Jéeobaeʼ ku kanáantkoʼon utiaʼal k-salvartikba
Jéeobaeʼ ku kanáantkoʼon utiaʼal k-salvartikba
«Teʼex yaan a woksaj óoleʼex tiʼ Dioseʼ, [...] ku kanáantkeʼex tiʼ kʼaas yéetel u páajtalil utiaʼal ka yanakteʼex le toksajil u nuʼuktmaj utiaʼal u tsʼáa kʼaj óoltbil tu tsʼook kʼii[noʼ].» (1 PED. 1:4, 5)
¿BAʼAX JEʼEL K-NÚUKIKEʼ?
¿Bix úuchik u natsʼkoʼon Jéeoba tiʼ u jaajil religión?
¿Bix jeʼel k-chaʼik u nuʼuktikoʼon le tsolnuʼuk ku tsʼáaik Jéeobaoʼ?
¿Bix u líiʼsaʼal k-óol tumen Jéeoba?
1, 2. 1) ¿Bix k-ojéeltik yaan u yáantkoʼon Dios utiaʼal u chúukpajal k-óol? 2) ¿Jach wa tu jaajil u kʼaj óoloʼon Jéeoba?
JUNTÉENJEAKILEʼ Jesuseʼ tu yaʼalaj: «Le máax ku muʼukʼaʼantal u yóol tak tu xuuleʼ, bíin toʼokok» (Mat. 24:13). Lelaʼ ku yeʼesikeʼ utiaʼal k-salvartikba tiʼ le xuʼulsajil ken u taas u Taata tiʼ u kʼasaʼan yóokʼol kaab Satanaseʼ, unaj u chúukpajal k-óol tak tu xuul. Baʼaleʼ lelaʼ maʼ u kʼáat u yaʼalal wa Jéeobaeʼ yaan u páaʼtik ka chúukpajak k-óol chéen t-juunaliʼ. Le Bibliaoʼ ku yaʼalik: «Teʼexeʼ ku páajtal a alab óoltikeʼex Jajal Dios, tumen bíin u tsʼáa xan bix jeʼel u páajtal a jóokʼleʼexiʼ, utiaʼal ka páatak a muʼyajtikeʼex. Baʼaleʼ le ken taalak le túuntaj óoleʼ Jajal Dios túuneʼ bíin u tsʼáa xan bix jeʼel u páajtal a jóokʼleʼexiʼ» (1 Cor. 10:13). ¿Baʼax u kʼáat u yaʼal le tʼaanoʼobaʼ?
2 Jéeobaeʼ kʼaʼabéet u yojéeltik baʼax talamiloʼob k-aktáantik, bix k-modos yéetel tak bukaʼaj baʼal jeʼel u páajtal k-aktáantikeʼ, tumen chéen bey jeʼel u páajtal u yojéeltik baʼax maʼ tu páajtal k-aktáantikoʼ. Baʼaleʼ ¿jach wa tu jaajil u kʼaj óoloʼon? Jach u kʼaj óoloʼon. Le Bibliaoʼ ku yeʼesikeʼ u kʼaj óol jach bix cada juntúul. Tuláakal u yojel tiʼ toʼon bey xan baʼaxoʼob k-beetik. Letiʼeʼ ku páajtal u xokik k-tuukul yéetel ku páajtal u yojéeltik baʼaxoʼob k-kʼáat k-beete (xokaʼak Salmo 139:1-6).
3, 4. 1) ¿Bix u yeʼesik le baʼax úuch tiʼ David de ke Jéeobaeʼ ku beetik u cuentail cada juntúul máak? 2) ¿Baʼax ku beetik Jéeoba teʼ kʼiinoʼobaʼ?
3 ¿Máasaʼ yaan kʼiineʼ jeʼel u tuklik máak maʼ yaabiltaʼan tumen Dioseʼ? Lelaʼ bey úuchik u tuklik xan David: «Le ken in líiʼs in wich utiaʼal in paktik le kaʼan ta beetoʼ, bey xan le uj [wa luna] yéetel le eekʼoʼob ta tsʼáaj teʼeloʼ, kin kʼuchul in tukult: ¿Baʼax le máak utiaʼal ka a kʼaʼajsoʼ?» (Sal. 8:3, 4). Maʼ xaaneʼ letiʼeʼ tu beetaj le kʼáatchiʼ yoʼolal le baʼaxoʼob uchaʼantiʼ ichil u kuxtaloʼ. Letiʼ u maas chichnil ichil u paalaloʼob Jesé, kex beyoʼ ilaʼab tumen Jéeoba bey «juntúul xiib uts u yanil», ka tu luʼsaj «ichil u múuchʼul le tamanoʼob» «utiaʼal u tsʼáa nojchil [u] kaajal», Israel (1 Sam. 13:14; 2 Sam. 7:8). ¡Bukaʼaj wal úuchik u kiʼimaktal u yóol David le ka tu tsʼáaj cuenta ku yilaʼal baʼax ku beetik juntúul chan j-kanan taman tumen le Máax beetmil tuláakal baʼaloʼ!
4 Toʼoneʼ bey xan k-uʼuyikba ken k-il bix u yeʼesiktoʼon u yaabilaj Jéeobaoʼ. Tiʼ letiʼeʼ ku meyaj le u jaajil religión utiaʼal u muchʼik «u ayikʼaliloʼob» tuláakal kaajoʼob yéetel táan u yáantkoʼob utiaʼal ka chúukpajak u yóoloʼob u meyajte (Ageo 2:7). Utiaʼal k-naʼatik bix u yáantkoʼon Jéeoba utiaʼal u chúukpajal k-óoleʼ, táanileʼ koʼoneʼex ilik bix u natsʼik máak tiʼ u jaajiloʼ.
DIOSEʼ TU NATSʼOʼON TU YIKNAL U HIJO
5. ¿Bix u natsʼik Jéeoba le máakoʼob tu yiknal u Hijooʼ? Tsol yéetel junpʼéel kettʼaan.
5 Jesuseʼ tu yaʼalaj: «Mix máak ku páajtal u taal tiʼ teen wa maʼ tu taasaʼal tumen le Taata máax túuxtenoʼ» (Juan 6:44). Lelaʼ ku yeʼesiktoʼoneʼ kʼaʼabéetchaj u yáantkoʼon Dios utiaʼal u béeytal k-tsaypachtik Cristo. Baʼaleʼ ¿bix túun u natsʼik Jéeoba tu yiknal u Hijo le máaxoʼob kabal u yóoloʼob bey tamanoʼoboʼ? Yéetel le kʼaʼaytajoʼ bey xan yéetel u yáantaj le kiliʼich muukʼoʼ. Jeʼex le ka bin Pablo yéetel uláakʼ misioneroʼob tu kaajil Filiposeʼ, tu kʼaj óoltoʼob juntúul koʼolel ku kʼaabaʼtik Lidiaeʼ ka tu tsikbaltoʼob le maʼalob péektsilil tiʼoʼ. Le Bibliaoʼ ku yaʼalikeʼ: «Jeʼeb túun u puksiʼikʼal tumen Yuumtsil utiaʼal ka u yoksaj óolt baʼax tu yaʼalaj Pablo». Jeʼex túun k-ilkoʼ, Dioseʼ tu tsʼáaj u kiliʼich muukʼ tiʼ utiaʼal u naʼatik le baʼax tsikbaltaʼabtiʼoʼ, le oʼolal okjaʼanaj letiʼ bey xan u láakʼtsiloʼob (Hch. 16:13-15).
6. ¿Bix úuchik u natsʼkoʼon Dios ichil u jaajil religión?
6 ¿Chéen wa Lidia áantaʼab beyoʼ? Maʼatech. Wa tsʼoʼok k-kʼubik k-kuxtal tiʼ Jéeobaeʼ, u kʼáat u yaʼaleʼ tsʼoʼok u natsʼkoʼon tu yiknal, jeʼex úuchik u natsʼik Lidiaoʼ. Jeʼex úuchik u yilik Jéeoba le jatsʼuts modos yaan tu puksiʼikʼal Lidiaoʼ, bey xan u yilik le yaantoʼonoʼ. Le ka káaj k-uʼuyik le maʼalob péektsiloʼ, Jéeobaeʼ tu yáantoʼon yéetel u kiliʼich muukʼ utiaʼal k-naʼatik (1 Cor. 2:11, 12). Jeʼex úuchik u bin k-tsʼáaik ichil k-kuxtal le baʼax k-kanik yéetel k-beetik le baʼax ku yaʼalikoʼ, bey úuchik u bin k-kʼamik le utsiloʼob ku tsʼáaikoʼ. Yéetel le ka t-kʼubaj k-kuxtal tiʼoʼ jach kiʼimakchaj u yóol. U jaajileʼ desde le ka joʼopʼ k-bin tu bejil le kuxtaloʼ, letiʼeʼ mix juntéen xuʼuluk u yáantik cada juntúul tiʼ toʼon.
7. ¿Bix k-ojéeltik Jéeobaeʼ yaan u yáantkoʼon utiaʼal u chúukpajal k-óol k-meyajte?
7 Desde ka káaj k-xíimbal yéetel Jéeobaeʼ, letiʼeʼ maʼ u jáalkʼabtoʼoniʼ. U yojel kʼaʼabéettoʼon u yáantaj, jeʼex le úuchik k-okol ichil u jaajil religionoʼ, bey xan utiaʼal ka pʼáatkoʼoniʼ. Apóstol Pedroeʼ tu yaʼalaj tiʼ le sukuʼunoʼob yéeyaʼanoʼob utiaʼal u binoʼob kaʼanoʼ: «Teʼex yaan a woksaj óoleʼex tiʼ Jajal Dioseʼ, letiʼeʼ ku kanáantkeʼex tiʼ kʼaas yéetel u páajtalil utiaʼal ka yanakteʼex le toksajil [wa salvación] u nuʼuktmaj utiaʼal u tsʼáa kʼaj óoltbil tu tsʼook kʼiin[oʼ]» (1 Ped. 1:4, 5). Le tʼaanoʼobaʼ ku yáantik tuláakal le máaxoʼob meyajtik Dios teʼ kʼiinoʼobaʼ, le oʼolal jach unaj k-chʼaʼik en cuentail. ¿Baʼaxten? Tumen tuláakloʼon kʼaʼabéettoʼon u yáantaj Dios utiaʼal u chúukpajal k-óol k-meyajte.
DIOSEʼ KU KANÁANTKOʼON UTIAʼAL MAʼ K-BEETIK BAʼAX KʼAAS
8. ¿Baʼaxten maʼ chéen chʼaʼabil u kanáantik máak maʼ u beetik baʼax kʼaasiʼ?
8 Le baʼaxoʼob k-aktáantik sáamsamal yéetel le kʼeban yaan t-wíinkliloʼ jeʼel u beetkoʼob u xuʼulul k-tsʼáaik k-óol k-meyajt Dioseʼ. Tsʼoʼoleʼ jeʼel u túulchʼintkoʼon k-beet baʼax kʼaas jujunpʼíitileʼ (xokaʼak Galaciailoʼob 6:1). Koʼoneʼex ilik bix úuchik tiʼ David beyoʼ.
9, 10. ¿Baʼax tu beetaj Jéeoba utiaʼal maʼ u beetaʼal baʼax kʼaas tumen David, yéetel bix u yáantkoʼon teʼ kʼiinoʼobaʼ?
9 Le ka joʼopʼ u chʼaʼpachtaʼal David tumen rey Sauloʼ, letiʼeʼ tu kanáantaj maʼ u sutik u jeel tiʼ (1 Sam. 24:2-7). Baʼaleʼ maʼ sen úuch tiʼ leloʼ, tu chaʼaj u tsʼáanchaʼataʼal tumen le kʼebanoʼ. Tumen minaʼan baʼal u jaantoʼob yéetel le soldadoʼob ku máanoʼob tu yéeteloʼ, tu kʼáataj áantaj tiʼ juntúul israelita ku kʼaabaʼtik Nabal. Baʼaleʼ letiʼeʼ chéen tu yaʼalaj baʼaloʼob kʼaastak tiʼob, le oʼolal Davideʼ jach pʼuʼujeʼ ka tu tuklaj u bin u kíims tuláakal le máaxoʼob ku meyajoʼob tu yotoch Nabaloʼ. Maʼ tu tuklaj wa ka u beeteʼ, yaan u kʼebantal tu táan Dios, tumen yaan u wekik u kʼiʼikʼel máakoʼob maʼ u beetmoʼob mix baʼal kʼaasiʼ. Chéen tumen bin ilbil tumen Abigail, u yatan Nabaleʼ, maʼ tu beetaj le baʼax u tukultmaj kaʼachoʼ. Davideʼ tu tsʼáaj cuenta Dios túuxt Abigail, le oʼolal tu yaʼalajtiʼ: «Kiʼitʼantbil Yuumtsil u [Dios] Israel tu túuchiʼitaj tiʼ teech a nuptáanten, u kiʼtʼantech xan Yuumtsil tu yoʼolal a maʼalob tuukul, tumen bejlaʼeʼ, tsʼoʼok a wetʼik in wekik kʼiʼikʼ yéetel in beetik pʼis óol tin kʼabil» (1 Sam. 25:9-13, 21, 22, 32, 33).
10 ¿Baʼax ku kaʼansiktoʼon lelaʼ? Jéeobaeʼ tu túuxtaj Abigail u yáant David utiaʼal maʼ u beetik baʼax kʼaas. Bejlaʼa xaneʼ láayliʼ ku meyajtiʼ le wíinikoʼob utiaʼal u yáantkoʼonoʼ. Baʼaleʼ maʼ unaj k-páaʼtik wa tuláakal súutukil yaan u túuxtik juntúul máax áantkoʼon utiaʼal maʼ k-beetik baʼax kʼaasiʼ. Mix xan unaj k-tuklik wa k-ojel baʼax ken u beet tiʼ tuláakal súutukiliʼ wa baʼax ken u chaʼa u yúuchul utiaʼal u béeytal le baʼax u tukultmoʼ (Ecl. 11:5). Baʼaleʼ k-ojel Jéeobaeʼ u yojel baʼax k-aktáantik tuláakal súutukil yéetel yaan u yáantoʼon utiaʼal u chúukpajal k-óol k-meyajte. Letiʼeʼ ku yaʼaliktoʼon: «In wichoʼobeʼ táan u paktikechoʼob [utiaʼal in kanáantkech]. Bíin in tsʼáatech kaʼanbesajiloʼob; bíin in tsʼáatech tsolxikinoʼob; bíin in weʼestech le bej unaj a biskoʼ» (Sal. 32:8). ¿Bix u tsoʼololtoʼon u nuʼuk tumen Jéeoba? ¿Bix jeʼel k-jóoʼsik utsil tiʼ le tsolnuʼukoʼ? ¿Yéetel baʼaxten jeʼel u páajtal k-creertik Jéeobaeʼ jach tu jaajil táan u nuʼuktik u kaajal teʼ kʼiinoʼobaʼ? Koʼoneʼex ilik bix u núukaʼal le kʼáatchiʼob tu libroil Apocalipsisoʼ.
DIOSEʼ KU TSOLIKTOʼON U NUʼUK UTIAʼAL U KANÁANTKOʼON
11. ¿Bix k-ojéeltik Jéeobaeʼ ku yilik le baʼax ku yúuchul teʼ múuchʼuliloʼoboʼ?
11 Le capítulo 2 yéetel 3 tiʼ Apocalipsisoʼ, ku yaʼalikeʼ le tsʼoʼok u kaʼa bin Jesucristo teʼ kaʼanoʼ, joʼopʼ u yilik le baʼaxoʼob ku beetaʼal kaʼach ichil le siete múuchʼuliloʼob yaan Asia Menoroʼ. Le náayoʼ ku yeʼesikeʼ Cristoeʼ maʼ chéen tu paktaj le múuchʼuliloʼoboʼ, baʼaxeʼ tu yilaj baʼax talamil ku aktáantkoʼob. Le oʼolal yaantiʼobeʼ tu chʼaʼchiʼitaj u kʼaabaʼ le máakoʼoboʼ, yéetel tu líiʼsaj u yóol cada junpʼéel, yéetel tu tsʼáaj le tsolnuʼuk tu yilaj kʼaʼabéettiʼoʼ. ¿Baʼax k-kanik tiʼ lelaʼ? Le baʼax ilaʼab teʼ náayoʼ káaj u béeychajal tu jaʼabil 1914. Le siete múuchʼuliloʼoboʼ ku chíikbesik le sukuʼunoʼob yéeyaʼanoʼob utiaʼal u binoʼob kaʼanoʼ, yéetel le tsolnuʼuk tu tsʼáajtiʼoboʼ ku yáantik tuláakal le múuchʼuliloʼob yaan ichil u kaajal Dios tiʼ tuláakal yóokʼol kaaboʼ. Le oʼolal jeʼel u páajtal k-aʼalikeʼ, Jéeobaeʼ táan u nuʼuktik u kaajal yéetel u yáantaj u Hijo. ¿Baʼax unaj k-beetik utiaʼal k-kʼamik le nuʼuktaj ku tsʼáaikoʼ?
12. ¿Bix jeʼel k-chaʼik u nuʼuktaʼal k-beel tumen Jéeobaeʼ?
12 Junpʼéel bix jeʼel k-kʼamik le nuʼuktaj ku tsʼáaik Jéeobaoʼ letiʼe k-xokik le Bibliaoʼ. Teʼ jóoʼsaʼaniloʼob ku beetik le palitsil chúukpajaʼan u yóol yéetel yaan u naʼatoʼ, Jéeobaeʼ ku tsʼáaiktoʼon yaʼabkach tsolnuʼukoʼob (Mat. 24:45). Wa k-kʼáat k-jóoʼs u yutsiloʼobeʼ, unaj k-jóoʼsik tiempo utiaʼal k-xokikoʼob yéetel k-tsʼáaik ichil k-kuxtal le baʼax ku yaʼalikoʼoboʼ. Jeʼex túun k-ilkoʼ, le u xakʼalxook máak tu juunaloʼ junpʼéel bix u kanáantkoʼon Jéeoba utiaʼal maʼ k-tʼóochpajal (Jud. 24). ¿Yaan wa kʼiin tsʼoʼok a wilik bey jach tiʼ teech ku yaʼalaʼal le baʼax ka xokik teʼ jóoʼsaʼaniloʼoboʼ? Wa beyoʼ unaj a wilik bey Jéeoba tsoliktech u nuʼukeʼ. Yaan kʼiineʼ juntúul k-amigoeʼ jeʼel u natsʼkuba u yaʼaltoʼon yaan baʼax unaj k-kʼexik ichil k-kuxtaleʼ. Jéeoba xaneʼ jeʼel u meyajtiʼ u kiliʼich muukʼ utiaʼal u yáantkech a wil unaj a kʼexik a modos yéetel baʼaxoʼob ka beetkeʼ, jeʼex u maasil máaxoʼob meyajtik Jéeobaeʼ, unaj xan a kʼexik a kuxtal. Wa k-kʼamik le nuʼuktaj ku tsʼáaik le kiliʼich muukʼoʼ, yaan k-chaʼik u nuʼuktaʼal k-beel tumen Jéeoba (xokaʼak Salmo 139:23, 24). Le oʼolal maʼalob ka k-il wa k-jóoʼsik u tiempoil k-xakʼalxook.
13. ¿Baʼaxten unaj k-ilik wa táan k-jóoʼsik u tiempoil utiaʼal k-xakʼalxook?
13 Wa jach yaʼab tiempo k-máansik tiʼ le náaysaj óolaloʼoboʼ, maʼ kun yantaltoʼon tiempo utiaʼal k-xakʼalxook t-juunal. Juntúul sukuʼuneʼ ku yaʼalik: «Jach séebaʼan u pʼáatal maʼ u xook máak tu juunal. Bejlaʼeʼ jach táaj yaʼab baʼaxoʼob yaan utiaʼal u náaysik u yóol máak. Lelaʼ ku chíikpajloʼob tiʼ televisión, tiʼ computadora yéetel tiʼ teléfono. Tuláakal tuʼux ku yilaʼal». Wa ku náayal k-óoleʼ, jeʼel u bin u xuʼulul k-jóoʼsik u tiempoil utiaʼal k-xook t-juunal, tak ka pʼáatak jach junpuliʼ maʼ k-xook (Efe. 5:15-17). Le oʼolal maʼalob ka k-tukle: «¿Kin jóoʼsik wa tiempo utiaʼal in xakʼalxoktik le Bibliaoʼ? ¿Wa kin beetik chéen ken tsʼaʼabakten junpʼéel tsoltʼaan in máans teʼ muchʼtáambaloʼoboʼ?». Wa tsʼoʼok u joʼopʼol u yúuchultoʼon beyoʼ, maʼ xaaneʼ kʼaʼabéet k-maas jóoʼsik u yutsil le adoración ich familiail wa k-xook chéen t-juunaloʼ, beyoʼ jeʼel u páajtal k-kʼamik le naʼat ku taal tiʼ Jéeoba jeʼel u yáantkoʼon k-salvartbaoʼ (Pro. 2:1-5).
DIOSEʼ KU LÍIʼSIK K-ÓOL
14. ¿Bix u yeʼesik le Biblia ku yilik Jéeoba bix k-uʼuyikbaoʼ?
14 Davideʼ tu muʼyajtaj yaʼab talamiloʼob (1 Sam. 30:3-6). Le baʼaxoʼob tu tsʼíibtoʼ ku yeʼesikeʼ ilaʼab tumen Jéeoba bix úuchik u yuʼubikuba (xokaʼak Salmo 34:18 yéetel 56:8). Letiʼeʼ láayliʼ ku yilik bix k-uʼuyikbaeʼ. Maʼatech u pʼatkoʼon ken yaachajak k-óol wa ken k-uʼuy bey kʼiilil k-puksiʼikʼal bey xan wa k-uʼuyik bey minaʼantoʼon «alab óolal[eʼ]». K-ojéeltik lelaʼ jach ku líiʼsik k-óol, jeʼex úuchik tiʼ Davideʼ, letiʼeʼ tu yaʼalaj: «A yaakunajeʼ ku taasikten kiʼ óolal yéetel kiʼimak óolal. Techeʼ tsʼoʼok a wilik in okʼom óolaloʼob, a kʼaj óol in muʼyajoʼob» (Sal. 31:7). Baʼaleʼ Dioseʼ maʼ chéen u yojel baʼax talamil k-muʼyajtikiʼ, baʼaxeʼ ku yáantkoʼon ikil u líiʼsik k-óol. Junpʼéel baʼax ku meyajtiʼ utiaʼal u beetkeʼ letiʼe muchʼtáambaloʼoboʼ.
15. ¿Baʼax ku kaʼansiktoʼon le baʼax úuch tiʼ Asafoʼ?
15 Le baʼax úuch tiʼ Asafoʼ ku yáantkoʼon k-il junpʼéel tiʼ le utsiloʼob ku taasik le muchʼtáambaloʼoboʼ. Yoʼolal le baʼaxoʼob tu yiloʼ tu tukleʼ chéen kunel u meyajtaʼal Dios, le oʼolal lúub u yóol. Letiʼeʼ tu yaʼalaj: «Teneʼ chuʼupen kaʼach tu yéetel kʼáakʼaj óolal». Yoʼolal lelaʼ óolak xuʼuluk u meyajtik Jéeoba. Baʼaleʼ ¿baʼax áant utiaʼal u kʼexik u tuukul? Letiʼeʼ ku yaʼalik: «Le ka ooken ichil u yotoch Dios». Le úuchik u yantal ichil u maasil máaxoʼob meyajtik Diosoʼ, kʼuch u naʼat baʼax maas maʼalob ka u beete. Tu naʼateʼ le máaxoʼob beetik baʼaloʼob kʼaastakoʼ maʼ kun bin utsil tiʼob mantatsʼ, baʼaxeʼ yaan u castigartaʼaloʼob tumen Jéeoba (Sal. 73:2, 13-22). Bejlaʼeʼ láayliʼ bey xan u yúuchloʼ. Maʼ xaaneʼ ku yaatal k-óol yoʼolal le baʼaxoʼob kʼaastak ku beetaʼal teʼ tu kʼasaʼan yóokʼol kaab Satanasaʼ. Baʼaleʼ ken yanakoʼon ichil le sukuʼunoʼoboʼ ku yantaltoʼon jeetsʼelil yéetel ku yáantkoʼon utiaʼal u seguer k-meyajtik Jéeoba.
16. ¿Bix u yáantkoʼon k-ilik le baʼax úuch tiʼ Anaoʼ?
16 Baʼaleʼ ¿kux túun wa yaan junpʼéel baʼax beetik u talamtaltoʼon k-bin teʼ muchʼtáambaloʼoboʼ? Maʼ xaaneʼ tsʼoʼok u luʼsaʼaltoʼon junpʼéel meyaj k-beetik kaʼachi. Wa maʼ xaaneʼ tsʼoʼok u yantaltoʼon junpʼéel talamil yéetel juntúul sukuʼun wa yéetel juntúul kiik. Teʼ súutukiloʼob beyoʼ maʼalob ka k-beet jeʼex úuchik u beetik Anaeʼ (xokaʼak 1 Samuel 1:4-8). Letiʼeʼ jach ku beetaʼal u muʼyaj kaʼach tumen Peniná, uláakʼ juntúul u yatan Elcana. Jeʼex le ken xiʼikoʼob u kʼuboʼob u siibaloʼob tiʼ Jéeoba tu kaajil Siló cada jaʼaboʼ. Anaeʼ jach ku yaatal u yóol, le oʼolal «ku sen okʼol, maʼ xan tu janal». Baʼaleʼ maʼ tu xulaj u adorartik Jéeobaiʼ, le oʼolal beetaʼab u bin utsil tiʼ yoʼolal le chúukaʼan óolal tu yeʼesoʼ (1 Sam. 1:11, 20).
17, 18. 1) ¿Bix u líiʼsaʼal k-óol teʼ muchʼtáambaloʼoboʼ? 2) ¿Bix a wuʼuyikaba ken tuukulnakech tiʼ le bix u kanáantkoʼon Jéeoba yéetel yaabilaj utiaʼal k-salvartikbaoʼ?
17 Toʼoneʼ unaj k-beetik jeʼex úuchik u beetik Anaoʼ. Jach unaj k-bin teʼ muchʼtáambaloʼoboʼ, tumen k-ojel tiʼ ku líiʼsaʼal k-óoliʼ, le baʼax jach kʼaʼabéettoʼon teʼ kʼiinoʼobaʼ (Heb. 10:24, 25). Le yaabilaj ku yeʼesiktoʼon le sukuʼunoʼoboʼ ku líiʼsik k-óol. Maʼ xaaneʼ le baʼax kun aʼalbil tiʼ junpʼéel tsoltʼaan wa le baʼax ken u yaʼal juntúul sukuʼun wa kiik utiaʼal u núukik le kʼáatchiʼoboʼ jach jeʼel u yáantkoʼoneʼ. Wa maʼ xaaneʼ jeʼel k-líiʼsik u yóol wa máaxeʼ wa jeʼel u líiʼsaʼal k-óol ken tsikbalnakoʼon yéetel juntúul sukuʼun wa kiik táanil tiʼ le muchʼtáambaloʼ wa ken tsʼoʼokok (Pro. 15:23; 17:17). Tsʼoʼoleʼ jach ku líikʼil xan k-óol ken múul kʼaaynakoʼon tiʼ Jéeoba. U jaajileʼ teʼ kʼiinoʼob jach chiʼichnakoʼon yoʼolal le baʼaxoʼob k-tuklikoʼ, maas jach kʼaʼabéet k-bin teʼ muchʼtáambaloʼoboʼ. Le muchʼtáambaloʼoboʼ ku meyajoʼob utiaʼal u tsʼáaiktoʼon Jéeoba «jeʼelel yéetel kiʼimak óolal» utiaʼal maʼ u xuʼulul k-tsʼáaik k-óol k-meyajte (Sal. 94:18, 19).
18 Tumen k-ojel jach ku kanáantkoʼon Dios yéetel yaabilajeʼ, k-uʼuyikba jeʼex Asafeʼ, letiʼeʼ tu yaʼalaj tiʼ Jéeoba: «Ta machen [tin] x-noʼoj kʼab, ta nuʼuktaj in kuxtal yéetel a tsolxikinoʼob» (Sal. 73:23, 24). ¿Máasaʼ jach kiʼimak k-óol ikil u kanáantkoʼon Jéeoba utiaʼal u páajtal k-salvartikba?
[U kʼáatchiʼiloʼob le xookoʼ]
[Foto yaan teʼ táan juʼun 28]
Jéeobaeʼ tsʼoʼok xan u natsʼkech
[Foto yaan teʼ táan juʼun 30]
Le tsolnuʼukoʼob ku tsʼáaik Diosoʼ utiaʼal k-utsil
[Foto yaan teʼ táan juʼun 31]
K-uʼuyikba maʼalobil ken líiʼsaʼak k-óol
