te rave mai i te terono o tona metua tane, te Ariki ko Davida. ‘Kua keia a Abasaloma i te ngakau o te tangata o Iseraela’ na te akavareanga i te au tangata e te inangaro ra aia ia ratou e te oronga anga i te au taputou pikikaa kia ratou. Kua takave e kua ongi aia ia ratou, mei te mea rai e te inangaro tikai ra aia ia ratou e te manako ra i to ratou au anoano. (2 Samu. 15:2-6) Kua peke katoa ia Abasaloma te tangata ako irinakiia o Davida ko Ahitopheta, tei riro mai ei pikikaa e tei piri atu ki te orureau anga. (2 Samu. 15:31) I roto ia Salamo 3 e te 55, kua akataka mai a Davida eaa ta te tu tiratirau kore i akatupu kiaia. (Sala. 3:1-8; e tatau ia Salamo 55:12-14.) Kua akaari akama kore a Abasaloma i te tu akangateitei kore i to te Atua turanga ngateitei na te parani e te orureau anga i te ariki akatainuia o Iehova. (1 Para. 28:5) Tei tupu mai, kare te orureau anga i tupu ana e kua tutara ua atu a Davida ei ariki akatainuia no Iehova.

6. Akapeea a Iuda te pikikaa anga ia Iesu, e kua akaaiteia te ingoa o Iuda ki teaa?

⁶ Akamanako ana eaa ta te tangata pikikaa ko Iuda Ikariota i rave kia Karaiti. I te tuatau o te Pasa openga ta Iesu i akono kapiti e tona au apotetoro e 12, kua akakite aia kia ratou e: “Koia mou taku e karanga atu kia kotou nei, ka pikikaa tetai o kotou nei iaku.” (Mata. 26:21) I taua po rai, kua akakite atu a Iesu kia Petero, Iakobo, e Ioane i roto i te aua i Getesemane e: “I na, te vaitata mai nei te pikikaa iaku nei.” Kare i roa ana kua tae mai a Iuda e tona aronga orureau, e ‘kua aere atura kia Iesu, na ko atura, kia ora na koe, e Rabi; e kua ongi atura iaia.’ (Mata. 26:46-50; Luka 22:47, 52) Kua ‘pikikaa atura a Iuda i te tangata ara kore’ e kua tuku atura ia Iesu ki tona au enemi. Eia moni i pikikaa ai te tangata noinoi moni ko Iuda ia Iesu? E 30 moni ario! (Mata. 27:3-5) Mei reira mai, kua akaaiteia te ingoa o Iuda ki tetai tangata “pikikaa,” tei pikikaa tikai i tona oa. *

7. Eaa te au apiianga ta tatou i kite mai mei te oraanga o (a) Abasaloma, Iuda e te (e) Delila?

⁷ Eaa ta tatou i kite mai mei teia au akaraanga akamatakiteanga? Kua mate a Abasaloma raua ko Iuda na roto i te tu akama no tei pikikaa i tei akatainuia e  Iehova. (2 Samu. 18:9, 14-17; Anga. 1:18-20) E akamanako uaia ana te ingoa o Delila ki te tu kikite e te inangaro pikikaa. (Sala. 119:158) E puapinga tikai kia kopae tatou i tetai atu tu noinoi e te inangaro taoonga teitei, te ka apai ke i ta Iehova akaperepereanga ia tatou! Kare ainei teia au apiianga pakari ei tauturu ia tatou kia kopae i teia tu kino no te tiratiratu kore?

ARU I TE ARONGA TEI AKAPAPU MAI I TE TU TIRATIRATU

8, 9. (a) Eaa a Ionatana i taputou ei i tona tu tiratiratu kia Davida? (e) Akapeea ra tatou me aru ia Ionatana?

⁸ Kua akakite katoa mai te Pipiria i tetai au tangata tiratiratu. Ka akamanako ana tatou e rua, e e akara eaa ta tatou ka kite mai mei te reira, akamata mai ki tetai tangata tei akapapu i tona tu tiratiratu kia Davida. Tano anga tikai ko Ionatana, te tama mua a te Ariki ko Saula, te ka riro ei ariki no Iseraela. Inara, kua iki a Iehova ia Davida kia riro mai ei ariki no Iseraela. Kua akangateitei a Ionatana i ta te Atua ikianga. Kare aia i manako vareae ana ia Davida ei enemi nona. Mari ra kua “piri rava akera te ngakau o Ionatana ki te ngakau o Davida,” i tona taputouanga i tona tu tiratiratu kiaia. Kua oronga katoa aia i tona kakau, koke, ana e te tatua no Davida ei akangateitei iaia. (1 Samu. 18:1-4) Kua tauta pakari a Ionatana i te ‘akamaroiroi ia Davida,’ noatu e ka kino tona oraanga no te paruru anga ia Davida i mua ia Saula. No to Ionatana tiratiratu kua akakite aia kia Davida e: “Ka riro oki koe ei ariki ki runga ia Iseraela, e ei raro iti ake au ia koe.” (1 Samu. 20:30-34; 23:16, 17) Kare i te mea poitirere e i muri ake te mate anga a Ionatana, kua akakite a Davida i tona mii e tona inangaro iaia na roto i te imene akaevaeva.​—2 Samu. 1:17, 26.

⁹ Kua papu ia Ionatana e koai tana ka turuturu tiratiratu. Kua kauraro pu tikai aia ki Tei Ngateitei, ko Iehova, e kua turuturu maroiroi aia ia Davida tei akatainuia e te Atua. Mei te reira katoa i teia tuatau, me kare i orongaia mai ana tetai apainga ngateitei na tatou i roto i te putuputuanga, kia turuturu puareinga ua tatou i te au taeake tei ikiia kia rave i te aratakianga i rotopu ia tatou.​—1 Tesa. 5:12, 13; Ebe. 13:17, 24.

10, 11. (a) Eaa ra a Petero i vai tiratiratu ei kia Iesu? (e) Akapeea tatou me aru ia Petero, e eaa ta te reira ka akakeu ia tatou kia rave?

¹⁰ Tetai akaraanga akaou ka akamanako tatou no runga i te apotetoro ko Petero, tei taputou e ka tiratiratu aia kia Iesu. Te tuatua anga a Karaiti i tetai akatutuanga i te tauturu i tana au pipi kia kite i te puapinga no te irinakianga ki roto i tona kopapa e te toto te ka akaatingaia, kua poitirere te maataanga o tana au pipi i te reira e kua akaruke iaia. (Ioa. 6:53-60, 66) No reira, kua uri atu a Iesu ki tana au apotetoro e 12 e kua ui atu kia ratou e: “Ka aere katoa ainei kotou?” Kua pau mai a Petero e:  “E te Atu, ka aere tika matou kiaai ra? tei ia koe te tuatua o te ora mutu kore ra. Kua akarongo akenei oki matou, e kua kite oki matou e, ko koe te Mesia, te Tamaiti a te Atua ora ra.” (Ioa. 6:67-69) Te aiteanga ainei e kua marama tikai a Petero i ta Iesu i tuatua ua akera no runga i Tona akaatinga anga? Kare paa. Noatu rai, kua tauta a Petero kia tiratiratu aia ki te Tamaiti akatainuia a te Atua.

¹¹ Kare a Petero i manako ana e kua tarevake te manako o Iesu e a muri mai ka taui Aia i Tana i tuatua ana. Kua ariki akaaka ra a Petero e “tei ia [Iesu] te tuatua o te ora mutu kore ra.” Mei te reira katoa i teia tuatau, akapeea me kite tatou i tetai manako i roto i ta tatou au puka Kerititiano no ko mai i te “akaaere pikikaa kore” kare tatou e marama ana me kore kare e tano ana ki to tatou manako? E tauta tatou kia marama i te reira, kare tatou e tiaki i tetai tauianga te ka tano ki to tatou manako.​—E tatau ia Luka 12:42.

VAI TIRATIRATU KI TOOU TOKORUA AKAIPOIPO

12, 13. Akapeea te pikikaa i o mai ei ki roto i te akaipoipo, e eaa te oraanga pakarikari kare i te kotoeanga no te rave i te reira?

¹² E angaanga kino tetai ua atu tu pikikaa e kia kore e akatika i te reira kia tamanamanata i te au e te taokotaianga o te pamiri Kerititiano e te putuputuanga. Na te akamaara anga i te reira, ka akamanako ana tatou e akapeea tatou e vai tiratiratu ei ki to tatou tokorua akaipoipo e ki to tatou Atua.

¹³ Ko te akaturi tetai tu kino roa atu no te pikikaa. Kua takino te tangata akaturi i tona tu tiratiratu ki tona tokorua akaipoipo e kua manako atu i tetai ke. Kua akarukeia te tangata tei pikikaaia koia anake ua​—e kua taui takiri tona oraanga. Akapeea te reira i tupu ei ki tetai nga tokorua tei inangaro tikai ana i tetai e tetai? Maata o te taime, ka akamata te reira me kare tetai e akamanako atu ana i tetai. Kua akamarama mai tetai Tangata Apii no te Pirianga Tangata, ko Gabriella Turnaturi, e no te tauianga mei “te piri vaitata tikai anga ki tetai e te akatakake uaorai anga i tetai, i tupu mai ei te tu pikikaa.” E tupu ana teia akatakake anga mei te tokorua akaipoipo noatu kua roa te akaipoipoanga. Ei akaraanga, kua kopae tetai tangata e 50 mataiti tei akaipoipo ana e 25 mataiti i tana vaine tiratiratu, kia piri atu ki tetai vaine ke tana i inangaro. Kua kimi kotoe tetai pae e e mea matauia teia no te aronga pakarikari. Inara, kare te reira tu e tau ana, ka karanga tatou i te reira tu e e pikikaa. *

14. (a) Eaa to Iehova manako no te tu pikikaa i roto i te akaipoipo? (e) Eaa ta Iesu i tuatua no runga i te tu tiratiratu kore i roto i te akaipoipo?

¹⁴ Eaa to Iehova manako no te aronga tei akaruke i to ratou tokorua kare e tumu anga tau mei te Tuatua Tapu? ‘E mea riri na to tatou Atua i te kopae,’ e kua tuatua pakari mai aia ki te aronga tei takino e tei akaruke i to ratou tokorua akaipoipo. (E tatau ia Malaki 2:13-16.) Mei tona Metua rai, kua apii a Iesu e kare e rauka i tetai kia tuaru me kore kia kopae i tona tokorua apa kore mei te mea rai e kare e apinga i tupu ana.​—E tatau ia Mataio 19:3-6, 9.

15. Akapeea te aronga i akaipoipo te akaketaketa anga i to ratou tu tiratiratu ki to ratou tokorua?

¹⁵ Akapeea te aronga kua akaipoipo e vai tiratiratu ei ki to ratou tokorua akaipoipo? Te karanga ra te Tuatua a te Atua e: “Kia rekareka koe i te vaine [me kore tane] o toou ou anga ra” e kia “Noo ki to vaine ra [me kore tane ra] ma te rekareka, e inangaro koe iaia.” (Mase. 5:18; Kohe. 9:9) I te nga tokorua e pakarikari maira, kia  “piri vaitata tikai” to raua pirianga i te pae kopapa e te pae manako. Te aiteanga kia akono i tetai e tetai, te akapou anga i te taime ki tetai e tetai, e te akapiri vaitata anga ki tetai e tetai. Kia akono tamou raua i to raua akaipoipo e to raua pirianga kia Iehova. E rauka ai i te rave i teia, kia apii kapiti te nga tokorua i te Pipiria, angaanga kapiti ua rai i te ngai tutuanga, e kia pure kapiti no ta Iehova akameitakianga.

VAI TIRATIRATU KIA IEHOVA

16, 17. (a) Akapeea to tatou tu tiratiratu ki te Atua me timataia i roto i te pamiri e te putuputuanga? (e) Eaa te akaraanga te akatutu maira e ka tupu mai te mea meitaki me akarongo tatou ki te akauenga a te Atua kia kore e kapiti atu ki te kopu tangata tei akaateaia?

¹⁶ Kua rave ana tetai au mema o te putuputuanga i te ara kino e kua ako ‘pakari vivikiia, kia tika to ratou akarongo i te tuatua nei.’ (Tito 1:13) Kua akaateaia tetai pae no ta ratou i rave. Kua tauturuia “te aronga i akamātauia,” me kore tei tereniia e te akoanga kia akaora akaouia mai i te pae vaerua. (Ebe. 12:11) Akapeea me e kopu tangata me kore e oa piri vaitata to tatou kua akaateaia? Ka tiratiratu tatou ki te Atua kare ki te reira tangata. Te akara maira a Iehova ia tatou me te aru ra tatou i tana akauenga kia kore e piri atu ki tetai ua atu tei akaateaia.​—E tatau ia 1 Korinetia 5:11-13.

¹⁷ Akamanako ana e tai akaraanga no te mea meitaki ka tupu mai me turuturu tiratiratu te pamiri i ta Iehova ture, kia kore e piri atu ki te kopu tangata tei akaateaia. Kua akaateaia tetai tangata mapu mei tetai tai ngauru mataiti, kare rava tona papa, mama, e tona tuakana e te nga teina e toru i “kapiti atu” ana kiaia. Kua tamata aia i tetai taime kia o atu ki ta ratou au angaanga, inara kua ketaketa rai te mema tataki tai i te patoi atu kia kore e piri atu kiaia. Muri mai i tona akaokiia mai anga, kua karanga aia e kua maromaroa tikai aia no te mea kare tona pamiri i kapiti ana kiaia, i te po tikai me koia anake ua. Inara, kua akatika aia e naringa te pamiri i piri mai kiaia no tetai tuatau iti ua, ka mareka rava aia i te reira. No te mea kare rava tona pamiri i tuatua mai kiaia, kua inangaro tikai aia i te piri atu kia ratou e kua riro te reira ei akakeu iaia kia akatupu akaou i tona pirianga kia Iehova. Akamaara i te reira me timataia koe kia aati i te akauenga a te Atua kia piri atu ki toou kopu tangata tei akaateaia.

18. Muri ake te akara akaou anga i te au akameitaki anga no te tu tiratiratu e te tupuanga kino no te tu tiratiratu kore, eaa taau ka rave?

¹⁸ Te noo nei tatou ki roto i tetai ao pikikaa e te tiratiratu kore. Inara, ka kite mai tatou i te au akaraanga tiratiratu takapini ia tatou i roto i te putuputuanga Kerititiano ei aru anga na tatou. Te akaari maira to ratou tu e: ‘Ko kotou oki te kite e te Atua katoa, te tu tiratiratu, te tika anga, e te ara kore anga, o ta matou tuatua i rotopu ia kotou i te aronga akarongo.’ (1 Tesa. 2:10) Kia vai tiratiratu ua rai tatou katoatoa ki te Atua e ki tetai e tetai.

[Au Tataanga Rikiriki i Raro]

[Au Uianga Apii]

[Tutu i te kapi 10]

Kua tiratiratu a Petero ki te Tamaiti akatainuia a te Atua noatu kua akaruke tetai pae Iaia