‘Dios ta proteha boso pa medio di su poder pasobra boso tin fe pa un salbacion cu ta cla pa keda revela den tempo di fin.’​—1 PED. 1:5.

1, 2. (a) Ki siguransa nos tin cu Dios lo yuda nos keda fiel te na fin? (b) Con bon Jehova conoce cada un di nos?

“ESUN cu persevera te na fin ta esun cu lo ser salba.” (Mat. 24:13) Cu e palabranan aki, Hesus a mustra bon cla cu si nos kier sobrevivi destruccion di e mundo di Satanas, nos mester keda fiel te na fin. Pero Jehova no ta verwacht pa nos depende riba nos mes forsa ni nos sabiduria pa logra esaki. Con nos por sa esey? Bijbel ta bisa cu “Dios ta fiel na su palabra, y lo e no laga boso pasa den un tentacion cu boso no por soporta, ma ora e tentacion presenta, lo e percura tambe pa e salida, a fin cu boso por want’e.” (1 Cor. 10:13) Kico e promesa aki ta encera?

² Wel, cu Jehova lo no laga nos pasa den un tentacion cu nos no por soporta. E por haci esey, pasobra e conoce nos bon. E sa ki problema nos tin, ki clase di persona nos ta y tambe cuanto nos por soporta. Pero di berdad Dios conoce nos asina bon? Si. E Scritura ta bisa cu Jehova conoce cada un di nos profundamente. E sa ki rutina y custumbernan nos tin. E por asta lesa nos pensamentonan y wak kico tin den nos curason.​—Lesa Salmo 139:1-6.

3, 4. (a) Con e experencia di David ta mustra cu Dios ta interesa den cada un di nos? (b) Con Jehova ta demostra interes den hende awe?

³ Di berdad e Dios Todopoderoso tin asina tanto interes den nos, siendo cu hende ta insignificante? E salmista David a pensa profundamente riba e pregunta aki; el a puntra Jehova: “Ora mi contempla bo cielonan, e obra di bo dedenan, e luna y e streanan cu abo a establece, ta kico hende ta, cu bo ta corda di dje?” (Sal. 8:3, 4) Kisas, ta e echo cu Jehova a mustra interes den David a motiv’e pa haci e pregunta ey. Pa Jehova, David tabata ‘un homber conforme Su curason.’  Pesey el a scoge e, e yiu homber di mas chikito di Isai, un hoben wardado di carne, pa bira “gobernante” di Israel. (1 Sam. 13:14; 2 Sam. 7:8) Bo por imagina bo con David lo mester a sintie ora el a realisa cu e Creador di universo a presta atencion na e pensamento- y sintimentonan di un simpel hoben wardado di carne?

⁴ E interes personal cu Jehova ta mustra den nos awe tambe ta masha remarcabel. For di ‘tur nacion’, e ta reuniendo personanan “deseabel” den su bista pa bira parti di su organisacion y ta yuda nan mantene nan integridad. (Hag. 2:7, NW) Pero con Jehova ta yuda nos mantene nos integridad? Wel, prome cu nos contesta e pregunta aki, ta bon pa nos compronde prome con Jehova ta hala hende na su organisacion.

DIOS A HALA NOS CERCA DJE

5. Con Jehova ta hala hende na su Yiu? Ilustra.

⁵ Hesus a bisa: “Ningun hende no por bini cerca mi a menos cu e Tata, cu a manda mi, hal’e cerca mi.” (Juan 6:44) Pues, pa nos por bira un discipel di Cristo, nos mester di Dios su yudansa. Awor, con Jehova ta hala hende semehante di carne cerca su Yiu? Esey ta pa medio di spirito santo y e predicacion di e bon noticia. Ata aki un ehempel: Ora Pablo y su compañeronan misionero tabata den Filipo, nan a topa un muher cu yama Lidia y a comparti e bon noticia cu ne. Bijbel ta bisa cu “Jehova a habri su curason completamente pa e acepta e cosnan cu Pablo tabata papia.” Si, Dios a uza su spirito santo pa yuda Lidia compronde e mensahe di Reino. E resultado tabata cu Lidia y tur e hendenan di su cas a batisa.​—Echo. 16:13-15.

6. Con Dios a hala nos tur na su organisacion?

⁶ Ta Lidia so Jehova a hala na su organisacion? Claro cu no. Si bo ta un cristian batisa, Dios a hala abo tambe na su organisacion, esta na e adoracion berdadero. Mescos cu nos Tata selestial a mira algo bon den curason di Lidia, el a mira algo bon den abo tambe. Con nos por sa esey? Wel, ora bo a cuminsa scucha e bon noticia, Jehova, pa medio di su spirito santo, a yuda bo compronde e mensahe. (1 Cor. 2:11, 12) Ora bo a cuminsa haci esfuerso pa cumpli cu Jehova su boluntad, el a bendiciona bo. Y ora bo a dedica bo bida na dje, bo a hacie contento. Si, for di e dia cu bo a cuminsa cana riba e caminda pa bida, Jehova ta cu bo.

7. Con nos por sa cu Dios lo yuda nos keda fiel?

⁷ Unabes cu Jehova a yuda nos bira su Testigo, nos por tin sigur cu lo e yuda nos keda fiel. E sa cu no ta di nos mes nos a bini den e berdad y cu nos mester di su yudansa pa keda den e berdad. Den un carta cu Apostel Pedro a skirbi e cristiannan ungi, el a bisa nan cu “Dios ta proteha [nan] pa medio di Su poder” pa nan por keda fiel. (1 Ped. 1:5) En realidad, loke Pedro a bisa e cristiannan ungi ta conta pa tur cristian. Pero, con Jehova ta proteha nos awe? Nos ta interesa den e contesta pa e pregunta ey pasobra nos tur mester di Dios su yudansa pa keda fiel na dje.

 DIOS POR EVITA CU NOS TA COMETE EROR

8. Kico por pone nos comete eror?

⁸ Problemanan di bida cu nos ta confronta y nos imperfeccion por pone nos perde nos enfoke spiritual y, prome cu nos realisa, comete un eror. (Lesa Galationan 6:1.) Esey ta loke a pasa cu David.

9, 10. Con Jehova a evita cu David lo a comete un eror, y con Jehova ta yuda nos awe?

⁹ Tempo cu Rey Saul tabata persigui David, David a desplega gran dominio propio y no a tuma represaya contra e Rey jaloers aki. (1 Sam. 24:2-7) Pero djis un poco tempo despues, David no por a domina su mes. Ta asina cu e tabatin mester di cuminda y awa pa su hombernan, y respetuosamente el a acudi na un otro Israelita cu yama Nabal pa yudansa. Nabal a insult’e y a nenga di yud’e. Esaki a pone David rabia asina tanto cu e kier a tuma venganza contra tur e hombernan di e cas di Nabal. E no a para keto y pensa cu, den Jehova su bista, lo el a bira culpabel di dramamento di sanger inocente. Pero Abigail, casa di Nabal, a interveni net na ora y a evita cu David ta comete e eror grave ey. David a realisa cu ta Jehova su man tabata den e asunto; pesey el a bisa Abigail: “Bendiciona sea e SEÑOR Dios di Israel, kende a manda bo e dia aki pa contra cu mi, y bendiciona sea bo discernimento, y bendiciona sea abo mes, kende a kita mi awe di drama sanger y di tuma venganza pa mi mes cu mi mes man.”​—1 Sam. 25:9-13, 21, 22, 32, 33.

¹⁰ Ki les nos por siña for di e relato aki? Wel, mescos cu Jehova a uza Abigail pa evita cu David lo a comete un eror, e por yuda nos tambe. Claro cu nos no ta spera cu Jehova lo manda hende interveni cada bes cu nos ta a punto di comete un eror. Ni nos no sa exactamente con Jehova lo obra den cierto situacion of kico lo e permiti pa su proposito cumpli. (Ecl. 11:5) No obstante, nos por tin confianza cu semper Jehova ta na haltura di nos situacion y cu lo e yuda nos keda fiel na dje. E ta sigura nos: “Lo mi instrui bo y siña bo e caminda cu bo tin cu cana; lo mi conseha bo; mi wowo ta riba bo.” (Sal. 32:8) Awor, con Jehova ta conseha nos? Con nos por beneficia di su conseho? Dicon nos por tin confianza cu Jehova ta guia su pueblo awe? Wak con e buki di Revelacion ta contesta e preguntanan aki.

SU CONSEHONAN TA PROTEHA NOS

11. Con bon Jehova conoce e congregacionnan?

¹¹ Den e vision registra na capitulo 2 y 3 di e buki di Revelacion, Rey Hesucristo ta inspecciona e shete congregacionnan di Asia Menor. Durante e inspeccion aki, Cristo no solamente ta wak e situacion general di e congregacionnan pero cosnan specifico tambe. Si, den algun caso e ta asta menciona nomber di algun persona. Ademas, e ta duna tur e congregacionnan e elogio y conseho necesario. Kico e vision aki ta nifica pa nos? Wel, e shete congregacionnan ta representa e cristiannan ungi despues di 1914, y en  principio, e conseho cu Hesus a duna e shete congregacionnan ta conta pa tur congregacion na mundo awe. Pues, nos por bisa cu Jehova ta guia su pueblo awe pa medio di su Yiu. Con nos por beneficia di e guia aki?

12. Con nos por permiti Jehova guia nos pasonan?

¹² Un manera cu nos por beneficia di Jehova su guia amoroso ta mediante estudio personal. Jehova ta provee un abundancia di conseho biblico mediante e publicacionnan cu nos ta ricibi di e esclavo fiel y prudente. (Mat. 24:45) Sinembargo, pa nos por beneficia di Jehova su consehonan, nos mester traha tempo pa studia e publicacionnan y aplica loke nos siña. Si, estudio personal ta un di e medionan cu Jehova ta uza pa ‘proteha nos pa nos no trompica.’ (Judas 24) Bo no a yega di studia algo den nos literatura cu ta comosifuera ta pa bo mes nan a skirbie? Si ta asina, acept’e como un conseho cu ta bini di Jehova. Jehova ta manera un amigo cu ta tik bo riba bo schouder pa hala bo atencion. E por uza su spirito santo pa hala bo atencion na un aspecto di bo conducta of personalidad cu bo mester traha riba dje. Anto ora nos ta sigui guia di Dios su spirito santo, nos ta permiti Jehova guia nos pasonan. (Lesa Salmo 139:23 y 24.) Pues, ta bon pa nos analisa e manera cu nos ta studia y wak cuanto tempo nos ta dedica na nos estudio.

13. Dicon ta sabi pa analisa nos custumber di studia?

¹³ Si nos ta dedica hopi tempo na entretenimento, nos lo no resta tempo pa haci estudio personal. Un ruman homber a bisa cu “ta masha facil pa keda sin haci estudio personal.” Dicon? El a splica: ‘Compara cu antes, awendia tin mas manera pa entretene bo mes y mas barata tambe. Bo por wak television, uza bo computer of telefon pa entretene bo mes. Unda cu bo bira tin entretenimento.’ Pesey, si nos no tene cuidou, mas y mas di e tempo cu nos tin cu uza pa estudio personal profundo ta bay na entretenimento te cu nos no ta resta tempo mas pa studia. (Efe. 5:15-17) Ta bon pa cada un di nos puntra nos mes: ‘Mi ta traha tempo regularmente pa studia e cosnan profundo di e Palabra di Dios? Of ta ora mi tin discurso of un parti na reunion so mi ta haci esey?’ Si ta asina, kisas nos tin cu haci mihor uzo di e anochi pa Adoracion Como Famia of estudio personal pa studia Bijbel mas profundo. Di e manera ey, nos por adkiri sabiduria spiritual di Jehova cu por proteha nos y yuda nos keda fiel te na fin.​—Pro. 2:1-5.

ANIMACION DI OTRONAN TA YUDA NOS PERSEVERA

14. Con Bijbel ta mustra cu Jehova tin atencion pa loke nos ta sinti?

¹⁴ David a enfrenta hopi situacion dificil den bida. (1 Sam. 30:3-6) No obstante, su palabranan skirbi bou di inspiracion ta revela cu Jehova tabata sa con e tabata sintie. (Lesa Salmo 34:18; 56:8.) Pues, Jehova sa tambe con nos sa sinti nos mes. E solo echo cu nos sa cu Jehova ta mira y  ta cerca nos ora nos ta sinti nos “abati” of “kibra” ta un consuelo pa nos. Ta esey a consola David, kende a canta: “Lo mi regociha y keda contento den bo misericordia, pasobra bo a mira mi afliccion; bo tabata sa di e angustianan di mi alma.” (Sal. 31:7) Pero Jehova ta haci mas cu djis tuma nota di nos angustia. E ta duna nos consuelo y animacion pa yuda nos persevera. Un manera cu e ta haci esey ta mediante nos reunionnan.

15. Ki les nos por siña for di e experencia di Asaf?

¹⁵ E experencia di e salmista Asaf ta yuda nos mira un di e beneficionan di asisti na nos reunionnan. Asaf tabata pensa asina tanto riba e inhusticia cu tabata reina den su tempo cu el a cuminsa duda si tabata bale la pena pa sirbi Dios y el a desanima. El a bisa: “Mi curason tabata yen di amargura, y mi tabata cunsumi te den mi higra.” Asaf su sintimentonan a pone cu casi el a stop di sirbi Jehova. Pero kico a yuda Asaf bini na su sano huicio? El a bisa: “Mi a drenta den e santuario di Dios.” Ey, hunto cu otro adoradonan di Jehova, el a bin mira e asunto for di e punto di bista corecto. El a bin compronde cu e exito di e malbadonan tabata temporal y cu na su debido tempo Jehova lo a rectifica asuntonan. (Sal. 73:2, 13-22) Tin biaha, nos tambe por sinti nos manera Asaf. E inhusticia den e mundo di Satanas por desanima nos. Pero ora nos reuni hunto cu nos rumannan den fe, nos ta haya e animo y e yudansa cu nos tin mester pa sigui sirbi Jehova cu goso.

16. Con e ehempel di Ana por yuda nos?

¹⁶ Awor, kico si surgi algo cu ta hacie dificil pa bo asisti na bo reunionnan di congregacion? Kisas bo tin berguensa di bay reunion pasobra bo a perde un privilegio di sirbishi. Of bo tin un problema cu un ruman. Si esey ta e caso, kisas e experencia di Ana por yuda bo. (Lesa 1 Samuel 1:4-8.) Ana tabata sintie masha desanima y afligi debi na un problema familiar cu Penina. Tur aña, ora nan tabatin cu bay Silo pa ofrece sacrificio na Jehova como famia, e situacion tabata bira mas dificil pa Ana. Ana tabata asina afligi cu “e tabata yora y no tabata come.” No obstante, e no a laga e situacion aki strob’e di bay adora Jehova. Jehova a mira su fieldad y a bendicion’e.​—1 Sam. 1:11, 20.

17, 18. (a) Den ki manera nos ta ricibi animacion na nos reunionnan di congregacion? (b) Con abo ta sinti ora bo pensa riba e manera tierno cu Jehova ta cuida nos pa nos haya salbacion?

¹⁷ Cristiannan awe tin bon motibo pa imita e ehempel di Ana y sigui asisti fielmente na nan reunionnan. Manera nos tur sa, nos reunionnan ta un fuente di animacion. (Heb. 10:24, 25) Ey nos ta haya e amor di nos rumannan cu ta consola nos. Kisas, un cos chikito cu nos a tende durante un discurso of un comentario ta conmove nos curason. Podise prome of despues di reunion, nos ta combersa un rato cu un ruman cu ta scucha nos cu atencion of ta bisa nos algo cu ta anima nos. (Pro. 15:23; 17:17) Ademas, ora nos canta hunto pa Jehova, nos ta sinti nos anima. Nos tur​—specialmente ora nos ta carga cu ‘preocupacion’​—tin mester di e animacion cu nos ta haya na nos reunionnan cristian. Ta na e reunionnan aki, Jehova ta percura pa nos haya e fortaleza y ‘consuelo’ cu nos tin mester pa keda fiel na dje.​—Sal. 94:18, 19.

¹⁸ Nos ta masha gradicido cu Jehova ta proteha nos y ta yuda nos persevera te na fin. Jehova su cuido amoroso ta duna nos e mesun confianza cu e salmista Asaf, kende a canta: “Bo a coge mi man drechi tene. Cu bo conseho lo bo guia mi.” (Sal. 73:23, 24)

[Preguntanan di Estudio]

[Plachi na pagina 29]

Jehova a hala abo tambe na su organisacion

[Plachi na pagina 30]

Nos ta disfruta di Dios su proteccion ora nos ta sigui su conseho

[Plachi na pagina 31]

Animacion ta yuda nos persevera