?I Stret Blong Ol Kristin Oli Joen Long Politik?

OL TRU Kristin oli no joen long politik. ?From wanem? From we oli folem fasin blong Jisas. Hem i talem se hem i no man blong wol, mo hem i talem long ol man blong hem se: “Yufala i no man blong wol ya.” (Jon 15:19; 17:14) I gud yumi tokbaot from wanem ol Kristin oli no mas joen long politik.

1. Man i no save bos long narafala. Baebol i talem se man i no naf blong rulum narafala man, mo hem i no gat raet blong mekem olsem. Profet Jeremaea i talem se: “I no gat man i save kam bos long laef blong hem.”—Jeremaea 10:23.

God i no mekem ol man blong oli flae olsem pijin. Long sem fasin, hem i no mekem ol man blong oli rulum olgeta bakegen. Wan man blong stadi long histri, David Fromkin, i tokbaot samting we gavman i no naf blong mekem. Long buk ya The Question of Government, David i talem se: “Ol man we oli stap long gavman oli sinman nomo. Taswe ol gavman oli save mestem mo oli save jenis enitaem nomo. Oli gat paoa, be paoa blong olgeta i no naf blong mekem evri samting.” !Tok blong Baebol i tru tumas, yumi no mas trastem ol haeman blong wol ya!—Ol Sam 146:3.

2. Ol rabis enjel oli gat paoa. Taem Setan i traem Jisas, Jisas i save se Setan i gat paoa blong givim olgeta kantri blong wol long hem. Long wan narafala taem, Jisas i talem  se Setan i “masta blong wol ya.” Mo biaen, aposol Pol i talem se Setan i “rabis god blong wol ya.” (Jon 14:30; 2 Korin 4:4) Pol i talem long ol Kristin se oli stap faet agens long ol devel, ol lida blong wol ya we oli stamba blong fasin blong tudak. (Efesas 6:12) Plante man oli no save se ol rabis enjel nao oli stap rulum wol ya. ?From wanem save ya i impoten taem yumi tingbaot politik?

Yu traem tingbaot wan kenu we taed i pulum. Ol man long kenu ya oli no save mekem wan samting blong blokem taed. Ol man blong gavman oli olsem ol man long kenu ya. Ol rabis enjel oli stap pulum olgeta blong mekem samting we oli wantem, be olgeta oli no save blokem ol rabis enjel. Ol rabis enjel oli traehad blong spolem fasin blong ol man, mo oli wantem se laef blong ol man i kam nogud olgeta. (Revelesen 12:12) Taswe, Jehova God nomo i save mekem laef blong ol man i kam gud. * Hem nomo i gat bigfala paoa i bitim Setan mo ol rabis enjel.—Ol Sam 83:18; Jeremaea 10:7, 10.

3. Ol tru Kristin oli sapotem Kingdom blong God. Jisas mo ol man blong hem oli save se God i makemaot wan taem blong stanemap wan gavman long heven. Gavman ya bambae i rul long olgeta ples long wol. Baebol i singaot gavman ya se Kingdom blong God. Mo Baebol i soemaot se God i putumap Jisas blong i King blong Kingdom. (Revelesen 11:15) From we Kingdom blong God bambae i rulum olgeta man, oltaem Jisas i talemaot “gud nius” blong Kingdom ya long ol man. (Luk 4:43) Mo Jisas i tijim ol man blong hem blong oli tokbaot Kingdom ya taem oli prea long God. Oli mas prea se: “Mifala i wantem we . . . yu yu kam King blong olgeta man.” ?From wanem oli mas prea olsem? From we Kingdom ya bambae i mekem olgeta samting we God i wantem i kamtru long heven mo long wol.—Matiu 6:9, 10.

?Wanem bambae i hapen long ol gavman we ol man oli stanemap? Baebol i talem se ol gavman long “evri ples long wol” bambae oli lus. (Revelesen 16:14; 19:19-21) I no longtaem Kingdom blong God bambae i finisim olgeta gavman blong man. Man we i bilif long ol tok ya, hem i no sapotem ol gavman ya. Sipos hem i sapotem olgeta, i olsem se hem i stap agensem God.

[Futnot]

[Tok blong makem poen long pej 6]

Ol Witnes blong Jehova oli no joen long politik, be oli wok strong blong talemaot Kingdom blong God