Yehova Ngu Kuran Se Sha Ci U Myom
Yehova Ngu Kuran Se Sha Ci U Myom
“Mba . . . kor ne sha agee a Aôndo sha jighjigh u nan, sha u ngohol myom u i kegh iyol i ver a ver u pasen un sha iyange i masetyô yô.”—1 PET. 1:5.
Ú NA MLUMUN WER NYI?
Yehova urugh se ve a mi ken mcivir u mimi nena?
Se lumun ser Yehova a hemen se sha kwaghwan na nena?
Yehova taver se ishima nena?
1, 2. (a) Er nan ve se lu a vangertiôr ser Aôndo una wase se u tilen sha mimi zan zan mkuru? (b) Yehova fa hanmô wase kighir nena?
“OR U nana taver ishima zan zan mkur yô, ka nan á yima nan ye.” (Mat. 24:13) Yesu pase ken mkaanem man wang ér, cii man se war mtim u Aôndo a lu van a mi sha tar u Satan ne yô, gba kpee u se tile sha mimi zan zan mkur. Kpa u ngu wer kwagh ne tese ér Yehova ver ishima ér se taver ishima sha tahav asev shin sha kwaghfan wase ga. Bibilo na se ibumun ér: “Aôndo yô, ka u jighjigh, Una lumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.” (1 Kor. 10:13) Inja i mkaanem man ér nyi?
2 Yehova lumun ér i mee se i hemba agee a ase ga. Una er kwagh ne sha ci u a fa mlu wase vindi vindi, kua mbamzeyol asev man imbaor u se lu la, kua kwagh u se fatyô u wan ishima a mi la kpaa. Aôndo fa se vindi vindi nahan mimii? Een. Ruamabera pase ér Yehova fa se asange asange kôr inya. A fa akaa a se eren ayange ayange la, kua anza a ase kpaa. Shi a fa mbamhen man mbaawashima asev cii.—Ôr Pasalmi 139:1-6.
3, 4. (a) Ikyo i Yehova yange wa Davidi la tese er a veren ishima sha kwagh wase asange asange nena? (b) Ka tom u vesen u nyi Yehova a lu eren nyiana?
3 Mimi je, kwagh gba Aôndo u Hembanagee cii a uumace mba kaka nee? Orpasalmi Davidi yange hen sha mpin ne, nahan a pine Yehova ér: “Er m veren ishima sha akaa a sha aôndo a a lu tom u u ahôaveegh Ou, ka uwer man asan a U ver a yô, or ngu nyi ve U umbur nana?” (Ps. 8:3, 4) Alaghga Davidi nenge er Aôndo wa un ikyo tsung yô, ka nahan ve pine un mpin ne ye. Davidi lu wan u Yese u masetyô. Hii shighe u lu wanye la je, Yehova nenge un ér ngu “or Na u sha ishima Na vough,” nahan a “tôô [un] hen ijiir i ilev yan toho, . . . hingir or u hemen” Iserael. (1 Sam. 13:14; 2 Sam. 7:8) Aôndo u a gbe sha man tar la yange fa mbamhen mba Davidi mba ken ishima, shin er Davidi lu wanye u kuran ilev nahan kpaa. Nenge er yange a lu Davidi ken ishima shighe u fa kwagh ne la yô!
4 Mwe u Yehova a we se ikyo nyian kpishi la kpa ka kwagh u kpilighyol tsô. Ngu kohol “akaainjaa a akuraior cii” van a mi ken mcivir u mimi, shi ngu wasen mba civir un u tilen sha mimi kpaa. (Hag. 2:7) Se hii timen sha gbenda u Yehova a urugh ior a ve a mi ken mcivir u mimi la tsô, se seer fan er a wasen se u tilen sha mimi yô.
AÔNDO URUGH SE
5. Yehova urugh ior ve a mi hen Wan na nena? Tese ikyav.
5 Yesu yange kaa ér: “Ma or nana fatyô u gban van her a mo ga, saa Ter u A tindim la, Una urugh nan.” (Yoh. 6:44) Mkaanem mara tese ér saa Aôndo una wase se keng ve, se hingir mbahenen mba Kristu ye. Yehova ngu a urugh se a va a mi hen Wan nan nena? Urugh se sha loho u dedoo u i pasen la, man sha ikyev i icighan jijingi. U tesen ikyav yô, shighe u Paulu kua mba ve lu eren tom u mishen vea na imôngo la ve lu ken Filipi la, ve zua a kwase ugen, i yilan ér Lidia, ve hii u pasen un loho u dedoo. Ngeren la kaa ér: “Ter kpaa bugh un ishima sha u una ver ishima sha akaa a Paulu lu ôron la.” Aôndo yange na kwase ne jijingi na sha u a wase un u kaven loho ne, nahan un a ya na cii ve er batisema.—Aer. 16:13-15.
6. Aôndo urugh se cica cii va a vese ken mcivir u mimi nena?
6 Ka Lidia tseegh imbakwagh ne yange i er un yee? Mayange ga. Wea lu Orkristu u ú tsegh iyol you sha ci u Aôndo yô, we kpa ka Aôndo yange urugh we va a mi ken mcivir u mimi ye. Er Ter wase u sha yange nenge a kwagh u dedoo ken ishima i Lidia nahan, kape we a nenge a kwagh u dedoo ken a we je la. Shighe u ú hii u keghen ato a loho u dedoo la, Yehova yange na u icighan jijingi na ér a wase ú u kaven loho shon. (1 Kor. 2:11, 12) Zum u ka wea kange ishima wer u dondo kwagh u ú hen la yô, Yehova ka a ver iniôngon i u lu nôngon wer u er ishima na la doo doo. Shighe u ú tsegha iyol you sha ci na la, yange ember kpishi. Sha kpôô yô, hii shighe u ú hii u tôôn angahar a zan sha gbenda u uma la je, Yehova za hemen u wasen we.
7. Er nan ve se fe ser Aôndo una wase se ér se civir un sha mimi?
7 Yehova yange wase se se hii u civir un, nahan mayange una kende se ér se civir un sha jighjigh sha tahav asev tseegh ga. A fa je wener, er yange se va ken mimi sha tahav asev ga yô, kape se za hemen u lun ken mimi sha tahav asev ga je la. Apostoli Peteru yange nger Mbakristu mba i shigh ve mkurem mbara washika, kaa ér: “Mba . . . kor ne sha agee a Aôndo sha jighjigh u nan, sha u ngohol myom u i kegh iyol i ver a ver u pasen un sha iyange i masetyô” la. (1 Pet. 1:5) Mkaanem mara ma a inja hen Mbakristu cica cii, shi doo u ma a gba hanmô wase kwagh nyian tsung. Sha ci u nyi? Sha ci u se cii gba u Aôndo una wase se ve se za hemen u tilen sha mimi ye.
AÔNDO UNA FATYÔ U YANGEN SE U EREN KWAGH U KPEEGH
8. Er nan i doo u se wa ikyo sha er se er kwagh u kpeegh ga?
8 Mbamzeyol mba uma kua mbamyen asev vea na se kera ver ishima sha akaa a ken jijingi ga, se hingir u tsenen iyol yase sha kwaghbo, aa mfe wase shio je kpaa. (Ôr Mbagalatia 6:1.) Kwagh u yange er Davidi la tese ikyav i kwagh ne.
9, 10. Yehova yange yange Davidi u eren kwagh u kpeegh nena, man yangen se u eren kwagh u kpeegh nyian nena?
9 Shighe u Tor Saulu lu tôvon Davidi ityô u wuan un la, Davidi tese ieren i dedoo, sha ci u a palegh u oron tor u wan iyuhe la iyev. (1 Sam. 24:2-7) Shighe la karen kera pohola yô, Davidi de ér myen na la a hemba un. Yange lu keren kwaghyan sha ci u ior mba ve lu a na imôngo la, nahan a pine iwasen hen Oriserael ugen u i yilan un ér Nabal yô. Er Nabal laha Davidi shi venda u wasen un yô, ishima vihi Davidi nahan a mough ér una za tim Nabal a ya na cii, kera umbur er ieren i wuan mbaishôôv la ia na una lu a ibo i awambe sha ishigh ki Aôndo nahan ga. Kpa Abigail, kwase u Nabal yange Davidi u eren imba kwaghbo ne. Davidi kav er lu Yehova je mgbegha Abigail ér a yange un yô, nahan a kaa a na ér: “I̱ wuese TER Aôndo u Iserael, u A tindi u nyian er ú va keghem gbenda ne! I̱ wuese kwaghfan wou shi i̱ wuese we iyol you kpaa; we u u yangem ikye i awambe nyian, man u oron iyev yam sha uwegh agh kpaa yô!”—1 Sam. 25:9-13, 21, 22, 32, 33.
10 Se hen nyi ken kwagh nee? Yehova yange mgbegha Abigail ér a yange Davidi u eren kwagh u kpeegh. Se kpa Yehova una fatyô u mgbeghan or ér nana yange se u eren kwaghbo. Kpa gba u se ver ishima ser Aôndo a tindi or ér nana yange se hanma kwa u se lu nôngon u eren kwaghbo ga. Shi se fa gbenda u Aôndo una bee a ma zayol, shin akaa a una de ér a er sha u kuren awashima na la jighilii ga. (Orpa. 11:5) Nahan cii kpa, se fatyô u lun a vangertiôr ser Yehova fa mbamlu asev hanma shighe cii shi una wase se se za hemen u civir un sha mimi kpaa. A tôndo zwa a vese ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.” (Ps. 32:8) Yehova tesen se kwagh u se er la nena? Ityesen shon ia lu se a iwasen nena? Man doo u se lu a vangertiôr ser Yehova ngu hemen ior nav nyian sha ci u nyi? Nenge ase er i ne mbamlumun sha mbampin mban ken takerada u Mpase yô.
KWAGHWAN KOR SE
11. Yehova fa kwagh u a lu zan hemen ken atôônanongo a mba civir un la kighir nena?
11 Ken mpase u sha mnenge u i nger ken takerada u Mpase ityough 2, man 3 la, i ôr kwagh u mser u Tor Yesu Kristu yange va sôr atôônanongo a ken Ashia u Kiriki la. Mpase u sha mnenge la tese ér, Yesu yange fa akaa a ior lu eren sha mi ga wuee ken atôônanongo ne la tseegh ga, kpa fa mbamzeyol mba hanma tiônnongo cii kôr inya. Sha ashighe agen je yô, yange a ter ior mbagenev sha ati, man hanma kwa yô, a wuese shin a kôôm ve kpaa. Kwagh ne tese ér nyi? Atôônanongo a ataankarahar la tile sha ityough ki Mbakristu mba i shigh ve mkurem, shighe u inyom i 1914 kar kera la. Er kwaghwan u Kristu la lu sha ci u Mbakristu mba i shigh ve mkurem mbara jighilii nahan kpa, atôônanongo a mba civir Aôndo sha tar nyian cii aa fatyô u zuan a iwasen ken kwaghwan ne. Sha nahan yô, se fatyô u kaan ser Yehova ngu hemen ior nav sha ikyev i Wan na. Se zua a iwasen ken mkôr ne nena?
12. Se lumun hemen u Yehova nena?
12 Gbenda môm u se zua a iwasen sha hemen u Yehova u sha dooshima la yô, ka u henen Bibilo sha tseeneke wase. Yehova yaren tom a ityakerada i wanakiriki u jighjigh man u fan kwagh la sha u wan se kwagh ken Ruamabera. (Mat. 24:45) Nahan kpa, saa se ver shighe u henen i shi eren sha kwagh u se hen ker la ve, ia lu se a iwasen ye. Kwaghhenen u sha tseeneke la ka gbenda môm u Yehova ‘Una kura se sha u se kera nôngo gbev ga’ yô. (Yuda 24) I lu nahan u hen kwagh ken ityakerada yase u i lu ú inja er i nger un sha ci wou vee? Aluer kwagh ngu nahan yô, nenge wer kwaghwan la due hen Yehova, nahan dondo kwaghwan shon. Di vough er ijende you ka i kpoghor we sha u ia ôrou kwagh nahan, kape Yehova kpa ngu a yar tom a jijingi na sha u umbur we kwagh u i gbe u we, kua mbagenev kpaa, ne sôr ken uma wen je la. Aluer se mba tsevaa sha u dondon gbendatesen u jijingi yô, se lu lumun hemen u Yehova. (Ôr Pasalmi 139:23, 24.) Sha nahan yô, de se time nen sha gbenda u se henen kwagh la.
13. Er nan ve i doo u se gbidye kwar sha gbenda u se henen kwagh sha tseeneke wase laa?
13 Aluer se mba vihin shighe kpishi sha iemberyolough yô, se zua a shighe u henen kwagh sha tseeneke wase ga. Anmgbian ugen kaa ér: “Ka ican ga u gban uwer a kwaghhenen u sha tseeneke la. Iemberyolough de ishar hegen, shi i kera taver ishe kpaa ga. U fatyô u zuan a mi sha televishen man sha kômputa kua sha hanseeti kpaa. Iemberyolough kase se wa atô.” Aluer se wa ikyo ga yô, se gema vihin shighe wase sha iemberyolough seer a seer, zan zan je yô, se va kera luun a shighe u henen kwagh sha tseeneke wase ga kuaa. (Ef. 5:15-17) Doo u hanma wase nana pine iyol i nan ér: ‘M tee shighe sha u timen sha akaa a cimin a ken Mkaanem ma Aôndo la ciligh ciligh kpa? Ka shighe u m lu a kwaghôron u ken igbar shin i nem ma asaimenti ken mkombo tseegh ka m wa iyol yee?’ Aluer ka nahan yô, alaghga a gba u se henen kwagh sha shighe u eren Mcivir u hen Tsombor shin henen kwagh sha tseeneke wase la, sha u timen ken Bibilo zan shimi, sha er se kav kwaghfan u Yehova, vough er ka se ker akaa a injaa shin inya nahan. Mfe ne una kura se una za a vese ken myom.—Anz. 2:1-5.
ISHIMATAVER NE SE ISHIMAWAN
14. Ruamabera tese ér Yehova fa er ka i lu se ken ishima la nena?
14 Davidi yange tagher a atsan kpishi ken uma na. (1 Sam. 30:3-6) Mkaanem ma Aôndo mgbegha un nger la ma tese ér Yehova yange fa er lu un ken ishima la. (Ôr Pasalmi 34:18; 56:8.) Se kpa Aôndo fa er i lu se ken ishima yô. Ngu a kporom ikyua a vese shighe u ‘asema a vihi’ se shin se lu a “ishima i zamber” la. Kwagh ne ngu a sur se asema, er yange sur Davidi ishima nahan. Davidi wa icam kaa ér: “Me ember, me ember tsung sha erdoo Wou, gadia U nenge ican yam, U fa er i lu zan uma wam iyol yum yô.” (Ps. 31:7) Kpa Yehova ngu a er kwagh i hemba di u fan a fa mbamzeyol asev tseegh tsô la. Ngu a taver se sha u surun se asema shin taver se asema kpaa. Gbenda môm u ngu a er kwagh ne yô, ka ken mbamkombo mba Mbakristu.
15. Kwagh u yange er Asav la tese se nyi?
15 Kwagh môm u yange er orpasalmi Asav la tese er i lu a inja u zan mbamkombo yô. Er Asav zer henen er mbaperapera lu yan ican kpa mbaaferev lu zan ikyura yô, a gba henen ér ityôkyaa ngi i civir Aôndo ga. Nahan iyol hingir u kpen Asav. A pase er yange lu un ken ishima la ér: “Ishima lu vihin mo, man shi sôôm ken ishima kpaa.” Kwagh ne na yô, shi cuku Asav yange ma de u civir Yehova. Kpa ka nyi yange i wase Asav ve sôr mhen naa? A kaa ér: “M nyôr ken icighanjiir u Aôndo.” Er lu vea mba civir Yehova imôngo ken mkombo yô, hide lu a mnenge u vough. Yange nenge er mkpeyol u iferor a lu u tsan gbem ga yô, shi fa er Yehova una va sôr hanma kwagh cii vough yô. (Ps. 73:2, 13-22) Se kpa alaghga ashighe agen a lu se ken ishima er Asav nahan. Atsan a se tagher a mi ken tar u Satan ne aa na yô, se ule shi ishima ia vihi se kpaa. Ka sea kohol vea anmgbianev asev imôngo yô, i kundu se iyol shi se zua a iember ken mcivir u se civir Yehova la.
16. Ikyav i Hana la ia wase se nena?
16 Kpa aluer ma kwagh za u iyol ken tiônnongo, nahan kwagh ne na yô, taver we u zan mbamkombo di ye? Adooga gba u ú kera lu sha ma iantom ken tiônnongo ga, nahan kunya kôr u a iyol you, gayô anyiman gba hen atô wou vea ma anmgbian u nomso shin u kwase. Aluer kwagh ngu nahan yô, ikyav i Hana la ia wase u. (Ôr 1 Samuel 1:4-8.) Umbur wer, Penina, wuhe u Hana yange a shi bamen un, nahan ishima vihi un kpishi. Hanma inyom tsombor u Hana yange ua za ken Shilo u za nan Yehova nagh yô, ishima i hemba vihin un ker cii, sha ci u m-bam u wuhe na la. Ishima yange i vihi Hana ker je “a gba vaan, kwaghyan kpaa a ya ga.” Nahan kpa, yange de ér kwagh ne a yange un u zan uiniongo mba civir Yehova mbara ga. Yehova yange nenge a jighjigh u Hana la, nahan ver un doo doo.—1 Sam. 1:11, 20.
17, 18. (a) Ka sha nyi igbenda nahan ka se zua a ishimataver ken mbamkombo mba tiônnongo? (b) U nenge gbenda u Yehova a lu eren a vese doo doo sha u wasen se ér se zua a myom la nena?
17 Doo u Mbakristu nyian vea dondo ikyav i Hana la. Gba u se zaan mbamkombo hanma shighe. Er se cii se vande fan nahan, mbamkombo mba taver se asema kpishi. (Heb. 10:24, 25) Mlu u kundu kundu u anmgbianev la ngu a sur se asema. U tesen ikyav yô, mkaanem ma or nan er zum u nan lu nan kwaghôron shin nan lu nan ikyar la ma a fatyô u kôron se ken ishima. Zum u se lu lamen a mbagenev shighe u i lu a hii mkombo ga, shin shighe u i dugh mkombo yô, ma anmgbian nana fatyô u keghen ato a vese shin ôron kwagh u una sur se ishima yô. (Anz. 15:23; 17:17) Ka sea zua akenge imôngo sha u wan icam i wuese Yehova yô, ishima i taver se shi i hide i saan se iyol kpaa. Hemban cii je yô, ka shighe u ‘mbamhen ve ngee se ken ishima’ la je ka i gba u a taver se ishima ken mbamkombo, ape Yehova a taver se sha ‘mbamsurshima Nav’ shi a suen se sha mkange u se kange ishima ser se za hemen u civir un sha mimi la ye.—Ps. 94:18, 19.
18 Er Aôndo wase a lu kuran se sha erdoo na yô, se nenge ser se mba ken mkor, vough er Asav nahan. Yange wa Yehova icam, kaa ér: “U kôrom sha uwegh agh ku yanegh. Ú hemen mo sha mhen Wou.” (Ps. 73:23, 24) Doo se kpishi er Yehova a kuran se sha ci u myom nahan!
[Mbampin Mba Ngeren u Henen]
[Foto u sha peeji 28]
We kpa ka Yehova yange urugh we va a mi ken mcivir u mimi ye
[Foto u sha peeji 30]
Ka sea dondo kwaghwan u Aôndo yô, se zua a mkor
[Foto u sha peeji 31]
Ka a̱ taver se ishima yô se zua a agee
