Jehova Chuan Chhandamna Hmu Tûrin Min Vêng
Jehova Chuan Chhandamna Hmu Tûrin Min Vêng
“Chhandamna, hun hnuhnûnga lang tûra peih sa chu hmu tûrin, rinna avângin Pathian thiltihtheihnaa vên chu in ni.”—1 PET. 1:5.
ENGTIN NGE KAN CHHAN ANG?
Engtin nge Jehova’n biakna dik lama min hîp?
Engtin nge Jehova chu a thununna hmanga kan inkaihhruaitîr?
Engtin nge Jehova chuan fuihna min pêk?
1, 2. (a) Kan rinawmna vawng tûrin Pathianin min ṭanpui ang tih eng tiamkamna nge kan neih? (b) Engtiang khawpin nge Jehova’n min hriat chian ṭheuh?
“A TAWP thlenga tuar peih apiang chu, chu mi ngei chu chhandamin a awm ang.” (Mt. 24:13) Chûng thute hmangin, Isua chuan Setana khawvêl chunga Pathian rorêl huna humhim kan nih theih nân, a tâwp thlenga kan rinawm a ngai tih a tilang chiang a ni. Mahse, chu chu mahni finna emaw, chakna emawa chhel tûrin Jehova chuan min beisei tihna a ni lo. Bible chuan: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin min tiam a ni. (1 Kor. 10:13) Hêng thute awmzia hi eng nge ni?
2 Jehova tân kan tuar theih tâwk aliam thlêmna kan tawh phal lo tûr chuan kan harsatna tawhte, kan miziate, kan tawrh theih chente pawh tiamin, kan chanchin engkim a hriat a ngai a. Pathian chuan chutiang khawpin min hre chiang tak zet em? Hre chiang e. Jehova chuan a mi malin min hre chiang hle tih Bible chuan a târ lang. Kan nî tin thiltih leh thil chînte chu a hria a. Thinlunga kan ngaihtuahna leh tumte hial pawh a hre thei a ni.—Sâm 139:1-6 chhiar rawh.
3, 4. (a) Jehova chuan a mi malin min ngaihsak tih engtin nge Davida thiltawn chuan a târ lan? (b) Tûn laiah Jehova chuan eng hna chhinchhiah tlâk tak nge a hlen mêk?
3 Pathianin keini mihring ve maite chutiang kawpa min ngaihven chu thil âwihawm lo angin a lang em? Fakna hla phuahtu Davida chuan he zawhna hi ngaihtuahin, Jehova hnênah: “I vân, i kut chhuakte, thla leh arsi i ruathote khi, ka ngaihtuah châng chuan, ‘Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni?’ ka ti ṭhîn,” tiin a sawi a ni. (Sâm 8:3, 4) He zawhna hi amah Davida thiltawn ngei aṭanga lo chhuak a ni thei a. Jesaia fapa naupang ber amahah chuan Jehova’n “ama thinlung ang pu mi” a hmu a, ‘a berâm vên laiin Israel mite chunga hotu atân a la a ni.’ (1 Sam. 13:14; 2 Sam. 7:8) Lei leh vân Siamtuin berâm vêngtu mipa naupang ngaihtuahna leh a thil veite a ngaihsak avânga Davida rilru awm dân tûr chu han ngaihtuah teh!
4 Tûn laia a mi mala Jehova min ngaihsakna chu a mak nêp bîk lo. “Hnam tinrêng thil duhzâwngte” chu biakna dikah a hruai khâwm a, a chhiahhlawhte chu an rinawmna vawng tûrin a ṭanpui a ni. (Hag. 2:7) Kan rinawmna vawng tûra Jehova min ṭanpui dân hre thiam lehzual tûrin, mite biakna dika a hîp hmasak dân chu i lo ngaihtuah ang u.
PATHIANIN A LAMAH MIN HIP
5. Engtin nge Jehova chuan mite chu a Fapa lama a hîp? Entîrna pe rawh.
5 Isua chuan “Pa mi tîrtuin a hîp loh chuan tumah ka hnênah an lo kal thei lo vang,” a ti a. (Joh. 6:44) Hêng thute hian Krista zirtîr ni tûrin, Pathian ṭanpuina kan neih a ngai tih a târ lang. Engtin nge Jehova chuan berâm ang mite chu a Fapa lama a hîp? Chanchin ṭha hrilhna leh thlarau thianghlim hnathawh hmangin a hîp a ni. Entîr nân, Paula leh missionary-a a zinpuite Philippi khuaa an awm lai chuan hmeichhe pakhat Ludi chu an hmu a, chanchin ṭha chu an hrilh ṭan ta a. Thlarauva thâwk khum thuziak chuan: “Paula thusawi zâwm tûrin Lalpa chuan a thinlung a tivâr ta a,” a ti. Ni e, Pathian chuan Ludi chu a thu hre thiam tûrin a thlarau a pe a, amah leh a chhûngte chuan baptisma an chan phah ta ni.—Tirh. 16:13-15.
6. Kan vai hian Pathianin biakna dik lamah engtin nge min hîp ṭheuh?
6 Chutiang thil chu Ludi chungah chauh vem ni thleng? Ni lo ve. Kristian inpumpêk tawh i nih chuan, nang pawh Pathianin biakna dik lamah a hîp che a ni. Kan Pa vâna mi chuan Ludi thinlungah ṭhatna engemaw tak a hmuh ang bawkin, nangmahah pawh a hmu a. Chanchin ṭha i ngaihthlâk ṭan hian, Jehova chuan i hriat thiam theih nân thlarau thianghlim pein a ṭanpui che a ni. (1 Kor. 2:11, 12) I thil zirte nunpui i han tum chuan, a duhzâwng ti tûra i thawhrimna chu mal a sâwm a. A hnêna i nun i pumpêk chuan, a thinlung a lâwm a ni. Dik takin, nunna kawng i zawh ṭan aṭangin, Jehova chuan englai pawhin a ṭanpui che a ni.
7. Pathianin rinawmna vawng reng tûrin min ṭanpui dâwn tih engtin nge kan hriat theih?
7 Jehova chuan a rawngbâwl ṭan tûra min ṭanpui avângin, rinawmna vawng reng tûr pawhin min ṭanpui ang tih kan ring tlat thei a ni. Ani chuan mahnia thutaka lo lût kan nih loh ang bawkin, mahniin thutakah kan awm reng thei lo tih a hria a. Tirhkoh Petera chuan hriak thih Kristiante hnêna a lehkha thawnah: “Chhandamna, hun hnuhnûnga lang tûra peih sa chu hmu tûrin, rinna avângin Pathian thiltihtheihnaa vên chu in ni,” tiin a ziak a. (1 Pet. 1:5) Chûng thua thu bulte chu Kristian zawng zawngte tân a hman theih a, tûn laiah kan ngaihven ṭheuh tûr a ni bawk. Engvângin nge? Kan vai hian rinawmna vawng reng tûra Pathian ṭanpuina kan mamawh ṭheuh avângin.
KAWNG SUAL ZAWH LO TURA INSUMIN
8. Engvângin nge kawng sual zawh loh tûra kan fîmkhur a ngaih?
8 Nuna nêksâwrna leh mahni ṭhat famkim lohna chuan thlarau lam thil ngaihsakna min hlohtîr theiin, kan hriat lohvin kawng sual min zawhtîr thei a. (Galatia 6:1 chhiar rawh.) Chu chu Davida nuna thilthleng chuan a târ lang a ni.
9, 10. Engin nge Jehova chuan Davida chu thil sual ti lo tûra a dan a, tûn laiah kan tân eng nge A tih?
9 Lal Saula veha a awm lai khân, Davida chuan lalber îtsîkna nei tak thungrûl lovin insûm theihna mize ngaihsânawm tak chu a lantîr a. (1 Sam. 24:2-7) Mahse, chu mi hnu lawk chuan Davida ṭhat famkim lohna chuan ani chu a hneh a ni. Amah leh a tlangvâlte tân ei leh in tûr a mamawh a, Israel mi ve tho Nabala hnênah zah tak chungin ṭanpuina a dîl a. Nabala’n hmusit taka a lo chhân lêt chuan, Davida chu a thin a rim hle a, pawi sawi lote thisen chhuahnain Pathian hmaah thiam loh a chantîr dâwn tih pawh ngaihtuah chang tawh lovin, Nabala leh a chhûngte zawng zawng bei tûrin a thawk chhuak ta a ni. Nabala nupui, Abigaili a hun taka a inrawlh avâng chauhvin, Davida chuan thil sual nasa tak tihna tûr chu a pumpelh ta hrâm a ni. Jehova a inrawlh tih hriain, Davida chuan Abigaili hnênah: “Vawiina mi lo hmuak tûra tîrtu che LALPA, Israelte Pathian chu fakin awm rawh se: tin, i remhriatna chu malsâwmin awm sela, tin, nang thisen chhuah thiam loh channa laka mi humtu leh keima kuta phuba la lova mi siamtu chu malsâwmin awm bawk ang che,” a ti a ni.—1 Sam. 25:9-13, 21, 22, 32, 33.
10 He thuziak aṭang hian eng nge kan zir theih? Jehova chuan thil sual ti lo tûra Davida dan nân Abigaili a hmang a. Tûn laiah pawh kan tân chutiang chuan a ti a ni. Pathianin thil sual kan tih dâwn apianga rawn inrawlh tûra tuemaw a tirh chu kan beisei thei lo va; dinhmun engemaw bera Pathian thiltih dân tûr emaw, a thiltum thlen famkim nâna thil engemaw a thlen phal chen tûr emaw chu kan hre thei lo bawk. (Thur. 11:5) Mahse, Jehova chuan kan dinhmunte chu engtik lai pawhin a hria a, a chunga rinawmna vawng tûrin min ṭanpui dâwn tih kan ring tlat thei a ni. Ani chuan: “Fing taka awmtîr chein i kalna tûr kawng chu ka entîr ang chia: ka mita en reng chung chein rem ka ruatsak zêl ang che,” tiin min tiam a ni. (Sâm 32:8) Engtin nge Jehova chuan rem min ruatsak, a nih loh leh thurâwn min pêk? Engtin nge chu chu kan hlâwkpui theih? Tin, tûn laiah Jehova’n a mite a kaihruai tih engvângin nge kan chian theih? Thu Puan buah hêng zawhnate chhân a nih dân hi lo chhinchhiah ang che.
THUNUNNAA VENHIM
11. Jehova’n a kohhrana thilthleng chu engtiang khawpin nge a hriat chian?
11 Thu Puan bung 2 leh bung 3-a chhinchhiah inlârnaah, chawimawia awm Isua Krista chuan Asia Minor-a kohhran pasarih chu a endik a. Krista chuan kohhran awm dân tlângpui mai ni lovin, an dinhmun engemaw bîk tak pawh a hmu tih inlârna chuan a târ lang. A ṭhenah phei chuan a mi mal leh thilthleng engemaw bîk thlenga sawi langin, a âwm tâwk fakna leh zilhna chu a pe a ni. Chu chuan eng nge a târ lan? Inlârna thlen famkimnaah, kohhran pasarih chuan kum 1914 hnu lama hriak thih Kristiante a entîr a; tin, kohhran pasarih hnêna pêk thununnaa lang thu bulte chu tûn laia khawvêl puma Pathian mite kohhran zawng zawng atân a hman theih a ni. Chuvângin, Jehova’n a mite chu a Fapa hmangin thatho takin a kaihruai kan ti thei a. A nih leh, engtin nge chu kaihhruaina chu kan hlâwkpui theih ang?
12. Engtin nge Jehova chu kan inkaihhruaitîr theih?
12 Jehova kaihhruaina duhawm tak kan hlâwkpui theih dân kawng khat chu mahnia Bible zirna hmangin a ni. Bâwih rinawm leh fing tak pâwl tih chhuah thu leh hlate kal tlangin, Jehova chuan Pathian Lehkha Thu hmanga thununna tam tak min pe chhuak a. (Mt. 24:45) Mahse, chu mi hlâwkpui tûr chuan hun pea kan zir leh kan thil zirte kan nunpui chu a ngai a ni. Mahnia Bible zirna neih chu Jehova’n kan ‘tlûk loh nâna min vên dân’ kawng khat a ni. (Jud. 24) I tân liau liauva ziak ang maia lang kan thu leh hla chhuah engemaw chu i zir ngai tawh em? Chu siam ṭhatna chu Jehova hnên aṭanga lo kal angin pawm ang che. I ṭhian chuan i dâra bêng thek thek chein, i fîmkhur a ngaihna lai chu a hrilh theih che ang bawkin, Jehova chuan a thlarau chu nangmah leh nangmah ang mi dang tam takte’n nungchang emaw, mizia emaw lama hmasâwn in ngaihna lai hriattîr nân che u a hmang thei a ni. Thlarau kaihhruaina kan hre thiama kan pawm hian, Jehova kan inkaihhruaitîr tihna a ni ṭhîn. (Sâm 139:23, 24 chhiar rawh.) He mi chungchângah hian, mahnia Bible zirna kan neih dân chu kan bih chiang tûr a ni.
13. Engvângin nge mahnia Bible zirna kan neih dân bih chian chu a finthlâk ang?
13 Intihhlim nâna hun tam tak kan hmanna chuan mahnia Bible zir hun tûr a ru bo thei a. Unaupa pakhat chuan: “Mahnia Bible zirna ṭhulh mai chu a awl hle. Intihhlimna hi tûn hma zawng aiin hmuh a awlsam a, tûn hma zawng aiin a tlâwm tawh zâwk bawk si a. TV te, computer te, leh phone-ahte a hmuh theih a. Chûngte chuan min hual vêl a ni,” tiin a sawi. Kan fîmkhur loh chuan, mahnia ngun taka Bible zirna neih nâna kan mamawh hunte chu a kiam tial tial thei a, a tâwpah phei chuan kan nei lo ṭhak thei a ni. (Eph. 5:15-17) Chuvângin, heti hian kan inzâwt ṭheuh tûr a ni: ‘Engtianga zingin nge Pathian Thu rilte chu mahnia ka zir ṭhin? Inkhâwma thusawi emaw, chanvo emaw ka neih hunah chauh vem ni?’ tiin. Chutiang kan nih chuan, chhandamna hmu tûra Jehova’n vênhimna min pêk thlarau lam finna ro hlute chhêk khâwl nân, chhûngkuaa Pathian biakna neih hun emaw, mahnia Bible zirna hun emaw chu hman ṭangkai lehzual kan tum thei a ni.—Thuf. 2:1-5.
FUIHNA HMANGA TIHCHAKA AWMIN
14. Jehova’n kan rilru awm dân a ngaihsak tih Bible-in engtin nge a târ lan?
14 Davida chuan manganna dinhmun tam tak a tâwk a. (1 Sam. 30:3-6) Thlarauva thâwk khum a thu chuan Jehova’n a rilru awm dân a hria tih a târ lang a ni. (Sâm 34:18; 56:8 chhiar rawh.) Pathian chuan kan rilru awm dân pawh a hria a. ‘Thinlunga kan lungchhiat’ emaw, ‘rilrua kan inchhîr’ emaw hunah ani chuan min hnaih a ni. Chu chuan: “I ngilneihna avâng hian ka hlimin ka lâwm ang: ka manganna hi i hmu si ṭhîn a; ka nunna hi a hrehawm laite pawhin i hre ṭhîn,” tia hla satu, Davida angin thlamuanna min pe rawh se. (Sâm 31:7) Mahse, Jehova chuan kan manganna a hre mai chauh a ni lo, thlamuanna leh fuihna min pein, min tichak bawk a. Chutianga a tih dân kawng khat chu Kristian inkhâwmna hmangin a ni.
15. Asapha thiltawn aṭangin eng nge kan zir theih?
15 Inkhâwm a ṭangkaina pakhat chu fakna hla phuahtu Asapha thiltawn chuan a târ lang a. Rorêl dik lohnate ngaihtuah rengna chuan Asapha chu Pathian rawngbâwl a hlutzia rinhlelhna a neihtîr a. Asapha chu a lunghnual hle a ni. A rilru awm dân chu heti hian a târ lang: “Ka thinlung hi a lungngai a, ka rilruah pawh chhun angin ka awm si a,” tiin. Chu mi avâng chuan, Jehova rawngbâwlna chu a bânsan ṭêp a ni. Asapha chu engin nge tung ding leh? Ani chuan: ‘Pathian hmun thianghlimah ka lût a,’ a ti a ni. Chuta Jehova betute zînga a awm avângin, thil thlîr dân dik a rawn nei leh ta a. Mi suaksualte hlawhtlinna chu rei lo tê atân a ni a, Jehova chuan thil awm dân chu a siam dik dâwn tih a hria a ni. (Sâm 73:2, 13-22) Chutiang chu kan ni ve a. Rorêl dik lohna Setana khawvêl kan dâwrna chuan min tilungngai thei a. Kan unaute nêna inkhâwmna chuan min tihahdamin, Jehova rawngbâwlnaa hlimna nei lêt leh tûrin min ṭanpui a ni.
16. Hani entîrna chu engtin nge kan hlâwkpui theih?
16 Mahse, kohhrana dinhmun engemaw chuan i tân inkhâwm tiharsa ta se engtin nge ni ang? I rawngbâwlna chanvo hlihthlâksak i nih avângin i zak deuh pawh a ni thei a, a nih loh leh kohhrana unau tuemaw nên in inmil lo pawh a ni thei bawk. Chutiang a nih chuan, Hani entîrna chu ṭangkai i ti mai thei a ni. (1 Samuela 1:4-8 chhiar rawh.) Ani chu a pasala nupui dang, Penini nêna inkûngkaih chhûngkaw dinhmun chuan a tilungngai êm êm tih hre chhuak leh la. Kum tin Silo khuaa Jehova hnêna inthawina hlân tûra an chhûngkuaa an kal apiangin, dinhmun chu a hrehawm lehzual ṭhîn a ni. Hani tân a lungngaihthlâk êm avângin, “a ṭap a ṭap a, chaw pawh a ei lo va.” Mahse, chu chu Jehova be tûra kal loh phah nân a hmang lo. Jehova chuan a rinawmna chu hmuin, mal a sâwm ta a ni.—1 Sam. 1:11, 20.
17, 18. (a) Kohhran inkhâwmnaah eng kawngtein nge fuihna kan dawn? (b) Chhandamna hmu tûra Jehova min ṭanpuina chu engtin nge i ngaih?
17 Tûn laia Kristiante chuan Hani entawn chhan tûr ṭha tak an nei a. Rinawm takin kan inkhâwm ziah tûr a ni. Kan tawn ṭheuh angin, inkhâwmte chuan fuihna pawimawh tak min pe si a. (Heb. 10:24, 25) Kristian inkawm khâwmna duhawm tak chuan thlamuanna min pe a. Thusawi emaw, chhânna pêk emawa ṭawngkam engemaw chuan kan thinlung a khawih thei a. Inkhâwm hma leh hnua titinaah, Kristian unau tuemaw chuan min ngaithlain, min hnêm mai thei bawk. (Thuf. 15:23; 17:17) Jehova tâna fakna hla saa aw kan chhuahna chuan min tiphûr a. A bîk takin, ‘rilru ngaihtuah tam takin’ min tihbuai hunah, inkhâwma kan dawn fuihna chu kan mamawh a, chutah chuan Jehova’n a ‘thlamuannatein’ min tichak a, rinawm reng kan tum tlatnaah min ṭanpui a ni.—Sâm 94:18, 19.
18 Kan Pathian min ngaihsakna duhawm taka him taka awmin, Jehova hnênah: “Ka kut ding lam hi i lo chelh ṭhîn a. Nangin i remruatnain mi hruai ang,” tia hla satu, Asapha angin kan awm ve thei a ni. (Sâm 73:23, 24) Jehova’n chhandamna hmu tûra min vên avângin kan va lâwm tak êm! (w12-E 04/15)
[Zirlai Atâna Zawhnate]
[Phêk 29-naa milem]
Nang ngei pawh Jehova hîpin i awm
[Phêk 30-naa milem]
Pathian thununna nunpuina hmanga vênhim kan ni
[Phêk 31-naa milem]
Fuihna kan dawnte chuan min tichak
