Unsay Angayng Buhaton sa mga Kristohanon Karon?

ANG tinuod nga mga Kristohanon karon dili mag-apil-apil sa politika. Ngano man? Kay ilang gisunod ang panig-ingnan ni Jesus. Siya miingon bahin sa iyang kaugalingon: “Ako dili bahin sa kalibotan.” Mahitungod sa iyang mga sumusunod, siya miingon: ‘Kamo dili bahin sa kalibotan.’ (Juan 15:19; 17:14) Tagda ang pipila ka rason kon nganong ang mga Kristohanon dili angayng mag-apil-apil sa politika.

1. Ang katakos sa tawo limitado. Ang Bibliya nag-ingong ang mga tawo walay katakos ni katungod sa pagmando sa ilang kaugalingon. “Dili iya sa tawo nga nagalakaw,” misulat si propetang Jeremias, “bisan ang pagtultol sa iyang lakang.”—Jeremias 10:23.

Maingon nga ang mga tawo wala lalangang makalupad, sila usab wala lalangang magmando nga malamposon nga silasila ra. Bahin sa limitasyon sa mga gobyerno, ang historyanong si David Fromkin miingon: “Ang mga gobyerno gilangkobag mga tawo; busa sila masayop ug ang ilang kaugmaon walay kasegurohan. Sila may gahom, apan limitado lang.” (The Question of Government) Mao diayng ang Bibliya nagpasidaan nato nga dili mosalig sa mga tawo!—Salmo 146:3.

2. Ang daotang mga espiritu may impluwensiya karon. Sa dihang gitanyagan ni Satanas si Jesus nga mahimong magmamando sa kalibotan, wala ilimod ni Jesus nga ang Yawa may awtoridad sa pagtanyag kaniya sa tanang gingharian sa kalibotan. Gani, sa ulahi, gitawag ni Jesus si Satanas nga “magmamando niining kalibotana.” Pipila ka tuig sa ulahi, gihubit ni apostol Pablo si Satanas ingong “diyos niini nga sistema sa mga butang.” (Juan 14:30; 2 Corinto 4:4) Si Pablo misulat sa iyang isigka-Kristohanon: “Kita adunay pakigdumog . . . batok sa mga magmamando sa kalibotan niini nga kangitngit, batok sa daotang mga puwersa nga espirituhanon sa langitnong mga dapit.” (Efeso 6:12) Kadaghanan sa mga tawo wala mahibalo nga ang daotang mga espiritu mao ang tinuod nga mga magmamando niining kalibotana. Sa unsang paagi kana makaapektar sa atong panglantaw sa politika?

Hunahunaa kini: Maingon nga ang gagmayng barko maanod sa kusog nga sulog sa dagat, ang politikal nga sistema sa tawo gikontrolar usab sa gamhanan, daotang mga espiritu. Ug maingon nga ang tripulante niana nga mga barko walay mahimo aron mapugngan ang kusog nga sulog,  ang mga politiko usab walay mahimo aron mapugngan ang impluwensiya nianang gamhanang mga espiritu. Katuyoan gayod sa maong mga espiritu nga daoton ang mga tawo sa bug-os ug magpahinabog ‘kaalaotan sa yuta.’ (Pinadayag 12:12) Busa, mapahinabo lamang ang tinuod nga kausaban pinaagi sa usa ka persona nga mas gamhanan kay kang Satanas ug sa iyang mga demonyo. Kana nga Persona mao si Jehova nga Diyos.—Salmo 83:18; Jeremias 10:7, 10.

3. Ang tinuod nga mga Kristohanon magmaunongon lamang sa Gingharian sa Diyos. Si Jesus ug ang iyang mga tinun-an nahibalo nga sa gitakdang panahon, ang Diyos magtukod ug usa ka kagamhanan sa langit aron magmando sa tibuok yuta. Ang Bibliya nagtawag niini nga Gingharian sa Diyos ug nagbutyag nga si Jesu-Kristo mao ang natudlo nga Hari niini. (Pinadayag 11:15) Sanglit ang maong Gingharian mag-apektar man sa tanang katawhan, gihimo ni Jesus “ang maayong balita sa gingharian sa Diyos” ingong pangunang tema sa iyang pagtulon-an. (Lucas 4:43) Gitudloan usab niya ang iyang mga tinun-an sa pag-ampo: “Paanhia ang imong gingharian.” Ngano? Kay ilalom sa maong Gingharian, ang kabubut-on sa Diyos seguradong matuman sa langit maingon man sa yuta.—Mateo 6:9, 10.

Nan, unsa may mahitabo sa mga gobyerno sa tawo? Ang Bibliya nag-ingon nga ang mga gobyerno “sa tibuok gipuy-ang yuta” pagalaglagon. (Pinadayag 16:14; 19:19-21) Kon ang usa nagtuo gayod nga hapit nang wagtangon sa Gingharian sa Diyos ang tanang politikal nga sistema sa tawo, makataronganon lamang nga dili niya kana paluyohan. Kay kon iyang paluyohan ang tawhanong gobyerno nga seguradong malaglag, sama rag nakigbatok siya sa Diyos.

Bisag ang tinuod nga mga Kristohanon dili mag-apil-apil sa politika, nagpasabot ba kana nga dili sila interesado sa pagpauswag sa komunidad nga ilang gipuy-an? Tagda ang tubag sa sunod nga artikulo.

[Blurb sa panid 7]

Ang mga Saksi ni Jehova aktibong nagpaluyo sa Gingharian sa Diyos, dili sa politikal nga reporma