“Ñandejára ipuʼaka rupi oñangareko penderehe, pejeroviágui pehupytytaha pe salvasión oĩmava ojehechauka hag̃ua umi ára pahápe.” (1 PED. 1:5, NM)

¿MBAʼÉPA ÑAMBOHOVÁITA?

¿Mbaʼéichapa Jehová ñandegueru iñorganisasiónpe?

¿Mbaʼéichapa Jehová ñanesãmbyhy umi konsého rupive?

¿Mbaʼéichapa Jehová ñanemokyreʼỹ?

1, 2. a) ¿Mbaʼérepa jaʼekuaa Jehová ñanepytyvõtaha ñaneñeʼẽrendu hag̃ua ipahaite peve? b) ¿Mbaʼeichaite pevépa ñandekuaa Jehová?

 “OGUEROPUʼAKÁVA ipahaite peve, upéva ojesalváta.” (Mat. 24:13, NM.) Péicha Jesús ohechauka tekotevẽha ñaneñeʼẽrendu ipahaite peve ikatu hag̃uáicha jajesalva Itúva ohundi vove ko múndo aña oĩva Satanás poguýpe. Péro upéva ndeʼiséi Jehová oipotaha jagueropuʼaka opa mbaʼe ñanembarete ha ñanearandúgui reínte. La Biblia heʼi porã ñandéve: “Ñandejára akóinte oĩta penendive, ha ndohejamoʼãi pehasa mbaʼeve ikatuʼỹvaʼerã pegueropuʼaka. Upéva rangue, pehasa jave peteĩ mbaʼe ijetuʼúva ohechaukáta peẽme mbaʼéichapa pesẽta upévagui pegueropuʼaka hag̃ua” (1 Cor. 10:13, NM). ¿Mbaʼépa heʼise upéva?

² Jehová oikuaapaite umi provléma jahasáva, ñande lája ha moõ pevépa ikatu jagueropuʼaka umi mbaʼe ijetuʼúva. Upéicha rupi ndohejamoʼãi jahasa peteĩ mbaʼe ikatuʼỹva jagueropuʼaka. Péro, ¿añetehápe piko upeichaite peve ñandekuaa? Iñeʼẽ ohechauka ndojehasaiha chugui mbaʼevete. Oikuaapaite jahasáva ha mbaʼéichapa jajepokuaa jaiko. Hiʼarive oikuaa mbaʼépa ñapensa ha ohechakuaa mbaʼépa ñanemomýi jajapo hag̃ua opa mbaʼe (elee Salmo 139:1-6).

3, 4. a) ¿Mbaʼéichapa David rembiasakue ohechauka Jehová ojesarekoha káda únore? b) ¿Mbaʼéichapa Jehová ohechauka oñeinteresaha ñanderehe?

³ Oiméne ni ndajagueroviaséi upeichaite peve Jehová ojepyʼapyha yvyporakuérare. Upéicha avei opensavaʼekue David, ha heʼi Jehovápe: “Che amañáramo yvagakuéra rehe, nde po rembiapokuére, pe jasy ha umi mbyja rehe nde rejapovaʼekue, che voi haʼe: ‘¿Mbaʼépa pe kuimbaʼe, nemanduʼa hag̃ua hese?’” (Sal. 8:3, 4, ÑÑB).  Heʼívo koʼã mbaʼe, David opensáne raʼe hembiasakuére. Haʼe ningo Jesé raʼy pahague ha oñangareko itúva ovechakuérare. Upéicharõ jepe, Ñandejárape g̃uarã David ‘peteĩ kuimbaʼe haʼe ojeroviaha’ ha oguenohẽ chupe ‘ovecha rapykuéri oikohágui’ ojapo hag̃ua chugui ‘Israel ruvicha’ (1 Sam. 13:14; 2 Sam. 7:8). ¡Ajépa ovyʼaiténe David ohechávo Jehová, opa mbaʼe Apohare, oguerohoryha umi mbaʼe opensáva, haʼéramo jepe peteĩ ovecharerekuamínte!

⁴ Peichaite ñande ñañeñandu jahechakuaávo Jehová oñeinteresaha avei ñanderehe. Haʼe oiporu pe rrelihión añetegua ombyaty hag̃ua umi ‘mbaʼerepy opa tetãygua’, térã umi tapicha ipyʼaporãva, ha oipytyvõ chupekuéra akóinte oservi hag̃ua chupe (Ageo 2:7, ÑÑB). Ikatu hag̃uáicha ñantende porã mbaʼéichapa Jehová ñanepytyvõ ñaneñeʼẽrendu hag̃ua chupe, ñahesaʼỹijo raẽta mbaʼépa ojapo oñemoag̃ui hag̃ua hese umi hénte.

ÑANDEJÁRA ÑANEMOAG̃UI ITAʼÝRARE

5. ¿Mbaʼéichapa Jehová omoag̃ui Itaʼýrare umi ipyʼaporãvape? Emoĩ peteĩ ehémplo.

⁵ Jesús heʼi: “Avave ndaikatúi ou che rendápe, che Ru chembouvaʼekue ndoguerúiramo chupe” (Juan 6:44, NM). Upéva heʼise tekotevẽ hague Ñandejára ñanepytyvõ ikatu hag̃uáicha ñamoirũ Crístope. Péro, ¿mbaʼéichapa Jehová omoag̃ui Itaʼýrare umi ipyʼaporãvape? Pe predikasión ha espíritu sánto rupive. Pór ehémplo, Pablo ha ambue misionéro ohórõ guare Filípospe, ojuhu peteĩ kuñakaraíre hérava Lidia ha opredika chupe hikuái. Ñandejára Ñeʼẽ heʼi: “Jehová opoko ikorasõre oguerovia hag̃ua [Pablo] heʼíva”. Jahechaháicha, Ñandejára omeʼẽ chupe ijespíritu ikatu hag̃uáicha ontende Iñeʼẽ, ha upéicha rupi ojevautisa haʼe ha hogayguakuéra (Hech. 16:13-15, NM).

6. ¿Mbaʼéichapa Jehová ñandegueru pe rrelihión añeteguávape?

⁶ ¿Ikatúpa jaʼe Lídiare oikovaʼekue ndoikomemeiha? Nahániri. Ñandehegui avei oiko kristiáno Jehová ñandegueru rupínte pe rrelihión añeteguávape. Ha ñande Ru ohecha haguéicha Lidia ipyʼaporãha, upéicha avei ohecha umi mbaʼe porã jarekóva ñande pyʼapýpe. Upévare, ñahendu ha jagueroviávo pe marandu porã, Jehová ñanepytyvõ ijespíritu sánto rupive ñantende hag̃ua pe mensáhe (1 Cor. 2:11, 12). Upéi katu jahecha mbaʼeichaitépa haʼe ñanevendesi ñañehaʼãmbaite haguére jajapo umi mbaʼe ñaaprendéva ha jaiko haʼe oipotaháicha. ¡Katuete ningo Jehová ovyʼáne raʼe ohechávo ñañemeʼẽha chupe jajapo hag̃ua hembipota! Añetehápe, ñañepyrũ guive jaservi chupe, haʼe ñanemoirũ ha ñanepytyvõ opa mbaʼépe.

7. ¿Mbaʼérepa jaʼekuaa Jehová ñanepytyvõtaha akóinte ñaneñeʼẽrendu hag̃ua chupe?

⁷ Ñañepyrũ ypy guive jaservi Jehovápe, haʼe nañanderejavéima ha ñanepytyvõ ikatu hag̃uáicha akóinte ñaneñeʼẽrendu chupe. Oikuaa ndajaikéi hague iñorganisasiónpe ñandejehegui reínte, ha ndaikatumoʼãiha ñaime upépe haʼe nañanepytyvõiramo. Pedro heʼivaʼekue umi kristiáno unhídope: “Ñandejára ipuʼaka rupi oñangareko penderehe, pejeroviágui pehupytytaha pe salvasión  oĩmava ojehechauka hag̃ua umi ára pahápe” (1 Ped. 1:5). Pedro heʼíramo jepe koʼã mbaʼe umi unhídope, ikatu avei oipytyvõ opavave kristiánope. ¿Mbaʼérepa? Enterove ñaikotevẽ rupi Ñandejárare ñaneñeʼẽrendu hag̃ua.

OÑANGAREKO ÑANDEREHE ANI HAG̃UA JAJAVY

8. ¿Mbaʼérepa ñañehaʼãvaʼerã ani hag̃ua jajavy?

⁸ Ñande ningo ñaneimperfékto ha ñambohovái heta mbaʼe ijetuʼúva, upévare ñande jerovia ikatu ikangy, ha ñande jerovia ikangývo ikatu hína jajavy ñaimoʼãʼỹre (elee Gálatas 6:1). David ohasavaʼekue, ohechauka mbaʼéichapa ikatu oiko koʼã mbaʼe. Jahechamína.

9, 10. ¿Mbaʼéichapa Jehová oipytyvõ Davídpe ani hag̃ua ojapo peteĩ mbaʼe ivaietereíva, ha mbaʼéichapa ñanepytyvõ koʼág̃a rupi?

⁹ Rréi Saúl opersegírõ guare Davídpe, haʼe ohechauka ojejokokuaaha, ha noñevengái pe mburuvicha ñañaitére (1 Sam. 24:2-7). Upéicharõ jepe, upe riremínte ojapomoʼã peteĩ mbaʼe ivaietereíva. Haʼe ha umi kuimbaʼe omoirũva chupe oikotevẽ tembiʼu, upévare hekópe porãnte ojerureka hiʼupy peteĩ kuimbaʼe isrraelítape hérava Nabal. Pe karai osẽ ombohovái vai chupekuéra. David katu ipochyeterei ha heʼi ojukataha entéro umi kuimbaʼe oikóva Nabal rógape oñevenga hag̃ua hese. Ni michĩmi nopensái Ñandejára ohechataha chupe peteĩ asesínoramo. Péro Abigail, Nabal rembireko, haʼetépe osẽ ojoko chupe. David ohechakuaa Jehová ombouha ko kuñakaraípe, ha heʼi: ‘¡Toñemombaʼeguasu Israel Jára nembou haguére ko árape cherug̃uaitĩ hag̃ua! Ha terejeguerohory neakãguapy haguére ha resẽgui chejoko hag̃ua añohẽ mboyve tuguy, ha che po rupi amyengovia mboyve hembiapo vai Nabálpe’ (1 Sam. 25:9-13, 21, 22, 32, 33, ÑÑB).

¹⁰ ¿Mbaʼépa ñaaprende ko ehémplogui? Jehová ojevale Abigail rehe ani hag̃ua David ojapo peteĩ mbaʼe ivaietereíva. Péicha avei koʼág̃a rupi oiporu ñande rapichakuérape ñanepytyvõ hag̃ua. Péro upéva ndeʼiséi Ñandejára omboutaha katuete peteĩ ermánope ani hag̃ua jajavy. Avei ñande ndajaikuaaporãi mbaʼépa Ñandejára ojapóne jahasa jave peteĩ mbaʼe ijetuʼúva, mbaʼépa ohejáta térã ndohejamoʼãi oiko oñekumpli hag̃ua hembipota (Ecl. 11:5). Upéicharõ jepe, ñanemanduʼavaʼerã Jehová oikuaaha opa mbaʼe jahasáva ha ñanepytyvõha akóinte ñaneñeʼẽrendu hag̃ua chupe. Haʼe opromete ñandéve: “Che rohekomboʼéta [...] ha ahechaukáta ndéve pe tape moõrupípa nde reguatavaʼerã, Che ahechaukáta ndéve che rembipota ha ajesarekóta nderehe” (Sal. 32:8, ÑÑB). ¿Mbaʼéichapa Jehová ñanerekomboʼe? ¿Mbaʼéichapa ideprovéchota ñandéve umi konsého haʼe omeʼẽva? ¿Ha mbaʼérepa jaʼekuaa Jehová oisãmbyhyha hembiguaikuérape koʼág̃a rupi? Jahechamína mbaʼéichapa oñembohovái koʼã porandu lívro de Revelaciónpe.

OÑANGAREKO ÑANDEREHE UMI KONSÉHO RUPIVE

11. ¿Mbaʼeichaite pevépa Jehová oikuaa opa mbaʼe oikóva entéro kongregasiónpe?

¹¹ Revelación kapítulo 2 ha 3-pe, Juan omombeʼu ohecha hague Jesúspe oho rire yvágape ojesarekohápe umi 7 kongregasión oĩvare Asia Menórpe. Pe visiónpe ojekuaa Cristo ohechaha opa mbaʼe oikóva umi kongregasiónpe, péro avei ojesarekoha peteĩteĩ ermanokuérare. Sapyʼánte heʼi voi umi ermáno réra, ha opavavépe omokyreʼỹ ha oñemoñeʼẽ tekotevẽháicha. ¿Mbaʼépa ñanemboʼe upéva? Umi 7 kongregasión ohechavaʼekue Juan pe visiónpe, orrepresenta opavave kristiáno unhídope oikóva áño 1914 rire, ha umi konsého oñemeʼẽvaʼekue chupekuéra ohupyty enterove kongregasiónpe oĩva opárupi ko yvy ape ári. Upévare  jaʼekuaa Jehová oisãmbyhyha iñorganisasión Itaʼýra rupive. ¿Mbaʼépa jajapovaʼerã ideprovécho hag̃ua ñandéve umi konsého haʼe omeʼẽva?

12. ¿Mbaʼéichapa jaheja Jehová ñanesãmbyhy?

¹² Jaipotáramo Jehová ñanesãmbyhy, ñandete jastudiavaʼerã Iñeʼẽ. Avei haʼe oñemoñeʼẽ ñandéve umi puvlikasión rupive ojapóva tembiguái jeroviaha ha iñarandúva (Mat. 24:45). Jaipotáramo ideprovécho ñandéve umi konsého, ñañemotiempovaʼerã ñahesaʼỹijo hag̃ua ha jajapo umi mbaʼe ñaaprendéva. Añetehápe, ñahesaʼỹijóvo la Biblia ñaneañoháme, Ñandejára ‘oñangareko ñanderehe ani hag̃ua ñañepysanga’ (Jud. 24, NM). Pyʼỹinte ningo ñapensa ñandéve g̃uarãite ojejapoha peteĩ informasión oĩva ñane puvlikasiónpe. Oiméramo upéicha, jahechakuaavaʼerã Ñandejára ñandekorrehiha koʼã konsého rupive. Sapyʼánte peteĩ ñane amígo ñaneatõi jepi ohechauka hag̃ua ñandéve peteĩ mbaʼe. Péicha avei Ñandejára oiporu ijespíritu sánto ohechauka hag̃ua ñandéve mbaʼépepa ñakambiavaʼerã, tahaʼe ñande lája térã jajapóvape. Jahejáramo pe espíritu ñanesãmbyhy, Jehová ohechaukáta ñandéve ñande raperã (elee Salmo 139:23, 24). Upévare tekotevẽ jajepyʼamongeta jaikuaa hag̃ua mbaʼéichapa ñahesaʼỹijoñaína Ñandejára Ñeʼẽ.

13. ¿Mbaʼérepa tekotevẽ jajepyʼamongeta jaikuaa hag̃ua mbaʼéichapa ñahesaʼỹijoñaína Ñandejára Ñeʼẽ?

¹³ Jaikoitereíramo umi vyʼarã rapykuéri, nahembymoʼãi ñandéve tiémpo jastudia hag̃ua la Biblia ñaneañoháme. Peteĩ ermáno ohechakuaa upéva ha heʼi: “Ndahasyiete ningo ñamboyke pe estúdio jajapóva ñaneañohápe. Koʼág̃a rupi oĩ opaichagua vyʼarã ha hiʼarive ndahepyiete. Og̃uahẽ ñandéve téle, komputadóra ha teléfono rupive. Opárupi rei jatopa”. Upeichaite, nañañatendéiramo, káda día saʼive ñanetiémpota ñahesaʼỹijo porã hag̃ua Ñandejára Ñeʼẽ, ha amo ipahápe ikatu hína ñamboykete (Efe. 5:15-17). Enterovéva iporã ñañeporandu: “¿Añemotiémpo memépa ahesaʼỹijo porã hag̃ua la Biblia, térãpa ajapo upéva chepárteta javénte rreunionhápe?”. Oiméramo upéicha, tekotevẽta jaaprovecha porãve pe Aty Jastudia Hag̃ua Ñande Rogayguándi, térã pe estúdio jajapóva ñaneañohápe. Péicharõmante umi mbaʼe porãita oĩva Ñandejára Ñeʼẽme ñanepytyvõta jajesalva hag̃ua (Pro. 2:1-5).

ÑANEMOKYREʼỸ ÑAAGUANTA HAG̃UA

14. ¿Mbaʼéichapa la Biblia ohechauka Jehová ojepyʼapyha umi mbaʼe ñañandúvare?

¹⁴ Oikove aja pukukue, David ohasa heta mbaʼe ijetuʼúva (1 Sam. 30:3-6). Ohaírõ guare espíritu sánto rupive, omombeʼu Jehová ohechakuaaha mbaʼéichapa oñeñandu hembiguái (elee Salmo 34:18 ha 56:8). Upéicha avei oikuaa mbaʼépa ñande ñañandu. Sapyʼánte ndajavyʼái ‘jahasa asy’ térã ‘ñañembyasy’ haguére. Péicha jave Jehová oñemoag̃ui ñanderehe ha upéva tuicha ñanembopyʼaguapy. Upéva oiméne ombovyʼa avei Davídpe, ajeve ohai peteĩ purahéipe: “Avyʼaite ha chepyʼaroryete nde poriahuvereko reheve, rehecha haguére che jepyʼapy asy, ha rehechakuaa che ánga ohasa asyha” (Sal. 31:7, ÑÑB). Ñandejára ningo oikuaa ñane provlemakuéra, ha hiʼarive ñanemokyreʼỹ  ha ñanekonsola, ha upearã oiporu jepi umi rreunión.

15. ¿Mbaʼépa ñanemboʼe Asaf rehe oikovaʼekue?

¹⁵ Asaf rehe oikovaʼekue ñanepytyvõ jahechakuaa hag̃ua mbaʼérepa tekotevẽte jaha umi rreunionhápe. Ko saserdóte ohecha ijerére ojejapoha heta mbaʼe hekopeʼỹ, upéva omokangy ijerovia ha ou ndoservisevéi Ñandejárape. Haʼe heʼi: “Cherenyhẽ pyʼarógui ha ñembyasýpe aikómi”. Upéicha rupi Asaf haimetete oheja Jehovápe. Péro, ¿mbaʼépa oipytyvõ chupe opensa jey hag̃ua hendápe porã? Haʼe omombeʼu oho hague ‘Ñandejára témplope’ ha upéva ojapo porãha hese. Upépe oĩ heta Jehová siérvo ijerovia mbaretéva omokyreʼỹva chupe. Upéi ohechakuaa umi hénte aña ndoikoaremoʼãiha ha Ñandejára omyatyrõtaha opa mbaʼe vai (Sal. 73:2, 13-22). Koʼág̃a rupi ñande ikatu avei ñañeñandu Asaf oñeñandu haguéicha. Sapyʼánte ikatu ñanemokaneʼõ umi mbaʼe vaieta oikóva ko múndope oĩva Satanás poguýpe. Péro ñañembyaty jave ñane ermanokuéra ndive umi rreunionhápe, ñandepyʼaguapy ha ñanekyreʼỹ jey jaservi meme hag̃ua Jehovápe vyʼapópe.

16. ¿Mbaʼéichapa ñanepytyvõ Ana ehémplo?

¹⁶ ¿Mbaʼépa jajapóta oikórõ peteĩ mbaʼe ñanemokangýva ha ndajahasevéi rreunionhápe? Ikatu japyta ñatĩ nañakumplivéi rupi peteĩ rresponsavilida jarekovaʼekue kongregasiónpe, térã jajoavy peteĩ ermáno térã ermána ndive. Upéicha jave ñanemanduʼavaʼerã Ana ehémplore (elee 1 Samuel 1:4-8). Iména Elqaná oreko avei ambue hembireko hérava Peniná. Ana heta ohasa asy Peniná kúlpare, koʼýte oho jave ifamília ndive káda áño tavernákulope oĩva Silópe, oikuaveʼẽ hag̃ua Jehovápe sakrifísio. Ana oñembyasyeterei, “hasẽ ha ndokarúi”, upéicharamo jepe osegi omombaʼeguasu Jehovápe. Ha Jehová ohecha haʼe ojeroviaitereiha hese, upévare ovendesi chupe (1 Sam. 1:11, 20).

17, 18. a) ¿Mbaʼéichapa ñañemokyreʼỹ umi rreunionhápe? b) ¿Mbaʼéichapa reñeñandu repensávo umi mbaʼe Jehová ojapóvare ñandesalva hag̃ua?

¹⁷ Ñande jaservíva Jehovápe jasegivaʼerã Ana ehémplo ha jaha meme rreunionhápe. Jaikuaaháicha, upépe añoite ikatúta ñañemokyreʼỹ (Heb. 10:24, 25). Pór ehémplo, umi ermáno ñanderayhu ha igustoiterei ñaime hendivekuéra. Ikatu opokoiterei ñanderehe umi mbaʼe ojeʼéva peteĩ diskúrso térã komentáriope. Avei upépe ñañemongeta jepi ermanokuérandi oñepyrũ mboyve térã opa rire pe rreunión ha katuete oĩ ñanerendu ha ñanemokyreʼỹva (Pro. 15:23; 17:17). Tuicha avei ñanepytyvõ ñañomoirũ jave japurahéi hag̃ua Jehovápe umi rreuniónpe. Añetehápe, ‘jajepyʼapyve’ jave tekotevẽvéntema ñaĩ rreunionhápe ikatu hag̃uáicha ñanekyreʼỹ. Upépe Jehová ‘ñanekonsola’ ha ñanemombarete ñaneñeʼẽrendu meme hag̃ua chupe (Sal. 94:18, 19).

¹⁸ Ñande ningo jaikuaa porã Jehová ñanderayhuetereiha, upévare oiméne katuete ñañeñandu Asaf oñeñandu haguéicha. Haʼe opurahéi: “Che pógui cheguereko. Cherekomboʼévo chesãmbyhy” (Sal. 73:23, 24). ¡Ajépa javyʼaite Jehová oñangareko haguére ñanderehe ñandesalva hag̃ua!

[Porandu ñahesaʼỹijóva]

[Nóta oĩva taʼanga ndive páhina 28]

Jehová nemoag̃ui avei ijehe

[Nóta oĩva taʼanga ndive páhina 30]

Ñandejára oñangareko ñanderehe umi konsého rupive

[Nóta oĩva taʼanga ndive páhina 31]

Jehová ñanemokyreʼỹ ñaaguanta hag̃ua