Givim Baksait Long Pren Mak Nogut Bilong Dispela Taim!
Givim Baksait Long Pren Mak Nogut Bilong Dispela Taim!
“Yupela i mas kisim nupela pasin em laik bilong God yet i as bilong en na i poroman wantaim stretpela pasin na pasin bilong stap gut long narapela.”—EFE 4:24.
PAINIM OL DISPELA BIKPELA POIN:
Yumi kisim wanem skul long pasin bilong Delaila, Apsalom, na Judas Iskariot long givim baksait long narapela?
Olsem wanem yumi ken bihainim pasin bilong Jonatan na Pita long stap gut long narapela?
Olsem wanem yumi ken stap gut long poroman marit na long Jehova?
1-3. (a) Wanem wanpela sain olsem yumi stap long taim bilong las de? Na wanem samting i insait long en? (b) Bai yumi kisim bekim bilong wanem 3-pela askim?
OLSEM WANEM Delaila, Apsalom, na Judas i wankain? Olgeta i no stap gut long poroman bilong ol. Delaila i no stap gut long Jas Samson, em man i laikim em tumas. Apsalom i no stap gut long papa bilong en, King Devit. Na Judas i no stap gut long Bikman bilong en, Krais Jisas. Pasin nogut dispela 3-pela i bin mekim i givim bikpela hevi long ol arapela! Bilong wanem yumi laik skelim dispela samting?
2 Wanpela man bilong raitim ol buk i tok pasin bilong givim baksait long pren em wanpela pasin planti man long nau i mekim. Yumi no kirap nogut long dispela. Taim Jisas i tok profet long sain i makim “pinis bilong dispela taim,” em i tok: “Planti man . . . bai putim narapela long han bilong ol birua.” (Mat. 24:3, 10) Dispela tok ‘putim narapela long han bilong birua’ i makim man husat i no stap gut long poroman na i givim baksait long em. Pasin bilong i no stap gut long narapela, em yumi lukim long nau, i soim olsem yumi stap long “taim bilong las de,” olsem Pol i bin tok. Em i tok olsem ol man “bai i no stap gut long narapela, . . . ol bai birua long ol pren bilong ol.” (2 Tim. 3:1, 2, 4) Planti taim ol man i raitim ol stori bilong ol buk na muvi i mekim olsem pasin bilong i no stap gut long narapela em rot bilong kisim amamas. Tasol ol buk na muvi i no kamapim tok i tru. Nogat. Long laip tru tru, pasin bilong i no stap gut long narapela na givim baksait long pren i save kamapim bikpela pen na hevi. Ol kain pasin olsem i soim olsem yumi stap long taim bilong las de!
3 Ol stori bilong Baibel long ol man i no bin stap gut long narapela i givim wanem skul long yumi? Husat i bin stap gut long narapela na yumi ken bihainim pasin bilong ol? Yumi mas strong long stap gut long husat? Yumi laik kisim bekim bilong ol dispela askim.
OL STORI I OLSEM TOK LUKAUT
4. Olsem wanem Delaila i givim baksait long Samson? Bilong wanem dispela em pasin nogut tru?
4 Namba 1 stori em bilong kusai meri Delaila, husat Jas Samson i laikim em tumas. Samson i laik go pas long pait long ol Filistia bilong helpim lain bilong God. Ating 5-pela bikman bilong ol Filistia i save pinis olsem Delaila i no laikim tru Samson long pasin we em bai stap gut long em. Ol i givim planti mani long Delaila na tokim em long painimaut as bilong bikpela strong bilong Samson na bihain ol i ken kilim em i dai. Delaila i wanpela gridi meri na em i orait long mekim olsem ol i tok. Tripela taim em i traim long painimaut as bilong strong bilong Samson, tasol em i no inap. Delaila i wok long “toktok planti na i wok long askim em.” Em i mekim i go inap Samson i “les nogut tru.” Olsem na Samson i tokaut long em olsem ol i no bin katim gras bilong em wanpela taim, na sapos ol i katim, strong bilong em bai pinis. a Nau Delaila i save long as bilong strong bilong Samson, na taim Samson i slip i dai long lek bilong en, em i singautim wanpela man i kam katim gras bilong Samson. Delaila i putim em long han bilong ol birua na bai ol i ken mekim save long em. (Het. 16:4, 5, 15-21) Dispela em i pasin nogut tru! Delaila i gat pasin gridi, olsem na em i putim man husat i laikim em long han bilong ol birua.
5. (a) Olsem wanem Apsalom i no stap gut long Devit? Dispela i kamapim wanem laik bilong em? (b) Devit i gat wanem tingting taim Ahitofel i givim baksait long em?
5 Namba 2 stori em bilong Apsalom, husat i no bin stap gut long papa bilong en. Apsalom i gat bikpela laik long kisim biknem na namba. Em i laik kisim wok king bilong Devit, papa bilong em. Pastaim em i wok long “pulim tingting bilong ol man bilong Israel na ol i save laikim em.” Em i giaman olsem em i laikim ol manmeri, na em i mekim ol giaman promis long ol. Em i holimpas ol na kis long ol, na giaman olsem em i tingim ol na ol samting ol i sot long en. (2 Sml. 15:2-6) Na tu, Apsalom i bin kirapim gutpela pren bilong Devit, Ahitofel, long givim baksait long Devit na joinim em long bikhet long king. (2 Sml. 15:31) Long Buk Song 3 na 55, Devit i stori olsem dispela pasin i mekim em i bel hevi tru. (Sng. 3:1-8; ritim Song 55:12-14.) Plen nogut bilong Apsalom em bilong rausim king em Jehova yet i bin makim. Dispela i soim olsem Apsalom i sakim namba bilong God long makim husat bai mekim wok king. (1 Sto. 28:5) Plen bilong Apsalom i no wok, na Devit i stap yet olsem king em Jehova i bin makim.
6. Olsem wanem Judas i givim baksait long Jisas? Long nau ol man i save yusim nem Judas bilong makim wanem samting?
6 Nau tingim pasin nogut Judas Iskariot i bin mekim long Krais. Long laspela Pasova Jisas i mekim wantaim 12-pela aposel, em i tok: “Mi tok tru long yupela: Wanpela bilong yupela bai putim mi long han bilong ol birua.” (Mat. 26:21) Bihain, long gaden Getsemani, Jisas i tokim Pita, Jems, na Jon: “Lukim! Man i laik putim mi long han bilong ol birua em i kam klostu pinis.” Long dispela taim stret, Judas i kam kamap long gaden wantaim bikpela lain manmeri, “na Judas i kam stret long Jisas na tok: ‘Gutnait Rabai!’ na em i givim kis long em.” (Mat. 26:46-50; Luk 22:47, 52) Judas i “putim stretpela man” Jisas long han bilong ol birua husat i laik kilim em i dai. Gridi man Judas i kisim hamas mani long mekim dispela? Em i kisim 30 silva koin tasol! (Mat. 27:3-5) Kirap long dispela taim na i kam inap long nau, ol man i yusim nem Judas bilong makim man i givim baksait long narapela, na moa yet taim man i givim baksait long pren bilong en. b
7. Yumi kisim wanem skul long laip bilong (a) Apsalom na Judas na (b) Delaila?
7 Yumi bin kisim wanem skul long ol dispela stori i olsem tok lukaut long yumi? Samting i painim Apsalom na Judas taim ol i dai i semim tru nem bilong ol. Dispela samting i kamap, long wanem, ol i givim baksait long man Jehova i makim. (2 Sml. 18:9, 14-17; Apo. 1:18-20) Taim ol man i harim dispela nem Delaila, ol i tingim pasin bilong em long i no stap gut long poroman na giaman long laikim em. Em i bikpela samting long sakim pasin gridi na pasin bilong laikim namba, sapos yumi no sakim, yumi no inap stap pren moa bilong Jehova! Ol dispela stori i skulim yumi olsem yumi mas holimpas pasin bilong stap gut long narapela, na sakim olgeta samting em inap kirapim yumi long givim baksait long poroman.
BIHAINIM GUTPELA PASIN BILONG OL
8, 9. (a) Bilong wanem Jonatan i tok promis long stap gut long Devit? (b) Olsem wanem yumi ken bihainim pasin bilong Jonatan?
8 Baibel i stori tu long ol man husat i bin stap gut long narapela. Bai yumi stori long tupela man em yumi ken kisim skul long ol. Pastaim bai yumi stori long wanpela man husat i bin stap gut long Devit. Jonatan em fesbon pikinini bilong King Sol, na ating em bai kamap king bihain long papa bilong em. Tasol Jehova i makim Devit. Jonatan i rispektim disisen bilong God na em i no jeles long Devit. Jonatan “i givim bel bilong en moa yet long Devit,” na i tok promis long stap gut long em. Na tu, Jonatan i soim ona long Devit taim em i givim klos, bainat, banara, na let bilong en long Devit. (1 Sml. 18:1-4) Jonatan i mekim olgeta samting em inap mekim bilong sapotim Devit. Maski laip bilong Jonatan inap lus, em i lukautim Devit na bai Sol i no ken kilim em i dai. Jonatan i stap gut long Devit na tokim em: “Bihain bai yu kamap king bilong Israel, na mi bai stap namba 2 bilong yu.” (1 Sml. 20:30-34; 23:16, 17) Yumi no kirap nogut olsem bihain long Jonatan i dai, Devit i singim song bilong kamapim bel sori bilong em na pasin bilong em long laikim tru Jonatan.—2 Sml. 1:17, 26.
9 Jonatan i save long husat em i mas stap gut long en. Em i stap gut long King, Jehova, na em i sapotim Devit, em man God i makim. Na i wankain long yumi long nau. Maski sapos yumi yet i no holim wanpela wok insait long kongrigesen, yumi mas amamas long sapotim ol brata em ol i kisim wok long go pas long yumi.—1 Tes. 5:12, 13; Hib. 13:17, 24.
10, 11. (a) Bilong wanem Pita i stap gut long Jisas na i no lusim em? (b) Olsem wanem yumi ken bihainim pasin bilong Pita? Pasin bilong Pita i mas kirapim yumi long mekim wanem?
10 Narapela man yumi inap kisim skul long en, em aposel Pita husat i bin tok promis long stap gut long Jisas. Krais i bin yusim tok piksa bilong helpim ol disaipel long kliagut olsem em i bikpela samting long ol i bilip long bodi na blut bilong em, we klostu nau em bai sakrifaisim. Em wanpela tok piksa tasol, tasol planti disaipel i kirap nogut long tok bilong em na ol i lusim em. (Jon 6:53-60, 66) So Jisas i askim 12-pela aposel: “Ating yupela tu i laik lusim mi na i go, a?” Pita i bekim tok: “Bikpela, bai mipela i go long husat? Ol tok bilong yu i bringim man i go long laip oltaim. Na mipela i bilip na kisim save olsem yu Man holi na God i bin salim yu i kam.” (Jon 6:67-69) Yu ting dispela i makim olsem Pita i kliagut long olgeta tok Jisas i mekim long sakrifais em Jisas yet bai mekim? Ating nogat. Tasol Pita i wokim disisen olsem em bai stap gut long Pikinini God i makim, em Jisas.
11 Pita i no ting olsem tingting bilong Jisas i kranki na bihain Jisas bai luksave long dispela na senisim tok em i mekim. Pita i gat pasin daun, na em i save olsem tok bilong Jisas “i bringim man i go long laip oltaim.” Na i wankain long yumi long nau. Yumi mekim wanem taim yumi ritim sampela tok long buk na nius i kam long “gutpela bosboi” we i hatwok long kliagut long en, o i no wankain long tingting bilong yumi yet? Yumi mas wok strong long kliagut long en. Yumi no ken wet na ting olsem bihain ol bai kamapim senis i stret wantaim tingting bilong yumi yet.—Ritim Luk 12:42.
STAP GUT LONG POROMAN MARIT
12, 13. Ating i gat wanem as na wanpela i no stap gut long poroman marit? Bilong wanem krismas bilong man i no ken stap olsem eskius na man i givim baksait long poroman?
12 Pasin bilong i no stap gut long pren na givim baksait long em, dispela em pasin nogut tru. Yumi no ken larim dispela pasin i bagarapim bel isi na pasin wanbel bilong ol famili Kristen na bilong kongrigesen. Yumi laik kisim save long olsem wanem yumi ken strongim pasin bilong yumi long i stap gut long poroman marit na long God.
13 Man i mekim pasin adaltri, em i givim baksait long poroman na i kamapim bikpela pen na hevi. Taim wanpela i mekim pasin adaltri, em i no stap gut moa long poroman marit, na tingting na laik bilong en i stap long narapela. Poroman marit husat i no mekim rong, nau em i stap wanpis. Laip bilong dispela poroman i senis olgeta. Olsem wanem dispela samting i painim tupela marit em bipo narapela i laikim tru narapela? Planti taim dispela samting i stat long kamap taim narapela i no tingim moa filings bilong poroman. Profesa Gabriella Turnaturi i tok pasin bilong givim baksait long poroman marit inap kamap, long wanem, ol i no mekim olgeta samting ol inap mekim bilong strongim marit bilong ol. Dispela inap kamap maski tupela i bin marit longpela taim pinis. Olsem, wanpela man i gat 50 krismas i bin marit inap 25 yia. Maski poroman marit i stap gut long em, em i katim marit na bai em i ken sindaun wantaim narapela meri em i laikim. Sampela i tok dispela em pasin bilong ol man i gat kain krismas olsem. Tasol maski man i gat hamas krismas, dispela pasin i no stret. Em i givim baksait long poroman na dispela tok promis em i bin mekim long stap gut long em. c
14. (a) Jehova i gat wanem tingting long ol marit i no stap gut long poroman bilong ol? (b) Jisas i tok wanem long man i no stap gut long poroman marit?
14 Jehova i gat wanem tingting long ol marit i lusim poroman bilong ol, na tok bilong Baibel i no as bilong samting ol i mekim? God bilong yumi i heitim pasin bilong katim marit, na em i givim strongpela tok long ol marit husat i mekim nogut long ol poroman bilong ol na lusim ol. (Ritim Malakai 2:13-16.) Tingting bilong Jisas long ol man i no stap gut long poroman marit i wankain olsem tingting bilong Papa bilong en. Em i skulim ol man olsem i no stret long sakim na lusim poroman marit na ting olsem dispela em samting nating.—Ritim Matyu 19:3-6, 9.
15. Ol marit i ken mekim wanem bilong strongim pasin bilong i stap gut long poroman bilong ol?
15 Ol marit i ken mekim wanem bilong strongim pasin bilong i stap gut long poroman bilong ol? Baibel i tok: ‘Amamas long meri [o man] bilong yu’ na, ‘yu mas amamas wantaim dispela meri [o man] bilong yu, em yu laikim tumas.’ (Snd. 5:18; Sav. 9:9) Taim krismas bilong tupela i go antap, ol i mas mekim olgeta samting ol inap mekim na bai pasin bilong ol long pas gut wantaim i ken stap strong, em long sait bilong skin na bel na tingting. Dispela i makim wanem? Tupela i mas pas gut wantaim long rot bilong tingim tru poroman, lukautim poroman long ol samting em i nidim, na lusim taim bilong i stap wantaim em. Ol i mas wok strong long lukautim marit bilong ol na pasin bilong ol long pas gut wantaim Jehova. Bilong mekim olsem, tupela marit i mas stadi Baibel wantaim, mekim wok autim tok wantaim, na beten wantaim na askim Jehova long blesim marit bilong ol.
STAP GUT LONG JEHOVA
16, 17. (a) Wanem samting inap traim pasin bilong yumi long stap gut long God insait long famili na long kongrigesen? (b) Wanem eksampel i soim olsem gutpela samting inap kamap taim yumi bihainim lo bilong God long no ken poroman wantaim wanblut i raus?
16 Sampela long kongrigesen i bin mekim ol bikpela rong na ol elda i mas “givim strongpela tok long ol bilong stretim ol, bai bilip bilong ol i ken i stap gut.” (Tai. 1:13) Sampela i mas raus long kongrigesen. “Tasol ol lain i kisim skul pinis long wanpela i stretim ol,” dispela i bin helpim ol long pas gut gen wantaim God. (Hib. 12:11) Olsem wanem sapos wanpela wanblut o wanpela gutpela pren i raus? Samting yumi mekim long kain taim olsem i soim olsem yumi stap gut long dispela rausman o yumi stap gut long God. Yumi mas stap gut long Jehova. Em i lukluk long yumi bilong save olsem, yumi bihainim lo bilong em long no ken poroman wantaim wanpela rausman, o nogat.—Ritim 1 Korin 5:11-13.
17 Gutpela samting inap kamap taim famili i stap gut long Jehova na bihainim lo bilong en long no ken poroman wantaim wanblut i raus. Olsem, wanpela yangpela man i bin raus inap 10-pela yia. Insait long dispela haptaim, papa, mama, na 4-pela brata bilong en i “lusim pasin bilong poroman wantaim” em. Sampela taim em traim long poroman wantaim ol, tasol olgeta wan wan long famili i stap gut long God. Ol i no bung liklik wantaim em. Taim kongrigesen i kisim em bek, em i tok olsem oltaim em i tingim famili bilong en, moa yet long nait taim em i stap wanpis. Em i tok sapos famili i bin bung wantaim em inap liklik tasol, dispela bai inapim laik bilong em long lukim ol. Tasol ol i no toktok wantaim em liklik. Olsem na strongpela laik long stap wantaim ol i wanpela as na em i laik stretim pasin bilong em long pas gut gen wantaim Jehova. Sapos yu pilim olsem yu laik brukim lo bilong God na poroman wantaim wanblut i raus, orait tingim dispela stori.
18. Yumi kisim skul pinis long ol lain i bin stap gut long narapela na lain i no bin mekim olsem, orait bai yu mekim wanem?
18 Yumi stap long taim we ol man i no stap gut long narapela na ol i givim baksait long poroman bilong ol. Tasol insait long kongrigesen i gat planti manmeri husat i stap gut long narapela na yumi ken bihainim pasin bilong ol. Wokabaut bilong ol i soim olsem ol i gat “stretpela pasin na pasin bilong stap gut long narapela.” (Efe. 4:24) Olsem na yumi laik mekim olgeta samting yumi inap mekim bilong i stap gut long God na long ol arapela.
[Ol Futnot]
a Samson em wanpela Promisman, na em i kisim strong bilong en long dispela pasin bilong em long pas gut wantaim Jehova na i no long gras bilong en. Gras bilong en i stap olsem mak bilong dispela promis i stap namel long em na Jehova.
b Long sampela tokples, dispela tok “kis bilong Judas” i makim pasin bilong givim baksait long pren.
c Bilong kisim sampela save moa long dispela samting, lukim atikol, “Karim Hevi Bilong Poroman i No Stap Gut Long Marit,” long Wastaua bilong Jun 15, 2010, pes 29-32.
[Askim Bilong Stadi]
[Piksa long pes 10]
Pita i bin stap gut long Pikinini God i makim, em Jisas, maski ol arapela i lusim Em
