Jehova i Lukaot Gud Long Yumi Blong Sevem Yumi

“Hem i stap yusum bilif ya blong yufala blong lukaot long yufala long paoa blong hem, gogo bambae i sevem yufala. Hem i mekem ol samting oli rere finis blong sevem yufala, mo bambae hem i soemaot ol samting ya long Lasdei.”—1 PITA 1:5.

?BAMBAE YU YU ANSA OLSEM WANEM?

․․․․․

?Jehova i mekem wanem blong pulum yu yu kam long tru wosip?

․․․․․

?Yumi mekem wanem blong letem Jehova i lidim yumi long ol advaes blong hem?

․․․․․

?Jehova i mekem olsem wanem blong leftemap tingting blong yumi?

1, 2. (a) ?From wanem yumi save se bambae God i givhan long yumi blong stanap strong? (b) ?Jehova i save gud yumi olsem wanem?

“MAN we i stanap strong gogo olgeta samting ya i finis, bambae God i sevem hem.” (Mat. 24:13) Ol tok blong Jisas oli soemaot se yumi mas stanap strong go kasem en, nao bambae God i sevem yumi taem hem i spolem wol blong Setan. Be Jehova i no wantem se yumi folem prapa waes blong yumi, mo yumi stanap strong long paoa blong yumi nomo. Baebol i talem se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.” (1 Kor. 10:13) ?Ol tok ya i tijim yumi long wanem?

² Jehova i lukaot gud se samting we i traem yumi i no strong tumas long yumi. Hem i save mekem olsem from we hem i save gud yumi. Hem i save ol trabol we i kasem yumi, hem i save se yumi olsem wanem, mo hem i save ol samting we i strong tumas long yumi. ?I tru se God i save gud yumi olsem? Yes. Baebol i talem se Jehova i save olgeta samting long saed blong yumi. Hem i save ol samting we yumi mekem evri dei. Mo hem i save ol samting we yumi stap tingting long hem, mo wanem we i stap long hat blong yumi.—Ridim Ol Sam 139:1-6.

3, 4. (a) ?Stori blong Deved i soemaot olsem wanem se Jehova i save gud yumi wanwan? (b) ?Tede Jehova i mekem wanem we i soemaot se hem i save yumi?

³ ?I tru se God ya we i gat olgeta paoa, hem i wantem save yumi ol man? Yumi man yumi nating nomo. Deved tu i tingbaot samting ya. Hem i talem long Jehova se: “Taem mi mi luk skae we yu yu mekem, mo mi luk mun mo ol sta we yu yu putum olgeta oli stap long stret ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu lukaot gud long hem.” (Sam 8:3, 4) Maet Deved i askem kwestin ya from we  Jehova i soemaot se hem i save Deved. Deved i lasbon pikinini boe blong Jese. Taem Deved i yangfala nomo, hem i stap lukaot long ol sipsip. Long taem ya, Jehova i luk Deved se hem i wan “man we i stret gud long fes blong hem” mo Jehova i jusumaot hem blong i king blong Isrel. (1 Saml. 13:14; 2 Saml. 7:8) Nating se Deved i wan yangfala nomo we i stap lukaot long ol sipsip, God we i mekem skae mo graon i save ol tingting blong Deved mo se hem i harem olsem wanem. !Yu traem tingbaot se Deved i harem olsem wanem taem hem i kasem save samting ya!

⁴ Tede tu yumi sapraes long fasin blong Jehova we i save gud yumi. Hem i stap pulum ol man we oli olsem ‘ol gudgudfala samting blong olgeta kantri,’ oli kam man blong hem. (Hag. 2:7) Hem i stap givhan tu long olgeta we oli mekem wok blong hem blong oli stanap strong. ?Jehova i givhan long olgeta olsem wanem? Fastaem, bambae yumi tokbaot samting we Jehova i mekem blong pulum ol man oli kam long hem.

GOD I PULUM YU YU KAM LONG HEM

5. ?Jehova i pulum ol man oli kam long Pikinini blong hem olsem wanem? Yu talem wan stori.

⁵ Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Ol tok ya oli soemaot se God i mas givhan long yumi, blong yumi save kam wan disaepol blong Kraes. God i pulum yumi, blong yumi kam long Pikinini blong hem. ?Hem i mekem samting ya olsem wanem? Hem i yusum wok blong prij mo tabu spirit blong hem. Taem Pol mo ol narafala misinari oli stap long Filipae, oli toktok wetem wan woman we nem blong hem Lidia. Baebol i talem se taem oli talemaot gud nius long woman ya, Jehova i “openem tingting blong hem blong i bilif long tok blong Pol.” God i yusum spirit blong hem blong givhan long Lidia blong i kasem save long gud nius mo i folem. Biaen, Lidia mo famle blong hem oli baptaes.—Wok 16:13-15.

6. ?God i mekem wanem blong pulum yumi evriwan i kam long tru wosip?

⁶ ?God i mekem olsem long Lidia nomo? Sipos yu yu givim laef blong yu i go long God, hem i pulum yu tu yu kam long tru wosip. Hem i luk wan gudfala samting long hat blong yu, sem mak olsem we hem i luk wan gudfala samting long Lidia. Taem yu jes stat blong lesin long gud nius, God i yusum tabu spirit blong hem blong givhan long yu, blong yu kasem save long gud nius mo yu folem ol tok blong hem. (1 Kor. 2:11, 12) Taem yu traehad blong folem samting we yu lanem, hem i blesem yu. Mo taem yu givim laef blong yu i go long hem, hem i glad we i glad. Yes, Jehova i givhan long yu taem yu jes stat blong mekem wok blong hem mo hem i gohed blong givhan long yu kasem naoia.

7. ?From wanem yumi save se bambae God i givhan long yumi blong stanap strong?

⁷ Jehova i givhan long yumi taem yumi stat blong mekem wok blong hem. Taswe, hem i save givhan long yumi blong gohed blong mekem wok blong hem. Hem i save se yumi no kam long trutok from tingting blong yumi nomo, mo hem i save se bambae yumi no stap long trutok long paoa blong yumi nomo. Aposol Pita i talem long ol Kristin we tabu spirit i makemaot olgeta se: “Hem i stap yusum bilif ya blong yufala blong lukaot long yufala long paoa blong hem, gogo bambae i sevem yufala. Hem i mekem ol samting oli rere finis blong sevem yufala, mo bambae hem i soemaot ol samting ya long Lasdei.” (1 Pita 1:5) Ol tok we Pita i talem i stret long olgeta Kristin. ?Tede Jehova i lukaot gud long yumi olsem  wanem? Yumi wantem save ansa blong kwestin ya from we yumi evriwan i nidim help blong God blong stanap strong.

GOD I SAVE BLOKEM YUMI BLONG YUMI NO MEKEM SIN

8. ?From wanem yumi mas lukaot gud se yumi no mekem bigfala sin?

⁸ Ol trabol we yumi kasem long laef mo ol slak fasin blong yumi, i save mekem se yumi no gat tingting olsem Jehova. Nao maet yumi folem rod we bambae i lidim yumi blong mekem bigfala sin, be yumi no save. (Ridim Galesia 6:1. *) Hemia nao samting we i hapen long Deved.

9, 10. ?Jehova i mekem wanem blong blokem Deved blong i no mekem bigfala sin? ?Jehova i mekem wanem blong yumi tede?

⁹ Deved i bos gud long tingting blong hem taem King Sol i traem blong kilim hem i ded. Nating se hem i gat janis blong kilim Sol i ded, be hem i no mekem. (1 Saml. 24:2-7) I no longtaem biaen, Deved i no moa bos long tingting blong hem. Hem wetem ol man blong hem oli nidim kakae mo wota. Ale, hem i askem long wan man Isrel we nem blong hem Nabal. Be Nabal i no wantem givhan long Deved mo i tok nogud long hem. Deved i kros we i kros. Hem i mekem desisen blong kilim i ded Nabal wetem olgeta man long haos blong hem. Deved i no tingbaot se Jehova bambae i jajem hem from we ol man ya oli no gat fol. Be woman blong Nabal we nem blong hem Abigel, i blokem Deved blong i no mekem bigfala sin ya. Deved i kasem save se Jehova i yusum Abigel blong blokem hem. Taswe hem i talem long Abigel se: “!Mi mi presem Hae God! Hem i laef, i stap we i stap, mo hem i God blong yumi. Hem nao i sanem yu blong yu kam mitim mi tede. Mi talem tangkiu long hem from gudfala tingting ya blong yu, mo from samting ya we yu mekem naoia, we yu blokem mi, blong mi no go kilim man ya i ded, mo mi no go mi wan, blong givimbak ol samting nogud tu we hem i mekem long mi.”—1 Saml. 25:9-13, 21, 22, 32, 33.

¹⁰ ?Yumi lanem wanem long stori ya? Jehova i save blokem yumi blong yumi no mekem bigfala sin. Be yumi no mas ting se evri taem bambae Jehova i sanem wan man blong blokem yumi. Yumi no save stret wanem bambae Jehova i mekem mo wanem bambae hem i letem, blong i mekem tingting blong hem i kamtru. (Pri. 11:5) Yumi save gat strong tingting se oltaem Jehova i save wanem i stap hapen long laef blong yumi, mo bambae hem i givhan long yumi blong stanap strong. Hem i promes se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” (Sam 32:8) ?Jehova i givim gudfala tingting long yumi olsem wanem? ?Gudfala tingting i givhan long yumi olsem wanem? ?Mo from wanem yumi save se Jehova i stap lidim ol man blong hem tede? Buk blong Revelesen i givim ansa long ol kwestin ya.

HEM I GIVIM ADVAES BLONG LUKAOT GUD LONG YUMI

11. ?Jehova i save gud wanem long saed blong ol kongregesen?

¹¹ Wan vison long Revelesen japta 2 mo 3 i tokbaot King Jisas Kraes se hem i luk samting we i stap hapen long seven kongregesen long Esia Maena. Kraes i luk se ol kongregesen ya oli olsem  wanem. Be i no hemia nomo. Hem i tokbaot sam samting we i stap hapen long ol kongregesen ya wanwan, mo hem i tokbaot samfala we oli stap long ol kongregesen ya. Hem i talem ol gudfala toktok mo i givim advaes we i stret long olgeta. ?Vison ya i tijim yumi long wanem? Seven kongregesen ya i minim ol Kristin we tabu spirit i makemaot olgeta afta long 1914. Ol advaes we Kraes i givim, i go fastaem long ol tabu Kristin. Be ol advaes ya i save givhan tu long olgeta kongregesen blong ol man blong God tede. Taswe, yumi save talem se Jehova i stap yusum Pikinini blong hem blong i lidim ol man blong hem tede. ?Yumi mekem wanem blong letem Jehova i lidim yumi?

12. ?Yumi mekem wanem blong letem Jehova i lidim yumi?

¹² Wan samting we yumi save mekem blong letem Jehova i lidim yumi, hemia se yumi stadi yumi wan. Jehova i givim plante advaes long yumi long ol buk blong slef we i stret mo waes. (Mat. 24:45, NW) Be sipos yumi wantem se ol advaes ya i givhan long yumi, yumi mas tekem taem blong stadi gud long hem, mo biaen yumi folem wanem we yumi lanem. Taem yumi mekem stadi blong yumi wan, Jehova i save ‘holem yumi, blong yumi no foldaon.’ (Jud 24) Maet samtaem yu ridim wan samting long ol buk blong ogenaesesen mo yu talem se, ‘Ol tok ya i stret long mi wantaem.’ Yu yu mas folem ol advaes ya we Jehova i givim long yu. Olsem wan fren we i tajem solda blong yu blong yu lukluk hem, Jehova i yusum spirit blong hem, blong mekem yumi tingbaot sam fasin blong yumi we yumi mas kam gud moa long olgeta. Taem yumi folem advaes we i kamaot long tabu spirit, yumi letem Jehova i lidim yumi. (Ridim Ol Sam 139:23, 24.) I gud yumi tokbaot moa, fasin blong yumi blong stadi yumi wan.

13. ?From wanem yumi mas tingbaot stadi blong yumi wan?

¹³ Sipos yumi yusum tumas taem blong pleplei mo spel, bambae yumi no gat taem blong stadi yumi wan. Wan brata i talem se i isi nomo blong mekem olsem. ?From wanem? Hem i talem se: “Naoia ol pleplei oli plante moa i bitim bifo, mo oli no sas tumas. Yu save lukluk televisin, pleplei long kompiuta mo long telefon. Ol pleplei oli stap evri ples raonabaot long yumi.” Sipos yumi no lukaot gud, sloslo yumi save yusum tumas taem long ol pleplei, nao yumi no moa gat taem blong stadi gud yumi wan. (Efes. 5:15-17) I gud yumi tingbaot ol kwestin ya se: “?Mi mi stadi long ol samting long Tok blong God we oli had moa blong kasem save long olgeta? ?Mi mi mekem olsem plante taem? ?No mi mi stadi gud nomo taem mi gat wan tok no wan haf long miting?” Yumi save yusum naet blong Famle Wosip mo taem we yumi putum blong stadi yumi wan, blong kasem save long ol tok blong God we oli had moa. Yumi save lukaot waes blong Jehova long Baebol, olsem we yumi stap traem faenem wan sas samting we man i berem. Waes blong Jehova i save blokem gud yumi mo i givhan long yumi blong stanap strong go kasem en.—Prov. 2:1-5.

HEM I LEFTEMAP TINGTING BLONG YUMI, BLONG YUMI STANAP STRONG

14. ?Baebol i soemaot olsem wanem se Jehova i tingbaot yumi?

¹⁴ Deved i kasem plante hadtaem long laef blong hem we i mekem hem i harem nogud. (1 Saml. 30:3-6) Baebol i soemaot we Jehova i save se Deved i harem olsem wanem. (Ridim Ol Sam 34:18; 56:8.) Jehova i save tu se yumi harem olsem  wanem. Yumi mas tingbaot se Jehova i save we tingting blong yumi “i kam nogud” mo “i foldaon olgeta.” Bambae hemia i leftemap tingting blong yumi, sem mak olsem we i leftemap tingting blong Deved. Deved i singsing se: “Bambae mi mi hapi, mi glad tumas, from fasin ya blong yu we oltaem yu lavem man tumas. Taem mi mi harem nogud, be yu yu luk, mo taem mi mi stap long trabol, be yu yu save.” (Sam 31:7) Be Jehova i no stap tingbaot ol trabol blong yumi nomo. Hem i leftemap tingting blong yumi mo i mekem yumi harem gud bakegen, blong yumi stanap strong. Hem i yusum ol Kristin miting blong mekem olsem.

15. ?Yumi save lanem wanem long stori blong Asaf?

¹⁵ Stori blong Asaf i givhan long yumi blong kasem save from wanem i gud blong go long ol miting. Asaf i stap tingbaot we ol gudfala man oli stap harem nogud, be ol rabis man oli stap win long laef blong olgeta. Nao tingting blong Asaf i foldaon olgeta. Hem i stap tingting se hem i wosipim Jehova, be i blong nating nomo. Hem i talem se: “Oli spolem tingting blong mi, mo oli mekem mi mi harem nogud tumas.” Ale klosap Asaf i no moa mekem wok blong Jehova. ?Wanem i givhan long Asaf blong i gat gudfala tingting bakegen? Asaf i talem se: ‘Mi go insaed long haos blong God.’ Yes, taem Asaf i joen wetem ol narafala man blong Jehova, hem i gat stret tingting bakegen. Hem i luksave se ol man nogud oli stap harem gud, be blong smoltaem nomo. Jehova bambae i jajem olgeta. (Sam 73:2, 13-22) Maet samtaem yumi harem olsem Asaf. Tingting blong yumi i foldaon mo yumi harem nogud, from we long wol ya blong Setan yumi luk ol fasin we oli no stret nating. Be taem yumi joen wetem ol brata mo sista, yumi kasem paoa mo yumi harem gud blong gohed blong mekem wok blong Jehova.

16. ?Fasin blong Hana i givhan long yumi olsem wanem?

¹⁶ Yu traem tingbaot sipos wan samting i hapen long kongregesen we i mekem i had long yu blong go long ol miting. Maet fastaem yu mekem wok long kongregesen be biaen yu mas lego wok ya, mo yu harem se yu sem. Maet yu no joen gud wetem wan brata no sista. ?Bambae yu mekem wanem? Stori blong Hana i save givhan long yu. (Ridim 1 Samuel 1:4-8.) Hana i woman blong Elkana. Narafala woman blong Elkana hemia Penina. Oltaem, Penina i stap jikim Hana, i mekem hem i harem nogud tumas. Evri yia oli go long haos blong God long Silo blong givim ol sakrefaes i go long Jehova. Hana i harem moa nogud long taem ya i bitim ol narafala taem. “Hem i stap krae, mo i no wantem kakae.” Be hem i go yet long haos blong Jehova blong mekem wosip long hem. Jehova i glad long Hana from we hem i stanap strong, mo Jehova i blesem hem.—1 Saml. 1:11, 20.

17, 18. (a) ?Wanem i leftemap tingting blong yumi taem yumi go long ol miting? (b) ?Wanem tingting blong yu long fasin blong Jehova blong lukaot long yu mo lavem yu?

¹⁷ Ol Kristin tede oli mas folem fasin blong Hana. Yumi mas go oltaem long ol miting. Ol miting oli leftemap tingting blong yumi evriwan. (Hib. 10:24, 25) Taem yumi go long ol miting, yumi harem se ol Kristin brata sista oli lavlavem olgeta, mo hemia i mekem yumi harem gud. Maet sam toktok we yumi harem long wan tok no wan ansa, i kasem hat blong yumi. Maet wan brata no wan sista i gat kaen fasin blong lesin long yumi mo i talem sam toktok we i mekem yumi harem gud bakegen. (Prov. 15:23; 17:17) Taem yumi singsing long Jehova, hemia i leftemap tingting blong yumi mo yumi harem gud bakegen. Ol gudfala toktok long ol miting i save leftemap tingting blong yumi, speseli taem yumi ‘wari mo tingting tumas.’ Long ol miting, Jehova i mekem “tingting blong yumi i kam gud bakegen,” blong yumi save stanap strong mo gohed blong mekem wok blong hem.—Sam 94:18, 19.

¹⁸ Jehova i lavem yumi mo i mekem yumi harem se yumi sef. Asaf tu i harem olsem, hem i singsing long Jehova i se: “Oltaem mi mi stap klosap long yu, mo yu stap holem mi long han blong mi. Yu yu stap lidim mi long ol toktok blong yu.” (Sam 73:23, 24) !Yumi glad tumas we Jehova i stap lukaot gud long yumi mo i givhan long yumi blong stanap strong go kasem en!

[Futnot]

[Kwestin]

[Tok blong pija long pej 29]

Jehova i pulum yu yu kam long tru wosip

[Tok blong pija long pej 30]

Sipos yumi folem ol advaes blong God, bambae hem i lukaot gud long yumi

[Tok blong pija long pej 31]

Ol tok we i leftemap tingting blong yumi, i givhan long yumi blong stanap strong