Hahalok traidór mak sinál ida kona-ba loron ikus sira!
Hahalok traidór mak sinál ida kona-ba loron ikus sira!
“Ami-nia hahalok loos, moos no sala-laek.”—1 TES 2:10.
BUKA TOʼOK RESPOSTA:
Ita bele aprende saida husi istória kona-ba Dalila, Absalão no Judas Iscariotes neʼebé sai traidór?
Oinsá mak ita bele halo tuir Jónatas no Pedro nia ezemplu kona-ba laran-metin?
Oinsá mak ita bele hatudu laran-metin nafatin ba ita-nia kaben no mós ba Jeová?
1-3. (a) Saida mak hatudu katak ita moris iha loron ikus sira? Hahalok neʼe envolve saida? (b) Ita sei hetan resposta ba pergunta tolu saida?
SAIDA mak hanesan entre Dalila, Absalão no Judas Iscariotes? Sira hotu la hatudu laran-metin no sai traidór. Dalila la hatudu laran-metin ba Sansão neʼebé hadomi nia. Absalão la hatudu laran-metin ba ninia aman, Liurai David. No Judas la hatudu laran-metin ba ninia Naʼi, Kristu Jesus. Tanba ema sira-neʼe nia hahalok aat, ida-neʼe lori susar boot ba ema seluk. Maibé, tanbasá mak diʼak ba ita atu buka-hatene kona-ba neʼe?
2 Hakerek-naʼin ida hatete katak hahalok traidór mak hahalok aat ida neʼebé ema barak ohin loron hatudu. Ita la hakfodak kona-ba neʼe tanba kuandu Jesus fó-hatene nanis kona-ba sinál neʼebé hatudu katak “mundu neʼe atu hotu”, nia hatete: “Ema barak . . . sei bobar lia ba malu [“sai traidór”, MF].” (Mt 24:3, 10) Liafuan “traidór” hatudu kona-ba ema neʼebé saran ema ida ba inimigu hodi la hatudu laran-metin ba nia. Hahalok ida-neʼe, neʼebé ita haree ohin loron, hatudu katak ita moris iha “loron ikus sira”, hanesan apóstolu Paulo fó-hatene nanis ona. Nia hatete katak ema sei sai “traidór”. (2 Tim 3:1, 2, 4) Livru no filme barak hatudu kona-ba hahalok neʼe iha dalan neʼebé romántiku no halo ema gosta. Maibé tuir loloos, hahalok hanesan neʼe lori rezultadu neʼebé aat. Hahalok hanesan neʼe hatudu duni katak ita moris iha loron ikus sira!
3 Saida mak ita bele aprende husi Bíblia kona-ba ema neʼebé la hatudu laran-metin no sai traidór? Oinsá mak ita bele halo tuir ezemplu husi ema neʼebé hatudu laran-metin ba ema seluk? Ita presiza hakaʼas an atu hatudu laran-metin ba sé? Mai ita buka-hatene resposta ba pergunta sira-neʼe.
EZEMPLU AAT HUSI TEMPU ULUK
4. Oinsá mak Dalila sai traidór? Tanbasá mak buat neʼebé nia halo aat tebes?
4 Ezemplu primeiru kona-ba ema neʼebé sai traidór mak Dalila, neʼebé Sansão hadomi. Sansão hakarak dirije funu hasoru ema Filístia hodi salva Maromak nia povu. Karik ema Filístia nia ulun-naʼin naʼin-lima hatene katak tuir loloos Dalila ladún hatudu domin ba Sansão. Tan neʼe, atu sira bele oho Sansão, sira hatete ba Dalila katak se nia buka-hatene saida mak halo Sansão forsa tebes, sira sei fó osan barak ba nia. Dalila koko dala tolu atu buka-hatene, maibé la hetan susesu. Maski nuneʼe, Dalila “obriga nia ho ninia liafuan iha tempu hotu no kontinua hakaʼas nia”. Ikusmai, Sansão “lakon ninia pasiénsia toʼo sente atu mate” no fó-hatene ba Dalila katak ninia fuuk nunka tesi, no se ema tesi karik, nia sei lakon ninia forsa. * Tanba Dalila hatene ona Sansão nia segredu, nia haruka ema ida atu tesi Sansão nia fuuk bainhira nia toba iha Dalila nia hitin. Depois, nia entrega Sansão ba ninia inimigu sira atu sira bele halo buat naran deʼit neʼebé sira hakarak halo ba nia. (Juíz 16:4, 5, 15-21) Dalila nia hahalok neʼe aat loos! Tanba nia ema neʼebé kaan-teen, nia la hatudu laran-metin ba ema neʼebé hadomi nia no sai traidór.
5. (a) Oinsá mak Absalão la hatudu laran-metin ba David? Ida-neʼe hatudu saida kona-ba Absalão? (b) Oinsá mak David sente kona-ba buat neʼebé Aitofel halo?
5 Ezemplu ida tan kona-ba hahalok traidór mak Absalão. Tanba nia hakarak tebes atu hetan pozisaun aas, nia la hatudu laran-metin ba ninia aman, Liurai David, hodi koko atu hadau ninia aman nia kadunan. Primeiru, Absalão buka dalan oioin atu halo povu Israel apoia fali nia. Nia finje katak nia hadomi ema hodi hakoʼak no reʼi sira, no halo promesa bosok ba ema. (2 Sam 15:2-6) Absalão mós halo David nia kolega diʼak, naran Aitofel, atu sai traidór no kontra hasoru fali David. (2 Sam 15:31) Iha Salmo 3 no 55, David hakerek kona-ba oinsá mak Aitofel nia hahalok neʼe halo nia laran-kanek. (Sal 3:1-8; lee Salmo 55:12-14. *) Tanba Absalão halo planu atu kontra hasoru liurai neʼebé Jeová hili ona, ida-neʼe hatudu katak nia la hatudu respeitu ba Maromak nia direitu atu hili sé mak sai liurai. (1 Crôn 28:5) Ikusmai, Absalão nia planu aat la hetan susesu, no David kontinua atu ukun nuʼudar liurai neʼebé Jeová hili.
6. Oinsá mak Judas sai traidór? Kuandu ema rona Judas Iscariotes nia naran, sira hanoin kona-ba saida?
6 Agora, mai ita koʼalia kona-ba buat neʼebé Judas Iscariotes halo ba Kristu. Kuandu Jesus selebra Páskua ikus hamutuk ho ninia apóstolu naʼin-12, nia hatete: “Tebes, haʼu dehan ba imi; imi ida sei saran haʼu.” (Mt 26:21) Liutiha oras balu iha kalan neʼe, Jesus hatete ba Pedro, Tiago no João iha jardín Getsémani: “Ema neʼebé atu saran haʼu besik ona mai!” Iha tempu neʼebá, Judas tama iha jardín neʼe hamutuk ho ema-lubun no “hakbesik Jesus hodi dehan: ‘Salve, Rabi!’ Hafoin nia reʼi nia”. (Mt 26:46-50; Lc 22:47, 52) Hodi entrega Jesus ba inimigu sira-nia liman, Judas sai traidór neʼebé “saran raan sala-laek”. Mane neʼe ho kaan-teen faʼan Jesus ho osan-mutin 30 deʼit! (Mt 27:3-5) Husi tempu neʼebá, kuandu ema rona Judas Iscariotes nia naran, sira hanoin kedas kona-ba ema neʼebé hatudu hahalok traidór hodi saran ninia belun ba inimigu. *
7. Ita bele aprende saida husi (a) Absalão no Judas no (b) Dalila?
7 Ita bele aprende saida husi ezemplu aat sira-neʼe? Tanba Absalão no Judas sira sai traidór ba ema neʼebé Jeová hili ona, ikusmai sira mate iha dalan neʼebé hamoe sira-nia an. (2 Sam 18:9, 14-17; Apos 1:18-20) No mós, ema barak neʼebé rona Dalila nia naran, sira hanoin kona-ba feto neʼebé finje atu hadomi mane no ikusmai sai traidór. (Sal 119:158) Sin, importante ba ita atu la husik hahalok kaan-teen sai buras iha ita-nia laran no la buka pozisaun neʼebé aas, tanba hahalok sira-neʼe bele halakon ita-nia relasaun diʼak ho Jeová! Ezemplu sira-neʼe ajuda ita atu hasees an husi hahalok naran deʼit neʼebé bele halo ita sai traidór.
EMA NEʼEBÉ HATUDU LARAN-METIN
8, 9. (a) Tanbasá mak Jónatas promete katak nia sei laran-metin ba David? (b) Oinsá mak ita bele halo tuir Jónatas nia ezemplu?
8 Bíblia mós konta ezemplu barak kona-ba ema neʼebé hatudu laran-metin. Mai ita hanoin kona-ba ema naʼin-rua neʼebé hatudu hahalok diʼak neʼe. Ida mak ema neʼebé laran-metin ba David, naran Jónatas. Nia ema neʼebé atu sai liurai tanba nia mak Liurai Saul nia oan-mane primeiru. Maibé, Jeová hili fali David atu sai liurai. Maski nuneʼe, Jónatas hatudu respeitu ba Maromak nia desizaun no nia la sai laran-moras. Jónatas “nia laran kesi metin ho David nia laran”, no nia promete ba David katak nia sei laran-metin ba nafatin. Jónatas mós fó ninia roupa, surik, rama, no sintu ba David, ida-neʼe hatudu katak nia simu David nuʼudar liurai. (1 Sam 18:1-4) Jónatas halo buat hotu atu apoia David, no nia mós tau ninia moris iha perigu laran hodi proteje David husi Saul. Ho laran-metin, nia hatete ba David: “Ó rasik mak sei sai liurai ba Israel, no haʼu sei sai ema segundu tuir ó.” (1 Sam 20:30-34; 23:16, 17) Ita la hakfodak katak depois Jónatas mate, David kanta knananuk neʼebé hatudu katak nia hadomi Jónatas no triste tebes tanba nia mate ona.—2 Sam 1:17, 26.
9 Jónatas hatene katak nia presiza hatudu laran-metin ba Jeová nuʼudar Ukun-Naʼin neʼebé Boot Liu, tan neʼe nia apoia David nuʼudar liurai neʼebé Maromak hili ona. Nuneʼe mós ho ita neʼebé moris ohin loron. Maski ita la iha knaar espesiál ruma iha kongregasaun, maibé ita tenke apoia ho laran irmaun sira neʼebé iha knaar atu tau matan ba ita iha kongregasaun.—1 Tes 5:12, 13; Ebr 13:17, 24.
10, 11. (a) Tanbasá mak Pedro hatudu laran-metin ba Jesus? (b) Oinsá mak ita bele halo tuir Pedro nia ezemplu? Ida-neʼe book ita atu halo saida?
10 Ezemplu diʼak ida seluk mak apóstolu Pedro, neʼebé promete katak nia sei laran-metin ba Jesus. Loron ida, Kristu konta ai-knanoik ida hodi bele ajuda ninia dixípulu sira atu hatene katak importante duni ba sira atu tau fiar ba ninia isin no raan neʼebé lakleur nia sei fó nuʼudar sakrifísiu. Jesus nia liafuan neʼe halo sira hakfodak tebes, no ema barak husik tiha nia. (Joao 6:53-60, 66) Tan neʼe, Jesus husu ba ninia apóstolu naʼin-12: “Imi mós hakarak bá ona?” Pedro hatán: “Naʼi, ami atu bá loos ho sé? Ita mak iha liafuan moris rohan-laek nian. Ami fiar ona hodi hatene katak Ita mak Maromak nia Santu.” (Joao 6:67-69) Ida-neʼe katak Pedro komprende buat hotu neʼebé Jesus foin hatete kona-ba ninia sakrifísiu ka lae? Karik lae. Maski nuneʼe, Pedro hatudu laran-metin nafatin ba Jesus, ida neʼebé Maromak hili ona atu sai liurai.
11 Pedro la hanoin katak Jesus nia hanoin mak sala no aban-bainrua Jesus sei troka fali ninia hanoin kona-ba ninia sakrifísiu. Duké hanoin hanesan neʼe, Pedro ho haraik-an rekoñese katak Jesus mak iha “liafuan moris rohan-laek nian”. Hanesan neʼe mós ho ita ohin loron. Kuandu ita lee ita-nia livru husi atan laran-metin no matenek no hetan informasaun ruma neʼebé susar atu komprende ka la tuir ita rasik nia hanoin, ita sei halo saida? Ita presiza hakaʼas an atu komprende informasaun neʼe. Ita labele hanoin katak aban-bainrua ita-nia organizasaun sei fó sai informasaun foun ruma neʼebé tuir ita-nia hanoin.—Lee Lucas 12:42.
LARAN-METIN NAFATIN BA ITA-NIA KABEN
12, 13. Oinsá mak ema komesa sai traidór ba ninia kaben? Tanbasá mak ita labele fó-sala ba idade?
12 Ita labele husik hahalok traidór atu estraga dame no unidade iha família laran no iha kongregasaun. Tan neʼe, mai ita hanoin oinsá mak ita bele hatudu laran-metin nafatin ba ita-nia kaben no mós ba ita-nia Maromak.
13 Se kaben-naʼin ida halo sala-foʼer, neʼe mak hahalok neʼebé aat tebes no halo ninia kaben laran-kanek. Ema neʼebé halo nuneʼe, nia la laran-metin tan ba ninia kaben no fó fali ninia domin ba ema seluk. Ida-neʼe halo ninia kaben sente mesamesak, no ninia moris sai la hanesan uluk ona. Oinsá mak ida-neʼe bele akontese ba feen-laʼen neʼebé uluk hadomi malu? Dala barak ida-neʼe komesa kuandu feen-laʼen la hanoin ninia kaben nia sentimentu. Matenek-naʼin ida naran Gabriella Turnaturi hatete katak ida-neʼe bele akontese kuandu feen-laʼen la hakaʼas an ona atu hametin sira-nia relasaun. Ida-neʼe bele akontese mós ba ema neʼebé kaben kleur ona. Porezemplu, mane ida ho tinan 50 liu soe ninia feen maski sira kaben ona ba tinan 25, no nia bá hela hamutuk ho feto seluk neʼebé ninia laran monu. Ema balu hatete katak hahalok hanesan neʼe mak hahalok baibain deʼit ba ema ho idade hanesan neʼe. Maibé, ita labele fó-sala ba idade. Tuir loloos, hahalok hanesan neʼe mak hahalok traidór. *
14. (a) Jeová sente oinsá kona-ba ema neʼebé la hatudu laran-metin ba ninia kaben? (b) Jesus hatete saida kona-ba ema neʼebé husik ninia kaben?
14 Jeová sente oinsá kona-ba ema neʼebé husik ninia kaben maski la iha razaun neʼebé loos tuir Bíblia nia matadalan? Ita-nia Maromak “odi soe-malu” no nia uza liafuan makaʼas atu hasoru ema neʼebé la hatudu laran-metin no husik ninia kaben. (Lee Malaquias 2:14, 16. *) Jesus mós hanoin hanesan ho ninia Aman, nia hanorin katak ema labele husik ninia kaben hodi hanoin katak ida-neʼe la problema.—Lee Mateus 19:3-6, 9.
15. Oinsá mak kaben-naʼin sira bele hatudu laran-metin nafatin ba malu?
15 Oinsá mak kaben-naʼin sira bele hatudu laran-metin nafatin ba malu? Maromak nia Liafuan hatete: “Haksolok bá ho ó-nia feen [ka laʼen] husi tempu joven nian.” No hatete mós: “Moris haksolok bá ho feen [ka laʼen] neʼebé ó hadomi.” (Prov 5:18; Ecle 9:9) Nuʼudar feen-laʼen sai ferik-katuas daudaun, sira presiza hakaʼas an atu halo buat neʼebé sira bele halo hodi hametin sira-nia relasaun nuʼudar kaben-naʼin. Oinsá? Feen-laʼen presiza nafatin hakbesik ba malu hodi hatudu laran-diʼak, tau matan ba malu, no uza tempu hamutuk. Sira mós presiza hakaʼas an atu proteje sira-nia relasaun nuʼudar kaben-naʼin no sira-nia relasaun ho Jeová. Hodi halo nuneʼe, sira presiza iha toman atu estuda Bíblia hamutuk, haklaken beibeik hamutuk, no mós halo orasaun hamutuk hodi husu Jeová nia bensaun.
LARAN-METIN NAFATIN BA JEOVÁ
16, 17. (a) Situasaun saida mak bele koko ita-nia laran-metin ba Jeová? (b) Kuandu ita halo tuir Maromak nia mandamentu kona-ba labele ransu ho família neʼebé kongregasaun hasai ona, ida-neʼe bele lori rezultadu diʼak saida? Fó toʼok ezemplu.
16 Iha kongregasaun laran, iha ema neʼebé halo sala boot no hetan dixiplina ‘makaʼas atu sira laʼo tuir dalan loos iha fiar’. (Tito 1:13) Ema balu tenke hasai husi kongregasaun tanba sira-nia hahalok sala no la arrepende an. Maibé “sira neʼebé simu tiha” dixiplina neʼe, ida-neʼe ajuda sira atu hadiʼa sira-nia relasaun ho Maromak. (Ebr 12:11) Oinsá se ita iha família ka kolega neʼebé kongregasaun hasai ona? Ida-neʼe sei koko duni ita-nia laran-metin, se ita sei laran-metin ba ema ka ba Jeová. Jeová sei haree oinsá ita halo tuir ka la halo tuir ninia mandamentu kona-ba labele ransu ho ema naran deʼit neʼebé kongregasaun hasai ona.—Lee 1 Korinto 5:11-13.
17 Hanoin toʼok kona-ba ezemplu ida neʼebé hatudu oinsá mak laran-metin ba Jeová bele lori rezultadu diʼak. Kongregasaun hasai mane joven ida, no durante tinan sanulu liu, ninia aman, inan, no maun-alin naʼin-haat ‘la laʼo hamutuk’ ho nia. Dala ruma, nia koko atu hola parte iha ninia família nia atividade, maibé sira hotu laran-metin atu la ransu tan ho nia. Kuandu nia fila fali ba kongregasaun, nia hatete katak uluk nia sempre triste tanba nia la bele ransu ho família, liuliu iha kalan neʼebé nia tuur mesak. Nia mós hatete katak se ninia família ransu ho nia maski uitoan deʼit, ida-neʼe sei halo nia kontente fali. Maibé tuir loloos, ema ida nunka koʼalia ho nia ka haruka mensajen ruma ba nia. Tanba nia hakarak tebes atu hamutuk ho sira, ida-neʼe mak razaun ida neʼebé book nia atu hadiʼa fali ninia relasaun ho Jeová. Se ita-nia laran hakarak atu la halo tuir Maromak nia mandamentu kona-ba labele ransu ho ita-nia família neʼebé kongregasaun hasai ona, diʼak atu hanoin-hetan kona-ba esperiénsia neʼe.
18. Tanba ita aprende ona kona-ba hahalok traidór no hahalok laran-metin, ita hakarak hakaʼas an atu halo saida?
18 Ita moris iha mundu aat neʼebé ema barak la hatudu laran-metin no sai traidór. Maibé iha kongregasaun laran, ita iha irmaun-irmán barak neʼebé hatudu ezemplu diʼak kona-ba laran-metin. Liuhusi sira-nia moris rasik, sira hatudu duni katak sira-nia hahalok “loos, moos no sala-laek”. (1 Tes 2:10) Tan neʼe, mai ita hakaʼas an atu hatudu laran-metin nafatin ba malu no ba Maromak Jeová.
[Nota–rodapé]
^ par. 4 Sansão nia fuuk laʼós buat neʼebé fó forsa ba nia, maibé ninia forsa mai husi ninia relasaun espesiál ho Jeová nuʼudar ema nazireu. Ninia fuuk reprezenta ninia relasaun espesiál neʼe.
^ par. 5 Salmo 55:12-14: “12 Tanba laʼós inimigu mak hamoe haʼu. . . . Laʼós ema neʼebé odi tebes haʼu mak halo nia an hanesan ema boot hodi kontra haʼu. . . . 13 Maibé, ó mak ema neʼe, . . . ema neʼebé haʼu koñese didiʼak no haʼu-nia kolega diʼak, 14 tanba ita baibain haksolok hodi ransu besik malu; ita uluk laʼo hamutuk ba Maromak nia uma ho ema-lubun.”
^ par. 6 Iha língua balu, liafuan “Judas nia reʼi” iha arti katak “hahalok neʼebé traidór”.
^ par. 13 Atu hetan informasaun liután kona-ba oinsá mak ita bele tahan hasoru situasaun susar neʼe, haree Livru Haklaken, 15 Juñu 2010, pájina 29-32 ho títulu: “Tahan nafatin maski Ita-nia kaben la hatudu laran-metin”.
^ par. 14 Malaquias 2:14, 16: “14 ‘Jeová rasik mak fó sasin entre ó no ó-nia feen husi tempu joven, neʼebé ó rasik lohi, maski nia mak ó-nia pár no ó-nia feen aliansa nian.” “16 Tanba nia odi soe-malu’, Jeová, Israel nia Maromak hatete.”
[Pergunta estudu nian]
[Dezeñu iha pájina 10]
Pedro hatudu laran-metin ba Jesus maski ema seluk husik Nia
