?Ɔ fata kɛ andɛ Klistfuɛ’m be yo politiki?

KLISTFUƐ kpa’m be yoman politiki. ?Ngue ti ɔ? Afin be nian Zezi i ajalɛ’n su. Ɔ kɛnnin i bɔbɔ i ndɛ seli kɛ: ‘N ti-man mɛn nunfuɛ.’ Yɛ ɔ seli kɛ i sɔnnzɔnfuɛ’m “be ti-man mɛn nunfuɛ.” (Zan 15:19; 17:14) Siɛn’n, maan e nian ninnge wie mɔ be ti’n ɔ fataman kɛ Klistfuɛ’m be fa be wun wlɛ i politiki yolɛ’n nun’n.

1. Nán like ngba yɛ klɔ sran kwla yo ɔ. Biblu’n waan klɔ sran’m be kwlá siman be wiengu sie yɛ be lemɛn i sɔ atin. Ɲanmiɛn nuan ijɔfuɛ Zeremi klɛli i kɛ: “Sran’n i nguan’n nun-mɛn i sa nun. Ajalɛ ng’ɔ tu’n ɔ fin-mɛn i.”​—Zeremi 10:23.

Ɲanmiɛn w’a yiman sran’m be kɛ be tu kɛ anunman mun sa. I wafa kunngba’n w’a yiman e kɛ e kwla sie e wiengu. Laa sa’m be su like suanfuɛ kun mɔ be flɛ i David Fromkin, ɔ kannin ninnge nga klɔ sran’m be awa’m be kwlaman be yo’n be ndɛ. Ɔ seli kɛ: “Klɔ sran mun yɛ be o awa’m be nun ɔn. I ti’n awa sɔ’m be kwla fɔn, yɛ sa wie kwla fu be nun. Be le kwlalɛ sɔ, sanngɛ be kwlalɛ’n le awɛ.” I kwlaa sɔ’n maan e wun like nga ti yɛ Biblu’n se e kɛ nán e fa e wla e guɛ i klɔ sran su’n!​—Jue Mun 146:3.

2. Kɛ é sé yɛ’n aolia nun sran tɛtɛ’m be tin mɛn’n i siefuɛ’m be su. Kɛ Satan seli kɛ ɔ́ fá mɛn’n i famiɛn diwlɛ mun mán Zezi’n, Zezi w’a seman kɛ mmusu’m be si’n kwlɛmɛn i sɔ yo. I kpa’n, blɛ uflɛ nun’n Zezi flɛli Satan kɛ “sran ng’ɔ sie mɛn nga’n.” Kɛ afuɛ wie’m be sinnin’n, akoto Pɔlu seli kɛ Satan yɛ ɔ ti “mɛn nga i min’n” niɔn.  (Zan 14:30; 2 Korɛntfuɛ Mun 4:4) Fluwa kun mɔ Pɔlu klɛli ko mɛnnin i wiengu Klistfuɛ mun’n i nun’n, ɔ seli be kɛ: “E nin mmusu mun, nin aosin tuun nga e o nun yɛ’n i min’n i kpɛnngbɛn mun, yɛ mmusu tɛtɛ bɔ be o nglo lɔ’n yɛ e kun-ɔn.” (Efɛzfuɛ Mun 6:12) Klɔ sran’m be nun kpanngban be siman kɛ sran bɔbɔ ba nga be sie mɛn’n yɛle aolia nun sran tɛtɛ mun. ?Kɛ mɔ e si sɔ’n ti’n, wafa sɛ yɛ ɔ fata kɛ e bu politiki yolɛ’n niɔn?

Maan e bu sunnzun ase nga i akunndan e nian. Jenvie m’ɔ kpalo dan’n, ɔ su nzue su alie kanngan’m be bo kɔ. I wafa kunngba’n, aolia nun sran tɛtɛ mɔ be le tinmin kpa’n be su politiki ninnge’m be bo. Kɛ jenvie’n kpálo alie’n kɔ́’n, alie’n i kanfuɛ’m be kwlá yoman like kpa kun sa naan b’a kle alie’n i ti lika nga be bɔbɔ be klo’n. I wafa kunngba’n, politikifuɛ’m be kwlá jranman mmusu’m be tinmin dan’n i ɲrun. Mmusu sɔ’m b’a gugu kpa kɛ bé sáci klɔ sran mun mlɔnmlɔn naan bé fá ɲrɛnnɛn yí i asiɛ’n su. (Sa Nglo Yilɛ 12:12) I kwlaa sɔ’n ti’n, saan sran nga i tinmin liɛ’n tra Satan nin i mmusu’m be liɛ’n yɛ ɔ kwla kaci ninnge’m be kpa sa asiɛ’n su ɔ. Sran sɔ’n yɛle Ɲanmiɛn Zoova * bɔbɔ.​—Jue Mun 83:19; Zeremi 10:7, 10.

3. Ɲanmiɛn Sielɛ’n i ngunmin cɛ yɛ Klistfuɛ kpa’m be suɛn i bo ɔ. Zezi nin i sɔnnzɔnfuɛ’m be sili kɛ kɛ i blɛ ko ju’n, Ɲanmiɛn bɔbɔ táka famiɛn diwlɛ kun ɲanmiɛn su lɔ. Yɛ famiɛn diwlɛ sɔ’n síe asiɛ’n. Biblu’n flɛ famiɛn diwlɛ sɔ’n kɛ Ɲanmiɛn Sielɛ, yɛ ɔ yi i nglo kɛ b’a fa Zezi Klist b’a sie famiɛn diwlɛ sɔ’n i su famiɛn. (Sa Nglo Yilɛ 11:15) Kɛ mɔ Sielɛ sɔ’n kan sran kwlaa’n ti’n, kɛ Zezi klé sran’m be like’n, “Nyanmiɛn sielɛ’n i ndɛ” kanlɛ’n yɛ ɔ yoli i cinnjin ɔn. (Lik 4:43) Asa ekun’n, ɔ seli i sɔnnzɔnfuɛ’m be kɛ, kɛ bé srɛ́ Ɲanmiɛn’n be se kɛ: “Maan ɔ sielɛ blɛ’n ju.” ?Ngue ti ɔ? Afin kɛ Sielɛ sɔ’n i blɛ’n ko ju’n, bé yó Ɲanmiɛn i klun sa’n asiɛ’n su wa kɛ be yo i ɲanmiɛn su lɔ’n sa.​—Matie 6:9, 10.

?Kɛ ɔ ko yo sɔ’n, sa benin yɛ ɔ́ jú klɔ sran’m be famiɛn diwlɛ’m be su ɔ? Biblu’n tɛ su kɛ bé núnnún ‘asiɛ’n su famiɛn’m be kwlaa.’ (Sa Nglo Yilɛ 16:14; 19:19-21) Sɛ sran kun lafi su sakpa kɛ Ɲanmiɛn Sielɛ’n wá núnnún klɔ sran’m be politiki anuannzɛ mun’n, ɔ su suanman be nun wie fi bo. Afin sɛ i waan ɔ́ súan klɔ sran’m be famiɛn diwlɛ sɔ mɔ saan bé núnnún be’n be bo’n, nn ɔ nin Ɲanmiɛn yɛ be su kun ɔn.

[Ja ngua lɛ ndɛ’n]

[Ndɛ kwle, bue 6]

Nán politikifuɛ’m be ninnge’m be bo yɛ Zoova i Lalofuɛ’m be suan ɔn, Ɲanmiɛn Sielɛ’n i bo yɛ be suɛn i juejue su ɔ.