Jehovah Ekpeme Nnyịn Enịm Ọnọ Edinyan̄a
Jehovah Ekpeme Nnyịn Enịm Ọnọ Edinyan̄a
“[Ẹda] odudu Abasi ẹkpeme [mbufo] oto ke mbuọtidem kaban̄a edinyan̄a eke ẹdiyararede ke akpatre ini.” —1 PET. 1:4, 5.
DIDIE KE AFO ỌKPỌBỌRỌ?
․․․․․
Jehovah akasan̄a didie odụri nnyịn esịn ke utuakibuot akpanikọ?
․․․․․
Didie ke ikeme ndiyak Jehovah ada item esie ọnọ nnyịn ndausụn̄?
․․․․․
Didie ke Jehovah esinọ nnyịn nsịnudọn̄?
1, 2. (a) Nso inam nnyịn inịm ke Abasi ayan̄wam nnyịn ika iso isọn̄ọ ida? (b) Jehovah ọfiọk owo nnyịn kiet kiet adan̄a didie?
“ẸYENYAN̄A owo eke ediyọde tutu esịm utịt.” (Matt. 24:13) Ikọ Jesus oro okowụt ke edieke anade ẹnyan̄a nnyịn ke ini Abasi edisobode ererimbot Satan ke ana isọn̄ọ ida tutu esịm utịt. Edi emi iwọrọke ke Jehovah oyom nnyịn ida odudu m̀mê ọniọn̄ nnyịn iyọ se isobode. Bible ọn̄wọn̄ọ ọnọ nnyịn ete: “Abasi edi anam-akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ọnọ mbufo ke ini idomo man mbufo ẹkeme ndiyọ enye.” (1 Cor. 10:13) Nso ke ikọ oro ọwọrọ?
2 Man Jehovah okụt ete ke owo idomoke nnyịn ibe se ikemede ndiyọ, ana enye ọfiọk kpukpru n̄kpọ aban̄a nnyịn, ọfiọk se nnyịn isobode, orụk owo emi nnyịn idide, ye se nnyịn ikemede ndiyọ. Ndi Abasi enen̄ede ọfiọk nnyịn ntre? Ih. N̄wed Abasi ọdọhọ ke Jehovah enen̄ede ọfiọk owo nnyịn kiet kiet. Enye ọfiọk se isinamde ke usen ke usen ye mme edu nnyịn, onyụn̄ ọfiọk idem se ikerede ye se iduakde ke esịt nnyịn.—Kot Psalm 139:1-6.
3, 4. (a) Didie ke se Jehovah akanamde ye David owụt ke Jehovah esikere aban̄a owo kiet kiet? (b) Nso akpan utom ke Jehovah anam mfịn?
3 Ndi etie fi nte ke Abasi ikemeke ndima mme anana-mfọnmma owo ntre? David, andiwet psalm, ama ekere aban̄a emi onyụn̄ ọdọhọ Jehovah ete: “Ke ini n̄kụtde mme heaven fo, kpa mme utom nnuenubọk fo, ọfiọn̄ ye mme ntantaọfiọn̄ emi afo anamde, owo edi nso eke afo etide enye?” (Ps. 8:3, 4) Ekeme ndidi nte Jehovah akamade David akanam David obụp mbụme oro. Enye David emi ekedide ekperedem eyen Jesse ke Jehovah okokụt nte “owo emi ekemde esịt ye [imọ],” onyụn̄ emek enye ete “etre nditiene otuerọn̄ man akabade edi adausụn̄” Israel. (1 Sam. 13:14; 2 Sam. 7:8) Kere nte eketiede David ke idem ndifiọk ke Andibot ofụri ekondo ama esitịn̄ enyịn ke se imọ ikekerede ke esịt imọ, kpa ekikere ekpri eyenọwọn̄ emi ekesikpemede erọn̄!
4 Ima emi Jehovah amade nnyịn mfịn enyene ndyọ n̄ko. Enye ke atan̄ mme owo, kpa “ndiye n̄kpọ” ke “kpukpru mme idụt,” obon ọtọkiet man ẹkpetuak ibuot ẹnọ enye. (Hag. 2:7) Man enen̄ede an̄wan̄a nnyịn nte Jehovah an̄wamde nnyịn man ika iso isọn̄ọ ida, ẹyak ibem iso ineme nte enye esidụride mme owo esịn ke utuakibuot akpanikọ.
ABASI ODỤRI NNYỊN ADA
5. Didie ke Jehovah esidụri mme owo ọnọ Eyen esie? Nọ uwụtn̄kpọ.
5 Jesus ọkọdọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” (John 6:44) Ikọ oro ọwọrọ ke ana Abasi an̄wam nnyịn edieke anade idi mbet Christ. Didie ke Jehovah esidụri nnyịn? Enye esida utom edikwọrọ eti mbụk ye edisana spirit odụri nnyịn. Ke uwụtn̄kpọ, ke ini Paul ye mme nsan̄a isụn̄utom esie ẹkedude ke Philippi, mmọ ẹma ẹsobo n̄wan emi ekekerede Lydia ẹnyụn̄ ẹnọ enye eti mbụk. Bible ọdọhọ ke “Jehovah [ama] onyụn̄ eberede enye esịt anam ọnọ ntịn̄enyịn ke mme n̄kpọ emi Paul etịn̄de.” Ih, Abasi ama ọnọ spirit esie man anam etop oro an̄wan̄a enye, ndien enye ye mbonufọk esie ẹma ẹna baptism.—Utom 16:13-15.
6. Didie ke Abasi okodụri kpukpru nnyịn esịn ke utuakibuot akpanikọ?
6 Ndi emi eketịbe ọnọ Lydia ikpọn̄? Ihih. Edieke edide Christian emi ayakde idem ọnọ Abasi, ọwọrọ Abasi ama odụri fi n̄ko esịn ke utuakibuot akpanikọ. Kpa nte Ete nnyịn eke heaven okokụtde eti n̄kpọ ke esịt Lydia, ntre n̄ko ke enye okụt eti n̄kpọ ke idem fo. Ke ini ọkọtọn̄ọde ndikpan̄ utọn̄ nnọ eti mbụk, Jehovah ama ada edisana spirit anam eti mbụk an̄wan̄a fi. (1 Cor. 2:11, 12) Ke ini okodomode ndinam se ekpepde, enye ama anam fi ekeme ndinam uduak esie. Ke ini akayakde idem ọnọ enye, esịt ama adat enye etieti. Ke nditịm ntịn̄, toto ke ini emi ọkọtọn̄ọde ndisan̄a ke usụn̄ emi adade esịm uwem, Jehovah aka iso ndidu ye afo kpukpru ini.
7. Isan̄a didie ifiọk ke Abasi ayan̄wam nnyịn ika iso inam akpanikọ inọ enye?
7 Jehovah akan̄wam nnyịn itọn̄ọ ndinam n̄kpọ esie, ntem imenịm ke enye ayaka iso an̄wam nnyịn inam akpanikọ. Enye ọfiọk ke sia nnyịn mîkedịghe ididụk akpanikọ ke idem nnyịn, ke nnyịn idikemeke ndisọn̄ọ ndu ke akpanikọ ke idem nnyịn. Apostle Peter ekewet ọnọ mme Christian oro ẹyetde aran ete: “[Ẹda] odudu Abasi ẹkpeme [mbufo] oto ke mbuọtidem kaban̄a edinyan̄a eke ẹdiyararede ke akpatre ini.” (1 Pet. 1:4, 5) Ikọ oro abuana kpukpru Christian, ndien akpana enye ebehe nnyịn owo kiet kiet mfịn. Ntak-a? Koro kpukpru nnyịn imoyom un̄wam Abasi man ika iso isọn̄ọ ida inam akpanikọ inọ enye.
ABASI EKEME NDIN̄WAM NNYỊN IKÛNAM IDIỌK
8. Ntak emi anade ikpeme mbak nnyịn idinam idiọkn̄kpọ?
8 Mme mfịghe uwem ye mme ndudue nnyịn ẹkeme ndinam nnyịn ikûse n̄kpọ nte Jehovah esede, ndien emi ekeme ndinam inam ata idiọkn̄kpọ, edi nnyịn ifiọkke. (Kot Galatia 6:1.) Se iketịbede inọ David owụt ke emi edi akpanikọ.
9, 10. Jehovah akasan̄a didie akpan David ndinam idiọk, ndien nso ke Enye anam ọnọ nnyịn mfịn?
9 Ke adan̄aemi Edidem Saul ekebịnede David, enye ama enen̄ede afara ke idem inyụn̄ isioho efịbe-ufụp edidem emi usiene. (1 Sam. 24:2-7) Edi esisịt ini ke oro ebede, David ama anana mfara ke idem. Enye ama oyom udia ye mmọn̄ ndinọ ikọt esie, ntre enye ama eben̄e eyen Israel emi ekekerede Nabal n̄kpọ emi ukpono ukpono. Ke ini Nabal ọkọbọrọde uyat uyat, David ama ayat esịt onyụn̄ oyom ndikosio Nabal ye kpukpru irenowo ke ufọk esie usiene, ikereke ke iyakama iyịp edieke iwotde mbon emi mîduehe. Abigail an̄wan Nabal akakpan David ndinam ata akwa ndudue emi. David ama ọfiọk ke Jehovah ekesịn Abigail anam n̄kpọ emi, ntre enye ama ọdọhọ Abigail ete: “Yak ekọm enyene Jehovah Abasi Israel, emi osiode fi ọdọn̄ ete edi edisobo ye ami mfịn emi! Yak ẹnyụn̄ ẹkọm fi ke eti ibuot fo, ẹnyụn̄ ẹkọm fi emi akpande mi ndinyene ubiomikpe iyịp mfịn emi, onyụn̄ akpande mi ndida ubọk mi nnyan̄a idemmi.”—1 Sam. 25:9-13, 21, 22, 32, 33.
10 Nso ke mbụk emi ekpep nnyịn? Jehovah akada Abigail akpan David ndinam idiọk. Enye esinam kpa ntre ye nnyịn mfịn. Edi nnyịn ikpekereke ke Abasi ọyọnọ owo edikpan nnyịn ini ekededi oro iyomde ndinam se mîfọnke. Nnyịn ikponyụn̄ ikereke ke imenen̄ede ifiọk nte Abasi edinamde n̄kpọ ke idaha kiet kiet m̀mê se enye ediyakde etịbe man osu uduak esie. (Eccl. 11:5) Edi imekeme ndinịm ke kpukpru ini ke Jehovah esifiọk mme idaha nnyịn, ndien ke enye ayan̄wam nnyịn ika iso inam akpanikọ inọ enye. Enye ọn̄wọn̄ọ ọnọ nnyịn ete: “Ami nyanam fi enyene ikike nyonyụn̄ nteme fi usụn̄ eke afo edisan̄ade. Nyetịn̄ fi enyịn ke idem nnyụn̄ nteme fi.” (Ps. 32:8) Didie ke Jehovah esinọ nnyịn item? Didie ke nnyịn ikeme ndibọ ufọn item esie? Ndien ntak emi ikemede ndinịm ke Jehovah ke ada ikọt esie usụn̄ mfịn? Se nte ẹbọrọde mme mbụme emi ke n̄wed Ediyarade.
ITEM EKPEME NNYỊN
11. Adan̄a didie ke Jehovah ọfiọk mme n̄kpọ oro ẹkade iso ke esop ikọt esie?
11 Ke n̄kukụt oro ẹwetde ke Ediyarade ibuot 2 ye 3, Jesus Christ oro ẹnọde ubọn̄ ama aka ekese esop itiaba ke Asia Minor. N̄kukụt oro owụt ke Christ okụt mme ata akpan n̄kpọ oro ẹtịbede ke mme esop. Ke ndusụk idaha, enye ama akam asiak enyịn̄ mme owo, ndien ke idaha kiet kiet, enye ama ọnọ akpan itoro m̀mê item. Nso ke emi owụt? Esop mbitiaba oro ẹda ẹban̄a mme Christian oro ẹyetde aran ke 1914 ama ekebe, ndien item oro ẹkenọde mmọ abuana kpukpru esop ikọt Abasi ke isọn̄ mfịn. Mmọdo, enen ndidọhọ ke Jehovah ke ada Eyen esie ọnọ ikọt esie ndausụn̄ mfịn. Didie ke nnyịn ikeme ndiyak Jehovah ada nnyịn usụn̄?
12. Didie ke ikeme ndiyak Jehovah ada nnyịn usụn̄?
12 Usụn̄ kiet emi ikemede ndiyak Jehovah ọnọ nnyịn ima ima ndausụn̄ edi ke ndikpep n̄kpọ ke idem nnyịn. Jehovah ada mme n̄wed ofụn emi anamde akpanikọ onyụn̄ enyenede ọniọn̄ ọnọ nnyịn akpakịp item N̄wed Abasi. (Matt. 24:45) Nte ededi, man ibọ ufọn mmọ, ana ida ini itie ikpep mmọ inyụn̄ ida se ikpepde isịn ke edinam. Ukpepn̄kpọ idemowo edi usụn̄ kiet emi Jehovah adade ‘ekpeme nnyịn mbak nnyịn idituak ukot iduọn̄ọ.’ (Jude 24) Ndi akanam emekpep n̄kpọ ke n̄wed nnyịn ndien enye etie nte ke ẹkewet n̄kpọ oro ke ntak fo? Da emi nte edinen̄ede emi Jehovah ọnọde. Kpa nte ufan ekemede ndifọi fi n̄wụt n̄kpọ, Jehovah ekeme ndida spirit esie mfọi fi n̄wụt edu m̀mê ido oro anade afo—ye ediwak owo en̄wen nte afo—ẹnam ukpụhọde. Edieke imade ndinam se edisana spirit etemede nnyịn, ọwọrọ ke nnyịn imayak Jehovah ada nnyịn usụn̄. (Kot Psalm 139:23, 24.) Ẹyak ineme adan̄a nte ikpesịnde ukeme inyụn̄ idade ini ikpep n̄kpọ.
13. Ntak emi ọfọnde idụn̄ọde nte isikpepde n̄kpọ?
13 Edieke ibiatde ini ikaha ke unọ idem inemesịt, nnyịn idinyeneke ini ndida n̄kpep n̄kpọ. Eyenete kiet ọdọhọ ete: “Edi ata mmemmem n̄kpọ nditre ndikpep n̄kpọ. Unọ idem inemesịt awak onyụn̄ emem urua idahaemi akan nte akanam edide. Enye odu ke TV, ke kọmputa, ye ke telefon. Enye ọyọyọhọ kpukpru ebiet.” Edieke nnyịn mîkpemeke, imekeme nditọn̄ọ ndibiat ekese ini ke unọ idem inemesịt tutu ini idụhe aba ndida nnen̄ede n̄kpep n̄kpọ. (Eph. 5:15-17) Ọfọn owo nnyịn kiet kiet obụp idemesie ete: ‘Ndi mmesida ini ntie n̄kpep mme ntotụn̄ọ n̄kpọ ke Ikọ Abasi? Ndi nsinam oro ke ini nnyenede utịn̄ikọ m̀mê n̄kpọ ndinam ke mbono esop?’ Edieke edide ntre, etie nte ọkpọfọn ida ini mbubreyo Utuakibuot Ubon nnyịn m̀mê eke ukpepn̄kpọ idem nnyịn ikpep mme ntotụn̄ọ ọniọn̄ Jehovah emi enye ọnọde man ekpeme nnyịn tutu esịm edinyan̄a.—Mme N̄ke 2:1-5.
NSỊNUDỌN̄ AN̄WAM NNYỊN IYỌ
14. Didie ke N̄wed Abasi owụt ke Jehovah ọfiọk nte etiede nnyịn ke idem?
14 David ama osobo ediwak afanikọn̄. (1 Sam. 30:3-6) Bible owụt ke Jehovah ama ọfiọk nte eketiede enye ke idem. (Kot Psalm 34:18; 56:8.) Abasi ọfiọk nte etiede nnyịn ke idem n̄ko. Ke ini “esịt obụn̄ọde” nnyịn m̀mê ke ini ‘spirit nnyịn anuahade,’ enye esisịk ekpere nnyịn. Enye ndisịk n̄kpere nnyịn ekeme ndidọn̄ nnyịn esịt, kpa nte ọkọdọn̄de David, emi ọkọkwọde ete: “Ami nyadara nnyụn̄ ndat esịt ke ima-mfọnido fo, koro afo omokụt ukụt mi; afo ọmọfiọk nnanenyịn ukpọn̄ mi.” (Ps. 31:7) Jehovah esikụt afanikọn̄ nnyịn onyụn̄ anam n̄kpọ aban̄a oro. Enye esisọn̄ọ nnyịn idem ebe ke ndidọn̄ nnyịn esịt nnyụn̄ nsịn udọn̄ nnọ nnyịn. Mme mbono esop ẹdi usụn̄ kiet emi enye esidade anam emi.
15. Nso ke ikeme ndikpep nto se ikọwọrọde Asaph?
15 Se ikọwọrọde Asaph andiwet psalm owụt ke ọfọn isidụk mme mbono esop. Ndikere mban̄a utụk n̄kaha ama anam Asaph ekere ke ufọn idụhe ndinam n̄kpọ Abasi. Idem ama emem Asaph. Enye ama etịn̄ nte eketiede enye ke idem ete: “Esịt ama ọdiọk mi onyụn̄ abiak mi uyat uyat ke ekpụt.” Akayak esisịt emi akpakanam enye etre ndinam n̄kpọ Jehovah. Nso ikan̄wam Asaph afiak ekere n̄kpọ ọfọn? Enye ọkọdọhọ ete: “Tutu ndidụk akwa edisana ebiet Abasi.” Enye ndidu ye ekemmọ mme andituak ibuot nnọ Jehovah ama anam enye ekere n̄kpọ ọfọn. Enye ama edikụt ke unen oro mme idiọkowo ẹkụtde edi ke ibio ini, ke Jehovah eyetre utụk. (Ps. 73:2, 13-22) Kpasụk ntre ke edi ye nnyịn. Mfịghe ediyọ utụk ke ererimbot Satan ekeme ndinam idem emem nnyịn. Ndisisop idem ye nditọete nnyịn ekeme ndinam nnyịn ikop inem idem onyụn̄ an̄wam nnyịn ika iso ikop idatesịt ndinam n̄kpọ Jehovah.
16. Didie ke uwụtn̄kpọ Hannah ekeme ndin̄wam nnyịn?
16 Nso ke akpanam edieke se itịbede ke esop anamde ọsọn̄ fi ndisidụk mbono esop? Ekeme ndidi afo ama ataba ifetutom ndien emi esinam bụt anam fi, mîdịghe edi ke afo ama enyene ndutan̄uyo ye eyenete. Edieke edide ntre, uwụtn̄kpọ Hannah ekeme ndin̄wam fi. (Kot 1 Samuel 1:4-8.) Ti ete ke Peninnah an̄wan ufụp esie ama esinam se iyatde enye etieti ke ufọk. N̄kpọ emi ama esinen̄ede ọsọn̄ ubọk kpukpru isua ke ini ubon mmọ ẹkesikade ndifọp uwa nnọ Jehovah ke Shiloh. Ama esibiak Hannah “tutu enye atua inyụn̄ idiaha udia.” Edi emi ikanamke enye etre ndisika n̄katuak ibuot nnọ Jehovah. Jehovah ama okụt nte enye anamde akpanikọ onyụn̄ ọdiọn̄ enye.—1 Sam. 1:11, 20.
17, 18. (a) Ke mme usụn̄ ewe ke nnyịn isibọ nsịnudọn̄ ke mbono esop? (b) Afo ese didie nte Jehovah ekerede aban̄a nnyịn ke ima man inyene edinyan̄a?
17 Odot mme Christian mfịn ẹkpebe eti uwụtn̄kpọ Hannah. Ana isidụk mbono esop kpukpru ini. Nte kpukpru nnyịn ifiọkde, mbono esop esinen̄ede esịn udọn̄ ọnọ nnyịn. (Heb. 10:24, 25) Ima nditọete Christian esidọn̄ nnyịn esịt. Ekpri n̄kpọ oro ẹtịn̄de ke utịn̄ikọ m̀mê ke ibọrọ oro ẹnọde ekeme nditụk nnyịn esịt. Ke nneme oro inyenede mbemiso m̀mê ke mbono esop asuanade, eyenete ekeme ndinen̄ede n̄kpan̄ utọn̄ nnọ nnyịn mîdịghe etịn̄ n̄kpọ emi ọdọn̄de nnyịn esịt. (N̄ke 15:23; 17:17) Esịt esifiak enem nnyịn ke ini ikwọde ikwọ inọ Jehovah. Ke ini ekikere ẹtịmerede nnyịn, nnyịn imesinen̄ede iyom nsịnudọn̄ oro isibọde ke mbono esop. “Ndọn̄esịt” emi Jehovah esinọde nnyịn ke mbono esop esin̄wam nnyịn iyọ inyụn̄ ika iso inam akpanikọ inọ enye.—Ps. 94:18, 19.
18 Sia inyenede ifụre ke idak ukpeme Abasi nnyịn, etie nnyịn ke idem nte eketiede Asaph andiwet psalm emi ọkọkwọde ọnọ Jehovah ete: “Afo omomụm mi ubọk nnasia. Afo ayada mi usụn̄ ke item fo.” (Ps. 73:23, 24) Esịt adat nnyịn didie ntem ke Jehovah ekpeme nnyịn man inyene edinyan̄a!
[Mme Mbụme Ukpepn̄kpọ]
[Ndise ke page 28]
Jehovah odụri fi n̄ko ada
[Ndise ke page 30]
Ndinam item Abasi ekpeme nnyịn
[Ndise ke page 31]
Nsịnudọn̄ oro isibọde esisọn̄ọ nnyịn idem
