Jehová Diosqa waqaychawasunmi salvakunapaq

“Qamkunaqa Diospi iñiyniyoqmi kankichik chaymi atiyninwan waqaychasunkichik salvasunaykichikpaq. Chaytaqariki Diosmi alistarqaña puchukay tiempokunapi reqsichinanpaq” (1 PED. 1:4, 5).

¿IMATAM NICHWAN?

¿Imaynatam Jehová Diosqa llaqtanman pusamuwarqanchik?

¿Imaynatam saqekunchik Jehová Dios pusawananchikta?

¿Imaynatam Jehová Diosqa kallpanchawanchik?

1, 2. a) ¿Imanasqam nichwan Diosman sonqo kanapaq kikin yanapawananchikta? b) ¿Imanasqam nichwan allintapuni Dios reqsiwasqanchikta?

“KAY pachapa tukupayninkama ñoqapi takyaqtam Diosqa salvanqa” (Mat. 24:13). Jesus kaynata nispanqa sutillatam kayta qawachiwanchik: kay pachapi Satanaspa munaychakusqanwan kuska mana puchukachisqa kanapaqqa, tukupayninkamam Diosman sonqo kananchik. Ichaqa manamá Jehová Diosqa suyanchu kikillanchikpa kallpanchikwan hinaspa yachayninchikwan iñiyninchikpi takyananchiktaqa. Bibliam nin: “Diosmi confiakuna kasqanrayku mana munanqachu mana aguantay atinaykichikkama tentasqa kanaykichiktaqa”, nispa (1 Cor. 10:13). ¿Ima ninantaq kayqa?

² Jehová Diosqa yachanmi ima sasachakuyniyoq kasqanchikta hinaspa imayna kasqanchiktawan imakuna aguantay atisqanchiktapas. Chayraykum saqenqa aguantay atisqanchik sasachakuyllapi kananchikta. Ichaqa, ¿cheqaptachu allintapuni reqsiwanchik? Arí. Bibliapa nisqanman hinaqa, Diosqa yachanmi ñoqanchikmanta tukuy imata. Manamá imapas ñawinmantaqa pakasqachu kachkan. Yachantaqmi piensayninchiktawan munayninchikkunatapas (leey Salmo 139:1-6).

3, 4. a) ¿Imaynatam yachanchik sapakama runakunapi Jehová Dios reparasqanta? b) ¿Imaynatam Jehová Diosqa kunan tiempopi qawachin runakunapi reparasqanta?

³ Yaqapaschá kaynata nikunchik: “¿Imataq kanchik ñoqanchikpi Dios reparananpaqqa?”, nispa. Davidpas chaynam tarikurqa, paymi Jehová Diosta kaynata nirqa: “Qamllapa rurasqayki cielotapas qawarispaymi, altopi churasqayki killatapas qawarispaymi, altopi churasqayki lucerota qawarispaymi ñoqallayqa tapukuni: ‘¿Piraqtaq runaqa paymantaraq piensanaykipaq?’”, nispa (Sal. 8:3, 4). Chaynata nispanqa yaqapaschá Davidqa tukuy pasasqanpi piensachkarqa. Isaipa churinkunamanta  qepallaña kaptinpas, Jehová Diosqa ‘agradonpaqmi’ qawarqa, hinaspam ‘oveja michisqanmanta horqoruspan’ Israel runankunata kamachinanpaq akllarurqa (1 Sam. 13:14; 2 Sam. 7:8). ¡Imaynachá oveja michiq Davidqa tarikurqa yuyaymanasqanpi tukuy Unanchaq Dios reparasqanmantaqa!

⁴ Ñoqanchikpas David hinam tarikunchik, Jehová Dios ñoqanchikpi reparasqanta yachaspanchik. Diosqa cheqap religionta servichikuspanmi, ‘llapallan nacionkunamanta munayllapaqña kaqkunata’ huñuchkan, yanapachkantaqmi hinalla Diosman sonqo kanankupaqpas (Ageo 2:7, NM). ¿Imaynatam chayta ruran? Chaypaqqa puntata qawasun runakunata llaqtanman imayna pusamusqanmanta.

DIOSQA CHURINMANMI PUSAMUWANCHIK

5. ¿Imaynatam Jehová Diosqa allin sonqoyoq runakunata Churinman pusamun? Rimarimuy Lidiamanta.

⁵ Jesusmi nirqa: “Manam pipas hamunmanchu ñoqamanqa kachamuwaqniy Taytay ñoqaman mana pusamuptinqa”, nispa (Juan 6:44). Kay nisqanqa qawachiwanchikmi Jesucristopa qatiqnin kananchikpaq Dios yanapawasqanchikta. ¿Imaynatam Jehová Diosqa allin sonqoyoq runakunata Churinman pusamun? Chaytaqa ruran serviqninkunapa predicasqankuwan hinaspa chuya espiritunwanmi. Pablowan riqmasinkuna Filipos llaqtaman chayaruspankum, Lidia sutiyoq warmiman Diosmanta willarqaku. Bibliam nin: “Hinaptinmi paypa sonqonta [Jehová Dios] kichaykurqa Pablopa nisqanta kasukunanpaq”, nispa. Qawasqanchikman hinaqa, Diosmi chuya espiritunwan yanaparqa Pablopa nisqanta entiendenanpaq, hinaptinmi Lidiaqa wasinpi kaqkunapiwan bautizakururqaku (Hech. 16:13-15).

6. ¿Imaynatam Diosqa pusamuwarqanchik cheqap religionman?

⁶ ¿Yaqachu Lidiallata chayna pasarqa? Manamá. Sichu kunan tiempopi Jehová Diosta servichkanchik hinaptinqa, paymi llaqtanpi kananchikpaq pusamuwarqanchik. Lidiapa sumaq kayninkunata qawasqanman hinam, ñoqanchikpipas chayta Jehová Diosqa qawarqa. Diospa willakuyninkunata uyarisqanchikman hinam, Jehová Diosqa chuya espiritunwan yanapawarqanchik entiendenanchikpaq (1 Cor. 2:11, 12). Chay yachasqanchikkunata kasukunapaq kallpanchakusqanchikman hinataqmi, Diosqa hinalla yanapawarqanchik. Hinaspa maynatachá payqa kusikurqa servinanchikpaq qokuykusqanchikmanta. Serviyta qallaykusqanchikmantapacham, Diosqa ñoqanchikwan karqa yanapawaspanchik.

7. ¿Imaynatam yachanchik Diosman sonqo kanapaq pay yanapawananchikta?

⁷ Servinanchikpaq Dios yanaparuwaspanchikqa, manataqmi makinchikmantaqa kachaykuwanchikchu. Taytanchik Jehová Diosqa kaytam yachan: manamá ñoqanchikqa kikillanchikmantachu llaqtanmanqa yaykurqanchik, hinaptinqa manataqmi kikillanchikqa atisunchu iñiyninchikpi qaqa hina takyaytaqa. Pedrom hanaq pachaman rinankupaq suyakuyniyoq cristianokunaman kaynata nirqa: “Qamkunaqa Diospi iñiyniyoqmi kankichik chaymi atiyninwan waqaychasunkichik salvasunaykichikpaq. Chaytaqariki Diosmi alistarqaña puchukay tiempokunapi reqsichinanpaq”,  nispa (1 Ped. 1:4, 5). Kay nisqanqa allinpunim lliw cristianokunapaq. Chayraykum llapanchik chay nisqanpi reparananchik, ¿imanasqa? Dios mana yanapawaptinchikqa manamá payman sonqo kaytaqa atisunchu.

DIOSQA YANAPAWANCHIKMI MANA HUCHALLIKUNAPAQ

8. ¿Imanasqam kallpanchakunanchik ima huchapipas mana wichiykunapaq?

⁸ Imapipas pantarusqanchikwanmi otaq llakinchikkunawanmi iñiyninchikpi hukmanyaruchwan. Chaymi qonqayllamanta ima huchapipas wichiykuchwan (leey Galatas 6:1). Chayna kasqantam allintapuni qawachin Davidta pasasqan. Qatiqninpi chaymanta qawasun.

9, 10. ¿Imaynatam Diosqa Davidta yanaparqa mana huchallikunanpaq, hinaspa imaynatam kunanpas yanapawanchik?

⁹ Rey Saulmi Davidta qatikacharqa, chaywanpas Davidqa allintam controlakurqa mana wañuchinanpaq (1 Sam. 24:2-7). Huk kutipim ichaqa pantaq kasqanrayku mana controlakurqachu. Runankunapaqwan paypaq ima mikuyninkupas mana kaptinmi, Israel castamanta Nabal sutiyoq runata mañakurqa yanapaykunanpaq. Nabal runaqa Davidta tratapaspanmi mana munarqachu. Hinaptinmi Davidqa llumpayta piñakuruspan tantearurqa Nabal runatawan wasinpi kaqkunatapas wañurachinanpaq. Manamá piensayllapas-piensarqachu chayta ruraspan huchallikunanmantaqa. Ichaqa qonqayllamantam Nabalpa señoran Abigail chayta mana rurananpaq harkarurqa. Hinaptinmi Davidqa reqsikurqa Dios yanapaykusqanta, chaymi Abigailta nirqa: “¡Israelpa yupaychasqan Tayta Diosyá alabasqa kachun! Paymi kachamusurqanki ñoqawan kunan tupaykunanchikpaq. Qamtapas paytaqyá bendecisunki allin piensaq kasqaykimanta. Kunanmi harkaykuwanki runakunapa yawarninta ama chaqchurunaypaq chaynataq kikiypuni ama vengakurunaypaq”, nispa (1 Sam. 25:9-13, 21, 22, 32, 33).

¹⁰ ¿Imatam kayqa yachachiwanchik? Jehová Diosmi Abigailta servichikurqa David mana huchallikunanpaq. Kunanpas Diosqa pitapas servichikunmi yanapawananchikpaq. Ichaqa manamá suyananchikchu sapa huchallikunanchikpaq kachkaptinchik, pitapas harkawananchikpaq kachamunanmantaqa. Manataqmi yachanchikchu sasachakuykunapi Jehová Dios imayna yanapawananchiktaqa, nitaq munaynin rurakunanpaq ima sasachakuykunata saqenanmantapas (Ecl. 11:5). Ichaqa manam iskayrayananchikchu Jehová Dios allintapuni reqsiwasqanchikmantaqa hinaspa payman sonqo kanapaq yanapawananchikmantapas. Payqa kaynatam niwanchik: “Ñoqam entiendechisqayki qamtaqariki. Ñoqam yachachillasqayki kawsakuytaqa. Ñoqam qawariykullaspay consejasqayki”, nispa (Sal. 32:8). Hinaptinqa, ¿imaynatam Diosqa consejawanchik? ¿Imaynatam chaywan yanapachikuchwan? Hinaspa, ¿imanasqam mana iskayrayachwanchu llaqtanta Dios kunan pusasqanmanta? Kay tapukuykunata kutichinapaq qawasun Apocalipsis qellqata.

DIOSQA YANAPAWANCHIKMI CONSEJONKUNAWAN

11. ¿Imaynatam allintapuni Diosqa reqsin congregacionkuna imayna tarikusqanta?

¹¹ Apocalipsis qellqapa 2 hinaspa 3 capitulokunam willawanchik, Asia Menor lawpi qanchis congregacionkuna imayna tarikusqankuta Jesucristo qawasqanta. Willawanchiktaqmi Jesucristo llapanta qawaspanpas, sapakama cristiano imayna tarikusqantapas qawasqanta. Wakinpiqa rimanraqmi cristianokunapa sutintapas, hinaspam kallpanchaspan consejota qon. ¿Imatam kaymanta yachachwan? Chay willakuyqa 1914 watamanta qepamanmi cumplikuyta qallaykurqa. Qanchis congregacionkunaqa tupanmi hanaq pachaman rinankupaq suyakuyniyoq cristianokunawan, hinaspa paykunata consejasqanpas allinpunim enteron pachapi  congregacionkunapaq. Chaymi nichwan kay pachapi llaqtanta Jehová Dios Churinwan pusasqanta. ¿Imatam rurananchik ñoqanchikpas paywan pusachikunapaq?

12. ¿Imaynatam saqekunchik Jehová Dios pusawananchikta?

¹² Jehová Dioswan pusachikunapaqqa, sapakamam Bibliata estudiananchik. Diosqa achkallaña consejokunatam qowanchik, yuyayniyoq confianza sirvientepa qowasqanchik qellqakunawan (Mat. 24:45). Allinta yanapachikunapaqqa, leenapaqmi tiempochakunanchik hinaspapas kasukunanchikmi. Arí, Diosqa sapakama estudiasqanchiktam servichikun waqaychawananchikpaq hinaspa huchamanpas mana wichinapaq (Jud. 24). Qellqanchikkunata leespayki haykallapipas nirqankichu: “Kayqa ñoqapaq hinam”, nispa. Chayna kaptinqa, Jehová Dios consejasusqaykita hina qaway. Wakinpiqa mayqan amistadninchikpas qawachiwachwanmi imapi pantasqanchikta. Chaynallataqmi Jehová Diospas chuya espiritunta servichikuspan qawachiwachwan imapi pantasqanchikta, hinaptinqa wakin iñiqmasinchikkuna hinam kallpanchakunanchik cambianapaq. Kasukuspaqa, saqekuchkanchikmi Jehová Dios pusawananchikta (leey Salmo 139:23, 24). Kaykunapi piensaspaqa, kallpanchakunanchikmi sapakama estudianapaq.

13. ¿Imanasqam tiempochakunanchik Bibliata sapakama estudianapaq?

¹³ Kusirikuykunata puntapi churaptinchikqa, manam tiemponchik haypawasunchu estudianapaqqa. Huk iñiqmasinchikmi nirqa: “Chayllam saqeruchwan Biblia estudiasqanchiktaqa. Kunanqa imaymana kusirikuykunam kachkan. Chaykunataqa qawachwanmi televisionpi, computadorapi hinaspa telefonopipas. Arí, tukuy hinastinpim kachkan”, nispa. Mana cuidakuspaqa, pisi-pisimantam Biblia estudiasqanchikta saqeruchwan (Efe. 5:15-17). Chaymi llapanchik tapukunanchik: “¿Tiempochakunichu tukuy sonqoywan sapa kuti Bibliata estudianaypaq? ¿Icha huñunakuypi imapas tupawaptillanchu allinta estudiani?”, nispa. Chayna kaptinqa, kallpanchakunanchikmi familiawan Diosta yupaychanapaq tutata otaq sapakama Biblia estudiasqanchikta allinta servichikunapaq. Chayta ruraspaqa Jehová Diospa qowasqanchik yanapakuykunatam allinta servichikusun salvakunapaq (Pro. 2:1-5).

DIOSQA YANAPAWANCHIKMI KALLPANCHAWASPANCHIK

14. ¿Imaynatam Bibliaqa qawachin imayna tarikusqanchikta Jehová Dios yachasqanta?

¹⁴ Davidqa achka sasachakuykunapim tarikurqa (1 Sam. 30:3-6). Bibliapi qellqasqankunam qawachiwanchik imayna tarikusqanta Jehová Dios yachasqanta (leey Salmo 34:18; 56:8). Ñoqanchikmantapas yachanmi. Llakisqa hinaspa hukmanyasqa tarikuptinchikqa payqa asuykamuwanchikmi. Chaymanta yachayqa Davidta hinam kallpanchawanchik, paymi nirqa: “Llumpayta kuyapayawasqaykiraykum kusikusaq. Qamllamiki ñoqapa ñakarillasqaykunataqa qawarqanki. Qamllamiki ñoqapa sasachakuyniykunataqa yacharqanki”, nispa (Sal. 31:7). Diosqa sasachakuyninchikta yachaspanpas, yanapawanchikmi kallpanchawaspanchik. Chaypaqmi servichikun huñunakuykunata.

15. ¿Imatam yachachwan Asafmanta?

 ¹⁵ Asafta ima pasasqanmi qawachiwanchik huñunakuykunaman riyqa allintapuni yanapawasqanchikta. Payqa llumpay mana allinkunata rikusqanraykum, Dios yupaychayninpi hukmanyarurqa. Nirqam ‘sonqonpi llakisqa’ tarikusqanmanta. Chayraykum Jehová Dios servisqanta yaqalla saqerurqa. Ichaqa, ¿imataq yanaparurqa? Paypa nisqanman hinaqa, ‘Diospa santuarionman yaykusqanmi’. Chaypi iñiqmasinkunawan tarikusqanmi yanaparurqa Diosta hinalla servinanpaq. Musyakururqam mana allin runakunapa kusisqa kawsakusqankuqa tukuruqlla kasqanta, hinaspa tukuy imata Dios allichanamantapas (Sal. 73:2, 13-22). Kunanpas yaqa chaynapim tarikunchik. Yaqachá ñoqanchikpas hukmanyasqa tarikunchik Satanaspa munaychakusqan tukuy mana allinkunawan. Ichaqa iñiqmasinchikkunawan huñunakuspaqa, kallpanchasqam tarikunchik Jehová Diosta kusikuywan hinalla servinapaq.

16. ¿Imatam Anamanta yachachwan?

¹⁶ Ichaqa, ¿hukmanyachkanchikchu huñunakuyman rinapaq congregacionpi imapas sasachakuy kasqanrayku? Ichapas penqakuywan kachkanchik congregacionpi rurayninchikta manaña ruranapaq niwasqanchikrayku. Otaq huk kaqnin iñiqmasinchikwanpas sientinarachikunchik. Chayna kaptinqa yuyarisun Anapa ima rurasqanta (leey 1 Samuel 1:4-8). Payqa llumpaytam ñakarirqa qosanpa huknin Penina sutiyoq warminwan sasachakusqanrayku. Astawanraqmi ñakarirqa llapallanku Silo llaqtapi temploman Jehová Diosman ofrendakunata qonankupaq sapa wata riptinku. Anaqa hukmanyasqallaña tarikuspanmi “waqaspan mana mikuqchu”. Chaywanpas payqa manamá saqerqachu Jehová Dios yupaychasqantaqa. Hinaptinmi Diosqa imayna tarikusqanta qawaspan bendeciykurqa (1 Sam. 1:11, 20).

17, 18. a) ¿Imaynatam huñunakuykunapi kallpanchasqa tarikunchik? b) ¿Imaynam qamqa tarikunki salvakunapaq kuyakuywan Jehová Dios waqaychawasqanchikmanta?

¹⁷ Llapanchikmi Anata qatipakunchik huñunakuyninchikta mana haykapipas saqespa. Chaypiqa llapanchikmá kallpanchanakunchik (Heb. 10:24, 25). Iñiqmasinchikkunapa kuyakuynin hinaspa paykunawan kuska kasqanchikqa kusichiwanchikmi. Arí, yaqachá huñunakuypi iñiqmasinchikkunapa rimasqankuqa hawkayaykachiwanchik. Otaq huñunakuy manaraq qallarichkaptin otaq tukuruptin pi iñiqmasinchikpa niwasqanchik otaq uyariwasqanchikqa kallpanchaykuwarqanchik (Pro. 15:23; 17:17). ¿Ima nichwantaq huñunakuypi takisqanchikmanta? Kaypas kallpanchawanchikmi. Arí, astawanraqmi huñunakuykunaman rinanchik llakikunawan intusqa kaspanchikqa. Chaypim Jehová Diosqa ‘consuelawaspanchik’ yanapawanchik, chaynapi hinalla payman sonqo kanapaq (Sal. 94:18, 19).

¹⁸ Jehová Dios waqaychawasqanchikmanta mana iskayrayaspam, Asaf hina kaynata ninchik: “Allinta consejawaspaykim qamqa pusawachkanki”, nispa (Sal. 73:23, 24). ¡Mayna kusisqam tarikunchik salvakunapaq Jehová Dios waqaychawasqanchikmanta!

[Kay yachachikuypa tapukuyninkuna]

[28 kaq paginapi dibujo]

Jehová Diosqa qamtapas pusamusurqankim

[30 kaq paginapi dibujokuna]

Diospa consejawasqanchikqa allinninchikpaqmi

[31 kaq paginapi dibujo]

Kallpanchawasqanchikqa yanapawanchikmi