Gin Ango ma Lukricitayo Myero Gutim i Kare-ni?

IKARE-NI Lukricitayo me ada pe gidonyo i tim me wibye. Pingo? Pien gilubo lanen ma Yecu oweko botgi. Yecu oloko i kome kekene ni: “An pe dano me lobo.” Madok i kom lulub kore en owaco ni: “Wun pe me lobo.” (Jon 15:19; 17:14) Kong wanenu tyen lok mogo mumiyo Lukricitayo myero pe gudony i tim me wibye.

1. Kero pa dano gik woko. Baibul nyuto ni dano pe gitye ki kero nyo twero me lone kengi. Lanebi Jeremia ocoyo ni, “dano pe loyo kwone kene nio i agikkine; pe tye ngat mo ma tye ki twero me loyo kwone.”​—Jeremia 10:23.

Kit macalo pe kicweyo dano ni myero gutuk i yamo ki kerogi-ni, pe bene kicweyogi ni gulone kengi. I kare ma lacoc mo me tekwaro, ma nyinge David Fromkin obedo ka lok i kom goro ma gamente pa dano tye kwede, en owaco ni: “Gamente obedo gin pa dano, pi meno tye ki roc dok anyimme pe genne. Gitye gire ki twero moni, ento ka ma gik iye tye.” Pe myero wabed ki ur mo pien Baibul cikowa pe me geno dano adana mamwa!​—Jabuli 146:3.

2. Dul mony mogo maraco aye dorogi. I kare ma Catan omiyo twero me loyo lobo bot Yecu, Yecu pe opyem ni Larac-ci tye ki twero me miyo bote ker me lobo-ni ducu. Ki lok ada, Yecu olwongo Catan ni “lalo lobo.” I nge mwaki mogo lakwena Paulo dok olwongo Catan ni “lubanga me lobo  man.” (Jon 14:30; 2 Jo Korint 4:4) Paulo ocoyo bot Lukricitayo luwote ni: “Walwenyo i kom . . . gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo.” (Jo Epeco 6:12) Kadi bed komgi pe nen, dul mony maraco aye gin luloc me lobo man. Ngeyo lok ada man myero ogud kit ma waneno kwede tim me wibye nining?

Tam kong i kom lapor man: Kit macalo yeya matidi teko pa yamo me nam bedo ka corone-ni, gamente pa dano bene lubo teko pa dul mony maraco ma tye i polo. Dok kit macalo lukwang yeya meno pe gitwero gengo teko pa yamo-ni, luwibye bene pe gitwero gengo adwogi ma bino ki bot cwec magi ma tego me cwiny-nyi. Dul mony magi mitigi tye me weko dano gutim jami maraco ki bene me kelo “can malit atika” i lobo. (Niyabo 12:12) Pi meno, alokaloka kikome rom timme keken ka ce ngat moni tye ki teko ma loyo Catan ki jogine. Ngat meno aye Lubanga Jehovah. *​—Jabuli 83:18; Jeremia 10:7, 10.

3. Lukricitayo me ada gigeno Ker pa Lubanga keken. Yecu kacel ki lupwonnyene onongo gingeyo ni i kare mo Lubanga biketo gamente mo i polo wek olo lobo lung. Baibul lwongo gamente man ni Ker pa Lubanga dok bene nyuto ni Yecu Kricito aye kicimo me bedo Kabakane. (Niyabo 11:15) Kit macalo Ker meno bigudo kwede dano ducu-ni, Yecu oweko “lok me kwena maber me ker pa Lubanga” obedo wi lok madit me pwonye. (Luka 4:43) En bene opwonyo lupwonyene me lega ni: “Ker meri obin.” Pingo? Pien i te Ker pa Lubanga, miti pa Lubanga bicobbe i polo ki dong lobo.​—Matayo 6:9, 10.

Gin ango ma dong bitimme i kom gamente pa dano? Baibul miyo lagamme ni gamente pa “luker me wi lobo ducu” kibityekogi woko. (Niyabo16:14; 19:19-21) Ka ce ada ngat moni ye ni Ker pa Lubanga bityeko te gamente pa dano woko ducu, cwinye myero ojuke woko me bedo ka keto genne i kom loc me lobo-ni. Pien ka ce en obedo kaketo genne i kom gamente pa dano, meno rom ma nongo en tye lamone pa Lubanga.

[Lok ma tye piny]

[Boro buk i pot karatac 6]

Lucaden pa Jehovah gitito pi Ker pa Lubanga keken, ento pe tim me kelo alokaloka i wibye