Eski bann Kretyen i devret mel dan politik?

BANN vre Kretyen ozordi pa mel dan politik. Akoz? Parski zot pe swiv legzanp Zezi. Zezi ti dir sa konsernan li: “Mon pa fer parti lemonn.” I ti osi dir sa konsernan son bann disip: “Zot pa fer parti lemonn.” (Zan 15:19; 17:14) Annou vwar serten rezon akoz bann Kretyen pa devret pran par dan politik.

1. Abilite imen i limite. Labib i dir ki imen napa sa abilite e ni menm drwa pour gouvern zot prop lekor. Profet Zeremi ti ekrir: “I pa pour en imen ki pe marse pour diriz son lepa.”​—Zeremi 10:23.

Zis parey imen pa’n ganny kree pour anvole san okenn led, nou pa’n ganny kree pour diriz nou lekor avek bon rezilta. En istoryen ki ti apel David Fromkin ti ekrir sa konsernan bann limit ki gouvernman i annan: “Se bann zonm enparfe ki dan gouvernman alor se pour sa rezon ki gouvernman i fer fot e zot lavenir i pa serten. Zot egzers pouvwar, me zot pouvwar i limite.” (The Question of Government) I pa drol alor ki Labib i averti nou pour pa met nou konfyans dan zonm!​—Psonm 146:3.

2. Bann demon pe enfliyans imen. Kan Satan ti ofer Zezi pour vin dirizan tou bann rwayonm ek gouvernman lo later antye, Zezi pa ti dir ki Satan ti napa sa drwa pour ofer li tou sa bann rwayonm. Anfet, dan en lot sirkonstans, Zezi ti apel Satan “sa enn ki gouvern lemonn.” En pe lannen pli tar, zapot Pol ti dekrir Satan konman “bondye . . . sa syek.” (Zan 14:30; 2 Korentyen 4:4) Pol ti ekrir son bann konpanyon Kretyen: “Nou . . . pe lit kont . . . bann pouvwar move lespri dan ler [oubyen lesyel], bann lotorite, ek pouvwar dan lemonn teneb.”  (Efezyen 6:12) Menm si laplipar dimoun pa realize, se bann move lespri oubyen demon ki pe vreman diriz sa lemonn. Lefet ki nou konn sa, ki mannyer nou devret konsider politik?

Annou vwar sa konparezon: Zis parey bann pti bato i ganny trennen par gro kouran dan delo sale, bann sistenm politik i ganny kontrole par bann demon vreman pwisan. Zis parey sa bann maren lo sa bann pti bato pa kapab fer nanryen kont sa gro kouran, i napa bokou keksoz ki bann politisyen i kapab fer pour sorti anba lenfliyans sa bann demon. Sa bann demon pe fer tou pour fer imen vin konpletman koronpi e anmenn ‘maler lo later.’ (Revelasyon 12:12) Alor sel fason pour annan en vre sanzman, fodre annan enn ki pli for ki Satan ek son bann demon. Zeova i sa Enn ki pli pwisan.​—Psonm 83:18; Zeremi 10:7, 10.

3. Bann vre Kretyen i siport zis Rwayonm Bondye. Zezi ek son bann disip ti konnen ki i ti pou annan en letan fikse kot Bondye ti pou personnelman etablir en gouvernman dan lesyel ki pou gouvern later antye. Labib i apel sa gouvernman Rwayonm Bondye e i dir ki se Zezi Kri ki’n ganny swazir pour vin Lerwa sa Rwayonm. (Revelasyon 11:15) Vi ki sa Rwayonm i annan en lefe lo lavi tou dimoun, Zezi ti fer “sa Bonn Nouvel konsernan Rwayonm Bondye” vin tenm prensipal son lansennyman. (Lik 4:43) I ti osi ansenny son bann disip pour fer sa demann dan lapriyer: “Ki ou Renny i ganny etabli.” Akoz? Parski Bondye pou akonplir son lavolonte konsernan lesyel ek later atraver sa Rwayonm.​—Matye 6:9, 10.

Be ki pou arive avek bann gouvernman imen? Labib i dir ki bann rwayonm ek gouvernman ki “lo later an antye” pou ganny detrir. (Revelasyon 16:14; 19:19-21, nou ki’n met an italik.) Si en dimoun i vreman krwar ki Rwayonm Bondye pou vreman retir tou sistenm politik lo later, i fer sans pour dir ki i pa pou siport okenn ant zot. Deplis, si i siport sa bann gouvernman ki pe al ganny detrir, i konmsi i pe opoz Bondye.

Lefet ki bann vre Kretyen pa partisip dan politik, eski sa i vedir ki zot pa enterese pour amelyor keksoz dan lakominote? Annou vwar larepons dan sa lot lartik ki swiv.

[Ekstre lo paz 6]

Temwen Zeova pe donn tou zot sipor Rwayonm Bondye. Zot pa pe esey anmenn reform politik