Kita Gipanalipdan ni Jehova Alang sa Kaluwasan
Kita Gipanalipdan ni Jehova Alang sa Kaluwasan
“[Kamo] gipanalipdan sa gahom sa Diyos pinaagi sa pagtuo alang sa kaluwasan nga andam nang igapadayag sa kataposang yugto sa panahon.”—1 PED. 1:5.
UNSAON NIMO PAGTUBAG?
Sa unsang paagi kita gikabig ni Jehova ngadto sa matuod nga pagsimba?
Unsaon nato pagpakita nga kita nagpagiya sa tambag ni Jehova?
Sa unsang paagi kita gidasig ni Jehova?
1, 2. (a) Nganong makasalig kita nga ang Diyos motabang nato nga makapabiling matinumanon? (b) Unsa ka sinati si Jehova sa matag usa kanato?
“SIYA nga nakalahutay hangtod sa kataposan mao ang maluwas.” (Mat. 24:13) Gipakita sa mga pulong ni Jesus nga aron kita maluwas dihang laglagon na sa Diyos ang kalibotan ni Satanas, angay kitang magmatinumanon hangtod sa kataposan. Apan wala kini magpasabot nga gidahom ni Jehova nga molahutay kita sa ato lang kaugalingong kaalam o kusog. Ang Bibliya nagpasalig: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.” (1 Cor. 10:13) Unsay gipasabot niana?
2 Dili tugotan ni Jehova nga tentalon kita nga labaw sa atong maantos. Mahimo niya kana kay siya nahibalo sa tanan bahin kanato, lakip sa atong mga problema, sa atong pagkatawo, ug sa kaya natong maantos. Ingon ba gyod niana ang pagkaila sa Diyos kanato? Oo. Gibutyag sa Kasulatan nga si Jehova sinati kaayo sa matag usa kanato. Nahibalo siya sa atong adlaw-adlawng kalihokan ug batasan. Nasayod pa gani siya kon unsay anaa sa atong hunahuna ug kasingkasing.—Basaha ang Salmo 139:1-6.
3, 4. (a) Sa unsang paagi gipakita sa kasinatian ni David nga interesado si Jehova sa matag indibiduwal? (b) Sa unsang paagi si Jehova nagpakitag interes kanato karon?
3 Lisod bang tuohan nga interesado gyod ang Diyos sa mga tawo? Ang salmistang si David namalandong niining pangutanaha ug miingon kang Jehova: “Sa dihang makakita ako sa imong mga langit, ang mga buhat sa imong mga tudlo, sa bulan ug sa mga bituon nga imong giandam, unsa ba ang may-kamatayong tawo nga ikaw nagahunahuna man kaniya?” (Sal. 8:3, 4) Tingali nakapangutana siya niini tungod sa iya mismong nasinatian. Sa dihang usa pa lang ka magbalantay sa karnero si David, ang kamanghorang anak ni Jese, gikahimut-an na siya ni Jehova ug gipili ‘aron mahimong pangulo’ sa Israel. (1 Sam. 13:14; 2 Sam. 7:8) Handurawa ang gibati ni David dihang iyang nasayran nga ang Maglalalang sa uniberso interesado sa iyang hunahuna ug pagbati, bisag usa lang siya ka batan-ong magbalantay!
4 Interesado usab kaayo si Jehova kanato karon. Iyang gitigom sa matuod nga pagsimba “ang tilinguhaong mga butang sa tanang kanasoran.” (Hag. 2:7) Gitabangan usab niya ang iyang mga alagad nga makapabiling matinumanon. Aron mas masabtan nato kon sa unsang paagi niya kini gihimo, ato unang tagdon kon giunsa niya pagkabig ang mga tawo ngadto sa matuod nga pagsimba.
GIKABIG SA DIYOS
5. Giunsa pagkabig ni Jehova ang mga tawo ngadto sa iyang Anak? Paghatag ug pananglitan.
5 Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Gipakita niini nga aron mahimo kitang tinun-an ni Kristo, gikinahanglan nato ang tabang sa Diyos. Sa unsang paagi gikabig ni Jehova ang mga tawo ngadto sa iyang Anak? Pinaagi sa pagsangyaw sa maayong balita ug sa paglihok sa balaang espiritu. Pananglitan, sa didto si Pablo ug ang kauban niyang mga misyonaryo sa Filipos, ilang nahimamat si Lydia ug gipaambit kaniya ang maayong balita. Ang Bibliya nag-ingon: “Gibuksan pag-ayo ni Jehova ang iyang kasingkasing aron maminaw sa mga butang nga gisulti ni Pablo.” Oo, gigamit sa Diyos ang iyang espiritu aron masabtan ni Lydia ang mensahe mao nga siya ug ang iyang pamilya nabawtismohan.—Buh. 16:13-15.
6. Sa unsang paagi kita gikabig sa Diyos ngadto sa matuod nga pagsimba?
6 Kang Lydia lang ba kadto nahitabo? Dili. Kon ikaw usa ka dedikadong Kristohanon, gikabig ka usab sa Diyos ngadto sa matuod nga pagsimba. Sama kang Lydia, may nakita usab nga maayo ang atong langitnong Amahan sa imong kasingkasing. Dihang naminaw ka sa maayong balita, gitabangan ka ni Jehova nga masabtan kini pinaagi sa balaang espiritu. (1 Cor. 2:11, 12) Dihang gipadapat nimo ang imong nakat-onan, gipanalanginan niya ang imong mga paningkamot. Nalipay gayod si Jehova dihang gidedikar nimo ang imong kinabuhi kaniya. Oo, si Jehova padayong nagtabang kanimo sukad sa imong pagsugod sa pag-alagad kaniya.
7. Nganong nahibalo kita nga ang Diyos motabang kanato nga makapabiling matinumanon?
7 Sanglit gitabangan kita ni Jehova nga makasugod sa pag-alagad kaniya, siya motabang usab kanato nga makapabiling matinumanon. Nahibalo siya nga wala kita makadangat sa kamatuoran sa ato lang kaugalingon, busa dili usab kita makapabilin sa kamatuoran sa ato lang kaugalingon. Si apostol Pedro misulat sa dinihogang mga Kristohanon: “[Kamo] gipanalipdan sa gahom sa Diyos pinaagi sa pagtuo alang sa kaluwasan nga andam nang igapadayag sa kataposang yugto sa panahon.” (1 Ped. 1:5) Kining mga pulonga mapadapat ngadto sa tanang Kristohanon ug angay kitang mainteres niini. Ngano? Kay kitang tanan nagkinahanglan sa tabang sa Diyos aron makapabiling matinumanon kaniya.
GIPUGNGAN NGA MAKASALA
8. Nganong posible kitang makasala?
8 Tungod sa mga problema sa kinabuhi ug sa atong pagkadili-hingpit, basin mawala ang atong pokus sa espirituwal nga mga butang o makasala kita nga dili gani makabantay niana. (Basaha ang Galacia 6:1.) Nahitabo kini kas-a kang David.
9, 10. Sa unsang paagi gipugngan ni Jehova si David nga dili makasala? Unsay gihimo ni Jehova alang kanato karon?
9 Si David nagpakitag talagsaong pagpugong sa kaugalingon samtang gigukod ni Haring Saul. Siya wala manimalos sa masinahong hari. (1 Sam. 24:2-7) Apan wala madugay human niadto, si David nawad-ag pagpugong sa kaugalingon. Dihang siya ug ang iyang mga kauban nagkinahanglag pagkaon ug tubig, si David matinahorong nangayog tabang sa iyang isigka-Israelinhon nga si Nabal. Apan wala siya tabangi ni Nabal ug giinsulto pa gani. Nasuko pag-ayo si David ug mihukom nga manimalos kang Nabal ug sa tanang lalaki sa panimalay niini. Wala mahunahuna ni David nga ang pagpatay ug inosenteng mga tawo maghimo kaniyang sad-an sa dugo atubangan sa Diyos. Apan si Abigail, ang asawa ni Nabal, nagpugong kang David sa paghimo sa maong grabeng sala. Nakaamgo si David nga gigamit ni Jehova si Abigail aron panalipdan siya, busa siya miingon kaniya: “Dalayegon si Jehova nga Diyos sa Israel, nga nagpadala kanimo niining adlawa sa pagsugat kanako! Ug dalayegon ang imong pagkamay-salabotan, ug dalayegon ikaw nga nagpugong kanako niining adlawa gikan sa pagkasad-an sa dugo ug sa paggamit sa akong kamot alang sa akong kaluwasan.”—1 Sam. 25:9-13, 21, 22, 32, 33.
10 Unsay atong makat-onan niini? Maingon nga gigamit ni Jehova si Abigail sa pagpugong kang David, mahimo usab kitang pugngan ni Jehova nga dili makasala. Siyempre, dili kita angayng magdahom nga duna kanunay sugoon ang Diyos sa pagpugong kanato nga dili makasala. Wala usab kita mahibalo kon unsay eksaktong himoon ni Jehova sa usa ka situwasyon o kon unsay tugotan niyang mahitabo aron matuman ang iyang katuyoan. (Eccl. 11:5) Apan makaseguro kita nga nahibalo gayod si Jehova sa atong kahimtang ug motabang kanato nga magpabiling maunongon kaniya. Siya nagpasalig kanato: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” (Sal. 32:8) Sa unsang paagi si Jehova nagtambag kanato? Sa unsang paagi kita makabenepisyo niini? Ug nganong makaseguro kita nga si Jehova naggiya sa iyang katawhan karon? Matikdi kon sa unsang paagi kini gitubag sa basahon sa Pinadayag.
GIPANALIPDAN PINAAGIG TAMBAG
11. Nganong makaingon kita nga si Jehova nahibalo sa nagakahitabo sa mga kongregasyon sa iyang katawhan?
11 Sa panan-awon nga narekord sa Pinadayag kapitulo 2 ug 3, gisusi sa hinimayang Jesu-Kristo ang pito ka kongregasyon sa Asia Minor. Gibutyag diha sa panan-awon nga nakita ni Kristo dili lang ang katibuk-ang kahimtang sa mga kongregasyon kondili ang espesipikong mga situwasyon niini. Dunay mga higayon nga naghisgot pa gani siyag mga indibiduwal, ug sa matag kahimtang, naghatag siyag nahiangayng pagdayeg o tambag. Unsay gipasabot niini? Ang pito ka kongregasyon naghulagway sa mga dinihogan human sa 1914, ug ang tambag nga gihatag kanila mapadapat usab sa tanang kongregasyon sa katawhan sa Diyos karon. Busa makaingon kita nga gigiyahan ni Jehova ang iyang katawhan karon pinaagi sa iyang Anak. Sa unsang paagi kita makabenepisyo niana?
12. Sa unsang paagi kita magpagiya kang Jehova?
12 Ang usa ka paagi nga makabenepisyo kita sa mahigugmaong paggiya ni Jehova mao ang personal nga pagtuon. Si Jehova dagayang nagtaganag tambag pinaagi sa mga publikasyon sa matinumanon ug maalamong ulipon. (Mat. 24:45) Apan aron makabenepisyo niini, kinahanglang mogahin kitag panahon sa pagtuon ug ipadapat ang atong nakat-onan. Ang personal nga pagtuon maoy usa ka paagi nga gipanalipdan kita ni Jehova nga dili makahimog sayop. (Jud. 24) Duna ka bay natun-an sa atong mga publikasyon nga daw gisulat para kanimo? Dawata ang tambag ingong pagtul-id gikan ni Jehova. Sama nga ang usa ka higala tingali magpikpik sa imong abaga aron ipatagad kanimo ang usa ka butang, mahimong gamiton ni Jehova ang iyang espiritu aron ipatagad kanimo ang usa ka bahin sa imong panggawi o personalidad nga angay nimong pauswagon. Kon atong dawaton ang paggiya sa balaang espiritu, kita nagpagiya kang Jehova. (Basaha ang Salmo 139:23, 24.) Busa, angay natong susihon ang atong batasan sa pagtuon.
13. Nganong maalamong susihon ang atong batasan sa pagtuon?
13 Ang sobrang paglingawlingaw makahurot sa atong panahon alang sa personal nga pagtuon. Usa ka brader ang miingon: “Dali rang mapadaplin ang personal nga pagtuon. Daghan na kaayong kalingawan karon, ug mas barato pa. Anaa kini bisan asa, sa TV, sa computer, ug sa cellphone.” Kon dili kita magbantay, anam-anam nga mahurot ang atong panahon nga para unta sa seryosong personal nga pagtuon. (Efe. 5:15-17) Angayng pangutan-on nato ang kaugalingon: ‘Unsa ka regular ang akong pagtuon sa Pulong sa Diyos? Kon duna lang ba koy pakigpulong o asaynment nga kinahanglang andamon?’ Kon mao, pahimuslan nato ang gabii para sa pamilyahanong pagsimba o personal nga pagtuon aron manukiduki sa kaalam ni Jehova. Gitagana ni Jehova kini nga kaalam aron mapanalipdan kita alang sa kaluwasan.—Prov. 2:1-5.
NAKALAHUTAY TUNGOD SA PAGDASIG
14. Sa unsang paagi gipakita sa Kasulatan nga si Jehova nagtagad sa atong pagbati?
14 Si David nakasinatig daghang makapaguol nga kahimtang. (1 Sam. 30:3-6) Gipakita sa Bibliya nga si Jehova nahibalo sa pagbati ni David. (Basaha ang Salmo 34:18; 56:8.) Ang Diyos nahibalo usab sa atong pagbati. Makita niya kon kita “dugmok ug kasingkasing” o “nahugno sa espiritu.” Ang pagkahibalo niini makapahupay na kanato maingon nga nakapahupay kini kang David, kinsa miawit: “Ako magmalipayon ug magmaya sa imong mahigugmaong-kalulot, sanglit nakita mo ang akong kasakitan; nasayran mo ang mga kagul-anan sa akong kalag.” (Sal. 31:7) Apan si Jehova wala lang mahibalo sa atong mga kasakit. Siya nagtagana kanatog paghupay ug pagdasig. Ang Kristohanong mga tigom maoy usa ka paagi nga iya kining gihimo.
15. Unsay atong makat-onan sa kasinatian ni Asap?
15 Gipakita sa kasinatian ni Asap ang usa ka benepisyo sa pagtambong sa mga tigom. Kay nagsigeg hunahuna sa mga inhustisya sa iyang palibot, si Asap naghunahuna nga morag walay pulos ang pag-alagad sa Diyos, ug kana nakapaluya kaniya. Siya miingon: “Ang akong kasingkasing nagmasulub-on sa hilabihan ug sa akong mga rinyon ako gisakitan pag-ayo.” Busa halos mihunong na siya sa pag-alagad kang Jehova. Unsay nakatabang kang Asap sa pagtul-id sa iyang panghunahuna? Siya miingon: “Misulod ako sa dakong sangtuwaryo sa Diyos.” Didto, kauban ang mga isigkamagsisimba ni Jehova, natul-id ang iyang panghunahuna. Iyang naamgohan nga temporaryo lang ang kalamposan sa mga daotan ug ipahinabo gayod ni Jehova ang hustisya. (Sal. 73:2, 13-22) Lagmit ingon usab kita niana. Ang inhustisya nga atong nakita sa kalibotan ni Satanas nakapaguol ug nakapaluya kanato. Apan dihang makauban nato ang mga igsoon, kita malipay, mapalig-on, ug matabangan nga padayong moalagad kang Jehova.
16. Sa unsang paagi makatabang kanato ang panig-ingnan ni Ana?
16 Apan komosta kon may situwasyon sa kongregasyon nga tungod niini nalisdan ka sa pagtambong sa mga tigom? Lagmit duna kay pribilehiyo sa pag-alagad nga kinahanglang buhian ug naulaw ka niini, o kaha nagkabikil mo sa usa ka igsoon. Kon mao, makatabang nimo ang panig-ingnan ni Ana. (Basaha ang 1 Samuel 1:4-8.) Hinumdomi nga gibiaybiay siya ni Penina, ang laing asawa sa iyang bana, kay siya wala makabatog anak. Ilabinang masakitan siya dihang ang pamilya moadto sa Shilo kada tuig sa paghalad kang Jehova. Naguol pag-ayo si Ana mao nga “siya mohilak ug dili mokaon.” Apan wala kini magpahunong kaniya sa pagtambong sa mga okasyon alang sa pagsimba kang Jehova. Gipabilhan ni Jehova ang iyang pagkamatinumanon ug gipanalanginan siya.—1 Sam. 1:11, 20.
17, 18. (a) Sa unsang mga paagi kita madasig panahon sa mga tigom? (b) Unsay imong gibati sa mahigugmaong pag-atiman ni Jehova aron kita maluwas?
17 Angayng sundogon sa mga Kristohanon karon ang panig-ingnan ni Ana pinaagi sa regular nga pagtambong sa mga tigom. Sa ato nang nasinatian, ang mga tigom makadasig kanato. (Heb. 10:24, 25) Sa maong mga tigom, kita mahupayan tungod sa gugma sa mga igsoon. Basin may madunggan kitang pakigpulong o komento nga makatandog sa atong kasingkasing. Sa dili pa magsugod ang tigom o human niana, tingali may igsoon nga mamati kanato o mopaambit ug makapahupayng mga pulong. (Prov. 15:23; 17:17) Samtang kita moawit kang Jehova, kita madasig ug malipay. Ilabina natong gikinahanglan ang pagdasig diha sa mga tigom kon may mga butang nga nakahasol kanato. Ang mga paghupay gikan kang Jehova motabang nato nga magpabiling matinumanon.—Sal. 94:18, 19.
18 Kay kita gihigugma ug giatiman ni Jehova, atong gibati ang sama sa gibati sa salmistang si Asap kinsa miawit sa Diyos: “Gikuptan mo ang akong tuong kamot. Pinaagi sa imong tambag pagatultolan mo ako.” (Sal. 73:23, 24) Pagkamapasalamaton nato nga kita gipanalipdan ni Jehova alang sa kaluwasan!
[Mga Pangutana sa Pagtuon]
[Hulagway sa panid 28]
Gikabig ka usab ni Jehova ngadto sa matuod nga pagsimba
[Mgas hulagway sa panid 30]
Kita mapanalipdan kon atong ipadapat ang tambag sa Diyos
[Hulagway sa panid 31]
Kita nakalahutay tungod sa pagdasig nga atong nadawat
