Yehova Alatucingilila Pa Kuti Tukapusuke

“Imwe mwalitetekela Lesa, na o ku maka yakwe akulamusunga pa kuti mukamone ipusukilo ilikasokoloka mu nshita ya kulekelesha.”—1 PET. 1:4, 5.

KUTI MWAYASUKA SHANI?

․․․․․

Bushe Yehova atukuliile shani ku kupepa kwa cine?

․․․․․

Kuti twacita shani pa kuti Yehova aletupanda amano?

․․․․․

Bushe Yehova atukoselesha shani?

1, 2. (a) Twashininkisha shani ukuti Lesa kuti atwafwa ukuba aba cishinka? (b) Bushe Yehova alitwishiba bwino sana?

BAIBOLO itila: “Uwashipikisha ukufika na ku mpela, e ukapusuka.” (Mat. 24:13) Aya mashiwi ayo Yesu alandile yalangilila fye apabuuta ukuti, pa kuti tukapusuke ilyo Lesa akaleta ubupingushi pa calo ca kwa Satana, tulingile ukutwalilila aba cishinka mpaka na ku mpela. Lelo tacalola mu kuti Yehova atwenekela ukushipikisha ku maka yesu na mano yesu. Baibolo itweba ukuti: “Lesa wa cishinka, kabili takamuleke ukweshiwa ubwesho ubo mushingashipikisha, lelo ilyo ubo bwesho bwaisa akafwaya na pa kuti mufuminemo pa kuti mube na maka ya kubushipikisha.” (1 Kor. 10:13) Ni mwi aya mashiwi yalola?

² Pa kuti Yehova engashininkisha ukuti tatweshiwe ukucila pa fyo twingashipikisha, alingile ukutwishiba bwino sana ukubikako na mafya tukwata, ifyo twaba e lyo na papela amaka yesu. Bushe Lesa alitwishiba bwino sana? Ee alitwishiba. Amalembo yatila Yehova alishiba fyonse pali ifwe. Alishiba imibele yesu ne fyo tucita cila bushiku. Aleshiba fye na matontonkanyo yesu ne fiba mu mitima yesu.—Belengeni Amalumbo 139:1-6.

3, 4. (a) lfyo Yehova abikile amano kuli Davidi filanga shani ukuti Lesa alibika amano ku bantu? (b) Mulimo nshi uukalamba uo Yehova alebomba muno nshiku?

³ Bushe cimoneka kwati Lesa tafwaya ukutwishiba fwe bantu untu fye? Kemba wa malumbo Davidi alitontonkenyepo pali ici cipusho, e co alandile kuli Yehova ati: “Ilyo nalolesha imyulu yenu, imilimo ya minwe yenu, umweshi ne ntanda ifyo mwapanga, ntila, wa nshi umuntu mwibukisha no kwibukisha umwina kufwa?” (Amalu. 8:3, 4) Nalimo icalengele ukuti epushe ici cipusho ni co alimwene ifyo Yehova  amubikileko amano. Yehova amwene ukuti umwana uwali umwaice pa bana bonse aba kwa Yese, e ‘muntu uo umutima wakwe watemenwe’ kabili alimufumishe ku ‘kusakamana impaanga pa kuti abe intungulushi’ ya bena Israele. (1 Sam. 13:14; 2 Sam. 7:8) Tontonkanyeni ifyo Davidi afwile aumfwile ilyo aishibe ukuti Kabumba wa fintu fyonse alishibe ifyo aletontonkanya ne fyo aleumfwa apo ali fye ni kacema.

⁴ Nga twatontonkanya pa fyo Yehova atutemwa muno nshiku, kuti twapapa nga nshi. Aleita “ifisuma ifya mu nko” ku kupepa kwa cine kabili aleafwa abantu bakwe ukutwalilila aba cishinka. (Hag. 2:7) Pa kuti twingomfwikisha bwino ifyo Yehova atwafwa ukuba aba cishinka, katubale tulande pa fyo akula abantu ku kupepa kwa cine.

LESA E UKULA ABANTU

5. Bushe Yehova akulila shani abantu ku Mwana wakwe? Londololeni.

⁵ Yesu atile: “Takuli uwingesa kuli ine kano Tata uwantumine, amukula.” (Yoh. 6:44) Aya mashiwi yapilibula ukuti pa kuti tube abasambi ba kwa Kristu, kano Lesa atwafwa. Bushe Yehova akulila shani abantu abapale impanga ku mwana wakwe? Abakula ukupitila mu kubila imbila nsuma na ku mupashi wa mushilo. Ica kumwenako fye, ilyo Paulo na ba mishonari banankwe bali mu Filipi, basangile Lidia kabili balimushimikile imbila nsuma. Amalembo yatila: “Yehova aiswile nga nshi umutima wakwe ku kubika amano ku fyalelanda Paulo.” Ca cine, Lesa abomfeshe umupashi wakwe ukwafwa Lidia ukumfwa umwalolele ubukombe ica kuti ena na ba mu ng’anda yakwe balibatishiwe.—Imil. 16:13-15.

6. Bushe ifwe bonse Lesa atukulila shani ku kupepa kwa cine?

⁶ Bushe ifyacitike kuli Lidia fyalicitikilapo na bambi? Ee. Nga muli Bena Kristu abaipeela, na imwe bene ni Lesa e wamukulila ku kupepa kwa cine. Nga fintu fye Shifwe wa mu muulu amwene ubusuma mu mutima wa kwa Lidia, e fyo amwene ubusuma na muli imwe. Ilyo mwatendeke ukumfwa imbila nsuma, Yehova alibomfeshe umupashi wa mushilo ukumwafwa ukumfwikisha icine. (1 Kor. 2:11, 12) Ilyo mwalebombesha ukukonka ifyo mwalesambilila, alimupaalile pa kuti mulecita ifyo afwaya. Ilyo mwaipeele kuli ena, alitemenwe. Kanshi ukutula fye apo mwatampila ukwenda mu nshila ya ku bumi, Yehova e umutungulula lyonse.

7. Twaishiba shani ukuti Lesa akatwafwa ukutwalilila aba cishinka?

⁷ Ukutula apo Yehova atwafwila ukutendeka ukulaenda nankwe, tabala atusha fweka pa kuti twingaimwena nga tulefwaya ukutwalilila ukuba aba cishinka. Alishiba ukuti filya fine tushaishiile fye mu cine, te kuti tutwalilile mu cine ku maka yesu. Ilyo Petro alelembela Abena Kristu basubwa, atile: “Imwe mwalitetekela Lesa, na o ku maka yakwe akulamusunga pa kuti mukamone ipusukilo ilikasokoloka mu nshita ya kulekelesha.” (1 Pet. 1:4, 5) Aya mashiwi yalabomba ku Bena Kristu bonse kabili bonse tufwile  ukufwaya ukwishiba umo aya mashiwi yalola. Mulandu nshi? Pantu bonse tulafwaya ukwafwa kwa kwa Lesa pa kuti twingatwalilila ukuba aba cishinka kuli ena.

LESA ALATWAFWA UKUKANACITA IFYABIPA

8. Cinshi tulingile ukubela abacenjela ku kukanafwaya ukulufyanya?

⁸ Amafya tukwata ukubikako no kukanapwililika kuti fyalenga twalaba ku fya kwa Lesa ica kutila kuti twalufyanya ukwabula no kwishiba. (Belengeni Abena Galatia 6:1.) Ifi e fyacitike kuli Davidi.

9, 10. Bushe Yehova aleseshe shani Davidi ukucita icabipa kabili atwafwa shani muno nshiku?

⁹ Ilyo Imfumu Shauli yalefwaya ukumwipaya, Davidi ali-ilamine nga nshi pantu tafwaile ukulandula pa fyacitile ilya mfumu ya mufimbila. (1 Sam. 24:2-7) Tapapitile ne nshita, Davidi alifililwe ukuilama. Ilyo alefwaya ifya kulya fya bantu bakwe, alilombele ku mwina Israele munankwe Nabali. Ilyo Nabali amusalwiile pa kwasuka, Davidi alifulilwe ica kuti alefwaya ukwipaya bonse aba mu ng’anda ya kwa Nabali pantu taishibe ukuti nga aipaya umuntu ushilufyenye, mulandu kuli Lesa. Lelo Abigaili, muka Nabali alileseshe Davidi ukukanaipaya umuntu. Apo Davidi alimwene ukuti ni Yehova e wamwafwile, aebele Abigaili ati: “Acindikwe Yehova Lesa wa kwa Israele, uwakutuma buno bushiku mu kunkumanya! Kabili yabe ayapaalwa amano yobe, kabili ube uwapaalwa we wandesha lelo ukusumya umulopa no kuilandwila ku minwe yandi.”—1 Sam. 25:9-13, 21, 22, 32, 33.

¹⁰ Finshi twingasambilila kuli ili ilyashi? Yehova abomfeshe Abigaili ukulesha Davidi ukucita icabipa. Na ifwe bene alatwafwa muno nshiku. Lelo tatufwile ukulaenekela ukuti Lesa akalatuma uwa kutulesha ukucita icabipa. E lyo te kuti twishibe ifyo Lesa engacita pali fyonse ifyacitika pa kuti ukufwaya kwakwe kukafikilishiwe. (Luk. Mil. 11:5) Lelo tulingile ukwishiba ukuti Yehova aleshiba fyonse ifitucitikila kabili akulatwafwa pa kuti tuletwalilila ukuba ne cishinka kuli ena. Alitulaya ati: “Nkakucenjesha no kukusambilisha inshila iyo ufwile ukuyamo. Nkakupanda amano ninshi na menso yandi yali pali iwe.” (Amalu. 32:8) Bushe Yehova atusambilisha shani? E lyo kuti twanonkelamo shani? Kabili kuti twashininkisha shani ukuti Yehova alatungulula abantu bakwe muno nshiku? Natumone ifyo ifi fipusho fyayasukwa mwi buuku lya Ukusokolola.

TULACINGILILWA NGA TULEKONKA UKUFUNDA

11. Finshi ifyo Yehova eshiba ificitika mu filonganino fya bantu bakwe?

¹¹ Mu cimonwa icaba mu Ukusokolola ifipandwa 2 na 3, Yesu Kristu alicecetele ifilonganino 7 ifyali mu Asia Minor. Icimonwa cilangilila ukuti Kristu alamona fyonse ificitika mu filonganino pantu alelumbula na mashina ya bantu. Na kabili alefunda aba mu filonganino nelyo ukubatasha. Bushe ici calelangilila cinshi? Mu kufikilishiwa kwa ici cimonwa, ifilonganino 7 fimininako Abena Kristu abasubilwe pa numa ya 1914, e lyo ifyo abafundile filabomba na ku filonganino fyonse ifya bantu ba kwa Lesa. Kanshi kuti twatila Yehova alabomfya Umwana wakwe ku kutungulula abantu bakwe. Kuti twanonkelamo shani mu butungulushi bwakwe?

12. Bushe kuti twacita shani pa kuti Yehova aletutungulula?

¹² Inshila imo iyo twinganonkelamo  mu butungulushi busuma ubwa kwa Yehova, kupitila mwi sambililo lya pa lwesu. Yehova alabomfya impapulo sha musha wa cishinka, ukutusambilisha mu nshila iisuma. (Mat. 24:45) Pa kuti tulenonkelamo, tulingile ukulabelenga no kulakonka ifyo tulesambilila. Isambililo lya pa lwesu, ni nshila na imbi iyo Yehova ‘atucingililamo pa kuti tatuwile.’ (Yuda 24) Bushe mwalibelengapo fimo mu mpapulo shesu ifyumfwika kwati ni mwe bale-eba? Tulekonka ukufunda no kumona ukuti kulefuma kuli Yehova. Filya fine umunenu engamwikata pa mabeya pa kuti amwebeko fimo, na Yehova kuti abomfya umupashi wa mushilo ukumwebako mumo umo mushicita bwino pa kuti mwawamyako. Nga tulebika amano ku fyo umupashi uletutungulula, ninshi tulesuminisha ukuti Yehova aletutungulula. (Belengeni Amalumbo 139:23, 24.) Kanshi tulingile ukulaibebeta no kumona nga tulabika amano ku kusambilila.

13. Cinshi cingawamina ukubebeta ifyo tusambilila?

¹³ Nga tulepoosa sana inshita ku fya kuleseshamo icitendwe, te kuti tulekwata inshita ya kusambilila ifya kwa Lesa. Munyinefwe umo atile: “Nga taucenjele te kuti ulekwata ne nshita ya kusambilila Baibolo. Ifya kuleseshamo icitendwe nomba fyalifula sana ukucila kale, e lyo kabili abantu tabapoosapo ne ndalama ishingi. Filasangwa na pa TV, pa ma kompyuta na pa mafoni. Fyalifula icine cine.” Nga tatucenjele, inshita ya kusambilila sana Baibolo kuti yaya ilepwa fye panono panono mpaka yapwililila. (Efes. 5:15-17) Bonse tulingile ukuipusha atuti: ‘Bushe miku inga nkwata inshita iya kusambilila sana Icebo ca kwa Lesa? Bushe ni lintu fye nkwata ilyashi nangu nga ndepekanya ukulongana?’ Nga ca kuti e fyo caba, nalimo tulingile ukulabomfya sana inshita ku mapepo ya lupwa nangu kwi sambililo lya pa lwesu, ku kusambilila sana ifya kwa Lesa ifyo Yehova atupekanishisha ifingatucingilila pa kuti tukapusuke.—Amapi. 2:1-5.

IFYO BATUKOSELESHA FILATWAFWA

14. Bushe Amalembo yalanga shani ukuti Yehova alabikako amano ku fyo tumfwa?

¹⁴ Ifyabipa ifingi fyalicitikile Davidi. (1 Sam. 30:3-6) Baibolo ilanda ukuti Yehova alishibe ifyo Davidi aleumfwa. (Belengeni Amalumbo 34:18; 56:8.) Lesa alishiba ifyo na ifwe tumfwa. Nga ‘twaba ne mitima ya bulanda’ nangu nga ‘twasakamikwa,’ Yehova alapalama kuli ifwe. Nga twaishiba ukuti alapalama kuli ifwe, tulasansamuka nga filya Davidi asansamwike. Aimbile ukuti: “Nkaanga no kusekelela mu cikuuku cenu, pantu namumona ukucula kwandi; namwishiba amacushi ya mweo wandi.” (Amalu. 31:7) Yehova tapelela fye pa kumona amacushi yesu, lelo alatusansamusha no kutukoselesha. Alacita ifi ukupitila mu kulongana kwa Bwina Kristu.

15. Finshi twingasambilila ku fyacitike kuli Asafi?

¹⁵ Ifyacitike kuli Asafi kemba wa malumbo fitulanga ubusuma bwaba mu  kuya ku kulongana. Ukulatontonkanya pa lufyengo kwalengele Asafi ukutwishika ubusuma bwaba mu kubombela Lesa. Asafi alifuupwike. Atile: ‘Umutima wandi walikalipe ne mfyo shandi shalikalipe icine cine.’ E calengele ukuti afwaye ukuleka ukubombela Yehova. Cinshi camwafwile ukutwalilila ukubombela Lesa? Atile: “[Nasukile] nayaingila umwa mushilo umwa kwa Lesa.” Ukuba pamo na bantu ba kwa Yehova kwalimwafwile ukushikatala. Alimwene ukuti ukutunguluka kwa bantu babipa kwa pa kashita fye akanono, no kuti Yehova ali no kuwamya ifintu. (Amalu. 73:2, 13-22) Ifi e ficitika na kuli ifwe. Ulufyengo ulwaba mu calo ca kwa Satana kuti lwalenga twafuupuka. Lelo ukulongana pamo na babwananyina kulatusansamusha kabili kulalenga twaba ne nsansa ilyo tulebombela Yehova.

16. Finshi twingasambilila ku fyacitike kuli Hana?

¹⁶ Kuti caba shani nga ca kuti mu cilonganino mwaba ifyalenga ukuti ciletukosela ukulaya mu kulongana? Nalimo kuti mwalilekele mwe bene ukubomba imilimo mu cilonganino e lyo muleumfwa ububi, nangu mwalipusene na munyinenwe mu cilonganino. Nga e fyo caba, ifyacitike kuli Hana kuti fyamwafwa. (Belengeni 1 Samwele 1:4-8.) Ibukisheni ukuti aleumfwa sana ububi pa bwafya bwali pali ena na Penina umukashi munankwe. Ubwafya bwalekulilako fye cila mwaka ulupwa nga lwaya ku kutuula amalambo kuli Yehova ku Shilo. Hana aleshikitika sana ica kuti “alelila no kulya iyo.” Lelo ici tacalengele ukuti aleke ukubombela Yehova. E co Yehova alimwene bucishinka bwakwe kabili alimupaalile.—1 Sam. 1:11, 20.

17, 18. (a) Tukoseleshiwa shani ilyo tuli mu kulongana kwa cilonganino? (b) Bushe mumfwa shani pa fyo Yehova amusakamana?

¹⁷ Abena Kristu muno nshiku balingile ukulaya lyonse mu kulongana nga filya Hana alecita. Nga fintu bonse twaishiba, ukulongana kulatukosha sana. (Heb. 10:24, 25) Ukutemwa kwa bamunyinefwe kulatusansamusha. Ifyo munyinefwe alanda mu lyashi nelyo ifyo ayasukapo pa kulongana, filatukoselesha. Ilyo tulelanshanya na bamunyinefwe lintu tushilatendeka ukulongana nelyo pa numa ya kulongana, kuti twaebako bamunyinefwe amafya tukwete kabili kuti batukoselesha. (Amapi. 15:23; 17:17) Lintu tuleimbila Yehova tulasansamuka. Nga tuli na “matontonkanyo” tulakoseleshiwa sana nga twaya mu kulongana pantu Yehova ‘alatusansamusha’ kabili alatutungilila pa kuti tutwalilile aba cishinka.—Amalu. 94:18, 19.

¹⁸ Ifyo Lesa atusakamana filalenga tuleumfwa abacingililwa nge fyo kemba wa malumbo Asafi aumfwile ilyo aimbiile Yehova ati: “Mwaikata ukuboko kwandi ukwa ku kulyo. Ku mano ayo mwampanda e ko mukantungulwila.” (Amalu. 73:23, 24) Ala tulatasha nga nshi pa fyo Yehova atucingilila pa kuti tukapusuke!

[Ifipusho]

[Icikope pe bula 28]

Na imwe bene Yehova alimukula

[Icikope pe bula 30]

Tulacingililwa nga tulekonka ifyo Lesa atufunda

[Icikope pe bula 31]

Ifyo batukoselesha filatwafwa ukushipikisha