A Zeova gũuda tõnd tɩ d na n wa paam fãagre
A Zeova gũuda tõnd tɩ d na n wa paam fãagre
“Yaa yãmb la Wẽnnaam pãngã gũud tẽeb yĩnga, tɩ yãmb paam fãagr sẽn segl n na n puk yaoolem wakate.”—1 PƖƐ. 1:5.
Y NA N LEOKAME TƖ BÕE?
․․․․․
Wãn-wãn la a Zeova bool tõnd tũudum hakɩkã pʋgẽ?
․․․․․
Wãn to la d tõe n bas t’a Zeova wilg-d sor ne a saglsã?
․․․․․
Wãn-wãn la a Zeova kengd-d raoodo?
1, 2. a) Bõe yĩng tɩ d tõe n kɩs sɩd t’a Zeova na n sõng-d lame tɩ d kell n sak-a? b) A Zeova mii tõnd ned kam fãa tɩ ta zĩ-bʋgo?
A ZEZI ra yeela woto: “Ned ning sẽn na n tall a tẽeb hal tɩ wakat ta, a na n paama fãagre.” (Mat. 24:13) Gom-kãensã wilgda vẽeneg tɩ sẽn na yɩl n põs dũniyã sãoong sasa, d segd n kell n saka Wẽnnaam n tãag wakat kãnga. La pa rat n yeel t’a Zeova basa tõnd ned kam fãa t’a teeg a bãngr wall a pãng ye. Sɩd me, Biiblã yeta woto: “Wẽnnaam sẽn yaa sɩd soabã, bãmb ka na n sak tɩ yãmb paam makr sẽn yɩɩd yãmb pãng ye. La ne makre, bãmb na n maana sor tɩ yãmb tõe n yi, la tɩ yãmb tõe n paam pãng makrã pʋgẽ n da lʋɩ ye.” (1 Kor. 10:13) Gom-kãensã võor yaa bõe?
2 A Zeova pa basd tɩ makr sẽn yɩɩd tõnd pãng paam-d ye. Bala, a mi-d-la sõma, n mi d zu-loeesã, d sẽn yaa ned ning buudã, la d sẽn tõe n tõog toog n ta zĩig ningã. Rẽ yĩnga Wẽnnaam sɩd mii tõnd sõma woto bɩ? N-ye. Gʋlsg Sõamyã wilgame t’a sɩd mii tõnd ned kam fãa sẽn yaa ned ning buudã. A mii tõnd daar buud fãa tʋʋmã, la bũmb nins d sẽn minim n maandẽ wã. A pʋd n tõe n bãnga d sũurã tʋlsem la d tagsa toor-toorã.—Karm-y Yɩɩl Sõamyã 139:1-6.
3, 4. a) Wãn to la a Davɩɩd kibarã wilgd t’a Zeova mii tõnd ned kam fãa? b) Bõe la a Zeova maand rũndã-rũndã?
3 La rẽ yĩnga ninsaal sẽn pa zem bũmbã yell sɩd paka Sẽn-tõe-a-fãa wã woto bɩ? Yɩɩl-gʋlsd a Davɩɩd ra bʋgsa sok-kãngã zugu, n soka a Zeova woto: “Mam sẽn get saasẽ sẽn yaa yãmb nus tʋʋmdã ne kiuugã la ãdsã yãmb sẽn ning b zĩigẽ wã, ninsaal yaa bõe tɩ yãmb tẽr a yelle? La ninsaalb kamb yaa bõe tɩ yãmb gũud-ba?” (Yɩɩl 8:4, 5) Tõe tɩ yaa a Davɩɩd sẽn yã a Zeova sẽn ges a yell to-to wã n kɩt t’a sok woto. A Zese kom-dibli wã yao-zʋʋg a Davɩɩd sẽn da wa n nan yaa pe-kɩɩmã, a Zeova yãame t’a yaa ‘ned sẽn ta a yam,’ n yãk-a t’a “wa lebg Israyɛll nebã naaba.” (1 Sãm. 13:14; 2 Sãm. 7:8) Tags-y n ges-yã a Davɩɩd sũur sẽn yɩ noog to-to, a sẽn wa n bãng tɩ ãndũniyã fãa Naandã mii yẽ sẽn yaa pe-kɩɩm balã sũur tagsgã!
4 A Zeova sẽn mi tõnd to-to rũndã-rũndã wã me yaa bõn-kãsenga. A tigimda neb nins a sẽn get wa ‘buudã fãa soolem bõn-neebã’ tũudum hakɩkã pʋgẽ, n sõngd-b tɩ b tõe n kell n sak-a. (Aze 2:7) Nand tɩ d bao n bãng a Zeova sẽn sõngd-d to-to tɩ d tõe n kell n sak-a wã, bɩ d reng n gom a sẽn maand to-to n boond neb tɩ b wat tũudum hakɩkã pʋgẽ wã.
WẼNNAAM N BOOL TÕNDO
5. Wãn to la a Zeova boond neb tɩ b wat a Bi-riblã nengẽ? Rɩk-y makre.
5 A Zezi yeela woto: “Ned ka tõe n wa mam nengẽ tɩ ka m Ba sẽn tʋm-a maamã n bool-a ye.” (Zã 6:44) Gom-kãensã wilgdame tɩ yɩl n lebg Kiristã karen-biiga, rẽndame tɩ d paam Wẽnnaam sõngre. Wãn to la a Zeova boond neb nins sẽn yaa sakdb wa piisã tɩ b wat a Bi-riblã nengẽ? Yaa ne koe-noogã mooneg maasem, la ne vʋʋsem sõngã sõngre. Wala makre, a Poll ne a tũud-n-taasã sẽn da wa n be Filipã, b sega pag yʋʋr sẽn boond t’a Lidi, n moon-a koɛɛgã. Kibarã wilgame tɩ “Zusoabã paka a sũur t’a reeg a Poll sẽn togs bũmb ninsã fãa.” Wẽnnaam sõng-a-la ne a vʋʋsem sõngã maasem t’a wʋm koɛɛgã võore, tɩ yẽ ne a zakã rãmb reeg lisgu.—Tʋʋ. 16:13-15.
6. Bõe la Wẽnnaam maan n bool tõnd ned kam fãa tũudum hakɩkã pʋgẽ?
6 Rẽ yĩnga yaa a Lidi bal n paam tɩ Wẽnnaam sõng-a t’a wʋm koɛɛgã võor bɩ? Ayo. Y sã n dɩka y meng n kõ a Zeova n lebg kiris-neda, Wẽnnaam boola yãmb me tũudum hakɩkã pʋgẽ. Tõnd saasẽ Ba wã yãa bõn-sõng a Lidi sũurẽ wã. A yãa bũmb a woto yãmb me nengẽ. Y sẽn wa n sɩng koe-noogã kelgrã, a Zeova kõ-y-la a vʋʋsem sõngã tɩ y tõog n wʋm a võore. (1 Kor. 2:11, 12) Y sẽn modg n na n tũ bũmb nins y sẽn da zãmsdã, a ninga y modgrã barka. Y sẽn wa n dɩk y meng n kõ-a wã, a sũur yɩɩ noogo. Sãmbg sẽn ka be, y sẽn sɩng vɩɩm sorã tũubã tɛka, a Zeova sõngd-y-la wakat fãa.
7. Bõe n kɩt tɩ d miẽ tɩ Wẽnnaam na n sõng-d lame tɩ d kell n sak-a?
7 A Zeova sẽn sõng tõnd tɩ d sɩng a tũubã yĩnga, d tõe n kɩsa sɩd t’a na n sõng-d lame tɩ d kell n sak-a. A miime tɩ sẽn yɩ tɩlae t’a sõng tõnd tɩ d tõog n wa tũudum hakɩkã pʋgẽ wã, d pa tõe n pa a pʋgẽ tɩ pa tũ ne a sõngr ye. Tʋm-tʋmd a Pɩɛɛr da goma ne kiris-neb sẽn paam vʋʋsem sõng zaeebã n yeel woto: “Yaa yãmb la Wẽnnaam pãngã gũud tẽeb yĩnga, tɩ yãmb paam fãagr sẽn segl n na n puk yaoolem wakate.” (1 Pɩɛ. 1:4, 5) Yaa sẽn paam-b zaeebã la a Pɩɛɛr sẽn da gomd ne wã. La a gomdã tara yõod ne tõnd ned kam fãa rũndã-rũndã. Bõe yĩnga? Bala sẽn na yɩl n kell n sak Wẽnnaam, d fãa rata a sõngre.
WẼNNAAM TÕE N SÕNG-D LAME TƖ D RA MAAN WẼNG YE
8. Bõe yĩng tɩ d segd n gũus n da wa beeg Wẽnnaam?
8 Vɩɩmã zu-loeesã n paas d sẽn yaa koangdbã tõe n kɩtame tɩ d wa pa le get yɛlã wa a Zeova sẽn get-b to-to wã ye. Woto tõe n wa yɩɩ sabab tɩ d maan bũmb n beeg Wẽnnaam n pa bãng ye. (Karm-y Galat dãmb 6:1.) A buud zoe n paama a Davɩɩde.
9, 10. Wãn la a Zeova sõng a Davɩɩd t’a pa maan wẽnga, la wãn to la a sõngd tõnd rũndã-rũndã?
9 Rĩm a Sayull sẽn da wa n baood a Davɩɩd n dat n kʋ wã, a Davɩɩd wilgame t’a yaa ned sẽn tõe a meng sõma. Baa a Davɩɩd sẽn wa n paam weer n tõe n dok a sũur ne rĩmã, a pa maan woto ye. (1 Sãm. 24:3-8) La rẽ poor bilfu, bũmb n wa n maane, t’a Davɩɩd pa tõog a meng ye. Yẽ ne a nebã ra wa n data rɩɩb la koom, t’a tʋm b kẽer Israyɛll ned a ye yʋʋr sẽn boond t’a Naball nengẽ tɩ b tɩ kos sõngre. La a Naball tʋ a Davɩɩd n tõdg t’a kõn sõng-a ye. Woto yika a Davɩɩd sũur wʋsgo, t’a tʋlg n na n tɩ kʋ a Naball ne rap nins sẽn be a zakẽ wã fãa n dok a sũuri, n yĩm t’a sã n kʋ neb sẽn pa beege, Wẽnnaam na n ning-a-la taale. La a Abigayill sẽn yaa a Naball pagã kẽesa a toog yellã pʋgẽ tao-tao, t’a Davɩɩd pa maan wẽng ning a sẽn da sɩfã ye. A Davɩɩd sẽn bãng t’a Zeova tũnuga ne a Abigayill n na n sõng-a wã, a yeela woto: “Bɩ Israyɛll Zusoab a Wẽnnaam sẽn tʋm foom tɩ f wa seg maam dũndã wã paam pẽgre. Bark Wẽnnaam f yamã yĩnga. Fo gɩdga maam tɩ m ka raag ned zɩɩm ye.”—1 Sãm. 25:9-13, 21, 22, 32, 33.
10 Yam bʋg la d tõe n dɩk kiba-kãngã pʋgẽ? A Zeova tũnuga ne a Abigayill n sõng a Davɩɩd t’a pa maan wẽng ye. A sõngda tõnd me rũndã-rũndã. Yaa sɩd tɩ d pa segd n tẽ tɩ d sã n wa tudg n na n maan wẽng fãa, Wẽnnaam na n tʋma ned t’a wilg-d ye. D leb n pa tõe n bãng Wẽnnaam sẽn na n welg yell ning to-to, wall a sẽn na n bas tɩ bũmb ning maane, a raabã pidsg yĩng ye. (Koɛ. 11:5) La wakat fãa, d tõe n kɩsa sɩd t’a Zeova mi d yɛlã sẽn yaa to-to wã sõma, la t’a na n sõng-d lame tɩ d kell n sak-a. A yeel-d-la woto: “Mam na n zãmsa foom n wilg foom sor ning fo sẽn tog n tũ. Mam nif geta foom, la mam yaa fo sagenda.” (Yɩɩl 32:8) Wãn to la a Zeova sagend tõndo? Wãn to la d tõe n dɩ sagl-kãens yõodo? La bõe yĩng tɩ d tõe n kɩs sɩd t’a Zeova wilgda a nin-buiidã sor rũndã-rũndã? Wilgr sebrã leoka sogs-kãensã.
A SAGLSÃ TŨUB KOGEND-D LAME
11. Yaa hal sẽn ta zĩ-bʋg la a Zeova mi yɛl nins sẽn maand a nin-buiidã tigims pʋsẽ wã?
11 Yãab ning sẽn be Wilgr sebrã sak a 2 ne a 3 wã wilgame tɩ rĩm a Zezi Kirist ra mii yɛl nins sẽn da be Aazi Mineer tigims a yopoe wã pʋsẽ. Pa tiging fãa yɛl sẽn da yaa to-to wã bal la a Zezi ra mi ye. A ra mii yɛl takɩ sẽn da maand b pʋsẽ, n pʋd neb kẽer yʋy menga. Sẽn paase, a pẽga tiging fãa wall a kõ-a sagls nins sẽn yaa tɩlae ne-a wã. Yãab kãng wilgda tõnd bõe? Yãabã pidsg pʋgẽ, tigims a yopoeyã makda kiris-neb nins sẽn paam vʋʋsem sõng zaeebã sẽn be tẽngã zug yʋʋmd 1914 poorã. Yaa sẽn paam-b zaeebã la a Zezi sẽn saglã. La a saglsã tõe n nafa Wẽnnaam nin-buiidã fãa sẽn be dũniyã gill zug rũndã-rũndã wã. Dẽnd d tõe n yeelame t’a Zeova wilgda a nin-buiidã sor ne a Bi-riblã maasem rũndã-rũndã. Wãn to la d wilgd tɩ d sakda a sor-wilgrã?
12. Wãn to la d tõe n bas t’a Zeova wilg-d sore?
12 Bũmb a ye d sẽn tõe n maan n dɩ a Zeova sor-wilgrã nafa, yaa d sẽn na n zãmsd a Gomdã. A Zeova tũnugda ne tʋm-tʋmd sẽn tũud sɩd la sẽn tar yamã sɛb n kõt tõnd sagl-sõma sẽn yit a Gomdã pʋgẽ. (Mat. 24:45) La sẽn na yɩl tɩ sagl-kãens naf-do, d segd n dɩkda sẽk n zãmsd-b la d tũud d sẽn zãmsdã. D sã n zãmsd Biiblã, d wilgdame tɩ d tʋllame t’a Zeova ‘tall-d tɩ d ra lʋɩ’ ye. (Ziid 24) Rẽ yĩnga, yãmb na zɩ n karem bũmb tõnd sɛbã pʋsẽ n tags tɩ b gʋls-a-la yãmb yĩng sɩda? Y segd n sak n deegame tɩ yaa saglg sẽn yit a Zeova nengẽ. Wala y zoa sẽn tõe n pĩms y bãok n tees-y bũmbã, a Zeova tõe n talla a vʋʋsem sõngã n wilg-y y yel-manesem bɩ zʋg y sẽn tog n toeeme. Sɩd me, tõnd fãa tara zĩis d sẽn segd n modg n manese. D sã n sakd vʋʋsem sõngã sor-wilgri, d basdame t’a Zeova wilgd-d sore. (Karm-y Yɩɩl Sõamyã 139:23, 24.) Woto yĩnga, bɩ d gomd d sẽn zãmsd Biiblã to-to wã yelle.
13. Bõe yĩng tɩ d segd n tags d sẽn zãmsd Biiblã to-to wã zugu?
13 D sã n dɩkd sẽk wʋsg n deemdẽ, na n yɩɩ toog tɩ d paamd sẽk n zãmsd Biiblã sõma. Saam-biig a yembr yeelame t’a buud tõe n paam-d-la nana-nana. Bõe yĩnga? Ad a sẽn yeele: “Rũndã-rũndã, f tõe n paama reem buud toor-toor nana wʋsg n yɩɩd pĩndã. Sẽn paase, pa le tũud ne ligd wʋsg yiisg ye. Televiziõ wã, ordinatɛɛr-dãmbã la selilɛɛr-dãmbã pida ne reem. Reemã bee zĩig zãnga.” D sã n pa gũusi, d tõe n wa tara vɩʋʋg ning d sẽn dɩkd n deemdẽ wã paasg bilf-bilfu, hal n wa pa le tar sẽk n zãmsd Biiblã sõma ye. (Ef. 5:15-17) Rẽnd yɩta sõma tɩ tõnd ned kam fãa sok a meng woto: ‘Rẽ yĩnga mam wae n dɩkda sẽk n vaeesd Wẽnnaam Gomdã sõma bɩ? Yaa m sã n wa tar sõsg tigingã pʋgẽ bal la m wɩsgd d meng n vaees-a bɩ?’ Sã n yaa rẽ, yɩta sõma tɩ d tũnug ne zaabr ning d sẽn yãk n zãmsd Biiblã d ye wall ne d zakã rãmbã, n zãmsd Biiblã sõma, n baood yam ning a Zeova sẽn kõtã wa d sẽn baood arzɛgse. Yam kãng na n kogla tõnd la a sõng-d tɩ d kell n sak a Zeova n tãag saabã.—Yel. 2:1-5.
A ZEOVA KENGDA D RAOOD N KOGEND-DO
14. Wãn to la Gʋlsg Sõamyã wilgd t’a Zeova mii tõnd tagsa wã?
14 A Davɩɩd vɩɩmã pʋgẽ, a sega zu-loees wʋsg sẽn komsd raoodo. (1 Sãm. 30:3-6) Goam nins a Zeova sẽn vẽeneg-a t’a gʋlsã wilgdame t’a ra mii a Davɩɩd tagsa wã. (Karm-y Yɩɩl Sõamyã 34:19; 56:9.) Wẽnnaam mii tõnd ned kam fãa me tagsa. D ‘sũ-sãang’ bɩ d ‘sũ-pa-noaang’ sasa, a pẽneg-d lame. Woto bãngr tõe n kenga d raoodo, wa sẽn da keng a Davɩɩd raoodã. A yeela woto: “Mam kɩdemdame n maand sũ-noog yãmb nonglmã pʋgẽ. Yãmb yãa mam naongo. Yãmb mii mam toogo.” (Yɩɩl 31:8) La a Zeova pa mi tõnd toogã bal ye. A belsd-d lame la a kengd d raoodo. Bũmb a yembr a sẽn tũnugd n maand rẽ yaa tigissã.
15. Yam bʋg la d tõe n dɩk bũmb ning sẽn da paam a Azafã pʋgẽ?
15 Bũmb ning sẽn paam a Azafã wilg-d-la tigissã kẽnd sẽn tõe n naf tõnd to-to wã neng a ye. A Azaf ra wa n tagsda tɩrlmã kaalem yelle, n wa getẽ tɩ Wẽnnaam tũub ka yõod ye. Woto komsa a raoodo. A goma rẽ yell n yeel woto: “Mam sẽn paam sũ-toog wakate, mam sũur vʋdgdame.” Woto kɩtame t’a ra na n bas a Zeova tũubu. Bõe n sõng a Azaf t’a toeem yam? Ad a sẽn yeele: “Yaa mam sẽn wa n kẽng Wẽnnaam sɛk-zĩigẽ wã.” Dẽnd yaa a sẽn kẽng a tẽed-n-taasã sʋkã n sõng-a. A bãngame tɩ nin-wẽnsã yɛl sẽn wõnd yaa sõma wã pa bũmb sẽn na n kaoose, la t’a Zeova na n dola ned kam fãa. (Yɩɩl 73:2, 13-22) Tõnd me tõe n mi n wa tagsda wa a Azafe. Tʋʋm-kɛg nins sẽn maand a Sʋɩtãan dũniyã pʋgẽ wã tõe n wa sãamda d sũuri, la komsd d raoodo. La d sã n tigimd ne d tẽed-n-taasã, d paamda belsgo, n tõe n kell n tũ a Zeova ne sũ-noogo.
16. Wãn to la a Ana kibarã tõe n naf-do?
16 La y sã n tara zu-loɛɛg tigingã pʋgẽ tɩ y yam pa le be tigissã kẽnd yẽ? Wala makre, tõe tɩ tʋʋmd y sẽn da tar tigingã pʋgẽ la b reeg n bas-y tɩ yãnd tar-y-yã, wall yãmb ne y tẽed-n-taag ning moor n yõsge. Sã n yaa rẽ, a Ana kibarã tõe n sõng-y lame. (Karm-y 1 Sãmwɛll 1:4-8.) Tẽeg-y t’a pʋg-to a Penina ra wae n maand n sãamda a sũurã wʋsgo. Yʋʋmd fãa, b sã n da wa kẽng a Zeova roogẽ wã Silo n na n tɩ kʋ maand la yellã manegd n kenge. Rẽ ra namsda a Ana wʋsg hal t’a mi n “yãbd n ka rat n dɩ” ye. La a zu-loɛɛgã zɩ n kɩt t’a tõdg t’a kõn kẽng n tɩ naag n pʋʋs a Zeova ye. A Zeova yãa a sẽn pelg a pʋg n tũud-a wã, n ning-a barka.—1 Sãm. 1:11, 20.
17, 18. a) Wãn-wãn la tigissã kẽnd kengd d raoodo? b) Yãmb tagsg yaa wãn a Zeova sẽn get tõnd yell ne nonglmã?
17 Rũndã-rũndã, kiris-nebã segd n dɩka a Ana togs-n-taare, n pa vaand tigissã ye. Wa d fãa sẽn gũus n gesã, tigissã sɩd kengda d raoodo. (Heb. 10:24, 25) D sã n kẽnge, d sẽn yãt d tẽed-n-taasã sẽn wilgd tõnd b nonglmã, kõt-d-la belsgo. D tõe n mi n wʋma bũmb sõsg pʋgẽ wall nina leoorẽ hal tɩ noog d sũuri. Nand tɩ tigissã sɩng wall b poore, d tẽed-n-taag ning tõe n maaga a yĩng n kelg-do, wall a togs-d bũmb tɩ keng d raoodo. (Yel. 15:23; 17:17) Sẽn paase, tigissẽ wã, d sã n wa naag taab n yɩɩnd n pẽgd a Zeova, d sũy manegd n noomame tɩ kengd d raoodo. Sẽn yɩɩd fãa, yaa d sã n wa tar “tagsg sẽn yaa toogo,” rat n yeel tɩ d sũur sã n wa pa noomẽ la d segd n modg n kẽng tigissã. Bala be la d paamd a Zeova “belsg” la a sõngre, n tõe n tõog n kell n sak-a.—Yɩɩl 94:18, 19.
18 Tõnd Wẽnnaamã sẽn get tõnd yell ne nonglmã kɩtame tɩ d tar bas-m-yam wa yɩɩl-gʋlsd a Azafe. A ra yeela a Zeova a yɩɩll pʋgẽ woto: “Yãmb na n tɛɛ maam ne y saglgo.” (Yɩɩl 73:23, 24) Ad d sɩd tara mi-beoog wʋsg ne a Zeova, a sẽn gũud tõnd woto tɩ d na n wa paam fãagrã!
[Zãmsgã sogsgã]
[Foto seb-neng 29]
Yaa a Zeova n bool yãmb me
[Foto seb-neng 30]
Wẽnnaam saglsã tũub kogend-d lame
[Foto seb-neng 31]
B sẽn kengd-d raoodã sõngd-d lame
