A Jehovah a Omekerreu er Kid el Kirel a Osobel
A Jehovah a Omekerreu er Kid el Kirel a Osobel
“Kloumera uchul ma klisichel a Dios a mengkar er kemiu, el kirel me lekor kemiu cholsobel el mo chemolt er sel uriul taem.”—1 PETRUS 1:5.
NGMEKERANG A OMONGER?
Ngmilekerang a Jehovah e olekeed er kid el mo er a mera el omengull?
Ngmekerang e sebeched el mecherei a Jehovah me lomekrael er kid el oeak a omellach?
Ngmekerang a Jehovah a lomeskid a omelisiich?
1, 2. (a) Ngera el omelisiich a dobang el kmo a Dios a mo ngosukid el lomelemii a blakerreng er kid? (b) Ngua ngera klemedengei er a Jehovah el kirel a derta me a derta er kid?
“NGIKEL outekangel el mo lmuut ra ullebongel a mosobel.” (Matteus 24:13) Ngoeak aika el tekoi, e a Jesus a mileketeklii el kmo a lsoad el melemolem el ngar er sel taem el Dios a mo oukerrekeriil er a beluulechad er a Satan, e ngkired el lomelemii a blakerreng er kid el mo er a ulebongel. Engdi tia diak el belkul a kmo a Jehovah a soal a doutekangel el di ultuil a llemesed me a lechub a klisiched. A Biblia a melisiich er kid el kmo: “A Dios a blak a rengul, me ngdiak di lak loltaut er kemiu ra ikel medeel er kemiu lomengarm e le merekong, ngdirrek el rullemiu el mo sebechiu el mtekengelii chomengarm, e kudmeklii a rolel a chiis.” (1 Korinth 10:13) Ngera belkul aika el tekoi?
2 A Jehovah a kirel el mo medengei a rokui el kired, el uldimukl er aike el omelsemai el dechelebangel, blekerdeled, me aike el sebeched me a diak, me lak bo decharm er aike el diak el sebeched. A Dios nguaisei el mera el ungil el medengelkid? Chochoi. A Bades a ochotii el kmo a Jehovah a kmal ungil el medengelkid. Ngmedengei aike el doruul er a bek el sils. Ngdirrek el medengei a uldesued me aike el soal a rengud.—Monguiu er a Psalm 139:1-6.
3, 4. (a) Ngmekerang a tekoi el dilubech el mo er a David a lolecholt el kmo a Jehovah a semeriar er a derta me a derta er kid? (b) Ngera el mengasireng el ureor a longetmokl er ngii a Jehovah er chelechang?
3 Ngsebechel a Kot el Ngarbab el Dios el mera el oba chouaisei el klemeriarreng el kirir a redi chad? A milluches er a Psalm el David a millatk er tia el ker er a loker er a Jehovah el kmo: “Sel kumes er a melidiul el mrirellii, e kisa buil ma btuch el mlilechang er olsechelel, e ng ngera belkul a chad me ke kmal melatk er ngii?” (Psalm 8:3, 4) A David a locha uleker er tia el ker e le ngmillatk a tekoi el dilubech el mo er ngii. A Jehovah a ulemes er ngika el kot el kekerei el ngelekel a Jesse el milengkar a sib, el ua “chad el soal a rengul” me ngileltii el mo merreder er a Israel. (1 Samuel 13:14; 2 Samuel 7:8) Me alta e a David a di milengkar a sib, engdi Ngike el Ulemeob er a melidiul a mle medengei a uldesuel. Ka di molatk er a uldesuel a David er a bo lodengelii tia el tekoi!
4 Ngkmal mengasireng sel dolatk er a klemeriarreng el lolecholt er ngii a Jehovah el mei er kid er chelechang. Ngoldak er a rechad er a “rokui el beluu” el tir a “mekreos” er a osengel el mo mengull er ngii. (Hagai 2:7) Me a bo dodengelii a rolel a Jehovah a lengesukid el mo lomelemii a blakerreng er kid, e a kot e me bo dosaod el kmo ngmekerang a lolekeed er a rechad el mo er a mera el omengull.
A DIOS A MEKROLID EL MO ER NGII
5. Ngmekerang a Jehovah a lomekrael er a rechad el mo er a Ngelekel? Momekesiu.
5 A Jesus a dilu el kmo: “Ng diak a chad el sebechel el mer ngak a lak le Chedam el ngikel ulderchak a mekrolii el mer ngak.” (Johanes 6:44) Aike el tekoi a belkul a kmo a lsoad el mo disaiplo er a Kristus, e kede ousbech er a ngelsuil a Dios. Ngmekerang a Jehovah a lomekrael er a rua sib el mo er a Ngelekel? Ngoeak a berkel a ungil el chais me a oureor el klisichel a Dios. El ua tiang, a Paulus me a rekldemel el missionari er a lengar er a Filipi, e te miltik er a ta el redil el ngklel a Lydia e ulemuchel el omerk er a ungil el chais el mo er ngii. A Biblia a melekoi el kmo: “Ma Rubak a milekengii a rengul me ngultaut a dingal ra tekoi el lolekoi a Paulus.” Nguaisei, a Dios a uluusbech er a oureor el klisichel el ngosuir ngii el redil el mo medengelii tia el klumech, el mlo uchul me ngii me a rechad er a blil a miltecholb.—Rellir 16:13-15.
6. Ngmilekerang a Dios a lomekrael er kid el rokui el mo er a mera el omengull?
6 Tia el tekoi ngdi dilubech el mo er a Lydia e merekong? Ngkmal diak. A lsekum e ke mla metecholb el Kristiano, e kau me ke dirrek el lulemekrael er kau a Dios el mo er a mera el omengull. A Demad el ngar er a eanged a mle sebechel el mesang a klungiolel a rengum el ua sel lilsang er a rengul a Lydia. Sera omomuchel el rongesii a ungil el chais, e a Jehovah a ngilsukau el mo medengelii el oeak sel lomeskau a oureor el klisichel. (1 Korinth 2:11, 12) Me sera molasem el mo oltaut aike el bla msuub, e ngulemekngeltengat er a blakerreng er kau el meruul a soal. E sera omtibir a klengar er kau el mo er ngii, e ngmlo dmeu a rengul. Nguaisei, a Jehovah a ngilsukau er sera omomuchel el mesiou er ngii e melemolem el olengeseu er kau.
7. Kede mekerang e medengei el kmo a Dios a mo ngosukid el mo melemolem el blak a rengud?
7 A Jehovah a ngilsukid el mo omuchel el mesiou er ngii, me ngsebechel el mo ulterekokl a rengud el kmo ngmo ngosukid el melemolem el blak a rengud. Ngmedengei el kmo ngdimlak el sebeched el di kid el mo medengelii a klemerang, me ngdiak el sebeched el di kid el melemolem el ngar er a klemerang. A apostol el Petrus a milluches el mo er a rengellitel el Kristiano el kmo: “Kloumera uchul ma klisichel a Dios a mengkar er kemiu, el kirel me lekor kemiu cholsobel el mo chemolt er sel uriul taem.” (1 Petrus 1:5) Aike el lullekoi a Petrus a melutk el kirir a rokui el Kristiano. Ngmekerang a Jehovah a lomekerreu er kid er chelechang? Ngsoad el mo medengelii a nger er tia el ker e le kede rokui el ousbech er a ngelsuil a Dios me bo el sebeched el lomelemii a blakerreng er kid el mo er ngii.
A DIOS A SEBECHEL RULLID ME NGDIAK DEBO ER A KLENGIT
8. Ngera uchul me ngkired el mo kerekikl me ngdiak derellii a cheleuid el tekoi?
8 A omelsemai er a klengar, me kid el diak demecherrungel a sebechel rullid me ngmo diak doba osengel a Jehovah el kirel a tekoi. E seikid e ngmo beot er kid el rullii a cheleuid el dimlak dodengelii e rullii. (Monguiu er a Galatia 6:1.) Tiakid el tekoi a mle ta el leduubech el mo er a David.
9, 10. Ngmilekerang a Jehovah er a lorrob er a David me lak lerellii a cheleuid el tekoi, e ngera ngmeruul er ngii el kired er chelechang?
9 A David a ulechotii a klou el ulserechakl el reng er sel taem el King el Saul a ulsiik a kodellel. Me alta e ngmlo er ngii a techellel el melaitechei er a Saul, engdi ngdimlak lolasem el meruul er ngii. (1 Samuel 24:2-7) Engdi a uriul er isei, e a David a mlo diak loba ulserechakl el reng. Nguluusbech a kall me a ralm el kirel ngii me a rechedal, me ngullengit a ngeso er a Nabal el chad er a Israel. E a Nabal a uleltuub er ngii e dimlak el kengei el mo ngosuir. Me tiang a rirellii a David el kmal mo kesib a rengul me ngmlo soal el melaitechei er a Nabal me a rokui el sechal er a blil. Ngdimlak lomdasu el kmo a Jehovah a mo oukerrekeriil er ngii a lokodeterir a rediak a telemellir el chad. Engdi a Abigail, el bechil a Nabal, a tirrebengii a David me lak lerellii tia el cheleuid el tekoi. A David a mlo medengei el kmo a Jehovah a uluusbech er a Abigail el mo omekerreu er ngii, me ngdilu er ngii el kmo: “Le mukngeltengat a ungil el uldesuem, me kau me mukngeltengat, ele chelechal sils e ke ulekebikak er a kngtil omelaitechei ma koadelchad.”—1 Samuel 25:9-13, 21, 22, 32, 33.
10 Ngera sebeched el suubii er tia el cheldecheduch? A Jehovah a sebechel torebengid me ngdiak derellii a cheleuid el tekoi. Nguaisei, engdi ngdiak el kired el omdasu el kmo a Dios a mo odureklii a chad el me torebengid er a bek el taem el bocha doruul a cheleuid el tekoi. Ngdirrek el diak dodengei aike el bo loruul a Dios er a chelsel a ngii di el blekeradel me a lechub aike el lekengei el mo duubech me lemotaut a moktek er ngii. (Olisechakl 11:5) Nguaisei, engdi ngsebechel el mo ulterekokl a rengud el kmo a Jehovah a blechoel el medengei aike el dechelebangel e mo ngosukid el lomelemii a blakerreng er kid el mo er ngii. Ngmelisiich er kid el kmo: “Ak mo osisecheklau er a rael el kirem el merael er ngii; ak mo osisecheklau e meskau a ngesou er a ungil uldasu.” (Psalm 32:8) Ngmekerang a Jehovah a lomeskid a ulekrael? Kede mekerang e ngmai a klungioled er ngii? E ngera me ngsebechel el mo ulterekokl a rengud el kmo a Jehovah a omekrael er a rechedal er chelechang? Momtab el kmo ngmekerang a lemonger aika el ker er a chelsel a babier er a Chocholt.
MUKERREU EL OEAK A OMELLACH
11. Ngua ngera klungel a klemedengei er a Jehovah el kirel aike el dubechang er a chelsel a ongdibel er a rechedal?
11 Ngar er a ues el llechukl er a Chocholt er a 2 me a 3 el klou el bliongel, e a King el Jesus Kristus a merriter aike el kleuid el ongdibel er a Asia Minor. Tia el ues a olecholt el kmo a Kristus a diak di lomes a blekeradel el ngar er ngii e ngbai omes a ileakl el tekoi el dubechang. A lebebil er a taem, e ngmelekoi a ngklir a rederta el chad, e chemat er tir me a lechub e ngomesterir a omellach el lousbech. Tiang ngera ngochotii? Aike el kleuid el ongdibel a omtechei er a rengellitel el Kristiano er a uriul er a 1914. Me alta omellach el lebilsterir a Kristus a mlo er a rengellitel, engdi a rokui el ongdibel er a rechedal a Dios el ngar er a beluulechad er chelechang a sebechir el ngmai a klungiolir er ngii. Me a leuaisei, e ngsebeched el melekoi el kmo a Jehovah a ousbech er a Ngelekel el omekrael er a rechedal er chelechang. Ngmekerang a debecherei a Jehovah me lomekrael er kid?
12. Ngmekerang a debecherei a Jehovah me lomekrael er kid?
12 A ta er a rolel e kede mecherei a Jehovah me ngomekrael er kid a okiu a omesubed el di kid el tang. A Jehovah a omeskid a betok el omellach el okiu aike el babier el loltobed a blak a rengul e mellomes a rengul el mesiou. (Matteus 24:45) Engdi a lsoad el ngmai a klungioled er aika el omellach, e ngkired el mengoit a taem el mesuub e ousbech er a chelsel a klengar er kid. Sel dosuub el di kid el tang, e kede mecherei a Jehovah me ngomekerreu er kid me ngdiak bo derellii a cheleuid el tekoi. (Judas 24) Ngmla ta el mosuub a suobel el ngar er a babilenged e melatk el kmo, ‘Tia el tekoi a kmal melutk el kirek’? Ngkirem el omes er tiang el ua lomellach el mla er a Jehovah. Me ngdi ua sechelid sel lolasem el olechau er a osenged, a Jehovah a sebechel el ousbech er a oureor el klisichel el ngosukid el mo medengelii a kmung ngera el ngar er a omerelled me a lechub a blekerdeled el kired el sumecheklii. Me sel dekengei er a ulekrael er a oureor el klisiich, e kede mecherei a Jehovah me ngomekrael er kid. (Monguiu er a Psalm 139:23, 24.) Me deluut el mesaod a betok el kirel a klungel a taem me a klisiich el dousbech er ngii el mesuub.
13. Ngera me ngungil a dorriter er a blekerdelel a dosuub?
13 A klou el taem el mechoit el kirel a tekoi er a ongelaod a sebechel el ngosur a temel a omesubed el di kid el tang. A ta el odam a omtab el kmo: “Ngkmal beot er kid el mengoit er a omesubed el di kid el tang. A tekoi er a ongelaod a kmal mla mo klou er chelechang, e mla mo beot a cheral. Ngar er ngii el okiu a TV, computer, me a dengua. Kede iliuekl er ngii.” A lak dekerekikl, e ngsebeched el mo ousbech a klou el taem el kirel a ongelaod me ngmo diak a temed el kirel a dmolech el omesuub el di kid el tang. (Efesus 5:15-17) A derta er kid a ungil a di lekid el oker el kmo: ‘Ngua ngera klungel el taem a kuusbech er ngii el dmolech el mesuub er a Tekingel a Dios? Ngdi sel taem el ngar er ngii a cheldechedechak me a lechub e ngsuobel er a miting el kirek el mengetmokl er ngii?’ A leuaisei, e nglocha ungil el dousbech er a temel a omengull el ongalek me a lechub a omesubed el di kid el tang el mo meleketek er a klemedengei er kid er a llomeserreng el Jehovah a omeskid el kirel a osebeled.—Osisechakl 2:1-5.
A OMELISIICH A NGOSUKID EL MO OUTEKANGEL
14. Ngmekerang a Bades a lolecholt el kmo a Jehovah a kerekikl aike el ngar er a rengud?
14 A David a chilebangel a betok el meringel el tekoi er a klengar er ngii. (1 Samuel 30:3-6) A Biblia a olecholt el kmo a Jehovah a mle medengei aike el ngar er a rengul. (Monguiu er a Psalm 34:18; 56:8.) A Dios me ngmedengei aike el ngar er a rengud. Sel ‘chelam a rengud’ me a lechub e ng ‘dikea omeltked,’ e ngolekeed er ngii er kid. Tia el tekoi a sebechel el mengelaod er kid, el ua lulengelaod er a David el ngii a milengitakl el kmo: “Ak mo oldeu er a renguk e mo ungil a renguk er a diak le mengodech el bltkil a rengum, ele ke milsekak er a chelebulek, e dimlak mchitak er a kerior el kmlar a chelsel.” (Psalm 31:7) Engdi a Jehovah a diak di lomes a ringel el dechelebangel, e ngbai ngosukid el outekangel el okiu a ongelaod me a omelisiich. A ta er a rolel a loruul er tiang a okiu a miting er a Rekristiano.
15. Ngera el suobel a sebeched el suubii er a tekoi el dilubech el mo er a Asaf?
15 A tekoi el dilubech el mo er a Asaf a ngosukid el mo medengelii a uchul me ngungil a debo er a miting. A Asaf a mle blechoel el omdasu el kirel a chelebirukel el mla er ngii a uchul me ngmlo melatk el kmo ngdikea ultutelel a losiou er a Jehovah. E tia el tekoi a chiltechetur a rengul. Ngmilsaod er ngii el kmo: “Ngar ngii a cheluached er a uldesuek, e . . . telemall a renguk.” Tiang a mlo uchul e ngmle sebechel el meterob el mesiou er a Jehovah. Ngera ngilsuir a Asaf el mo ngodechii a uldesuel? Ngdilu el kmo: ‘A kmlor a Templo er kau.’ Ngar isei, e ngmlo sebechel el meklemeltii a uldesuel el loeak sel lobengterir a rebebil el milsiou er a Jehovah. Ngmilsa el kmo a ungilbesul el klengar er a remekngit a di tedeb, e a Jehovah a ulterekokl el mo omeklemalt a tekoi. (Psalm 73:2, 13-22) Kid me kede dirrek el uaisei. A chelebirukel el domes er tia el beluulechad er a Satan a sebechel el mo mengitechut er a uldesued me a rengud. Engdi sel bo dedak el obengterir a rudam me a rudos er kid, e kede ngmai a omelisiich me a ngeso el dousbech me bo el sebeched el mesiou er a Jehovah el oba deurreng.
16. Ngmekerang a dengai a klungioled er a kerebil a Hana?
16 E kuk mekerang a lsekum a blekeradel er a chelsel a ongdibel a rullii el mo meringel er kau el mo er a miting? Alta ke merur e le ngmle kirem el mo diak mteloi er a ileakl el techall er a omesiou, me a lechub e ngngar er ngii a mondai er a delongelem kau me a ta er a odam me a lechub e ngodos. A leuaisei, e a kerebil a Hana a sebechel el ngosukau. (Monguiu er a 1 Samuel 1:4-8.) A bechil a Hana el Elkana, a mla er ngii a ta er a bechil el Penina, el mle blechoel el olengasech er a rengul a Hana. Tia el blekeradel a liluut el kmal mo meringel er a Hana er a bek el rak sel ledak el telungalek el mo melenget el mo er a Jehovah el ngar er a Silo. Ngkmal mle mekngit a rengul me ngdi lmangel e di “mo diak lomengur.” Nguaisei, engdi a Hana a dimlak lemeterob el mo er a basio el sebechel el mo mengull er a Jehovah el Dios. A Jehovah a milsang a blakerreng er ngii e ulemekngeltengat er ngii.—1 Samuel 1:11, 20.
17, 18. (a) Ngoeak a ngera el rolel e kede ngmai a omelisiich er aike el miting er a ongdibel? (b) Ngua ngera uldesuem er a ulekerreuil a Jehovah el olengeseu er kid el mo nguu a osobel?
17 A Rekristiano er chelechang a ngar er ngii a ungil el uchul e te oltirakl er a kerebil a Hana, me a leuaisei e ngkired el mo blak a rengud el mo er a miting. Kede rokui el medengei el kmo a miting a meskid a omelisiich el dousbech. (Hebru 10:24, 25) Me a bltikerreng er a rudam me a rudos a meskid a ongelaod. A tekoi el medung er a cheldecheduch me a lechub a nger er a chad a sebechel el melisiich er kid. Sel dechadecheduch er a uchei me a lechub e nguriul er a miting, e a ta er a kldemed er a klaumerang a sebechel el orrenges er kid me a lechub e ngmelekoi a ungil el tekoi el melisiich er kid. (Osisechakl 15:23; 17:17) Me sel dedak el mengitakl el mo er a Jehovah, e nglmuut el mo dmeu a rengud. Ngileakl sel bo ‘louedikel a rengud’ e kede ousbech er a omelisiich el dengai er aike el miting er kid, el ngar er ngii e a Jehovah a olengeseu er kid el oeak a ‘ongelaod’ el mo outekangel e melemolem er a blakerreng er kid.—Psalm 94:18, 19.
18 Kid a selebechakl el ngar cheungel a ulekerreuil a Dios er kid el ua ngike el milluches er a Psalm el Asaf, el milengitakl el mo er a Jehovah el kmo: “Me korreked er a chimak. Ke mengetikaik er ngak el oba ngesou er a ungil uldasu er kau.” (Psalm 73:23, 24) Ngkmal dmeu a rengud e le a Jehovah a omekerreu er kid el kirel a osobel!
[Aike el Ker er a Suobel]
[Siasing el ngar er a 29 el llel]
A Jehovah a mla mekrolau el mo er ngii
[Siasing el ngar er a 30 el llel]
Kede mukerreu sel doltaut a omellach er a Dios
[Siasing el ngar er a 31 el llel]
A omelisiich a ngosukid el mo outekangel
