Iehova a Thupë Së Kowe La Mel
25 JUUN KOI 1 JULAI
NYIMA: 110, 60
Iehova a Thupë Së Kowe La Mel
“Thatraqai shë, lo ite hna thupëne hnene la mene i Akötesie ngöne la lapaune kowe la mele hna hnëkëne troa amamane ngöne la ijine hnapin.”—1 PET. 1:4, 5.
NEMENE LA AQANE TRO NYIPUNIETI A SA?
Iehova a e së tune kaa kowe la hmi ka wië?
Tro sa nue Iehova tune kaa troa eatrongë së hnene la eamo i Nyidrë?
Iehova a aegöcatrenyi së tune kaa?
1, 2. (a) Nemene la ka aijijë së troa qaja xeciëne ka hape tro Akötresieti a xatua së troa cile huti ngöne la itre itupath? (b) Kola mama tune kaa laka atre së hnyawa hi hnei Iehova?
“AME la ate cile huti uti hë la pune, te, tro ha mel.” (Mat. 24:13) Iesu a anyipicine koi së e celë ka hape, tro ha amele së elanyi ngöne la Akötresieti a apatrene la fene i Satana, ngo nyipi ewekë pe tro sa catre nyipici uti hë la pun. Atre hnyawa hi Iehova ka hape, thatreine kö tro sa cile huti hnene la sipu inamacane me trenge catre së. Tusi Hmitrötre a qaja axeciëne koi së ka hape: “Ngo nyipici Akötesie, ate tha nue nyipunie kowe la itupathi hune la hnei nyipunie hna atein ; ngo loi pe tro nyidëti a nyi jëne köte e kola tupath, mate ateine nyipunie xomi hnin.” (1 Kor. 10:13) Nemene la aliene la itre hnëewekë celë?
2 Tha sihngödri kö koi Iehova la nöjei ewekë ka traqa koi së, tune la itre jole hne së hna cile kow, memine la pengö së, me itre ifego së. Celë hi matre, atreine hi tro Nyidrëti a hmekëne matre tha tro kö a sasaithe menu pala ha la ketre itupath. Hapeu, nyipici kö laka atre së hnyawa hi hnei Akötresie? Eje hi. Kola amamane hnene la Tusi Hmitrötre ka hape, atre së hnyawa hi hnei Iehova, easë isa ala cas. Tha sihngödri kö koi Nyidrëti la itre hne së hna majemine kuca o drai. Ketre öhne mina fe Nyidrëti la itre mekune së me itre aja ne la hni së.—E jë la Salamo 139:1-6.
3, 4. (a) Kola mama tune kaa hnene la hna melëne hnei Davita ka hape Iehova a wange atrune la itre atr, angatre isa ala cas? (b) Nemene la huliwa ka tru hna eatrëne hnei Iehova enehila?
3 Hapeue xecie kö koi së ka hape, Akötresieti a wange atrune la itre atr ka ipië? Hnei Davita atre cinyihane la salamo hna lapa mekune la hnyinge cili, me hape koi Iehova: “E ini a goeëne la hnengödrai i cilie, huliwa ne la iwanakothemie i cilie, ene la teu me ite wëtesiji lo hnei cilieti hna isa amë ; ka ue la ate, mate tro cilieti a mekune koi angeic ?” (Sal. 8:3, 4) Maine jë hna xulu thei Davita la mekune celë qaa ngöne la hnei angeice hna sipu melën. Angeice hi lo nekö i Iese ka co pe, ngo hnei Iehova hna öhne thei angeic, “la ate tune la hni nyidë;” hnei Nyidrëti mina fe hna xomi angeice “qa hna thupëne la ite mamoe, nyine tane” la nöje i Nyidrë, ene Isaraela. (1 Sam. 13:14; 2 Sam. 7:8) Atre hnyawa hi la Atre Xupe la fene hnengödrai la itre mekune me aliene hni Davita, ngacama neköi thöthi hi angeice ka thupë mamoe. Drei la hni ne ole i angeice koi Iehova!
4 Tha sesëkötre kö së la easa öhne la aqane wange atrunyi së hnei Iehova enehila. Nyidrëti a icasinekeune hnine la hmi ka wië “la nöjei ewekë lo hna ajane hnei nöjei nöj’ asë” nge Nyidrëti mina fe a xatuane la itre hlue i Nyidrëti troa cile huti ngöne la itre itupath. (Hag. 2:7) Tro sa pane ce wange la aqane ea Nyidrë la itre atr kowe la nyipi hmi, matre tro sa trotrohnine hnyawa la aqane xatua së hnei Iehova troa cile huti ngöne la itre itupath.
HNA EE SË HNEI AKÖTRESIE
5. Iehova a ea tune kaa la itre atr kowe la Hupuna i Nyidrë? Hamëne jë la ketre ceitun.
5 Öni Iesu: “Pëkö ate ateine tro koi ni, e tha hna e angeice kö hnei Tetetro ate upi ni.” (Ioane 6:44) Kola amamane hnene la hnëewekë celë ka hape, maine easa ajane troa ketre atre drei Keriso, nyipi ewekë koi së la ixatua qaathei Akötresie. Iehova a ea tune kaa la itre atr hna aceitunëne me mamoe kowe la Hupuna i Nyidrë? Jëne la huliwa ne cainöjëne la maca ka loi, memine la mene ne la uati hmitrötr. Drei la ketre ceitun, ame e Filipi, hnei Paulo me itre sine tronge i angeice hna cainöje kowe la ketre föe Lidia la ëjen. Kola qaja hnene la edromë ka hape: “Hnei [Iehova] hna fepi la hni nyido troa qatixenyëne la nöjei ewekë hnei Paulo hna qaja.” Haawe, hnei Akötresieti hna nue la uati hmitrötre i Nyidrëti matre troa xatua nyiidro troa trotrohnine hnyawa la aliene la maca, ame hna bapataiso nyiidro me hnepe lapa i nyiidro.—Ite hu. 16:13-15.
6. Tune kaa la aqane ee së asë hnei Akötresie kowe la hmi ka wië?
6 Hapeu Lidia hmekuje hi la ka melëne la ewekë cili? Ohea. Maine epuni la ketre Keresiano ka sa xepu hë, haawe, epuni fe hi la hnei Akötresie hna hane ea kowe la hmi ka wië. Hnei Tretretro e hnengödrai hna öhne la ewekë ka lolo e kuhu hni Lidia, ketre hnei Nyidrëti mina fe hna öhne la ewekë ka lolo thei epun. Ame lo epuni a nyiqaane drenge la maca ka loi, tre, Iehova fe hi a hamëne la uati hmitrötre matre troa xatua epuni troa trotrohnine la aliene ej. (1 Kor. 2:11, 12) Nge ame la epuni a catre trongëne la hnei epuni hna inin, Nyidrëti mina fe a amanathithine la trenge catre i epuni troa kuca la aja i Nyidrë. Ame hë la epuni a sa xepu me nue la mele i epuni koi Nyidrë, kola amadrinëne la hni Nyidrë. Eje hi laka, ame la epuni a nyiqaane trongëne la gojenyi ne tro kowe la mel, tha hnei Iehova pi kö hna nue axöji epuni uti hë enehila.
7. Easa atre tune kaa ka hape tro Akötresieti a xatua së troa cile huti ngöne la nyipici?
7 Pine laka hnei Iehova hna xatua së troa nyiqaane nyi hluei Nyidrë, haawe, tha luelue kö së laka tro pala kö Nyidrëti a xatua së troa cile hut. Atre hnyawa hi Nyidrëti laka tha hne së kö hna traqa xane kowe la nyipici, nge tha ijije kö la trenge catre së troa ketre sipu cile huti ngöne la nyipici. Öni Peteru kowe la itre Keresiano hna iëne ka hape: “Thatraqai shë, lo ite hna thupëne hnene la mene i Akötesie ngöne la lapaune kowe la mele hna hnëkëne troa amamane ngöne la ijine hnapin.” (1 Pet. 1:4, 5) Thatraqane la itre Keresiano asë la hnëewekë celë, nge loi e tro së isa ala casi a wange atrune lai enehila. Pine nemen? Pine laka, sisitria koi së la ixatua i Akötresie matre atreine së troa catre nyipici koi Nyidrë.
AQANE SEWE SË HNEI AKÖTRESIE TROA TRIA
8. Pine nemene matre nyipi ewekë tro sa hmek ngöne la easa troa tria?
8 Ame itre xa ijin, ijije hi tro la itre ejolene la mel memine la ngazo ka eje the së, a sewe së troa xome la aqane wai ewekë i Akötresie. Ame e cili, thatre kö së ngo easë hë a troa huliwa menu. (E jë la Galatia 6:1.) Kola amamane hnyawa la mekune cili ngöne la ewekë ka traqa koi Davita.
9, 10. Hnei Iehova hna sewe Davita tune kaa troa tria, nge nemene la hnei Nyidrëti hna kuca koi së enehila?
9 Hnei Davita hna xomehnöthe la trenge hni angeic, ngöne lo kola thele troa humuthi angeice hnei Saulo Joxu. (1 Sam. 24:2-7) Ngo ame hi e thupen, hna nue hnei Davita la trenge hni angeic. Kolo hmekune lo angeice a sipo a i angeice me itre sine ce tro i angeic, thei Nabala ketre atre Isaraela. Ngo hnei Nabala hna sa akökötrenyi koi angeic, ame hnei Davita hna elëhni atraqatr, me mekune troa humuthi Nabala me itre atrene la lapa i angeice asë. Tha mekune pe Davita laka e humuthe hë angeice la itre atr ka pë ethan, tre, thei angeice pë hë la madra i angatr qëmeke i Akötresie. Eloine pe, hnei Abigaila föi Nabala hna sewe Davita troa tria. Davita a öhne e cili la ime i Iehova, me hape koi nyiidro: “Ole koi Iehova Akötesi angete Isaraela, ate upi ’ö troa ixelë me ini ngöne la drai celë ; me ole la hna eamo hnei ’ö, me ole koi ’ö ate shewe ni ngöne la drai celë, mate tha tro kö a kuci madra, me nyi thupene thatraqai ni kö hneng.”—1 Sam. 25:9-13, 21, 22, 32, 33.
10 Nemene la ini hne së hna xome qaa ngöne la edromë celë? Hnei Iehova hna nyi jëne Abigaila matre troa sewe Davita troa tria. Celë hi aqane ujë i Nyidrëti fe koi së enehila. Eje hi laka, tha Akötresieti kö a upe la ketre atr ngöne la nöjei ijine easa troa tria. Ketre thatre kö së la hnei Akötresieti hna troa kuca e traqa ju la itre jol, memine fe la itre ewekë hnei nyidrëti hna nue matre troa eatrëne la aja i Nyidrë. (Ate cai. 11:5) Ngo xecie koi së laka atre hnyawa hi Iehova la itre ewekë ka traqa koi së, nge tro pala kö Nyidrëti a xatua së troa cile huti ngöne la nyipici. Nyidrëti a qaja axeciëne koi së ka hape: “Tro ni a ini ’ö me köjane koi ’ö la jëne qâ i ’ö troa trongën ; tro ni a haji ’ö me alamekë eö.” (Sal. 32:8) Iehova a hamë së tune kaa la itre eamo? Tro sa kepe thangane tune kaa qaa ngön? Nge pine nemene matre xecie koi së laka Iehova a eatrongëne la nöje i Nyidrë enehila? Hanawange la aqane sa la itre hnyinge celë ngöne la itusi Hna Amamane.
HNA THUPË SË HNENE LA EAMO
11. Tune kaa la aqane goeëne Iehova la itre ewekë ka traqa e hnine la nöjei ekalesia i Nyidrë e cailo fen?
11 Ame ngöne la hna meköle goeëne hnei Ioane lo hna cinyihane ngöne Hna Amamane mekene 2 me 3, tre kola wai pengöne hnei Iesu Keriso Joxu la itre ekalesia ka ala sevene ne Asia. Easa öhne e cili, laka tha Keriso kö a goeëne hmekuje hi la pengöne la itre ekalesia asë, ngo nyidrëti mina fe a goeëne la itre ewekë ka traqa kowe la itre ekalesia isa ala cas. Goi qaja fe Iesu la isa ëje ne la itre ekalesia cili, me hane qaja aloinyi angatr maine hamë eamo pena. Nemene la hna amamane hnene la mekune celë? Ame lo sevene lao ekalesia hna meköle goeëne hnei Ioane, tre, kola nyi hatrene la itre Keresiano hna iëne thupene lo macatre 1914, nge ame la eamo hna hamëne kowe la itre ekalesia ka ala seven, tre thatraqane fe enehila la nöjei ekalesia i Akötresie e cailo fen. Haawe, meköti hi troa qaja ka hape, Iehova a eatrongëne la nöje i Nyidrë jëne la Hupuna i Nyidrë. Tro sa kepe thangane tune kaa la ixatua cili qaathei Iehova?
12. Tro sa nue Iehova tune kaa troa eatrongë së?
12 Ame la ketre jëne tro sa kepe thangane la ixatua i Iehova, tre, ene la troa isa ini Tus. Iehova a hamë së la itre eamo ka mana qa hnine la Tusi Hmitrötr, jëne la itre itusi qaathei hlue ka nyipici me ka inamacan. (Mat. 24:45) Ngo nyipi ewekë tro sa ami ijine troa inine ej, me trongëne la itre ini hne së hna kapa matre troa kepe thangane qaa ngön. Jëne hi la hne së hna ini Tus, Iehova a “thupë [së] wanga keipi” së. (Iuda 24) Ase hë epuni hane öhne la ketre mekune ngöne la ketre itusi hnei epuni hna inin, me hane mekune ka hape ‘Hna cinyihane lai thatraqai ni’? Kapa ju la mekune cili ceitu me ketre jëne troa ameköti së hnei Iehova. Tune la kola hmekë epuni hnene la ketre sinee i epun, Iehova mina fe a xome la uati Nyidrëti matre troa köja epuni la ketre götrane la aqane ujë i epuni, maine thiina nyine tro epun me itre xane fe a saze. Ame la easa mele thenge la ixatua ne la ua, easë hi lai a nue Iehova troa eatrongë së. (E jë la Salamo 139:23, 24.) Haawe, loi e tro sa wange hnyawa la itre porogarame ne isa ini Tusi së.
13. Pine nemene matre loi e tro sa wange hnyawa la porogarame ne isa ini tusi së?
13 Ijije hi troa thapa la traeme së hna amë göi ini Tusi së hnene la itre nyine iamadrinë. Hanawange la hna qaja hnene la ketre trejin: “Tha ka jole kö la troa wange acone la isa ini tus. Tha hne së fe kö hna hane öhne la ewekë celë ekö, laka ame enehila hna haöthe la fene hnene la itre nyine iamadrinë, nge tha ka tru pena kö la thupene itre ej. Itre eje a mama ngöne televizio, me ngöne ordinatör, me ngöne itre mobilis. Itre eje a lapa xötreithi së.” Maine tha hmeke kö së, tro ha xome trootro la traeme së hnene la itre nyine iamadrinë, uti hë la tha ini tusi së. (Efe. 5:15-17) Haawe, nyipi ewekë tro sa isa hnyinge ka hape: ‘Ije hawa hnenge hna xome matre troa sine thele la Wesi Ula i Akötresie? Hapeu, kolo hi lo ijine eni a troa cile fë la ketre hnëqa, maine ngöne pena la eni a troa hnëkëne la ketre igötranen la icasikeu?’ Maine celë hi hne së hna kuca, nga loi e tro sa xome hnyawa la heji hna amë thatraqane la ini tusi ne la hnepe lapa, maine isa ini tusi pena, matre troa sine thele la inamacane qaathei Iehova ka troa thupë së kowe la mel.—Ite edomë 2:1-5.
IXATUA HNA KAPA MATRE CILE HUTI NGÖNE LA ITRE ITUPATH
14. Kola amamane tune kaa hnene la Tusi Hmitrötre laka Iehova a wange atrune la aliene hni së?
14 Hnei Davita hna cile kowe la itre jole ka tru ngöne la mele i angeic. (1 Sam. 30:3-6) Kola mama jëne la trenge ewekë i angeice ka hape atre hnyawa hi Iehova la aliene hni angeic. (E jë la Salamo 34:18; 56:8.) Ketre tune mina fe, atre hnyawa hi Akötresie la aliene hni së. Ame ngöne la easa “thë fë hni” maine “aköte u” pena, Nyidrëti hi a lapa easenyi së. Kolo lai a akeukawanyi së, tune la aqane akeukawanyi Davita, atre sili nyimane ka hape: “Tro ni a aciacine me madine la tenge ihnimi cilie ; hnei cilieti hna xajawatine la aköteng ; trotrohnine kö cilieti la unge ngöne la nöjei iakötë.” (Sal. 31:7) Maine nyipici laka, tha sihngödri kö koi Iehova la akötre ka eje the së, ngo Nyidrëti mina fe a xatua së. Nyidrëti a akeukawanyi së me ithuecatre koi së. Ame la ketre jëne ixatua i Nyidrë, tre ene la itre icasikeu së, itre Keresiano.
15. Nemene la ini hne së hna xome qaa ngöne la hna melëne hnei Asafa?
15 Kola amamane hnene la hna melëne hnei Asafa atre cinyihane la salamo, la ketre manathithi hna kapa qaa ngöne la hna sine la itre icasikeu. Hnene la hnei Asafa hna lapa mekune la itre ewekë ka tha meköti kö hna kuca, ame hna cia thei angeice la luelue, me hape ma pëkö eloine e troa nyihluei Akötresie. Tha lapa hnyawa pi kö la hni Asafa. Drei la aqane qejepengöne angeice la ewekë cili: “Hna ahaitene la hning, nge hna thine la lue wanahatrajo.” Ame hë la thangane lai, kösë patre hë la aja thei angeice troa kuca la huliwa i Iehova. Nemene la ka xatua Asafa troa amekötine la mekuna i angeic? Öni angeice ka hape: “Uti hë e traqa ni kowe la ēnē i Akötesie.” Pine laka hnei angeice hna ce me itre sine hmi angeic hnine la ēnē, haawe, hetrenyi hmaca jë hi angeice la aqane wai ewekë ka meköt, me öhne laka, ka xoxopatre hi la mele ka loi ne la itre atre ka ngazo, nge tro pala kö Iehova a nyithupene koi angatr. (Sal. 73:2, 13-22) Ketre tu së mina fe, ijije hi troa akucakucanyi së hnene la hna wange atrune pala ha la itre ewekë ka tha meköti kö hne së hna cile kow. Tro la itre icasikeu së me itre trejine me easë a aegöcatrenyi së me xatua së tro pala hi sa nyi hluei Iehova ngöne la madrin.
16. Tro sa kepe thangane tune kaa la tulu i Hana?
16 Tune kaa e sewe epuni ju hnene la ketre ewekë hnine la ekalesia troa sine la itre icasikeu? Maine jë hnei epuni hna nue la ketre götraneqa i epuni hnine la ekalesia, nge ma epuni jë a hmahman. Maine jë pena, epuni a isi mekune memine la ketre trejin. Ame e cili, tro la tulu i Hana a xatua epun. (E jë la 1 Samuela 1:4-8.) Hna akötrëne catrë angeice hnei Penina, ketre föi Elekana, ke pëkö nekö i angeic. Kola catrehnine la akötre i angeice ngöne la nöjei macatre lo kola tro hnene la hnepe lapa troa huuje koi Iehova e Silo. Nge ame e cili, angeice a “teije nge tha hane kö xen.” Ngo ame pe, tha hnei angeice kö hna nue la ewekë cili troa sewe angeice troa kuca la huliwa i Iehova ngöne la nöjei ijin. Tha sihngödri kö koi Iehova la lapaune i angeic, ame hnei Nyidrëti hna amanathithi angeic.—1 Sam. 1:11, 20.
17, 18. (a) Kola aegöcatrenyi së tune kaa hnene la itre icasikeu? (b) Tune kaa fe së la easa mekune la ihnimi Akötresie koi së, ene laka Nyidrëti a xatua së troa hetrenyi la mel?
17 Nyimu kepine matre nyipi ewekë tro la itre Keresiano enehila a nyitipu Hana, ene la troa catre sine la itre icasikeu. Tune la hne së hna melëne hë, itre icasikeu a ithuecatre koi së. (Heb. 10:24, 25) Kola akeukawanyi së hnene la hna ce memine la itre trejine me easë. Maine jë hna ketr la hni së hnene la ketre mekune hne së hna dreng qaa ngöne la ketre cainöj, maine ketre mekune pena hna hamën. Ame ngöne la easa porotrike qëmekene la itre icasikeu maine e thupen pena, maine jë troa hnangenyë së hnene la ketre trejin, maine qaja pena la trenge ithanata ka ithuecatre koi së. (Ite edomë 15:23; 17:17) Ketre, ame la easa nyima draië koi Iehova, tre, kolo fe hi lai a aegöcatrenyi së. Ngo easa öhne la eloine la itre icasikeu ngöne la itre ijine kola ketri së hnene “la nyimu mekun’ e kuhu hni [së].” Ame e cili, Iehova a xatua së hnene la hna “akeukawane la hni [së]” me acatrenyi së matre cile huti së ngöne la lapaun.—Sal. 94:18, 19.
18 Hnene la mejiune së kowe la ihnimi Akötresie, ene pe casi fe hi la mekuna së me Asafa ka nyimane koi Iehova ka hape: “Hnei cilieti hna xölehuje la ime macang. Tro cilieti a e ni hnene la eamo i cilie.” (Sal. 73:23, 24) Drei la hni ne ole së koi Iehova la hnei Nyidrëti hna thupë së kowe la mel!
[Thying]