Jehoväqa salvacionpaqmi guardëkämantsik

“Teyta Diosman marcäcushqam poderninwan pe wardecamäshun que patsapa ushenin junaq salbasionta qomanqantsicyaq.” (1 PED. 1:5.)

¿IMA NISHWANRAQ?

¿Imanötaq Jehová yanapamarquntsik alli religionman yëkunapaq?

¿Imanötaq jaqintsik Jehová consëjonkunawan pushamänata?

¿Imanötaq Jehová kallpata qomantsik?

1, 2. a) ¿Imanirtaq markäkuntsik o yärakuntsik alli tsarakunapaq Diosnintsik yanapamänapaq kaqman? b) ¿Mëyaqtaq Jehová reqimantsik?

“USHANANYAQ tsarakushqa kaqqa salvakunqam.” (Mat. 24:13, NM.) Tsënö nirqa, Jesus clärom rikätsikurqan Satanaspa makinchö këkaq mundota Teytan ushakätsiptin salvakunapaqqa alli tsarakunantsik precisanqanta. Pero kikintsikpa yachënintsikllawan y kallpantsikllawan tsarakunatatsu manam Jehoväqa shuyan. Diospa Palabranmi kënö nimantsik: “Teyta Diosnintsicman marcäcushqaqa [yärakushgaga] musyanmi meyaqlla awantanantsicpaq caqta. Tsemi tentasion chacaramuptinpis, yanapecamäshun imanopapis mana ishquinantsicpaq” (1 Cor. 10:13). ¿Imatataq rikätsimantsik kë palabrakuna?

² Jehoväqa alleqmi musyan ima problëmayoq kanqantsikta, imanö nuna kanqantsikta y mëyaq aguantëta puëdenqantsikta, awmi, tsënö reqimarnintsikmi pëqa alli musyan pasanqantsik pruëbaqa aguantëta puëdenqantsikpita más mana kanqanta. Pero ¿rasumpatsuraq tsëläya reqimantsik? Awmi. Palabran Bibliaqa rikätsimantsik chakintsikpita peqantsikyaq Jehová reqimanqantsiktam. Jehoväqa llapan kawënintsikta y costumbrentsiktam musyan. Pero manam tsëllatsu, jina musyanmi imata pensëkanqantsikta y imatapis imanir ruranqantsikta (lei Salmo 139:1-3 *).

3, 4. a) ¿Imanötaq David pasanqankuna rikätsimantsik cada nunata Diosnintsik reqimanqantsikta? b) ¿Ima jatun rurëtataq Jehová kanan witsan rurëkan?

³ Nunakuna mana kaq cuenta këkashqapis Dios cuentapaq churamanqantsikqa, ¿manaku mana creipaqnö? Jina tsëllatam rey Davidpis tapukurqan Jehoväta kënö nirnin: “Makikiwan cielo ruranqëkita, y killatawan qoyllurkunata churanqëkita rikarmi noqa tapukö, ¿imataq wanoq nuna pëta yarpänëkipaq[?]” (Sal. 8:3, 4). Itsachi tsënö tapukurqa pensëkarqan llapan pasanqankunaman. Jesëpa último kaq tsurin këkaptinmi  Jehoväqa rikarqan “shonqunpaqnö nuna” kanqanta, y “üshapa qepanchö” purikanqampitam rakirqan “Israel markapa gobernaqnin” kanampaq (1 Sam. 13:14; 2 Sam. 7:8). ¡Imanö kushishqaraq Davidqa sientekurqan mitsikoqlla këkaptin ciëlota y Patsata Kamaq yarpëninkunata cuentapaq churanqanta rikärir!

⁴ Jina tsënöllam noqantsikpis sientekuntsik Jehová cuentapaq churamanqantsikta rikarnin. Pëqa alli kaq religiontam utilicëkan ‘llapan nacionkunapita allin kaqkunata’ ëllunampaq o gorinampag, y sirweqninkunatam yanapëkan alli tsarakuyänampaq (Ageo 2:7). Alli tsarakunapaq Jehová imanö yanapamanqantsikta tantearinapaqqa, rikärishun alli kaq religionman shayämunampaq nunakunata imanö yanapanqantaraq.

DIOSMI TSURIMPA LÄDONMAN PUSHAMARQUNTSIK

5. ¿Imanötaq nunakunata Jehová yanapan Tsurinman witiyänampaq? Unë pasanqanwan willakaramï.

⁵ Jesusmi kënö nirqan: “Cachamaq Dios Yaya nunacunata shonquncunacho mana cäyitsiptenqa, manam ni pipis noqaman shamunmantsu” (Juan 6:44). Tsënö ninqanmi rikätsimantsik Cristupa qateqnin këman chänapaqqa Diosraq yanapamanqantsikta. Pero ¿imanötaq Jehoväqa üshanö manshu nunakunata yanapan Tsurinman witiyänampaq? Më tsëchö yachatsikïwan y santo espïritupa yanapakïninwanmi. Tsëta rikärishun, juk kutim Pabluwan wakin kaq misionërokuna Filipos markata watukarnin, Lidia jutiyoq warmiwan tinkuriyarqan y alli willakïkunata yachatsiyarqan. Bibliam kënö willamantsik: “Diosmi shonqunta yatecorqan Pablu willapäcushqanta cäyiquicunanpaq”. Rikanqantsiknöpis, Diosmi santo espïritunwan yanaparqan Pablu yachatsinqanta shumaq entiendinampaq, tsënöpam pë y wayinchö llapan täraqkuna bautizakuyarqan (Hech. 16:13-15).

6. ¿Imanötaq Dios yanapamarquntsik alli kaq religionta tarinapaq?

⁶ ¿Lidiallawanku tsënö pasarqan? Manam. Jehoväta sirwinapaq bautizakushqa cristiano kanapaqqa, pëmi Lidiatanö alli kaq religionman pushamarquntsik. Y imanömi ciëlochö Teytantsikqa Lidia alli shonquyoq kanqanta rikarqan, tsënöllam noqantsiktapis rikämarquntsik. Alli kaq willakïkunapita yachakur qallëkushqam Jehoväqa santo espïritunwan yanapamarqantsik shumaq entiendirinapaq (1 Cor. 2:11, 12). Yachakunqantsiknö kawanapaq y munëninta ruranapaq kallpachakurninmi bendicionninta rikarqantsik. Y pëllapaqna kawanapaq awnirishqam alläpa kushikurqan. Rasun kaqchöqa, sirwita qallanqantsikpitam pëqa llapan pasanqantsikchö yanapëkämantsik.

7. ¿Imanötaq musyantsik alli tsarakunapaq Jehová yanapamänantsikpaq kaqta?

⁷ Wamra cuenta makimpita tsarirkur purir qallarishqaqa Jehoväqa manam kacharamantsiktsu. Musyanmi kikintsikllapitaqa rasun kaq yachatsikïta tarita mana puëdenqantsiknölla, tsë rasun kaq yachakunqantsikchö kikintsikllapita imëpis këtaqa mana puëdenqantsikta. Ciëlopaq akrashqa cristiänokunaman cartakurmi apóstol Pëdruqa kënö nirqan: “Teyta Diosman marcäcushqam poderninwan pe wardecamäshun que patsapa ushenin junaq salbasionta qomanqantsicyaq” (1 Ped. 1:5). Tsënö ninqanqa llapan cristiänokunapaqwanmi, y alläpam precisan cuentaman churanantsik. ¿Imanir? Porque ushananyaq tsarakunapaqqa Diospa yanapakïnintaran wanantsik.

DIOSQA MANA ALLIMAN MANA ISHKINAPAQMI GUARDAMANTSIK

8. ¿Imanirtaq kallpachakunantsik ima mana allimampis mana ishkirinapaq?

⁸ Kawënintsikchö imëkakunapa pasanqantsik y jutsasapa kanqantsikmi Diospa kaqchö qelanäratsimashwan.  Tsënam cuentata mana qokurlla ima mana allimampis ishkirishwan (lei Galatas 6:1). Tsë pasamënintsikta puëdenqanta rikärishun Davidta pasanqanta yarparnin.

9, 10. ¿Imanötaq Jehová Davidta yanaparqan mana alliman mana ishkinampaq, y imanötaq kanan witsan yanapamantsik?

⁹ Rey Saúl qatikachanqan witsanqa mana vengakurninmi Davidqa peqanta alli tsarëta puëdenqanta rikätsikurqan (1 Sam. 24:2-7). Tsënö kaptimpis, wallka tiempo pasariptinllam jutsasapa kënin mana alliman ichikpa ishkiratsirqan. Pëpaqwan yanapaqnin nunakunapaq mikï mana kaptinmi, Nabal jutiyoq israelita nunata respëtowan mikïta mañakurirqan. Tsënö mañakïkaptin insultarnin qoyta mana munaptinmi Davidqa shonqupita patsë alläpa piñakurqan, y vengakïta munarmi Nabalpa wayinchö llapan täraqkunata wanutsinampaq churapakarqan. Manam ni ichikllapis pensarirqantsu tsëta ruraptinqa jutsannaq nunakunapa yawarnimpita Dios cuentata mañanampaq kaqta. Y tsëta ruranampaq ëwëkaptin Nabalpa warmin Abigaíl taripëkur cuentata qokaratsiptinran tsë mana alli rurëman ishkirqantsu. Davidqa musyarirqan tsë warmita Dios kachëkur yanapanqantam, tsëmi kënö nirqan: “¡Bendecishqa këkutsun kë junaq taripämänëkipaq kachamushoqniki Israelpa Diosnin Jehová! Y bendecishqa këkullätsun alli juicioyoq këniki, y kanan junaq yawarta ramanäpita y makïwan mana allita ruranäpita tsapämanqëkipita qampis bendecishqa kë” (1 Sam. 25:9-13, 21, 22, 32, 33).

¹⁰ ¿Imatataq yachakuntsik kë pasanqampita? Jehoväqa Abigailta utilizarmi Davidta yanaparqan mana alli rurëman mana ishkinampaq. Y kanan witsampis tsënöllam yanapamänapaq nunakunata utilizan. Pero musyanqantsiknöpis, mana alli rurëkunaman ishkinantsik këkaptin pitapis yanapamänapaq Dios imëpis kachamunantaqa manam shuyarashwantsu. Jina manam pensashwantsu imëka pasakunqanchöpis Dios imata ruranampaq kaqta o munënin rurakänampaq ima pasananta jaqinampaq o mana jaqinampaq kaqtapis musyanqantsiktana (Ecl. 11:5). Tsënö kaptimpis, markäkïta puëdentsikmi imakunapa pasëkanqantsikta Jehová alli musyanqanta y tsarakunapaq yanapamanqantsikta. Jinamampis këtam awnimantsik: “Käyikïnikim [yachënikim] qoshqëki, y alli nänipa purinëkipaqmi yachatsishqëki. Qammanmi nawïta churamurqö y consejashqëkim” (Sal. 32:8). Tsëqa, ¿imanötaq Jehová consejamantsik? ¿Imanötaq tsëkuna yanapamantsik? Y, ¿imanirtaq kanan witsankuna Jehová markanta pushëkanqanta nintsik? Kë tapukïkunapita Apocalipsis libro ima ninqanta rikärishun.

CONSEJAMARNINTSIKMI DIOSQA MANA ALLIPITA TSAPÄMANTSIK

11. ¿Mëyaqtaq Jehová reqin congregacionkunachö pasanqanta?

¹¹ Apocalipsis libropa 2 y 3 kaq capïtulonkunachömi willakun Jesucristu ciëlochöna këkar Asia Menorchö qanchis congregacionkuna imanö këkäyanqanta rikanqanta. Tsë visionmi willakun llapan cristiänokuna imanö kayanqanllatatsu Cristu rikanqanta, sinöqa imakunapa pasëkäyanqantapis musyanqanta. Y höraqa jutimpam wakin nunakunapaq parlan y cada congregaciontam wanayanqanmannö consëjota y kallpata qon. ¿Imatataq tsëpita yachakuntsik? Tsë visionqa 1914 watapita patsëmi cumplikëkan. Qanchis congregacionkunaqa ciëlopaq akrashqa cristiänokunam kayan, y consëjonkunaqa jinantin Patsachö llapan congregacionkunapaqwanmi. Tsë llapanmi rikätsikun Jehoväqa Tsurinta utilizarnin markanta pushëkanqanta. ¿Imatataq ruranantsik Cristu pushamänata jaqinapaq?

12. ¿Imanötaq Jehová pushamänata jaqintsik?

¹² Jehová pushamänata munarqa Palabran Bibliapitam yachakunantsik. Mäkoq mäkoq cumplido sirweqninwanmi Jehoväqa Bibliapita mëtsika consëjokunata qomantsik (Mat. 24:45). Tsëkuna yanapamänata munarqa yachakunapaq y kawënintsikchö ruranapaqmi tiempota jorqanantsik. Awmi, japallantsik Bibliapita yachakunapaqqa Jehová patsätsimushqa sirweqninkunata cuidamänantsikrëkur y ‘jutsaman mana ishquinapaqmi’ (Jud. 24, 25). ¿Manaku imëllapis pensarqunki juk publicacionchö qellqarëkanqantaqa  qamman pensëkur rurayämunqanta? Tsënö kaptinqa Jehoväpa consëjontanö chaskikï. Höraqa imatapis cuentata qokunantsikrëkurmi juk amïgontsikqa hombrontsikta yatarkamun. Tsënöllam Jehoväpis santo espïritunta utilizëta puëden imanöpis kënintsikchö y portakïnintsikchö imanö këkanqantsikta cuentata qokurir, wakin cristiano mayintsikkunanöpis cambianapaq. Santo espíritu yanapamänata jaqirqa kikin Jehová pushamänatam jaqikantsik (lei Salmo 139:23, 24 *). Tsëta cuentaman churëkur alli pensarishun japallantsik yachakunqantsikchö imanö këkanqantsikman.

13. ¿Imanirtaq alläpa alli kanman Diospa Palabrampita japallantsik yachakïchö imanö këkanqantsikta rikänantsik?

¹³ Tukï kushikï rurëkunata puntaman churashqaqa, manam tiempontsik tinkunqatsu japallantsik Bibliapita yachakunapaq. Juk wawqim kënö nirqan: “Japallëki yachakïtaqa rasllam juk kuchuman churarinkiman. Kanan witsan kushikï rurëkunata tariqa más fäcil-llam y manam alläpa chaniyoqtsu. Televisionchö, computadörachö y telëfonochömi amänulla këkan. Më tsëchömi tarita puëdentsik”. Tsëkunata puntaman churarqa ichikllapa ichikllapam Bibliapita japallantsik shumaq yachakïta chipyë jaqirishun (Efe. 5:15-17). Llapantsikmi kënö tapukunantsik: “¿Tiempota rakïku Diospa Palabrampita alli yachakunäpaq? ¿O congregacionchö discurso rurë tocamaptinllaku tsëta rurä?”. Tsënö karqa alläpam precisanqa familiachö Diosta adoranantsik o japallantsik yachakunantsik hörapaq tiempontsikta alli rakinantsik, tsënöpa salvamänarëkur Jehová tukïta yachatsimanqantsikta provechanapaq (Pro. 2:1-5).

KALLPATA QOMARNINTSIKMI DIOSQA TSARÄMANTSIK

14. ¿Imanötaq Biblia rikätsikun imanö sientekunqantsikta Jehová musyanqanta?

¹⁴ Davidqa imëka mana allikunapam kawëninchö pasarqan (1 Sam. 30:3-6). Y santo espïritupa yanapakïninwan qellqanqankunam rikätsikun Jehoväqa imanö sientekunqanta alli musyanqanta (lei Salmo 34:18 y 56:8). * Y tsënöllam noqantsik imanö sientekunqantsiktapis alli musyan. Pëqa alläpa llakikurnin ‘shonquntsikchö nanatsikïkashqa’ o ‘espïrituntsikchö pasëpa llakishqa’ këkashqam lädontsikchö këkan. Tsëta musyëqa alläpam kallpata qomantsik, y tsënömi Davidwampis pasarqan, tsëmi kënö cantarqan: “Rasumpa kuyakoq kanqëkipitam alläpa kushishqa kashaq, llakikïnïtam rikarqunki y musyarqunkim imanir almä llakishqa këkanqantapis” (Sal. 31:7). Pero Diosqa manam problëmantsikllatatsu musyan, sinöqa shoqamantsikmi y kallpatam qomantsik. Y tsërëkurmi reunionkuna kanampaq patsätsimushqa.

15. ¿Imatataq yachatsimantsik Asafta pasanqan?

¹⁵ Asafta pasanqanmi rikätsimantsik reunionkunaman ëwë alläpa yanapakunqanta. Tsë sacerdöteqa imëka mana allikunata rikarmi, Diosta sirwiqa ni imachö yanapakunqanta pensar qallëkurqan y qelanäkurirqan. “Shonqöqa pochqurirqanmi, y riñonnïkunachömi tuksikäyämaptin nanaqtanö sientirqä” nirqanmi. Tsëkuna pasaptinmi Jehoväta sirwitapis ichikllapa jaqirirqan. Pero ¿imataq yanaparqan cuentata qokunampaq? Kikinmi nirqan “Diospa shumaq templonman” yëkunqan yanapanqanta. Tsëchömi Diosman markäkoq o yärakog sirweq mayinkunawan paqta karnin, ima alli kaq kanqanta cuentata qokurirqan. Mana alli nunakunapa alli kawakïninkuna  juk tiempolla kanqanta, y Jehová llapanta altsarinampaq kaqtam cuentata qokurirqan (Sal. 73:2, 13-22). Kanan witsampis tsënöllam pasan. Itsa Satanaspa makinchö këkaq mundochö imëka mana allikunata rikarnin alläpa utishqa sientekushwan. Pero cristiano mayintsikkunawan ëllukärirqa o gorikärirga jukläyam sientekuntsik, y Jehoväta kushishqa sirwinapaqmi pëkunaqa yanapamantsik.

16. ¿Imatataq Änapita yachakuntsik?

¹⁶ Pero ¿congregacionchö ima pasakurinqampis reunionkunaman ëwanata qelanätsimashqaqa? Itsa juk cargota jaqishqa kar penqakushqa këkantsik. O itsa juk cristiano mayintsikwan imachöpis llakitsinakurquntsik. Tsëkuna pasamashqaqa Änapita yachakunqantsikmi alläpa yanapamäshun (lei 1 Samuel 1:4-6 *). Nunampa juknin kaq warmin Peninäwan problema kaptinmi  alläpa mana allikunapa pasaq. Y tsëqa más peor tikraq Silöchö Jehoväpa wayinman cada wata ëwayänan tiempo chaptinmi. Alläpa mana allipa pasarmi Änaqa waqaq y mikoqtsu. Pero tsë pasanqan Jehoväta adorananta qelanätsinantaqa manam jaqirqantsu, tsëmi Jehoväqa llapan shonqunwan sirwinqanta rikar bendecirqan (1 Sam. 1:11, 20).

17, 18. a) ¿Imanötaq reunionkunachö kallpata tarintsik? b) ¿Imanötaq qam sientekunki salvamänantsikrëkur kuyamaqnintsik Jehová guardamanqantsikpita?

¹⁷ Kanan witsan cristiänokunapis allitam rurantsik Ana ruranqanta qatirqa. Reunionkunachöqa juknintsik juknintsik yanapanakurmi kallpata tarintsik, tsëmi mana faltëta reunionnintsikkunaman ëwanantsikqa alläpa precisan (Heb. 10:24, 25). Cristiano mayintsikkunawan junto kanqantsik y kuyakïninkunata chaskinqantsikqa, alläpam yanapamantsik. Itsa shonquntsikman chäramun discursochö imallatapis shumaq nirayämunqan o pipis comentaramunqan. O itsa reunión manaraq qallaptin o ushariptin pillapis shumaq parlapäramanqantsik o wiyaramanqantsik kallpata qoramantsik (Pro. 15:23; 17:17). Jina Jehoväta alabanapaq cantanqantsikpis alläpam yanapamantsik. Rasun kaqchöqa, ‘tukïpaq yarpachakïkuna’ nitimanqantsik hörakunam masqa wanantsik reunionkunachö tukïnöpa kallpata tarita. Tsëchömi Jehoväqa ‘shoqamarnintsik’ tsarämantsik y imëkata pasarpis alli tsarakunapaq kallpata qomantsik (Sal. 94:18, 19).

¹⁸ Kuyamarnintsik Dios cuidamanqantsikta musyarmi Asafnö kushishqa sientekuntsik, pëqa kënömi cantarqan: “Qammi derecha makïpita tsarämarqunki. Consëjïkikunawanmi pushamanki” (Sal. 73:23, 24). ¡Alläpam agradecikuntsik Jehová salvacionpaq guardëkämantsikta!

[Päginapa ura kuchunchö willakïkuna]

[Yachakunapaq kaqpa tapukïninkuna]

[28 kaq päginachö dibüju]

Jehovämi qamtapis pëman pushashurqunki

[30 kaq päginachö dibüju]

Mana allikunapita tsapämänantsikrëkurmi Diosqa consejamantsik

[31 kaq päginachö dibüju]

Cristiano mayintsikkuna kallpata qomanqantsikmi tsarakunapaq yanapamantsik