Yehova Wakutisunga Kuti Tiponoskeke
Yehova Wakutisunga Kuti Tiponoskeke
“Imwe . . . mukusungika na nkhongono ya Ciuta kwizira mu cipulikano kuti muponoskeke. Ciponosko ici canozgekera kuzakavumbukwa mu umaliro wa nyengo.”—1 PET. 1:4, 5.
KASI MUNGAZGORA WULI?
Kasi Yehova wakatiguza wuli kuti tize mu cisopa caunenesko?
Kasi tingacita wuli kuti Yehova watilongozge?
Kasi Yehova wakutipa wuli cikhwimisko?
1, 2. (a) Cifukwa wuli tikusimikizga kuti Ciuta watovwirenge kuti tilutilire kuŵa ŵakugomezgeka? (b) Kasi Yehova wakutimanya wuli ise waliyose payekha?
“UYO wazizipizga mpaka pa umaliro ndiyo wazamuponoskeka.” (Mat. 24:13) Apa Yesu wakalongora kuti tikwenera kuŵa ŵakugomezgeka mpaka pa umaliro kuti tizakapone para Ciuta wakuzakeruzga caru ca Satana ici. Kweni ici cikung’anamura kuti Yehova wakulindizga kuti tizizipizgenge na nkhongono panji mahara ghithu yayi. Baibolo likutisimikizgira kuti: “Ciuta ngwakugomezgeka, ndipo wazomerenge cara kuti imwe muyezgeke kujumpha ico mungazizipizga, kweni pamoza na ciyezgo wapelekengeso nthowa yakufumiramo mwakuti mumanye kucizizipizga.” (1 Kor. 10:13) Kasi mazgu agha ghakung’anamuraci?
2 Yehova wakuwoneseska kuti tikuyezgeka cara kujumpha ico tingazizipizga. Fundo iyi yikung’anamura kuti wakumanya vyose vyakukhwaskana na ise, nga ni masuzgo agho tikusangana nagho, umo tili kulengekera, ndiposo ivyo tingafiska kuzizipizga. Kasi Ciuta wakutimanya makora nadi? Enya. Malemba ghakulongora kuti Yehova wakutimanya makora ise waliyose payekha. Wakumanya ivyo tikucita zuŵa na zuŵa ndiposo nkharo yithu. Wakumanya maghanoghano ghithu na ivyo mtima withu ukukhumba.—Ŵazgani Salmo 139:1-6.
3, 4. (a) Kasi ivyo vikacitikira Davide vikulongora wuli kuti Yehova wakutitemwa ise waliyose payekha? (b) Kasi ni mulimo wuli wakuzirwa uwo Yehova wakucita mazuŵa ghano?
3 Kasi mukughanaghana kuti nchambura macitiko kuti Ciuta watimanye nthena taŵanthu? Wamasalimo Davide nayo wakaghanaghanirapo fumbo ili, wakati kwa Yehova: “Apo nkhupima mitambo yinu, mulimo wa minwe yinu, na mwezi na nyenyezi izo mulikwimika; kasi munthu ngwaci, kuti mumukumbuke?” (Sal. 8:3, 4) Panyake Davide wakafumba fumbo ili cifukwa ca kuwona umo Yehova wakalongolera kuti wakumughanaghanira. Yehova wakawona kuti mwana mucoko comene wa Jese uyu, wakaŵa “munthu wapa mtima wake” ndipo wakamutora ‘ku kuliska mberere, kuti waŵe mweruzgi’ pacanya pa Ŵaisrayeli. (1 Sam. 13:14; 2 Sam. 7:8) Aghanaghanirani waka umo Davide wakajipulikira wakati wamanya kuti Mlengi wa cilengiwa cose wakamanya maghanoghano ghake nangauli wakaŵa muliska.
4 Mazuŵa ghano napo Yehova wakulongora kuti wakutitemwa comene. Wakuwunganya “vyuma vyose vya mitundu” kuti vize mu cisopa caunenesko ndipo wakovwira ŵateŵeti ŵake kuti ŵalutilire kuŵa ŵakugomezgeka. (Hag. 2:7) Kuti tipulikiske umo Yehova wakutovwilira kuti tilutilire kuŵa ŵakugomezgeka, tiyeni tiwone umo wakuguzira ŵanthu ku cisopa caunenesko.
TIKUGUZIKA NA CIUTA
5. Kasi Yehova wakuguza wuli ŵanthu kuti ŵize ku Mwana wake? Yowoyani ciyelezgero.
5 Yesu wakati: “Palije munthu uyo wangiza kwa ine kwambura kuti Ŵadada, awo ŵakanituma, ŵamuguza.” (Yoh. 6:44) Mazgu agha ghakulongora kuti Ciuta ndiyo wakutovwira kuti tiŵe ŵasambiri ŵa Khristu. Kasi Yehova wakuguza wuli ŵanthu awo ŵali nga ni mberere kuti ŵize ku Mwana wake? Wakuŵaguza kwizira mu mulimo wa kupharazga makani ghawemi ndiposo mu nkhongono ya mzimu utuŵa. Mwaciyelezgero, apo Paulosi na ŵamishonale ŵanyake ŵakaŵa ku Filipi, ŵakasangana na mwanakazi munyake zina lake Lidiya, ndipo ŵakamba kumuphalirako makani ghawemi. Baibolo likuti: “Yehova wakajura mtima wake kuti wategherezge vinthu ivyo vikayowoyekanga na Paulosi.” Nadi, Ciuta wakatuma mzimu wake kuti uwovwire mwanakazi uyu kuti wapulikiske uthenga, ndipo iyo na ŵamumbumba yake ŵakabapatizika.—Mil. 16:13-15.
6. Kasi tose Ciuta wakatiguza wuli kuti tize mu cisopa caunenesko?
6 Kasi ivi vili kucitikirapo Lidiya pera? Yayi. Para ndimwe Mkhristu wakujipatulira, namweso ni Ciuta uyo wali kumuguzani kuti mwize mu cisopa caunenesko. Nga umo Ŵadada ŵithu ŵakucanya ŵakawonera viwemi mu mtima wa Lidiya, ŵali kuwonamoso viwemi mwa imwe. Apo mukamba kutegherezga makani ghawemi, Yehova wakamovwirani kuti mughapulikiske mwa kumutumirani mzimu utuŵa. (1 Kor. 2:11, 12) Apo mukayezgayezganga kulondezga ivyo mukasambiranga, Yehova wakatumbika kufwilirapo kwinu kuti mucite khumbo lake. Ndipo wakakondwa comene apo mukapatulira umoyo winu kwa iyo. Kwamba waka apo mukambira kuteŵetera Yehova, iyo waŵa namwe mpaka sono.
7. Kasi tikumanya wuli kuti Ciuta watovwirenge kuti tilutilire kuŵa ŵakugomezgeka?
7 Pakuti Yehova wakatovwira kuti tambe kumuteŵetera, watovwirengeso kuti tilutilire kuŵa ŵakugomezgeka. Wakumanya kuti nga umo tikizira tekha yayi mu unenesko, tingakhalaso yayi tekha mu unenesko. Apo wakalemberanga Ŵakhristu ŵakuphakazgika, mpositole Petrosi wakati: “Imwe . . . mukusungika na nkhongono ya Ciuta kwizira mu cipulikano kuti muponoskeke. Ciponosko ici canozgekera kuzakavumbukwa mu umaliro wa nyengo.” (1 Pet. 1:4, 5) Mazgu agha ghakugwiraso nchito ku Ŵakhristu wose mazuŵa ghano, ndipo tose tikwenera kughalondezga. Cifukwa wuli? Cifukwa tose tikukhumbikwira wovwiri wa Ciuta kuti tilutilire kuŵa ŵakugomezgeka.
CIUTA WAKUTOVWIRA KUTI TILEKE KUPULUKA
8. Cifukwa wuli tikwenera kuŵa maso kuti tileke kupuluka?
8 Masuzgo agho tikukumana nagho ndiposo maubudi ghithu vingatitondeska kughanaghanira vinthu vyauzimu, ndipo vingatipuluska kwambura kumanya. (Ŵazgani Ŵagalatiya 6:1.) Fundo iyi yikuwoneka makora pa ivyo vikacitikira Davide.
9, 10. Kasi Yehova wakawovwira wuli Davide kuti waleke kupuluka, ndipo wakucita wuli kwa ise mazuŵa ghano?
9 Apo Themba Sauli likapenjanga Davide kuti limukome, Davide wakalongora kuti wakaŵa wakujikora mwa kuleka kuwezgera themba la sanji ili. (1 Sam. 24:2-7) Kweni nyengo yicoko waka yikati yajumphapo, Davide wakacita vinthu mwambura kwenelera cifukwa ca kuwura kufikapo. Wakakhumbanga vyakurya na maji vya ŵanthu ŵake ndipo mwanchindi wakapempha wovwiri kwa Muisrayeli munyake zina lake Nabala. Davide wakakwiya comene cifukwa cakuti Nabala wakazgora mwamsinjiro ndipo wakawuka kuti wakawezgere Nabala na nyumba yake yose. Davide wakatondeka kumanya kuti Ciuta wakate wamupenge mulandu wa ndopa cifukwa ca kukoma ŵanthu ŵambura mulandu. Cifukwa cakuti Abigelu, muwoli wa Nabala, wakanjilirapo luŵiro, lekani Davide wakaleka kunanga vinthu. Pakumanya kuti Yehova ndiyo wakatuma Abigelu, Davide wakati kwa Abigelu: ‘Wacindikike Yehova Ciuta wa Israyeli, uyo watuma iwe muhanya uno kuzakakumana nane! Yitumbikike fundo yako, nawe utumbikike, wandikanizga muhanya uno kuleka kwiza kuthiska ndopa na kuwezgera nduzga ndamwene na woko lane.’—1 Sam. 25:9-13, 21, 22, 32, 33.
10 Kasi tikusambirapo vici pa nkhani iyi? Yehova wakatuma Abigelu kuti Davide waleke kupuluka. Mazuŵa ghano napo Yehova wakucita mwakuyana waka kwa ise. Kweni tileke kukhazga kuti Ciuta watumenge munthu nyengo yiliyose kuti watiwezge para tili pafupi kucita cinthu cambura kwenelera. Kweniso tingamanya yayi umo Ciuta wacitirenge pa cilicose, panji ivyo wazomerezgenge kuti vicitike kuti wafiske khumbo lake. (Muph. 11:5) Nangauli vili nthena, kweni tili na cigomezgo kuti nyengo zose Yehova wakumanya masuzgo ghithu ndipo watovwirenge kuti tilutilire kuŵa ŵakugomezgeka kwa iyo. Wakutisimikizgira kuti: “Tindikurunjikizge na kukusambizga nthowa iyo ukwenera kwendamo; tindikulongozge na jiso lane.” (Sal. 32:8) Kasi Yehova wakutipa wuli ulongozgi? Kasi ukutovwira wuli? Kasi tingasimikizga wuli kuti Yehova wakulongozga ŵanthu ŵake sono? Wonani mazgoro gha mafumbo agha mu buku la Uvumbuzi.
TIKUVIKILIRIKA PARA TIKUPULIKIRA ULONGOZGI
11. Kasi Yehova wakumanya vinthu ivyo vikucitika mu mipingo ya ŵanthu ŵake kufika mpha?
11 Mu mboniwoni iyo yili kulembeka mu vipaturo 2 na 3 vya buku la Uvumbuzi, Yesu Khristu mu ucindami wake wakawona ivyo vikacitikanga mu mipingo yinkhondi na yiŵiri ya mu Asiya. Mboniwoni iyi yikulongora kuti Khristu wakawonanga vinthu vyose ivyo vikacitikanga mu mipingo iyi. Nyengo zinyake, wakazunuranga nanga ni mazina gha ŵanthu, ndipo apo mphakwenelera wakawonganga panji kupeleka ulongozgi. Kasi ivyo vili kulembeka mu mboniwoni iyi vikulongoraci? Pakufiskika kwa mboniwoni iyi, mipingo 7 yikwimira Ŵakhristu ŵakuphakazgika cilimika ca 1914 cati cajumpha. Ulongozgi uwo ukapelekeka ku mipingo 7 ukugwiraso nchito mu mipingo yose ya ŵanthu ŵa Ciuta mazuŵa ghano pa caru cose capasi. Ipo nchakupulikikwa kuyowoya kuti Yehova wakulongozga ŵanthu ŵake kwizira mwa Mwana wake. Kasi tingandula wuli na ulongozgi uwu?
12. Kasi tingacita wuli kuti Yehova walongozge mendero ghithu?
12 Nthowa yimoza iyo yingatovwira kuti tisange candulo na ulongozgi wa Yehova nkhucita sambiro la taŵene. Yehova wakupeleka ulongozgi wa mu Malemba kwizira mu mabuku gha muzga wakugomezgeka na wakucenjera. (Mat. 24:45) Ndipouli, kuti tisange candulo na ulongozgi uwu tikwenera kuŵa na nyengo yakusambilira na kulondezga ivyo tasambira. Sambiro la taŵene ni nthowa yimoza iyo Yehova ‘wangativikililira kuti tileke kukhuŵara.’ (Yuda 24) Kasi muli kusambirapo nkhani yinyake mu mabuku ghithu iyo yikaŵa nga ni para yalembekera waka imwe? Mukwenera kupokera ulongozgi uwu nga ngwakufumira kwa Yehova. Nga umo mubwezi withu wangatiphalilirako nkhani yinyake, Yehova nayo wangagwiliskira nchito mzimu wake kutimanyiska nkharo yinyake iyo ise tikwenera kusintha. Para tikumanya umo mzimu ukutilongozgera, ndikuti tikuzomerezga Yehova kulongozga mendero ghithu. (Ŵazgani Salmo 139:23, 24.) Pa nkhani iyi, tingacita makora kusanda umo tikucitira sambiro la taŵene.
13. Cifukwa wuli cingaŵa camahara kusanda umo tikucitira sambiro la taŵene?
13 Para tikumalira nyengo yinandi pa vyakusanguluska, tingaŵavya nyengo yakucitira sambiro la taŵene. Mubali munyake wakati: “Nchipusu comene kuleka kucita sambiro la taŵene. Vyakusanguluska vyazara comene mazuŵa ghano, ndipo ni vyakuchipa comene kuluska kumasinda kose. Vikusangika pa kompyuta, TV, na pa foni. Vyakusanguluska vili palipose.” Para tikuleka kuŵa maso, nyengo yakucitira sambiro lacandulo la taŵene yingamba kucepa panji nanga nkhusoŵerathu. (Efe. 5:15-17) Waliyose wakwenera kujifumba mafumbo agha: ‘Kasi nkhalinga apo nkhusanga nyengo yakusambilira vinthu vyandimba mu Mazgu gha Ciuta? Kasi nkhucita nthena pekha para nili na nkhani yakuti ninozgekere?’ Usange ni nthena, tingacita makora kuŵikapo mtima kuti ticitenge vinandi pa Nyengo Yakusopera ya Mbumba panji pa sambiro la taŵene kuti tisambire vinjeru vinandi vyauzimu ivyo Yehova wakupeleka kuti watisunge kuti tizakaponoskeke.—Zinth. 2:1-5.
CIKHWIMISKO CIKUTOVWIRA KUTI TIZIZIPIZGENGE
14. Kasi Malemba ghakulongora wuli kuti Yehova wakumanya umo tikujipulikira?
14 Davide wakasangana na masuzgo ghanandi pa umoyo wake. (1 Sam. 30:3-6) Mazgu agho wakalemba ghakulongora kuti Yehova wakamanyanga umo Davide wakajipulikiranga. (Ŵazgani Salmo 34:18; 56:8.) Mazuŵa ghano napo, Ciuta wakumanya umo tikujipulikira. Para ‘tapyoka mu mtima’ panji ‘mzimu withu wateketeka,’ Ciuta wakusendelera pafupi na ise. Fundo iyi yingatipembuzga nga umo vikaŵira kwa Davide, uyo wakimba kuti: “Tindikondwe na kusekelera cifukwa ca cinthemwa cinu, cifukwa mwaviwona visuzgo vyane na maunonono ghane.” (Sal. 31:7) Kweni Yehova wakucita vinandi padera pa kumanya masuzgo ghithu. Wakutovwira kuti tizizipizge mwa kutipembuzga na kutikhwimiska. Nthowa yimoza iyo wakutipembuzgira na kutikhwimiskira nkhwizira mu maungano.
15. Kasi tikusambirapo vici pa ivyo vikacitikira Asafu?
15 Ivyo vikacitikira wamasalimo Asafu vikutovwira kumanya candulo ca kuwungana. Cifukwa ca kughanaghana comene vinthu vyambura kukhozga, Asafu wakamba kukayikira usange nchacandulo kuteŵetera Ciuta. Asafu wakakhuŵara comene. Wakalongosora maghanoghano ghake, wakati: “Mzimu wane ukaŵa na mbembe, para nkhalasika mu mtima.” Pa cifukwa ici, wakakhala pacoko kuleka kuteŵetera Yehova. Nchivici ico cikawovwira Asafu kuti wambe kuwona vinthu mwakwenelera? Iyo wakati: “Nkhanjira mu malo ghakupatulika gha Ciuta.” Wati waŵa pamoza na ŵateŵeti ŵanyake ŵa Yehova, Asafu wakamba kuwona vinthu mu nthowa yakwenelera. Wakamanya kuti vinthu ivyo ŵanthu ŵaheni ŵakaŵa navyo vikaŵa vyakanyengo kacoko waka, kweniso kuti Yehova wanyoloskenge vinthu kwambura kutondeka. (Sal. 73:2, 13-22) Vikuyana waka na ise lero. Vinthu vyambura urunji ivyo tikuwona mu caru ca Satana vingatiwezgera nyuma. Kweni para tikuwungana pamoza na ŵabali ŵithu ŵauzimu tikukhozgeka ndiposo tikovwirika kuti tilutilire kuteŵetera Yehova na cimwemwe.
16. Kasi tikusambirako vici ku ivyo Hana wakacita?
16 Wuli usange cinthu cinyake mu mpingo cikumutondeskani kuti muwunganenge? Nyengo zinyake muli kuleka uteŵeti unyake mu mpingo ndipo soni zikumukorani, panji muli kukhuŵazgana na mubali panji mudumbu munyake. Para ni nthena, ivyo Hana wakacita vingamovwirani. (Ŵazgani 1 Samuel 1:4-8.) Kumbukani kuti wakakwenyeleranga comene na ivyo wakacitanga muwolimwa munyake, Penina. Suzgo ili likakuranga comene para mbumba iyi yikuluta kukapeleka sembe kwa Yehova ku Shilo cilimika cilicose. Hana wakakwenyeleranga comene mwakuti ‘wakaliranga masozi na kuleka kurya.’ Kweni wakazomerezga yayi kuti suzgo ili limutondeske kuwungana kuti wasope Yehova. Yehova wakawona kuti wakaŵa wakugomezgeka ndipo wakamutumbika.—1 Sam. 1:11, 20.
17, 18. (a) Kasi tikupokera wuli cikhwimisko pa maungano gha mpingo? (b) Kasi tikujipulika wuli cifukwa cakuti Yehova wakutipwelelera kuti tizakaponoskeke?
17 Mazuŵa ghano, Ŵakhristu ŵakwenera kuyezga Hana. Ŵakwenera kuwungana mwakugomezgeka. Nga umo tose tikumanyira, maungano ghakutikhozga comene. (Heb. 10:24, 25) Tikupembuzgika para tikucezga na Ŵakhristu ŵanyithu pa maungano. Fundo yiwemi iyo yayowoyeka mu nkhani panji mu zgoro la Mkhristu munyithu yingakhwaska mtima withu. Mu nchezgo izo tikuŵa nazo pambere ungano undambe na para wamara, Mkhristu munyithu wangatitegherezga mwaciwuravi, na kuyowoya mazgu ghakupembuzga. (Zinth. 15:23; 17:17) Para tikuyimbira Yehova sumu tikukondwa. Comene para ‘takweŵeka mu mtima’ ndipo tikukhumbikwira cikhwimisko ico tikupokera pa maungano apo Yehova wakutipa “visangurusko” vyake na kutovwira kuti tilutilire kuŵa ŵakugomezgeka.—Sal. 94:18, 19.
18 Pakuti Ciuta withu wakutipwelelera, tikujipulika nga umo wakajipulikira wamasalimo Asafu, uyo wakimbira Yehova kuti: “Mukundikora ku woko la malyero. Timundilongozge na vipango vinu.” (Sal. 73:23, 24) Tikuwonga comene Yehova cifukwa cakuti wakutisunga kuti tiponoskeke.
[Mafumbo]
[Cithuzithuzi pa peji 28]
Namwe muli kuguzika na Yehova
[Cithuzithuzi pa peji 30]
Tikusungika para tikulondezga ulongozgi wa Ciuta
[Cithuzithuzi pa peji 31]
Para tikukhwimiskika tikovwirika kuti tizizipizge
