Jehova Nĩ Atũgitagĩra Nĩguo Tũkaahonoka
Jehova Nĩ Atũgitagĩra Nĩguo Tũkaahonoka
“Inyuĩ mũtũire mũrangagĩrũo nĩ hinya wa Ngai, nĩ ũndũ wa ũrĩa mwĩtĩkĩtie, nĩ getha mũkona ũhonokio ũrĩa ũhaarĩirio wa gũkaguũranĩrio mahinda-inĩ marĩa ma kũrigĩrĩria.”—1 PET. 1:4, 5.
ŨNGĨCOKIA ATĨA?
Jehova aatũgucĩrĩirie atĩa harĩ ũthathaiya wa ma?
Tũngĩtĩkĩria Jehova atũtongorie na ũtaaro wake atĩa?
Jehova atwĩkagĩra ngoro atĩa?
1, 2. (a) Tũrĩ na ũũma ũrĩkũ atĩ Ngai nĩ arĩtũteithagia tũtũũrie wĩkindĩru witũ? (b) Jehova atũũĩ wega atĩa tũrĩ mũndũ ũmwe ũmwe?
“ŨRĨA ũgakirĩrĩria nginya o ithirĩro, ũcio nĩakahonokio.” (Mat. 24:13) Kũgerera ciugo icio, Jesu onanirie atĩ no mũhaka tũtũũrie wĩkindĩru witũ nginya mũthia nĩguo tũkaahonokio rĩrĩa Ngai akaaniina thĩ ĩno ya Shaitani. No ũguo ti kuuga atĩ Jehova erĩgagĩrĩra tũhũthĩre ũũgĩ kana hinya witũ gũkirĩrĩria. Bibilia ĩtũũmagĩrĩria ũũ: “Ngai nĩ mwĩhokeku, na ndangĩĩtĩkĩra mũgerio na magerio makĩrĩte marĩa mũngĩhota gwĩtiiria; no hĩndĩ ĩrĩa mũkũgerio nĩarĩmuonagĩra njĩra ya kũhonokera, nĩ getha mũhote gwĩtiiria magerio macio.” (1 Kor. 10:13) Ciugo icio ironania atĩa?
2 Nĩguo Jehova atigĩrĩre atĩ tũtiragerio makĩria ma ũrĩa tũngĩĩtiiria, no mũhaka akorũo oĩ maũndũ mothe marĩa matwĩgiĩ, mathĩna marĩa tũracemania namo, mũũmbĩre witũ, na mũigana ũrĩa tũngĩhota gwĩtiiria. Hihi Ngai nĩ atũũĩ wega ũguo? Ĩĩ nĩ atũũĩ. Maandĩko monanagia atĩ Jehova nĩ oĩ wega o ũmwe witũ. Nĩ amenyaga maũndũ marĩa twĩkaga o mũthenya na mĩtugo iitũ. No ahote gũkũũrana nginya meciria o na ũrĩa ngoro ciitũ icirĩire gwĩka.—Thoma Thaburi 139:1-6.
3, 4. (a) Maũndũ marĩa Daudi eeyoneire maronania atĩa atĩ Jehova nĩ arũmbũyagia mũndũ ũmwe ũmwe? (b) Nĩ ũndũ ũrĩkũ mũnene Jehova arahingia ũmũthĩ?
3 Hihi nĩ ũrona ta gũtangĩhoteka Ngai arũmbũiye andũ a thĩ ũguo? Mũtungi wa Thaburi Daudi nĩ eeyũragia kĩũria kĩu, akĩĩra Jehova ũũ: ‘Rĩrĩa ngũrora igũrũ rĩu rĩaku, ngona wĩra wa ciara ciaku-rĩ, mweri na njata, icio wĩkĩrĩte kuo, ngoria atĩrĩ, kaĩ mũndũ akĩrĩ kĩ, tondũ ũmũririkanaga?’ (Thab. 8:3, 4) No kũhoteke Daudi oririe ũguo nĩ ũndũ wa maũndũ marĩa eyoneire. Jehova nĩ onire mũriũ ũcio wa Jesii wa kĩhinga nda arĩ mũndũ “mangĩiguana nake” na akĩmũruta ‘ciugũ-inĩ cia mbũri atige gũcirũmĩrĩra, atuĩke mũnene wa gwathaga’ Isiraeli. (1 Sam. 13:14; 2 Sam. 7:8) Ta wĩcirie Daudi aiguire atĩa rĩrĩa aamenyire atĩ Mũũmbi wa igũrũ na thĩ nĩ aarũmbũyagia meciria make, methugunda ma kamwana ga kũrĩithia!
4 O na ithuĩ no tũgegaga ũguo tweciria ũrĩa Jehova atũrũmbũyagia tũrĩ mũndũ ũmwe ũmwe ũmũthĩ. Aracokanĩrĩria ‘indo cia kwĩrirĩrio cia ndũrĩrĩ’ ũthathaiya-inĩ wa ma, na agateithia ndungata ciake itũũrie wĩkindĩru wacio. (Hag. 2:7) Nĩguo tũtaũkĩrũo wega ũrĩa Jehova atũteithagia gũtũũria wĩkindĩru witũ, rekei twambe twĩcirie ũrĩa agucagĩrĩria andũ harĩ ũthathaiya wa ma.
NGAI NĨWE ŨTŨGUCAGĨRĨRIA
5. Jehova agucagĩrĩria andũ harĩ Mũriũ wake atĩa? Heana ngerekano.
5 Jesu oigire ũũ: “Gũtirĩ mũndũ ũngĩhota gũũka kũrĩ niĩ atagucĩrĩirio nĩ Ithe witũ ũrĩa wandekirie.” (Joh. 6:44) Ciugo icio ironania atĩ, nĩguo mũndũ atuĩke mũrutwo wa Kristo, no mũhaka ateithio nĩ Ngai. Jehova agucagĩrĩria atĩa andũ arĩa mahaana ta ng’ondũ harĩ Mũriũ wake? Kũgerera wĩra wa kũhunjia ũhoro ũrĩa mwega na ũteithio wa roho mũtheru. Kwa ngerekano, rĩrĩa Paulo na amĩshonarĩ angĩ maarĩ Filipi, nĩ maacemanirie na mũtumia wetagwo Ludia na makĩambĩrĩria kũmũhunjĩria ũhoro ũrĩa mwega. Ũhoro ũrĩa ũtongoretio nĩ roho ugaga ũũ: “Mwathani [Jehova] agĩtũma ngoro yake yende gũthikĩrĩria ndeto iria ciaheanagwo nĩ Paulo.” Ĩĩ-ni, Ngai aamũheire roho wake, ũkĩmũteithia kuona bata wa ndũmĩrĩri ĩyo, naguo ũndũ ũcio ũgĩtũma we na andũ a nyũmba yake mabatithio.—Atũm. 16:13-15.
6. Ithuothe twagucĩrĩirio nĩ Ngai harĩ ũthathaiya wa ma atĩa?
6 Hihi ũndũ ũcio wekĩkire harĩ Ludia warĩ wa mwanya? Aca. Angĩkorũo wĩ Mũkristiano wĩyamũrĩire Ngai, o nawe no kũgucĩrĩrio wagucĩrĩirio nĩ Ngai ũthathaiya-inĩ wa ma. O ta ũguo Ithe witũ wa igũrũ onire ũndũ mwega thĩinĩ wa ngoro ya Ludia, noguo onire ũndũ mwega thĩinĩ waku. Rĩrĩa waambĩrĩirie gũthikĩrĩria ũhoro ũrĩa mwega, Jehova nĩ aagũteithirie ũgĩtaũkĩrũo nĩguo na njĩra ya gũkũhe roho mũtheru. (1 Kor. 2:11, 12) Rĩrĩa werutanĩirie gwĩka ũrĩa werutaga, akĩrathima kĩyo gĩaku gĩa gwĩka wendi wake. Wamwĩyamũrĩra, ũgĩkenia ngoro yake. Ti itherũ, kuuma hĩndĩ ĩyo wanyitire njĩra ya muoyo, Jehova akoretwo nawe maũndũ-inĩ mothe.
7. Tũmenyaga atĩa atĩ Ngai nĩ egũtũteithia tũtũũre tũrĩ ehokeku?
7 Arĩkia gũtũteithia twambĩrĩrie gũtwarana nake, Jehova ndacokaga gũtũtiga twĩcarĩrie njĩra ciitũ cia gũtũũria wĩhokeku. Nĩ oĩ atĩ, o ta ũrĩa tũteerehire ũhoro-inĩ wa ma, tũtingĩhota gwĩtũũria thĩinĩ waguo. Akĩandĩkĩra Akristiano aitĩrĩrie maguta, mũtũmwo Petero oigire: “Inyuĩ mũtũire mũrangagĩrũo nĩ hinya wa Ngai, nĩ ũndũ wa ũrĩa mwĩtĩkĩtie, nĩ getha mũkona ũhonokio ũrĩa ũhaarĩirio wa gũkaguũranĩrio mahinda-inĩ marĩa ma kũrigĩrĩria.” (1 Pet. 1:4, 5) Ũrutani wa ciugo icio ũkoniĩ Akristiano othe na o ũmwe witũ nĩ agĩrĩirũo gũciĩciria ũmũthĩ. Nĩkĩ? Tondũ ithuothe nĩ tũbataraga ũteithio wa Ngai nĩguo tũtũũre tũrĩ ehokeku harĩ we.
NĨ TŨGIRAGĨRĨRIO TŨTIKAE KŨHĨTIA
8. Tũrabatara kwĩmenyerera tũtikoe ikinya rĩtaagĩrĩire nĩkĩ?
8 Mathĩna ma ũtũũro na kwaga gũkinyanĩra gwitũ ene, no gũtũme tũte muoroto witũ wa kĩĩroho, na gũtũingĩrie ũgwati-inĩ wa gwĩka ihĩtia o na rĩngĩ tũtekũmenya. (Thoma Agalatia 6:1.) Ũndũ ũmwe wekĩkire ũtũũro-inĩ wa Daudi nĩ wonanĩtie ũguo.
9, 10. Jehova aagirĩrĩirie Daudi atĩa ndakoe ikinya rĩtaagĩrĩire, na Ekaga atĩa nĩ ũndũ witũ ũmũthĩ?
9 Rĩrĩa Daudi aahĩtagwo nĩ Mũthamaki Saulu, nĩ eegirĩrĩirie na njĩra nene ndakerĩhĩrie harĩ mũtongoria ũcio warĩ na ũiru. (1 Sam. 24:2-7) No thutha-inĩ hanini, mĩerekera ya Daudi ya kwaga gũkinyanĩra nĩ yendire kũmũtooria. Kwĩ hĩndĩ aabataraga irio cia andũ arĩa aarĩ nao, na akĩhoya ũteithio kũrĩ Mũisiraeli wetagwo Nabali arĩ na gĩtĩo. Rĩrĩa Nabali amũcokeirie na irumi, Daudi akĩrakara mũno, na agĩkũũrĩrĩra akerĩhĩrie harĩ arũme othe a nyũmba ya Nabali, atekũririkana atĩ kũũraga andũ mateehĩtie nĩ kũngĩamũreheire rĩhia rĩa ũiti-thakame maitho-inĩ ma Ngai. Tiga Abigaili mũtumia wa Nabali aahiũhire kũmũgirĩrĩria, Daudi nĩ angĩekire ihĩtia inene. Nĩ ũndũ wa gũkũũrana atĩ nĩ Jehova wahũthagĩra mũtumia ũcio, Daudi aamwĩrire ũũ: “Jehova Ngai wa Isiraeli arogoocwo, o we ũcio ũkũrekirie nĩguo ũũke ũcemanie na niĩ ũmũthĩ; o naguo ũũgĩ waku ũrorathimwo, ningĩ o nawe, wee mwene, ũrorathimwo, o wee wagiria njite thakame ũmũthĩ, na wagiria ndĩĩrĩhĩrie na guoko gwakwa.”—1 Sam. 25:9-13, 21, 22, 32, 33.
10 Ũhoro ũcio ũratũruta atĩa? Jehova aahũthĩrire Abigaili kũgirĩrĩria Daudi ndakahĩtie. No taguo ekaga harĩ ithuĩ ũmũthĩ. Ũguo ti kuuga atĩ, no twĩrĩgĩrĩre Ngai atũmage mũndũ atũteithie rĩrĩa rĩothe twakorũo tũrorete kũhĩtia; o na ningĩ tutingĩĩgereria atĩ nĩ tũĩ wega ũrĩa Ngai angĩka ũndũ-inĩ mũna, kana maũndũ marĩa angĩtĩkĩria nĩguo ahingie muoroto wake. (Koh. 11:5) O na kũrĩ ũguo, no tũkorũo na ma atĩ Jehova hĩndĩ ciothe nĩ akoragwo akĩmenya maũndũ marĩa tũragerera na nĩ arĩtũteithagia gũtũũra tũrĩ ehokeku harĩ we. Atũũmagĩrĩria ũũ: “Nĩngũkũũhĩgia, nguonererie njĩra ĩrĩa ũrĩgeraga; ndĩĩgũtaaraga o ngĩkũbaraga na riitho rĩakwa.” (Thab. 32:8) Hihi Jehova atũtaaraga na njĩra ĩrĩkũ? Ũtaaro ũcio ũngĩtũguna atĩa? Na tũngĩkorũo na ma nĩkĩ atĩ Jehova nĩ aratongoria andũ ake ũmũthĩ? Baara wone ũrĩa ciũria icio icoketio ibuku-inĩ rĩa Kũguũrĩrio.
ŨTAARO NĨ ŨTŨGITAGĨRA
11. Jehova akoragwo oĩ na gĩkĩro kĩrĩkũ maũndũ marĩa marekĩka thĩinĩ wa ciũngano cia andũ ake?
11 Kĩoneki-inĩ kĩrĩa kĩrĩ thĩinĩ wa Kũguũrĩrio mũrango wa 2 na wa 3, Jesu Kristo ũrĩa mũtũũgĩrie arathuthuria ciũngano iria mũgwanja cia Asia Nini. Kĩoneki kĩu kĩguũrĩtie atĩ Kristo ndonaga o maũndũ ma ciũngano tu, no nĩ nginyagia maũndũ ma mũndũ ũmwe ũmwe. Amwe o na amagwetete na marĩĩtwa mao kĩoneki-inĩ kĩu, na hĩndĩ ciothe akamagaathĩrĩria kana akamataara. Ũndũ ũcio ũronania atĩa? Harĩ kũhinga gwa kĩoneki kĩu, ciũngano icio mũgwanja irũgamĩrĩire Akristiano aitĩrĩrie maguta kuuma mwaka wa 1914, na ũtaaro ũrĩa waheirũo ciũngano icio nĩ ũrahũthĩka ciũngano-inĩ cia andũ a Ngai thĩ yothe ũmũthĩ. Kwoguo, no tuuge atĩ Jehova kũgerera harĩ Mũrũwe, nĩ aratongoria andũ ake na njĩra nene. Tũngĩgunĩka atĩa nĩ ũtongoria ũcio?
12. Tũngĩtĩkĩria Jehova atongorie makinya maitũ na njĩra ĩrĩkũ?
12 Njĩra ĩmwe tũngĩgunĩka nĩ ũtongoria wa Jehova wa wendo nĩ kũgĩa na wĩruti wa mũndũ kĩũmbe. Jehova nĩ atũheaga ũtaaro mũingĩ wa Kĩĩmaandĩko kũgerera mabuku ma ngombo ĩrĩa ĩĩhokekete na njũgĩ. (Mat. 24:45) Ĩndĩ nĩguo ũtũgune, no mũhaka twethage mahinda ma kwĩruta na kũũhũthĩra. Wĩruti wa mũndũ kĩũmbe nĩ njĩra ĩmwe Jehova angĩhũthĩra ‘gũtũgitĩra tũtikahĩngwo.’ (Jud. 24) Hihi nĩ ũrĩ weruta ũndũ mabuku-inĩ maitũ ũkona ta arĩ we waandĩkĩirũo? Ĩtĩkĩra ũtaaro ũcio ta uumĩte harĩ Jehova. O ta ũrĩa mũrata angĩkuunĩra riitho akĩenda wĩcirie ũndũ mũna-rĩ, Jehova no ahũthĩre roho wake gũtũma wĩcirie ũndũ mũna wĩgiĩ mũtugo kana ũmũndũ waku, ũrĩa angĩ aingĩ o tawe marabatara kwagagĩria. Rĩrĩa twathĩkĩra ũtongoria wa roho, nĩ twĩtĩkagĩria Jehova atongorie makinya maitũ. (Thoma Thaburi 139:23, 24.) Ũndũ-inĩ ũcio, nĩ twagĩrĩirũo gũthuthuria njĩra ciitũ cia kwĩruta.
13. Nĩkĩ gũthuthuria njĩra ciitũ cia kwĩruta no ũkorũo ũrĩ ũndũ wa ũũgĩ?
13 Kũhũthĩra ihinda inene mũno maũndũ-inĩ ma gwĩkenia, no kuoye ihinda rĩa wĩruti wa mũndũ kĩũmbe. Mũrũ wa Ithe witũ ũmwe oigire ũũ: “Nĩ ũhũthũ mũno mũndũ kũreka wĩruti wake kĩũmbe ũthire. Rĩu maũndũ ma gwĩkenia nĩ maingĩhĩte mũno na thogora wamo ũkanyiha kũrĩ hĩndĩ ĩngĩ o yothe. Marĩ thĩinĩ wa TV, kompiuta, o na thimũ. Gũtirĩ handũ matarĩ.” Tũngĩaga kwĩmenyerera, ihinda rĩrĩa tũbataraga rĩa kwĩruta na njĩra ndikĩru no rĩthiĩ rĩnyihĩrĩire nginya rĩthire kaimana. (Ef. 5:15-17) O ũmwe witũ aagĩrĩirũo kwĩyũria ũũ: ‘Nĩ hũthagĩra kaingĩ ihinda kwĩruta Kiugo kĩa Ngai na njĩra ndikĩru? Kana no rĩrĩa ndĩrahaarĩria gĩcunjĩ kĩa mĩcemanio kana mĩario?’ Angĩkorũo nĩguo, no tũkĩhũthĩre wega makĩria hwaĩ-inĩ wa ũthathaiya wa famĩlĩ kana wa wĩruti wa mũndũ kĩũmbe kuongerera mũthithũ witũ wa ũũgĩ wa kĩĩroho ũrĩa Jehova atũheaga ũtũgitĩre nĩguo tũkaahonokio.—Thim. 2:1-5.
GWĨKĨRŨO NGORO NĨ GŨTŨTIIRAGĨRĨRA
14. Maandĩko monanĩtie atĩa atĩ Jehova nĩ arũmbũyagia ũrĩa tũiguaga?
14 Daudi nĩ aacemanirie na maũndũ maingĩ maritũ ũtũũro-inĩ wake. (1 Sam. 30:3-6) Ciugo ciake iria itongoretio nĩ roho cionanagia atĩ Jehova nĩ oĩ ũrĩa aaiguaga. (Thoma Thaburi 34:18; 56:8.) Ngai nĩ oĩ ũrĩa tũiguaga o na ithuĩ. Rĩrĩa ‘tũthuthĩkĩte ngoro’ kana ‘tũkahera roho-inĩ’ nĩ atũkuhagĩrĩria. Kũmenya ũguo gwiki no gũtũhoorerie, o ta ũrĩa kwahooreririe Daudi, ũrĩa wainire ũũ: “Niĩ no njanjamũke ngĩkenagĩra ũtugi waku, nĩ gũkorũo gũthĩnĩka gwakwa, wee nĩũkuonete; kũmenya nĩũmenyete ũrĩa ngoro yakwa yonete mĩnyamaro.” (Thab. 31:7) No Jehova to kũmenya amenyaga mĩnyamaro iitũ. Nĩ atũtiiragĩrĩra na njĩra ya gũtũhooreria na gũtwĩkĩra ngoro. Ũndũ ũmwe ahũthagĩra nĩ mĩcemanio ya Gĩkristiano.
15. Ũndũ ũrĩa wekĩkire harĩ Asafu ũratũruta atĩa?
15 Ũguni ũmwe wa gũthiĩ mĩcemanio nĩ wonanĩtio nĩ ũndũ ũrĩa wekĩkire harĩ mũtungi wa Thaburi Asafu. Gwĩciria mũno ũhoro wa waagi wa kĩhooto nĩ gwatũmĩte Asafu aage bata wa gũtungatĩra Ngai. Nake agĩkua ngoro. Aataarĩirie ũrĩa aaiguaga ũũ: “Ngoro yakwa ĩrathitĩte nĩ kĩeha, na ngagariũkagwo nĩ higo.” Nĩ ũndũ wa ũguo, aarĩ hakuhĩ gũtiga gũtungatĩra Jehova. Nĩ kĩĩ gĩateithirie Asafu gũcokia rũũĩ mũkaro? Oigire, nĩ ‘gũtonya handũ harĩa haamũre ha Mũrungu.’ Arĩ hau, gatagatĩ-inĩ ka athathaiya arĩa angĩ a Jehova, nĩ aacokirie mawoni marĩa magĩrĩire. Nĩ aamenyire atĩ ũgacĩru wa andũ aaganu no wa kahinda, na Jehova hatarĩ nganja nĩ angĩarũngire maũndũ. (Thab. 73:2, 13-22) No taguo harĩ ithuĩ. Mĩtangĩko ĩrĩa yumanaga na waagi wa kĩhooto wa thĩ ĩno ya Shaitani no ĩtũme tũkue ngoro. No gũcemania na aarĩ na ariũ a Ithe witũ, nĩ gũtũcanjamũraga na gũgatũteithia gũtũũria gĩkeno tũgĩtungatĩra Jehova.
16. Kĩonereria kĩa Hana kĩngĩtũguna atĩa?
16 Ĩ angĩkorũo harĩ ũndũ thĩinĩ wa kĩũngano ũratũma ũigue ũtekwenda gũthiĩ mĩcemanio? Hihi rĩngĩ harĩ mweke mũna wa ũtungata wĩrĩga gũtigithio na ũkaigua ũgĩconoka, kana he mũrũ kana mwarĩ wa Ithe witũ mũtaraiguithania. Ũndũ-inĩ ta ũcio, kĩonereria kĩa Hana no gĩgũteithie. (Thoma 1 Samueli 1:4-8.) Ririkana atĩ nĩ aathirĩkagio mũno nĩ mũiruwe Penina nĩ ũndũ wa thĩna aarĩ naguo wa kĩĩfamĩlĩ. Ũndũ ũcio wehaga makĩria o mwaka rĩrĩa famĩlĩ yathiĩ Shilo kũrutĩra Jehova magongona. Hana nĩ aahinyĩrĩrĩkaga mũno nginya ‘akarĩra, agatiga kũrĩa irio.’ O na kũrĩ ũguo, ndetĩkĩririe ũndũ ũcio ũmũgirie gũthiaga gũthathaiya Jehova. Nake Jehova akĩona wĩhokeku wake na akĩmũrathima.—1 Sam. 1:11, 20.
17, 18. (a) Tũũmagĩrĩrio na njĩra irĩkũ mĩcemanio-inĩ ya kĩũngano? (b) Ũiguaga atĩa nĩ ũndũ wa ũrĩa Jehova atũrũmbũyagia na wororo nĩguo tũkaahonoka?
17 Ũmũthĩ, Akristiano marĩ na gĩtũmi kĩega gĩa kwĩgerekania na kĩonereria kĩa Hana. Twagĩrĩirũo gũthiaga mĩcemanio tũrĩ na wĩhokeku. O ta ũrĩa twaneyonera, mĩcemanio nĩ ĩtwĩkagĩra ngoro. (Ahib. 10:24, 25) Ũrata ũrĩa ũkoragwo ngwatanĩro-inĩ ya Gĩkristiano nĩ ũtũhooragĩria. No tũigue kaũndũ thĩinĩ wa mĩario kana macokio gatũhutie ngoro. Tũgĩtereta mbere kana thutha wa mĩcemanio, Mũkristiano ũngĩ no athikĩrĩrie thĩna witũ kana aarie ciugo itũhoorerie. (Thim. 15:23; 17:17) Tũkĩinĩra Jehova, ngoro ciitũ nĩ icanjamũkaga. Na makĩria rĩrĩa tũrĩ na “mĩtangĩko,” nĩ tũbataraga kũũmĩrĩrio nĩ mĩcemanio ĩrĩa Jehova ahũthĩraga gũtwĩkĩra hinya kũgerera ‘ũhooreria wake,’ na agatũhotithia kũrũmia itua riitũ rĩa gũtũũra tũrĩ ehokeku.—Thab. 94:18, 19.
18 Ũgitĩri mwororo wa Ngai, ũtũmaga tũigue o ta Asafu mũtungi wa Thaburi ũrĩa wainĩire Jehova ũũ: ‘Nĩ kũũnyita ũũnyitĩte guoko kwa ũrĩo. Ũrĩndongoragia na ũtaari waku.’ (Thab. 73:23, 24) Githĩ ti gĩkeno kĩnene kũmenya atĩ Jehova nĩ atũgitagĩra nĩguo tũkaahonoka!
[Ciũria cia Wĩruti]
[Mbica karatathi-inĩ ka 29]
O nawe nĩ Jehova wakũgucĩrĩirie
[Mbica karatathi-inĩ ka 30]
Kũhũthĩra ũtaaro wa Ngai nĩ gũtũgitagĩra
[Mbica karatathi-inĩ ka 31]
Nĩ tũtiiragĩrĩrũo rĩrĩa twekĩrũo ngoro
