Jihova u tu Langa Phala ku Bhuluka
Jihova u tu Langa Phala ku Bhuluka
“Enu oso mu kutena kua Nzambi, a mi lange mu kuxikana, ni mu kukinga o kubhuluk’oko kua-ndù tukuluka mu kithangana kia kà suka-ku.” —1 PHE. 1:4, 5.
KIEBHI KI UEJI TAMBUIJILA?
Kiebhi kia tu sungu Jihova mu ubhezelu ua kidi?
Kiebhi ki tu tena kuehela Jihova ku tuendesa ni milongi iê?
Kiebhi kiene mu tu bhana Jihova kikuatekesu?
1, 2. (a) Ihi i tuejiia i tu kuatekesa ku dielela kuila Nzambi ua-nda tu kuatekesa ku kolokota? (b) O kuila Jihova ua tuijiia kiambote?
“UOSO-PHE u kolokota katé bhu dizubhilu, muène uà [ka] bhuluka.” (Mat. 24:13) Mu kuzuela kiki, Jezú ua londekesa kuila, se tua mesena ku kala ku muenhu, kioso kia-nda kuíza Nzambi ku buika o mundu ua Satanaji, tua tokala ku kolokota katé ku dizubhilu dia mundu. Maji ki kilombolola kuila Jihova, ua mesena tu kolokota mu nguzu ietu, mba mu unjimu uetu. O Bibidia i tu kanena: “O Nzambi-phe kizuelu kiê u ki kumbidila, kehela ku mi diangula kia tundu o nguzu ienu. Maji kioso k’iza o mudiangu, Nzambi u mi bhana nguzu phala mu tene kubhalakata, ni ditundilu dia kutena kubhita.” (1 Kol. 10:13) O izuelu íii a i kanena nanhi?
2 Jihova uejiia kuila, ki tu tena ku bhita mu ibhidi i tu bhonza ku dibhana na-iu, muéne ua tuijiia kiambote, ni ibhidi ioso i tu bhita na-iu, ki kale iofele, mba ionene, ni kiebhi ki tu tena ku kolokota. O kuila Nzambi ua tuijiia muene kiambote? Ua tuijiia. Mukonda o Bibidia i zuela kuila Jihova, uejiia o muxima ua muthu ni muthu. Muéne uejiia o ima i tu bhanga, ni ifua ietu, u tena ué kuijiia o ibanzelu ietu, ni ima ia mesena o muxima uetu.—Tanga Jisálamu 139:1-6.
3, 4. (a) Kiebhi ki tu londekesa o musoso ia Davidi kuila Jihova u suua muthu ni muthu? (b) Kikalakalu kiahi kia mu bhanga Jihova lelu?
3 O kuila Nzambi u suua o athu? O mukua jisalamu Davidi, uambe ia lungu ni kibhuidisu kiki, kioso kiambe kua Jihova: “Kioso ki ng’ila ngi talesa ku diulu ku ufunu ua milembu ié, ku mbeje ni jithéthembua ji ua iudika, ng’amba, ngixi: Muthu muene ua soko kiebhi, phala eie ku mu suua?” (Jisá. 8:3, 4) Nange Davidi ua bhange o kibhuidisu kiki, mukonda dia ibhidi ia bhiti na-iu. Sumbala muéne uexile o kasule ka Jese, maji Jihova ua mu mono kuila, “muthu ua mu zelela ku muxima ué,” iu ua mu solo ‘phala ku kala ku pholo mu tambula konda ia mundu’ ua Izalaiele. (1 Sam. 13:14; 2 Sam. 7:8) Xinganeka kia divu Davidi mu kuijiia kuila, o Mubhangi ua ngongo ua kexile mu suua o ibanzelu iê, sumbala uexile ngó mubhidi!
4 Ki tu tokala ku diuana mu kuijiia kuila Jihova uene ué mu tu suua lelu. Muéne ua mu bheka mu ubhezelu uê ‘athu a miji ioso,’ ua mu kuatekesa ué o mundu uê ku kolokota. (Aje. 2:7) Phala kuijiia kiambote kiebhi Jihova kia tu kuatekesa ku kolokota mu ufiiele uetu, tua-nda xinganeka kiebhi muéne kiene mu sunga o mundu uê, mu ubhezelu ua kidi.
NZAMBI U TU SUNGA KO KUÊ
5. Kiebhi Jihova kiene mu sunga athu, kua Mon’ê? Bhana kifika.
5 Jezú uambe: “Kana muthu u tena kuiza ko-kuami, se Tata ua ngi tumu u kamba ku mu sunga.” (Nzu. 6:44) O izuelu íii, ilondekesa kuila phala ku kala dixibulu dia Kristu, ku bhinga kikuatekesu kia Nzambi. Kiebhi Jihova kiene mu sunga athu edi kála jimbudi, kua Mon’ê? Bhu kaxi ka njimbu iambote, ni nzumbi ikôla. Mu kifika, kioso Phaulu kia kexile ni jiphange ja mukuá mu mbanza ia Filipe, a sange muhatu a mu ixana Lidia, a mu bokela o njimbu iambote. O misoso ia Bibidia izuela: ‘Jihova ua mu jikula o muxima mu ku tambulula o maka a tange Phaulu.’ Nzambi ua tumikisa o nzumbi iê phala ku mu kuatekesa ku tendela o njimbu iambote, mu kusuka-ku muéne, ni muiji uê a a batizala.—Ika. 16:13-15.
6. Kiebhi kia tu sungu kua Nzambi, mu ubhezelu ua kidi?
6 O kuila o musoso ua Lidia uene ngó? Kana. Se u Kidistá ua di bhakula, a ku sungu ué kua Nzambi mu ubhezelu ua kidi. O tata ietu ia diulu ua mono kima kia uabha ku muxima ua Lidia, ua mono ué kima kiambote ko kuê. Kioso ki uevu o njimbu iambote, Jihova ua ku kuatekesa ku tendela, mu ku u bhana o nzumbi ikôla. (1 Kol. 2:11, 12) Kioso ki u di suínisa ku kumbidila ioso i u di longa, muéne u besoala o nguzu i u bhanga phala ku kumbidila o vondadi iê. Kioso ki ua di bhakula kua muéne, o muxima uê ua sangulukile kiavulu. Kienhiki, tundé ki ua mateka kuenda mu njila ia kidi, Jihova uene ku kuendesa izuua ioso.
7. Kiebhi ki tuejiia kuila Nzambi, ua-nda tu kuatekesa ku kolokota mu ufiiele uetu?
7 Mu ku tu kuatekesa kuenda mu njila iê, Jihova kehele kuila tu kolokota mu ufiiele mu nguzu ietu ngó. Muéne uejiia kuila etu ki tueza mu ubhezelu uê mu nguzu ietu, ki tu tena ku kolokota mu ubhezelu mu nguzu ietu ngó. Mu ku soneka o Jikidistá a a undu, o poxolo Phetele uambe: “Enu oso mu kutena kua Nzambi, a mi lange mu kuxikana, ni mu kukinga o kubhuluk’oko kua-ndù tukuluka mu kithangana kia kà suka-ku.” (1 Phe. 1:4, 5) O izuelu íii, phala o Jikidistá joso a a undu, ia tokala ué o Jikidistá joso lelu. Mukonda diahi? Mukonda etu enioso tua bhingi o kikuatekesu kia Nzambi, phala tu kolokote ku mu kala fiiele.
NZAMBI U TENA KU TU FIDISA KU TA ITUXI
8. Mukonda diahi tu tena ku kala mu ibhidi, se tu ta kituxi?
8 O maka ku muenhu uetu, ni kituxi ki tua lundula, a tena ku tu fidisa ku kala ku mesu a zele, ni ku tu ta mu ibhidi, mba ku ta ituxi se ku kijiia. (Tanga Ngalásia 6:1.) Kiki a kilondekesa mu ibhidi ia bhiti na-iu Davidi.
9, 10. Kiebhi Jihova, kia fidisa Davidi ku ta kituxi, ni kiebhi Muéne kia bhanga kiki lelu?
9 Kioso kia kexile ku mu sota kua Sobha Saúlu, Davidi ua londekesa kídifua kiambote, o ku di tumina jihanji, muéne ka vutula phonzo kua nguma iê. (1 Sam. 24:2-7) Maji saí kithangana, mukonda dia ku kala mukua ituxi, Davidi ua lueza. Saí kizuua Davidi ua mesenene kúdia phala o masoladi mê, muéne ua bhingi kúdia ni ku xila kuoso kua mukua ixi iê, a mu ixanene Nabale. Nabale ka mu tambuijila kiambote, Davidi-phe njinda i mu kuata, iu ua mesenene ku jibha Nabale, ni muiji uê uoso, se ku xinganeka kuila o ku jibha athu sé kikuma, kituxi kua Nzambi. Maji Abingaíle muhatu’â Nabale, ua mu fidisa ku ta o kituxi kiki. Mu kuijiia kuila Jihova muéne ua mu fidisa bhu kaxi ka muhatu muenhó, Davidi ua mu ambela: “Nga sakidila Jihova, Nzambi ia Izalaiele, ua ku tumu kizuua kia lelu ku ngi batuila. Nga ku sakidila ue eie-muène ni kilunji kié, kuma ua ngi fudisa lelu kubhubhisa manhinga, ni ku vutula phônzo ni lukuaku luami eme-muène.”—1 Sam. 25:9-13, 21, 22, 32, 33.
10 Ihi i tu longa o musoso iú? Jihova bhu kaxi ka Abingaíle, ua fidisa Davidi ku ta kituxi. Muéne u bhanga ué kiki mu izuua ietu. Maji ki tu tokala ku kingila kuila Jihova u tumikisa muthu, phala ku tu fidisa ku ta kituxi; ki tu tena kuijiia se Nzambi ua-nda tu fidisa, mba se ua-nda kuehela phala ku kumbidila o kikanenu kiê. (Ndo. 11:5) Maji tu tena ku dielela kuila Jihova uejiia o ima i tu bhita na-iu, ni kuila ua-nda tu kuatekesa ku kolokota ku mu kala fiiele. Muéne u tu kanena: “Ngi ku longesa, ngi ku [idikisa] njila ioso i ua fuama kuia; ngi ku bhana kaiula, kuma nga ku te muene diesu.” (Jisá. 32:8) Kiebhi Jihova kia tu bhana milongi? Kiebhi ki tu tena ku katula mbote mu milongi iê? Mukonda diahi tua xikina kuila Jihova, ua mu longa o mundu uê lelu? Tua-nda sanga o itambuijilu íii mu divulu dia Dijingunuinu.
O MILONGI I TU LANGA
11. Kiebhi kiejiia Jihova o ima ia mu bhita mu ilunga ia mundu uê lelu?
11 O kisuma mu divulu dia Dijingunuinu mu kibatulu 2 ni 3, Jezú Kristu ua londo o sambuadi dia ilunga ku Azia. O kisuma kilondekesa kuila Kristu, ka tungula ngó o ilunga, maji ua tungula kilunga ni kilunga, saí ithangana, ua tumbula o majina mâ, saí ilunga ua i ximana, o ia mukuá ua i bazela. Kiki ki tu longa ihi? Mu kisuma, o sambuadi dia ilunga ilombolola o Jikidistá a a undu, tundé ku muvu ua 1914, o itendelesu ia bhana ku sambuadi dia ilunga, a tokala ué ku i belesela mu ilunga ioso ia mundu ua Nzambi lelu, mu ixi ioso. Kienhiki tu tena kuijiia kuila Jihova, bhu kaxi ka Mon’ê, ua mu kuendesa o mundu uê lelu. Kiebhi ki tu tena ku katula mbote ku itendelesu íii?
12. Kiebhi ki tu tena kuehela kuila Jihova u tu longa?
12 O ukexilu mu tu tena ku katula mbote mu milongi ia Jihova, o ku di longa ubheka uetu. Bhu kaxi ka madivulu ene mu bhanga o kibuka kia kimbadi kia fiiele, Jihova u tu bhana o milongi iê bhu kaxi ka Mikanda Ikola. (Mat. 24:45) Maji phala ku katula mbote, tua tokala ku kumbidila o milongi ioso i tu di longa. Se tu di longa ubheka, Jihova u tena ku tu ‘fidisa ku di bhukana.’ (Jud. 24) O kuila ua di longo kiá kima mu madivulu metu, iu ua mono kuila a ki soneka muene phala eie? Xikana o itendelesu ia Jihova. Kála o dikamba di ku bhabha bhu kisuxi phala ku ku londekesa kima, Jihova u tena ku tumikisa o nzumbi iê, phala ku ku londekesa kima mu ukexilu uê, mba mu ifua iê—ni ia akuenu, ia tokala—ku lungulula, se tu xikana kuila o nzumbi iê i tu kuatekesa, tua-nda kuehela Jihova ku tuendesa. (Tanga Jisálamu 139:23, 24.) Mu kuijiia o maka enhá, kima kiambote ku tonginina se tua mu di longa ubheka uetu.
13. Mukonda diahi kima kiambote ku tonginina kiebhi ki tuene mu di longa ubheka uetu?
13 O ku bhita ithangana iavulu mu itonokenu, ki tena ku tu fidisa ku kala ni kithangana phala ku di longa ubheka uetu. Phange’etu uambe: “Ki ki bhonzo kueha ku di longa ubheka uetu. Lelu kuala itonokenu iavulu, ki i te kalu, kála m’ukulu. Kuala o mutelembe ua izunzumbia, komputadolo, ni mutelembe ua kafuetele. Ima íii tu i sanga mu ididi ioso.” Se ki tu di lange, o kithangana kia tokala phala ku di longa o ima ia zongo ia Nzambi, tu ki zanga ni ima iéngi, mu kusuka-ku, ki tu kala dingi ni kithangana kia ku di longa ubheka uetu. (Efe. 5:15-17) Muthu ni muthu, ua tokala ku dibhudise: ‘O kuila ngene mu di longa o Mak’â Nzambi izuua ioso? Anga ngi di longa ngó kioso ni nga-nda bhanga diskursu, mba nga mu pelepalala o milongi ia kiônge?’ Se kiene mu bhita ni etu, tu tena ku katula mbote mu kizuua kia ubhezelu ku muiji, mba kioso ki tu di longa ubheka uetu, tu tena ku bandekesa o unjimu uetu mu milongi i tu bhana Jihova, i tu langa phala ku bhuluka.—Jisa. 2:1-5.
O KU TU SUÍNISA KU TU KOLOKOTESA
14. Kiebhi ki londekesa o Bibidia, kuila Jihova u suua o malamba metu?
14 Davidi ua bhiti mu ibhidi iavulu ku muenhu uê. (1 Sam. 30:3-6) O izuelu iê ia londekesa kuila Jihova uejidile o malamba mê. (Tanga Jisálamu 34:18; 56:8.) Nzambi ué uejiia o malamba metu. Kioso ki tu “toloka o mixima” mba tu “talamana mu nzumbi,” Jihova u tu zukama. Kiki ki tu kolokotesa kála Davidi kioso kimbi: “Ngi sanguluka, ngi kala ni kutana mu kulenduka kué; kuma eie ua ngi xinganeka mu kubhindama kuami, eie ua ng’ijidila mu jiphaxi mu nga bhiti.” (Jisá. 31:7) Jihova ka tu konda ngó o malamba. Muéne u tu kolokotesa mu ku tu suínisa. U bhanga kiki bhu kaxi ka iônge ietu.
15. Ihi i tu longa o musoso ua Azafo?
15 O mbote i tu katula mu iônge, tu i mona mu musoso ua mukua jisalamu Azafo. Kioso kia mono o usuéia, Azafo ua di ebhuidisa se o ku sidivila Nzambi kuala ni valolo. Azafo ua luualele. Muéne ua soneka kiebhi kia kexile mu divua, kuila: “Kioso mu thulu ki mua ngi xitile, kia ngi katele ku muxima kala songo ia ngi toma mu miôngo.” Kua mu kambele ngó, muéne keji sidivila dingi Jihova. Ihi ia kuatekesa Azafo? Muéne uambe: “Katé ki nga bokona mu tembulu ia Nzambi.” O ku kala bhu kaxi ka jiselevende ja Jihova, kua mu bhangesa ku lungulula o ibanzelu iê. Muéne ua mono kuila o akua phulu keji nangenena, ni kuila Jihova ueji zubha o maka enhó. (Jisá. 73:2, 13-22) Kiki ki tena ku bhita ni etu. O ibhidi ku mundu ua Satanaji i tena ku tu zozesa. O ku dilunga ni jiphange jetu, ku tena ku tu kolokotesa ku sidivila Jihova ni kisangusangu kioso.
16. Phangu iahi i tu katula kua Hana?
16 Abha se maka a mu bhita mu kilunga, a mu ku fidisa kuia mu iônge? Nange kua mu bhanga dingi o sidivisu i ua kexile mu bhanga mu kilunga, kiki, ki ki ku uabhela, mba ua kexile ni maka ni phange mu kilunga. Se kia mu bhita n’eie, u tena ku katula phangu kua Hana. (Tanga 1 Samuuele 1:4-8.) Ejiia kuila Hana, akexile ku mu xonguena kua mukajin’ê, Penina. Kia betele ku mu bhonza kioso muiji uê kia kexile múia mivu joso ku bhana jisata kua Jihova mu Silo. Hana ua luualele kiavulu, mukonda dia kiki, “muene u kala mu dila u fula kúdia.” Muéne kehela kuila o maka enhá a mu fidisa ku sidivila Jihova. Jihova ua mono o ufiiele uê iu ua mu besoala.—1 Sam. 1:11, 20.
17, 18. (a) Kiebhi ki tu tena ku tambula ki kuatekesu mu iônge ietu? (b) Kiebhi ki u divua kioso ki u mona kuila Jihova, u tu langa phala ku bhuluka?
17 O Jikidistá lelu, a tena ku katula phangu kua Hana. Etu ué ki tu tokala ku fonga mu iônge. Kala ki tuejiia kiá, o iônge i tu suínisa. (Jihe. 10:24, 25) O henda ia jiphange jetu i tu suínisa. O diskursu di bhanga phange, mba kima kiambote ki zuela phange ni muxima uoso, ki tena ku tu suínisa. O kuzuela ni jiphange ande dia ku mateka o kiônge, mba kioso ki tu zumbuka, mba phange u tena ku tuívua kiambote ni ku tu suínisa ni izuelu i tululukisa. (Jisa. 15:23; 17:17) Kioso ki tu imbila Jihova, o muxima uetu u sanguluka. Bhenge-bhenge kioso ‘kivula o hele,’ tu bhindamena o kikuatekesu ki tu tambula mu kilunga, muene mu tu kolokotesa ni ‘ukamba uê,’ u tu kuatekesa ku kolokota mu vondadi ietu ia ku mu kala fiiele.—Jisá. 94:18, 19.
18 Tu sakidila kiavulu o henda ia Jihova, ia ku tu langa phala ku bhuluka! Mu kuijiia kuila Nzambi u tu langa tu divua kála o mukua jisalamu Azafo, kioso kiembile Jihova: “Mbata eie ua ngi kuata mu lukuaku lua kadilu. Eie ua ngi bhana kaiula kioso ki ngenda jinga kunu.”—Jisá. 73:23, 24.
[Ibhuidisu ia ku dilonga]
[Foto ku mbandu 29]
Eie ué a ku sungu kua Jihova
[Foto ku mbandu 30]
O ku belesela o itendelesu ia Nzambi i tu langa
[Foto ku mbandu 31]
O itendelesu ia tu bhana i tu suínisa
