Jehovah Gwokowa Pi Nongo Larre
Jehovah Gwokowa Pi Nongo Larre
“Lubanga tye ka gwokowu ki tekke pi niyewu, wek wunong larre ma giyubo, ma binen i kare me agikki piny.”—1 PET. 1:5.
IN IROMO GAMONE NINGO?
Jehovah mono nyikowa me bino i woro me ada nining?
Wan watwero ye ni Jehovah otelwa ki tirane nining?
Jehovah cuko cwinywa nining?
1, 2. (a) Gen ango ma watye kwede ni Lubanga bikonyowa me gwoko gennewa? (b) Jehovah ngeyowa maber rom lakwene?
“NGAT ma biciro nio wa i agikki bilarre.” (Mat. 24:13) I lok man, Yecu onyuto ka maleng ni ka wamito bedo ma kwo i kare ma Lubanga ngolo kop i kom lobo pa Catan-ni, omyero wagwok gennewa nio wa i agikki. Ento man pe te lokke ni Jehovah tamo ni wabiciro peko-ni ki ryekowa nyo tekowa kenwa. Baibul jingo cwinywa ni: “Lubanga genne, pe biye ni gibitwu matek makato ma wuromo cirone, ento i kare ma Catan tye ka bitowu, Lubanga bimiyowu yo ma myero wubwot kwede, wek wubed ki twero [teko] me ciro.” (1 Kor. 10:13) Lok man dong gonye ningo?
2 Wek pe kitemwa makato tekowa me cirone, Jehovah omyero kong onge jami ducu ma makowa, peko ma wabilwenyo kwede, kodi dano ango ma wabedo ki dong ka ma tekowa gik iye. Lubanga tika ada ngeyowa maber? En ngeyo. Ginacoya nyuto ni Jehovah ngeyowa ki acel acel maber. En ngeyo ticwa ki kwowa me nino ducu. En bene romo pimo tamwa ki lok ma tye i cwinywa.—Kwan Jabuli 139:1-6.
3, 4. (a) Kwo ma Daudi okato ki iye nyuto nining ni Jehovah keto tamme i kom dano acel acel? (b) Tic madit ango ma Jehovah tye ka cobone i kare-ni?
3 Mono nen calo gin matek, ka kiwaco ni Lubanga tye ki miti i kom wan dano adana mamwa-ni? Daudi, ma ocoyo Jabuli-ni otamo i kom lapeny man kun waco bot Jehovah ni: “Ka aneno polo, ma in itiyo ki cingi, ki dwe ki lakalatwe ma iketogi i kabedogi liking; dano kono gin ango ma miyo itamo pire?” (Jab. 8:3, 4) Nyo gwok lapeny man obino pi kwo ma Daudi okato ki iye. Jehovah onongo ni Daudi, wod pa Yece obedo “dano ma bitimo gin ma cwinye mito” ci okwanyo en ki ‘ka leko romi, wek obed laker ma loyo jone jo Icrael.’ (1 Cam. 13:14; 2 Cam. 7:8) Tam kong kit ma Daudi nen calo owinyo kwede i nge niang ni Lacwe polo ki lobo oketo tamme i kom lwodo lok ma i cwiny awobi ma obedo lakwat-gu!
4 Pud dong obedo gin me ur tutwal bene me tamo i kom miti ma Jehovah keto i komwa ki acel acel i kare-ni. En tye kacokko kacel “lonyo me rok ducu” me bino i woro me ada kun konyo luticce me gwoko gennegi. (Ag. 2:7) Wek waniang maber kit ma Jehovah konyowa kwede me gwoko gennewa, kong wanenu kit ma en nyiko kwede dano me bino i woro me ada.
LUBANGA AYE ONYIKOWA BOTE
5. Jehovah nyiko dano bot Wode nining? Mi labol.
5 Yecu owacci: “Dano mo pe twero bino bota, ka Wora ma yam oora pe opeye [onyikke].” (Jon 6:44) Lok man nyuto ni me doko lapwonnye pa Kricito, omyero wanong kony pa Lubanga. Jehovah nyiko jo ma gitye calo romi me bino bot Wode nining? Nyikogi kun wok ki i tic me tito kwena maber-ri kacel ki tic pa cwiny maleng. Me labolle, i kare ma Paulo ki lumiconari luwote onongo gitye i Pilipi, gin gurwatte ki dako mo ma nyinge Ludia ci gucako nywako kwena maber-ri kwede. Lok me ginacoya waco ni: Jehovah “oyabo tamme omiyo oketo cwinye ka winyo lok ma Paulo waco.” Ada, Lubanga omiyo cwiny mere me konye wek oniang kwena meno, ma omiyo en kacel ki lupacone gunongo batija.—Tic. 16:13-15.
6. Lubanga mono onyikowa me bino i woro me ada nining?
6 Gin mutimme i kom Ludia-ni mono onongo dok pat? Pe wacel. Ka ibedo Lakricitayo ma odyere, in bene nongo Lubanga onyiki me bino i woro me ada. Kit ma Wonwa me polo oneno gin mo maber i cwiny Ludia-ni, en bene oneno gin mo maber i cwinyi. I kare ma icako winyo kwena maber-ri, Jehovah okonyi me niang ki miyo cwiny maleng. (1 Kor. 2:11, 12) Ka iyelle me keto gin ma ipwonyo i tic, en goyo laane i yelleni me timo mitine. Ka idyero kwoni bote, cwinye bedo yom. Ki lok ada, nicakke ma icako wot i yo me kwo, Jehovah tye kwedi kare ducu.
7. Wan wangeyo nining ni Lubanga bikonyowa me bedo lugen?
7 Ka dong Jehovah okonyowa me cako wot kacel kwede, en pe wekowa me tic ki tekowa kenwa me medde ki bedo lugen. En ngeyo ni kit ma wan pe wabino i ada piwa kenwa-ni, wan bene pe wabibedo i ada piwa kenwa. I kare ma lakwena Petero tye ka coc bot Lukricitayo ma kiwirogi, en owacci: “Lubanga tye ka gwokowu ki tekke pi niyewu, wek wunong larre ma giyubo, ma binen i kare me agikki piny.” (1 Pet. 1:5) Lok man tiyo pi Lukricitayo ducu dok omyero wan ki acel acel waket iye cwinywa i kare-ni. Pingo? Pien wan ducu wamito kony pa Lubanga wek wabed lugen bote.
KIJUKKE WEK PE OTIM BAL
8. Pingo omyero wagwokke i timo bal?
8 Lyeto me tek pa kwo kacel ki roc ma watye kwede twero weko cwinywa a woko ki i lok me cwiny, ma miyo wabedo i peko me timo bal kadi bed wangeyo nyo pe. (Kwan Jo Galatia 6:1.) Man onen i gin mo mutimme i kwo pa Daudi.
9, 10. Jehovah ojuko Daudi ki i timo bal nining, dok gin ango ma en timo botwa i kare-ni?
9 I kare ma Kabaka Caulo tye ka dwaro en, Daudi onyuto kit me jukke ken pien en pe otiyo ki kare ma onen me neko Kabaka meno ma lanyeko. (1 Cam. 24:2-7) Ento ma pe otero kare malac, bedo ki roc pa Daudi onen woko ka maleng. En onongo mito jami mogo pi jone ci openyo kony ki mwolo bot Laicrael lawote mo ma nyinge Nabal. I kare ma Nabal ogamo lokke ki anywar, cwiny Daudi owang ci ocako wot me cito ka tic i kom jo ducu me ot pa Nabal, kun wiye pe dong tamo ni neko jo ma pe ki bal weko ebedo ki ali me remo i nyim Lubanga. Bino pa Abigail ma ongukke ma peya oo aye okonyo Daudi ki i timo twon bal madit-ti. I kare ma oniang ni Jehovah otiyo ki dako-ni, Daudi owacce ni: “Gipwo Rwot Lubanga pa Icrael, ma tin ocwali ka rwatte kweda-ni! Gipwoyi mulil, gum obed i komi, pi ryekoni maber, mumiyo ijuka tin, omiyo pe atingo alii me oyo remo, ki pi culo kworra kekena ki cinga kikome!”—1 Cam. 25:9-13, 21, 22, 32, 33.
10 Pwony ango ma watwero nongone ki lok man? Jehovah otiyo ki Abigail me juko Daudi ki i timo bal. En timo gin acel-lu i komwa i kare-ni. Omyero pe watam ni Lubanga bicwalo ngat mo teke wacok ki timo bal; pe bene omyero watam ni wangeyo gin ma Lubanga obitimo ma lubbe ki peko moni-ni nyo gin ma en biye ni otimme ma lubbe ki cobbe pa yubbe. (Latit. 11:5) Kadi bed kit meno, pud watwero bedo ki gen ni Jehovah kare ducu ngeyo pekowa dok bikonyowa me bedo lugen. En niangowa ni: “Abipwonyi dok abicimmi yo ma myero ilubi; abimiyi ryeko dok abineni.” (Jab. 32:8) Jehovah miyowa tam nining? Wan watwero nongo adwogi maber ki iye nining? Dok wan watwero bedo labongo akalakala ni Jehovah tye ka telo jone i kare-ni nining? Nen kit ma lapeny magi kigamogi kwede i buk me Niyabo.
PWONY MA TYE ME GWOKOWA
11. I rwom mene ma Jehovah ngeyo kwede ki jami ma timme i kacokke pa jone?
11 I ginanyuta ma kicoyo i buk me Niyabo cura 2 ki 3, Yecu Kricito ma dong tye i deyo ongiyo kacokke abiro me Acia Minor, ma i kom kare ni obedo lobo Turkey. Ginanyuta man nyuto ni Kricito neno jami ki acel acel ma timme i kacokke. I kare mogo en owaco wa nying dano moni-ni ki gin ma otimme, en omiyo pwoc nyo tira ma nongo mitte. Man nyuto gin ango? I cobbe pa ginanyuta man, kacokke abiro ca gicung pi Lukricitayo ma kiwirogi ma gukwo i nge 1914 dok tira ma kimiyo bot kacokke abiro-ni tiyo wa i kom kacokke pa jo pa Lubanga i kare-ni. Pi meno rwatte me moko ni Jehovah tye ka telo jone kun tiyo ki Wode. Wan watwero nongo adwogi maber ki i tira man nining?
12. Wan watwero ye ni Jehovah otirwa nining?
12 Yo acel ma waromo nongo kwede adwogi maber ki i tira me mar pa Jehovah aye ka wakwano kwan piwa kenwa. Jehovah miyo tira mapol me Ginacoya kun wok ki i bukke ma lagwok ot ma lagen coyo. (Mat. 24:45) Me nongo adwogi maber ki iye, omyero wakwany kare me kwanone ki keto gin ma wapwonyo i tic. Kwan piwa kenwa obedo yo acel ma Jehovah twero “gwoko [wa] miyo pe [wa]poto.” (Juda 24) In tika dong nino mo ikwano gin mo ki i bukkewa ci itamo ni kicoyo piri? Ye tira meno calo gin ma tye ka a ki bot Jehovah. Calo kit ma laremmi mo romo gwelo gwoki pi nyuti gin mo, Jehovah twero tic ki cwiny mere maleng me nyutti kitti mo ma omyero i lokki. Ka waye tira pa cwiny man, nongo watye ka ye ni Jehovah otirwa. (Kwan Jabuli 139:23, 24.) Pi meno, ber me ngiyo yub ma watye kwede me kwan piwa kenwa.
13. Pingo obedo gin me ryeko me ngiyo yub ma watye kwede me kwan piwa kenwa?
13 Cawa malac ma wacwalo i galowang twero kwalo cawa ma myero wati kwede me kwan piwa kenwa. Omego mo acel owacci: “Yot adada me weko kwan piwa kenwa kato. Gigalowang dwong ma pe wacce, dok welgi yot kato kare mo keken. Tye i TV, Kompiuta, ki dong cim cing-gu. Tye ma gurumowa woko dyere.” Ka pe wagwokke, ci cawa ma myero watii kwede me kwan piwa kenwa rweny tuko tuko paka pe wamedo ki kwan. (Ep. 5:15-17) Ngat acel acel omyero openye kekene ni: ‘An mono akwanyo kare me kwano Baibul i yo matut tyen adi? An tika akwanyo kare keken ka atye ki pwony ma kimiya nyo dul ma mito akwana pi yubbe pi cokke?’ Ka tye kit meno, ci itwero tic ki otyeno me woro pi jo me ot nyo me kwan kekeni pi nongo ngec me wel ma Jehovah miyo pi gwokowa pi nongo larre.—Car. 2:1-5.
CUKO CWINY KONYOWA ME CIRO PEKO
14. Ginacoya nyuto nining ni Jehovah keto cwinye i kit ma wan wawinyo kwede?
14 Daudi orwatte ki peko mapol i kwone. (1 Cam. 30:3-6) Lok ma en ocoyo ki teko pa cwiny maleng nyuto ni Jehovah onongo ngeyo kit ma en winyo kwede. (Kwan Jabuli 34:18; 56:8.) Lubanga ngeyo maber kit ma wawinyo kwede. Ka ‘cwinywa goro’ nyo watye ki ‘arem madwong i cwinywa,’ ci en nyikke cok botwa. Man twero miniwa kwe cwiny kit ma okweyo kwede cwiny Daudi ma owero ni: “Abibedo ki yomcwiny madwong pi mar meri ma pe lokke, pien dong ityeko neno can ma omaka, dok ityeko winyo koko me can ma odiya.” (Jab. 31:7) Ento Jehovah pe ngeyo pekowa keken. En gwokowa kun miniwa kwe cwiny dok cuko cwinywa. Yo acel ma en timo ki man en aye ni en tiyo ki cokke pa Lukricitayo.
15. Pwony ango ma wanongo ki kom gin ma otimme i kom Acap?
15 Adwogi maber acel ma wanongo i bedo i cokke nen i gin ma otimme i kom Acap. Bedo ka keto tamme i kom kit ma jo ma kitgi atir gideno can kun nongo lutim maraco ginongo kwo mayot oturo cwiny Acap woko. En otito kit ma ewinyo kwede ni: “Abedo ki keccwiny, ma cwinya oton adada.” Macalo adwogine, en onongo cok giko tic pi Jehovah woko. Ngo ma okonyo Acap me dwoko cwinye? En owaci, “acito i ot maleng pa Lubanga.” Ki kunnu, i kare ma en tye i kin luwote ma giworo Jehovah, en ocako bedo ki neno matir. En oneno ni kuc pa lutim maraco-ni onongo tye pi tutuno dok ni Jehovah kadi ningo bineno ni eweko jami ducu odok kakare. (Jab. 73:2, 13-22) Rom aroma kwedwa i kare-ni. Lweny ki jami ma pe tye atir me lobo pa Catan-ni twero balo cwinywa mada. Cokke kacel ki omegiwa ki lumegiwa miyo yamo kutowa dok konyowa me nongo yomcwiny i tic pi Jehovah.
16. Wan wanongo adwogi maber ki i lanen pa Anna nining?
16 Ket kong ni ka gin mo ma tye ka timme i kacokke miyo binoni i cokke bedo tek kono? Romo bedo ni iweko mot mo me tic i kacokke dok man miyo lewic maki nyo winye manok tye i kin in ki omego nyo lamego mo. Ka tye kit meno, ci itwero nongo ni lanen pa Anna tye me kony boti. (Kwan 1 Camuel 1:4-8.) Wi po ni cwinye onongo otur mada pi gin mo ma obedo ka timme i otgi ma lubbe ki nyeke Penina. Peko meno onongo tiko medde doko marac mwaka ki mwaka ka jo me otgi gucito i Cilo ka miyo gityer bot Jehovah. Cwiny Anna onongo ton kun “bedo ka koko, ci pe camo.” Ento man pe oweko en okwero bino i nino me woro Jehovah. Jehovah oneno ni Anna lagen ci ogoyo laa i kome.—1 Cam. 1:11, 20.
17, 18. (a) I yo ango ma wanongo ki cuko cwiny i cokke? (b) In iwinyo nining pi gwok maber ma Jehovah miyo pi konyowa me nongo larre?
17 Lukricitayo me kare-ni gitye ki tyen lok me poro lanen pa Anna. Omyero wabed lugen ka odok i lok me bino i cokke. Wan ducu wangeyo maber ni cokke pire tek pi cuko cwinywa. (Ibru 10:24, 25) Bedo kacel ki Lukricitayo luwotwa kweyo cwinywa. Lok mo ma kiwaco i pwony nyo lagam ma kimiyo romo gudu cwinywa. I boko lok ma nongo cokke peya ocakke ki i nge tumme, omego nyo lamego mo romo ciko ite me winyo pekowa nyo loko lok me kweyo cwinywa. (Car. 15:23; 17:17) Ka wawero wer ki dwan malongo bot Jehovah, ci cwinywa bedo yom. Tutwalle ka tamwa opong ki “jami mapol,” nongo wamito cuko cwiny ma wanongo ki i cokke ka ma Jehovah ‘kweyo cwinywa’ kun konyowa me cung matek i bedo lugen.—Jab. 94:18, 19.
18 Ka watye i te gwok pa Lubangawa, wawinyo kit ma laco Jabuli owinyo kwede, ma owero bot Jehovah ni: “In ibedo ka mako cinga lacuc bene. Itela ki tam ma ibedo ka miya.” (Jab. 73:23, 24) Pud dong watye ki pwoc madit bot Jehovah ni en gwokowa pi nongo larre!
[Peny me Kwan]
[Cal ma tye i pot karatac 29]
In bene Jehovah aye ma onyiki
[Cal ma tye i pot karatac 30]
Wan wanongo gwok pa Lubanga ki keto tirane i tic
[Cal ma tye i pot karatac 31]
Cuko cwiny ma wanongo aye miyo waciro peko
