Ma Ayuwegdad Jehovah Ya Nge Yog e Yafas Ngodad

“Gimed e piin ni ke thapegmed Got ngak [“ayuwegmed Got,” NW] u daken gelngin ngu daken e michan’ romed ngak, ma gimed be sonnag e gin ni ngam thapgad ngay, ni kan ngongliy rogon kan ta’ ni ngan dag ko ngiyal’ ni nge mus e rran riy.”​—1 PET. 1:4, 5.

UW ROGON NI GA RA FULWEG?

Uw rogon ni ke pow’iydad Jehovah ko bin riyul’ e liyor?

Uw rogon ni ngad paged Jehovah ni nge pow’iydad u daken e pi fonow rok?

Uw rogon ni ma pi’ Jehovah e athamgil nga lanin’dad?

1, 2. (a) Mang fan nib pagan’dad nra ayuwegdad Got ngaud pared ni gad ba yul’yul’? (b) Uw feni fel’ rogon ni manangdad Jehovah?

 “EN NRA athamgil nge mada’ ko tomur e ra yog e yafos ngak.” (Matt. 24:13) Pi thin rok Jesus ney e be tamilangnag nthingar da pared ni gad ba yul’yul’ nge mada’ ko tomur ya nge yog nda mageygad ni gad ba fas u nap’an nra pufthinnag Got e re fayleng rok Satan ney nib kireb. Machane re n’ey e gathi be yip’ fan ni be lemnag Jehovah nrayog ni ngad athamgilgad ni faanra pagan’dad ko gonop rodad nge gelngidad. Be micheg e Bible ngodad ni gaar: “Got e dabi thiliyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabiyog romed ni ngam taleged gimed riy.” (1 Kor. 10:13) Mang e be yip’ fan e pi thin ney?

² Ma guy Jehovah rogon ndabi yib ngodad e pi n’en ni ma waliy e girdi’ nge denen nge pag rogon ndabkiyog ni ngad taleged gadad riy. Rayog ni nge rin’ e re n’ey ni bochan e manang urngin ban’en u murung’agdad, nib muun ngay e pi magawon ni gad ma mada’nag, nge rarogodad, nge pi n’en nrayog ni ngad athamgilyed. Gur, aram feni fel’ rogon ni manangdad Got? Arrogon. Thin nu Bible e be dag ni gad gubin nri manangdad Jehovah nib fel’ rogon. Manang e pi n’en ni gad ma rin’ ni gubin e rran nge pi n’en ni ke mecham ngodad ni ngaud rin’ed. Ku manang e pi n’en ni bay u lanin’dad nge gum’ircha’dad.​—Mu beeg e Psalm 139:1-6.

3, 4. (a) Uw rogon ni be m’ug ko n’en ni buch rok David nri ma lemnagdad Jehovah? (b) Uw rogon ni be m’ug nri ma lemnagdad Jehovah e ngiyal’ ney?

³ Riyul’ ni aram rogon ni ma lemnag Got e girdi’, fa? Ireray e n’en ni lemnag David me gaar ngak Jehovah: “Faan gu ra yaliy lan e lang ni gur e kam sunumiy, nge pul nge pi t’uf nu lan e lang, ni gur e mu ta’rad nga tagil’rad, me lungug u wun’ug, Girdi’ e mang ni ngam lemnag?” (Ps. 8: 3, 4) Dabisiy ni fith David e re deer ney ni bochan e pi n’en ni i buch rok. Nap’an ni kab pagel David, ni ir e th’abi bitir u fithik’ fapi pagel ni fak Jesse, mi ri “adag” Jehovah daken ma aram me “tay ni ir e nge mang pilung rok” piyu Israel. (1 Sam. 13:14; 2 Sam. 7:8) Yugu aram rogon ni kab pagel David ma manang e En Tasunmiy e pi n’en ni ma lemnag. Am lemnag rogon laniyan’ u nap’an ni nang e re n’em!

⁴ Riyul’ ni gad ra gin ni faan gad ra nang rogon ni ma lemnagdad Jehovah e ngiyal’ ney. Be kunuy e girdi’ “ko pi nam” ngak, ni piin ni yad bod e “machaf,” ya nge yog nra manged e pi tapigpig rok. (Hag. 2:7, BT) Faanra ngari tamilang u wan’dad rogon ni ma ayuwegdad Jehovah ni ngaud pared ni gad ba yul’yul’ ngak, ma ngad lemnaged rogon ni ma pow’iy e girdi’ ko bin riyul’ e liyor.

GOT E MA POW’IYDAD

5. Uw rogon ni ma pow’iy Jehovah e girdi’ ngak Fak? Mu weliy ban’en ni buch.

⁵ I gaar Jesus: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog.” (John 6:44) Pi thin ney e be yip’ fan ni faanra ngad manged reb i gachalpen Kristus, ma thingari ayuwegdad Got. Uw rogon ni ma pow’iy Jehovah e piin ni yad bod e saf ngak Fak? Ma rin’ u daken fare thin nib fel’ ni yibe machibnag nge gelngin nib thothup. Bod nnap’an ni immoy Paul nge piin ni ur machibgad u taabang u Filippi, mar mada’naged be’ nib pin ni Lydia fithingan, ma aram mar weliyed fare thin nib fel’ ngak. Be gaar e Bible: “Me tamilangnag Somol laniyan’ ni nge uthum tel ko n’en ni be weliy Paul.” Arrogon, i pi’ Got gelngin nib thothup ni nge ayuweg ni nge nang fan me mich u wan’ e n’en ni yibe machibnag ngak. Ma angin ni yib riy e, yad gubin chon e tabinaw rok nni taufenagrad.​—Acts 16:13-15.

6. Uw rogon ni ke pow’iydad Got ko bin riyul’ e liyor?

⁶ Gur, kemus ni goo Lydia e ke buch e re n’ey rok? Danga’. Faanra gur reb e Kristiano, ma Got e ku ir e ke pow’iyem ko bin riyul’ e liyor. Ke guy e Chitamangidad nu tharmiy ban’en nib fel’ u gum’irchaem ni bod e n’en ni guy u gum’irchaen Lydia. Nap’an nim tabab ni ngam motoyil ko fare thin nib fel’, me ayuwegem Jehovah ni ngam nang fan u daken gelngin nib thothup. (1 Kor. 2:11, 12) Ma nap’an nim athamgil ni ngam fol ko pi n’en ni kam fil, ma aram me tow’athnagem ko athamgil ni ga be tay. Ma nap’an nim ognag e yafas rom ngak ma ri felfelan’. Bin riyul’ riy, e ka nap’an nim tabab ko pigpig ngak Jehovah, ma ke ayuwegem ke mada’ ko chiney.

7. Uw rogon ni kad nanged nra ayuwegdad Got ngad pared ni gad ba yul’yul’ ngak?

⁷ Ke ayuwegdad Jehovah ni ngad pigpiggad ngak, ere rayog ni nge pagan’dad ni ku ra ayuwegdad ni ngad pared ni gad ba yul’yul’ ngak. Manang ni gathi gelngidad e da maruwelgad ngay ma gad yib ko tin riyul’, ere dabiyog ni ngad pigpiggad ngak ndabi ayuwegdad. Nap’an ni yol apostal Peter ngak e pi Kristiano ni kan dugliyrad, me yog ni gaar: “Gimed e piin ni ke thapegmed Got ngak [“ayuwegmed Got,” NW] u daken gelngin ngu daken e michan’ romed ngak, ma gimed be sonnag e gin ni ngam thapgad ngay, ni kan ngongliy rogon kan ta’ ni ngan dag ko ngiyal’ ni nge mus e rran riy.” (1 Pet. 1:4, 5) Pi thin nem e rayog ni nge fil urngin e Kristiano ban’en riy mab ga’ fan ngodad e ngiyal’ ney. Mang fan? Ya gad  gubin nib t’uf ni nge ayuwegdad Got ngaud pared ni gad ba yul’yul’ ngak.

RAYOG NI NGE AYUWEGDAD GOT NDAB DA RIN’ED BAN’EN NIB KIREB

8. Mang fan nib mom ni ngad rin’ed reb e denen nib ubchiya’?

⁸ Bochan ni boor e magawon ni ma yib ngodad ma dawor da flontgad, ma rayog ni ngad wargad ko tirok Got ban’en ma gad rin’ ban’en nib kireb ndad nanged. (Mu beeg e Galatia 6:1.) Ireray e n’en ni buch rok David.

9, 10. Uw rogon ni taleg Jehovah David ni nge dabi rin’ ban’en nib kireb? Mang e Ma rin’ ni fan ngodad e ngiyal’ ney?

⁹ Nap’an ni i guy Saul ni Pilung rogon ni nge thang e fan rok David, me athamgil David ni nge t’ar laniyan’ ma de guy rogon ni nge fulweg taban ngak Saul ni yugu aram rogon ni immoy ba ngiyal’ ni mab e kanawo’ ngak nrayog ni nge li’ riy. (1 Sam. 24:2-7) Machane, de n’uw nap’an nga tomuren ma daki yog rok David ni nge t’ar laniyan’. Nap’an ni t’uf e ggan nge ran rorad fapi pumoon ni yad be un ngak, ma aram me yan i ning e ayuw ngak Nabal. Machane, de ayuweg Nabal me yog e thin nib kireb ngak. Ma aram mi ri damumuw David me dugliy ni nge fulweg taban e n’en ni ke rin’ Nabal nge chon e tabinaw rok. Ngiyal’ nem e de lemnag ni faanra li’ boch e girdi’ ndariy ban’en ni kar bucheged ma aram e ke denen nib togopuluw ngak Got. Fin nap’an ni yan Abigail i non ngak e aram e ngiyal’ ni tal ndaki guy rogon ni nge yan i li’ Nabal. Ke nang David ni ke fanay Jehovah Abigail ni nge ayuweg, ma aram me yog ngak ni gaar: “Ngaun pining e sorok ngak Somol, ni Got rok yu Israel, ni ke piem e daba’ ni ngad mada’gow! Ke magar Got nga fenam gonop nge n’en ni kam ngongliy e daba’ ni nge talegeg ko tin kireb ni aram e mathang pogofan nge kireb ni kug lemnag ni nggu rin’.”​—1 Sam. 25:9-13, 21, 22, 32, 33, BT.

¹⁰ Mang e gad ra fil ko re n’ey? I fanay Jehovah Abigail ni nge taleg David ni nge dabi rin’ ban’en nib kireb. Ku aram e n’en ni ma rin’ e ngiyal’ ney. Riyul’ nsusun e ndab da lemnaged nra pi’ Got be’ ni nge talegdad u nap’an ni gad be yan ni ngad rin’ed ban’en nib kireb. Maku dabiyog ni ngad nanged e n’en nra rin’ Got ko pi n’en ni ma buch ara pi n’en nra pag ni nge buch ni fan e nge lebguy e tin nib m’agan’ ngay. (Ekl. 11:5) Machane, rayog ni nge pagan’dad ni gubin ngiyal’ ma manang Jehovah rarogodad ma ra ayuwegdad ni ngad pared ni gad ba yul’yul’ ngak. Ke micheg ngodad ni gaar: “Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.” (Ps. 32:8) Uw rogon ni ma yog Jehovah e tin ni ngad rin’ed? Ma uw rogon nrayog ni nge yib angin ngodad? Ma mang fan nrayog ni nge pagan’dad ni be pow’iy Jehovah e girdi’ rok e ngiyal’ ney? Mu tay fanam i yan u rogon ni kan weliy e fulweg ko pi deer ney ko fare babyor ni Revelation.

MA AYUWEGDAD E FONOW

11. Uw feni fel’ rogon ni manang Jehovah e pi n’en ni be buch u lan e ulung e ngiyal’ ney?

¹¹ Fapi thin ni bay ko Revelation ko guruy ni 2 nge 3 e be weliy murung’agen Jesus Kristus ni yan i yaliy fa medlip i ulung ni bay u Asia Minor. Kun weliy riy ni gathi kemus ni tin nib gagiyel u murung’agen e pi ulung nem e i guy Kristus, ya kub muun ngay e tin ni gathi rib gagiyel. Immoy yu ngiyal’ ni weliy murung’agen  boch ban’en ni i buch nge murung’agen boch e girdi’. Ki weliy murung’agen boch ban’en nib fel’ ni i rin’ e re ulung nem nge boch ban’en nib t’uf ni ngan fonownagrad riy. Mang rogon e pi thin ney ngodad? Fa medlip i ulung e be yip’ fan e pi Kristiano ni kan dugliyrad u tomuren e duw ni 1914. Ma yugu aram rogon ni fapi fonow ni pi’ Kristus e fan ngak e piin ni kan dugliyrad, maku rayog ni nge yib angin ko pi ulung rok Got u fayleng e ngiyal’ ney. Ere rayog ni nga dogned ni be pow’iy Got e girdi’ rok u daken Fak e ngiyal’ ney. Uw rogon ni nge yib angin e re n’ey ngodad?

12. Uw rogon ni ngad paged Jehovah ni nge pow’iydad?

¹² Fol Bible ni gad ma tay ni goo gadad e aram reb e kanawo’ ni gad ma pag Jehovah ni nge pow’iydad riy. Ma fonownagdad Jehovah u daken e pi babyor ni ma ngongliy fare tapigpig nib yul’yul’ ma ba gonop. (Matt. 24:45) Machane, faanra nge yib angin e pi n’ey ngodad, ma thingar da ted e tayim ni ngad filed ma gad fol riy. Fol Bible ni gad ma tay ni goo gadad e aram reb e kanawo’ nrayog ni nge ayuwegdad Jehovah ‘ndab [da] mulgad.’ (Jude 24) Ka am fil ban’en ko pi babyor rodad mag lemnag ni kan yoloy ni fan ngom? Faanra aram rogon, ma thingar mu lemnag ni aram reb e kanawo’ ni be yal’uwegem Jehovah riy. Rayog ni nge fanay Jehovah gelngin nib thothup ni nge ayuwegem ngam nang boch ban’en ko ngongol rom ara rarogom nib t’uf ni ngam thilyeg, ni bod rogon be’ ni be totoy pa’ nga daken pom ya ngam sap ngak. Faan gad ra fol u rogon ni be pow’iydad gelngin Got nib thothup, ma aram e gad be pag Jehovah ni nge pow’iydad. (Mu beeg e Psalm 139:23, 24.) Ere, ba t’uf ni ngad fal’eged i yaliy rogon e fol Bible ni gad ma tay.

13. Mang fan nib fel’ ni ngaud fal’eged i yaliy rogon e fol Bible ni gad ma tay?

¹³ Faanra pag urngin e tayim ni gad ma tay ni fan ko pi n’en ni yima chuweg e chalban ngay, ma rayog ni nge lich e tayim rodad ni fan ko fol Bible ni gad ma tay ni goo gadad. Reb e walag ni pumoon e yog ni gaar: “Rib mom ni nge tal be’ i fil e Bible ni goo ir. Ke yoor ban’en ni ma chuweg e girdi’ e chalban rorad ngay e ngiyal’ ney, ni ke thil ko kafram, maku de tolang puluwon ni bod rogon kafram. Bay ko TV, nge computer, nge pi cell phone ni yima fanay. Gubin yang ni bay riy.” Faanra dab da kol ayuwgad ma rayog ni nge lich e tayim ni gad be tay ni fan ko fol Bible ni goo gadad me munmun ma dab ku ud filed e Bible rodad. (Efe. 5:15-17) Ere ba fel’ ni nge bagadad me fith ir ni nge gaar: ‘Gu ma tay e tayim ni gubin ngiyal’ ni ngaug fil e Thin rok Got nib fel’ rogon? Ara fin ngiyal’ ni bay e welthin rog ara ban’en ni nggu rin’ u nap’an e muulung e gu ma fil e Bible rog riy?’ Faanra aram rogon, ma rayog ni ngad guyed rogon ni ngad fal’eged i fil e thin rok Jehovah ma gad gay e gonop rok u lan e Bible u nap’an ni gad be fil e Bible ni goo gadad ara nap’an e fol Bible ni tabinaw.​—Prov. 2:1-5.

YIRA PI’ E ATHAMGIL NGA LANIN’DAD MA ARAM E RAYOG NI NGAD ATHAMGILGAD

14. Uw rogon ni be m’ug u Bible ni ma lemnag Jehovah rarogon lanin’dad?

¹⁴ Boor ban’en ni i buch rok David ni i kireban’ riy maku i k’aring e gafgow ngak. (1 Sam. 30:3-6) Fapi thin nni thagthagnag nga laniyan’ nge yoloy e be tamilangnag ni manang Jehovah  rarogon laniyan’. (Mu beeg e Psalm 34:18; 56:8.) Manang Got lanin’dad. Nap’an nra ‘mulan’dad’ ma ma chugur ngodad. Re n’ey e rayog ni nge fal’eg lanin’dad ni bod rogon David ni tang ni gaar: “Bay gu uf mug felfelan’ ni bochan e t’ufeg rom ni dabi mus. Ga be guy e gafgow rog; ga manang e oloboch rog.” (Ps. 31:7) Machane gathi kemus ni manang Jehovah e pi gafgow ni gad ma yan u fithik’, ya ku ma ayuwegdad ni ngad athamgilyed ni aram e ma fal’eg lanin’dad me pi’ e athamgil nga lanin’dad. Pi muulung ni gad ma un ngay e aram reb e kanawo’ ni ma rin’ e re n’ey riy.

15. Mang e gad ra fil ko n’en ni buch rok Asaf?

¹⁵ N’en ni buch rok Asaf e be ayuwegdad ni ngad nanged fan nib fel’ ni ngaud uned ko pi muulung ni gad ma tay. Bochan ni i par Asaf ni be lemnag e kireb ni be rin’ e girdi’ u tooben, ma aram me mulan’ me lemnag ndariy fan e pigpig ni be tay ngak Got. Baaray rogon ni weliy laniyan’ ni gaar: “Nap’an ni kireb lanin’ug, me kireban’ug ko tin ni kan rin’ ngog.” I chugur ni nge tal ko pigpig ngak Jehovah ni bochan e re n’ey. Ere, mang e ayuweg Asaf ni nge yal’uweg e lem rok? I yog ni gaar: ‘Gu wan nga lan e tempel rok Got.’ Nap’an ni yan ko gin ni bay e pi tapigpig rok Jehovah riy, ma aram e ngiyal’ ni yog ni nge yal’uweg e lem rok. Ke nang ni fel’ rogon ko piin ni yad ba kireb e dabi n’uw nap’an me m’ay, ma ra guy Jehovah rogon ni nge yal’uweg gubin ban’en. (Ps. 73:2, 13-22) Ku er rogodad e ngiyal’ ney nrayog ni nge mulan’dad ni bochan e boor ban’en nib kireb ni gad be guy ni be buch u lan e re fayleng rok Satan ney. Machane, muulung ni gad ma tay pi walagdad u taabang e ma pi’ gelngidad me ayuwegdad ni ngad ululgad ko pigpig ngak Jehovah ni gad ba felfelan’.

16. Uw rogon nra yib angin ngodad e n’en ni rin’ Hannah?

¹⁶ Uw rogon ni faanra bay ban’en ni ke buch u lan e ulung ni be mo’maw’nag ngom ni ngam un ko muulung? Sana kan chuweg reb e maruwel rom u lan e ulung ma sana kam tamra’ ni bochan, ara ke sum e maluagthin u thilmew reb e walag. Faanra aray rogon, ma sana ra yib angin ngom e n’en ni rin’ Hannah. (Mu beeg e 1 Samuel 1:4-8.) Peninnah nreb i leengin e pumoon rok Hannah e i rin’ boch ban’en ni i kirebnag laniyan’. Gubin e duw nri ma kireban’ nib gel u nap’an ni yad ra yan chon e tabinaw rok nga Shiloh ni ngar pied e maligach ngak Jehovah. Aram fan nri ma “yor ma dakir kay ban’en.” Yugu aram rogon ma de pag e re n’ey ni nge taleg ndab ki yan nga tagil’ e liyor rok Jehovah. I guy Jehovah e yul’yul’ ni i tay me tow’athnag ni bochan.​—1 Sam. 1:11, 20.

17, 18. (a) Mang boch e kanawo’ ni yima pi’ e athamgil nga lanin’dad u nap’an e muulung rodad? (b) Uw rogon u wan’um e ayuw ni ma pi’ Jehovah ngodad ya nge yog e yafas ngodad?

¹⁷ Piin Kristiano e ngiyal’ ney e thingar ra folwokgad rok Hannah ni aram e ngaur uned ko muulung ni gubin ngiyal’. Pi muulung rodad e ma pi’ e athamgil nga lanin’dad. (Heb. 10:24, 25) Gad ra chag ngak pi walagdad u nap’an e muulung ma rayog ni nge fel’ lanin’dad. Nap’an ni yira yog ban’en u nap’an reb e welthin ara reb e fulweg ni ke pi’ reb e walag, ma rayog ni nge pi’ e athamgil nga lanin’dad. Maku rayog ni nge motoyil reb e walag u nap’an ni gad be weliy e magawon rodad ngak ara yog boch ban’en nra fal’eg lanin’dad. (Prov. 15:23; 17:17) Ma nap’an ni gad ra yon’ e pi tang rodad ni fan ngak Jehovah ma rayog ni ngad felfelan’gad. Rib t’uf ni ngan pi’ e athamgil nga lanin’dad u nap’an e muulung, nib ga’ ni faanra bay ban’en ni be magawonnag lanin’dad. Aram e ngiyal’ ni ma “fal’eg” Jehovah lanin’dad ya nge yog nda athamgilgad ngaud pared ni gad ba yul’yul’ ngak.​—Ps. 94:18, 19.

¹⁸ Bochan ni gad manang ni ma ayuwegdad Jehovah, ma aram fan nrayog ni ngad lemgad ni bod Asaf ni i yoloy boch e tang kakrom ni faani tangnag Jehovah ni gaar: “Ga be kol paag. Ga be pow’iyeg ko fonow ni ga be tay ngog.” (Ps. 73:23, 24) Ri gad ba felfelan’ ni be ayuwegdad Jehovah ya nge yog e yafas ngodad!

[Study Questions]

[Picture on page 29]

Jehovah e ku ir e ke pow’iyem ko bin riyul’ e liyor

[Picture on page 30]

Faan gad ra fol ko pi fonow rok Got ma ra ayuwegdad

[Picture on page 31]

Yira pi’ e athamgil nga lanin’dad ma aram e rayog ni ngad athamgilgad