Ania ti Rumbeng nga Aramiden Dagiti Kristiano Ita?

SAAN a makipaspaset iti politika dagiti pudno a Kristiano. Apay? Tultuladenda ngamin ni Jesus a nagkuna a “saan a paset ti lubong.” Kinunana met kadagiti pasurotna: “Saankayo a paset ti lubong.” (Juan 15:19; 17:14) Usigem ti sumagmamano a rason no apay a di rumbeng a makipaset dagiti Kristiano iti politika.

1. Limitado ti kabaelan ti tao. Ibaga ti Biblia a saan a kabaelan ken awan karbengan ti tao a mangiwanwan iti bagina. Insurat ni propeta Jeremias: “Saan a kukua ti tao a magmagna uray ti panangiturong iti addangna.”​—Jeremias 10:23.

Saan a naparsua ti tao tapno agtayab, ket saan met a naparsua tapno sibaballigi a maiturayanna ti bagina. Kinuna ti historiador a ni David Fromkin maipapan iti limitasion dagiti gobierno: “Tattao ti mangiturturay kadagiti gobierno; ngarud, agkamali ken saan a sigurado no agballigi dagiti planoda. Adda pannakabalinda ngem limitado.” (The Question of Government) Di ngarud pakasdaawan nga iballaag ti Biblia a ditay agtalek iti padatayo a tao!​—Salmo 146:3.

2. Napigsa ti impluensia dagiti dakes nga espiritu. Idi intukon ni Satanas ken Jesus ti panangituray iti lubong, binigbig ni Jesus nga adda autoridad ti Diablo a mangitukon kenkuana iti amin a pagarian ti lubong. Kinapudnona, inawaganna pay ni Satanas kas “agturay iti lubong.” Sumagmamano a tawen kalpasanna, ni apostol Pablo dineskribirna ni Satanas kas “ti dios daytoy a sistema ti bambanag.” (Juan 14:30; 2 Corinto 4:4) Insurat ni Pablo kadagiti padana a Kristiano: “Addaantayo iti pannakigubal . . . maibusor kadagiti agturay iti lubong daytoy a kinasipnget, maibusor kadagiti nadangkes nga espiritu a puersa kadagiti nailangitan a disso.” (Efeso 6:12) Dagiti dakes nga espiritu ti talaga a mangiturturay iti daytoy a lubong. Gapuna, ania ti rumbeng a panangmatmattayo iti politika?

Usigem daytoy: No kasano a nalaka nga iyanud dagiti allon ti baybay ti babassit a bilog, nalaka laeng nga impluensiaan dagiti nabileg a dakes nga espiritu dagiti napolitikaan a sistema ti tao. Ken no kasano a dagiti mangiturturong iti bilog saanda a kabaelan a kontrolen dagiti  dadakkel nga allon, di met malapdan dagiti politiko ti impluensia dagiti dakes nga espiritu. Kayat dagitoy nga espiritu a parigaten ken dadaelen dagiti tattao. (Apocalipsis 12:12) Ngarud, daydiay laeng nabilbileg ngem ni Satanas ken dagiti demoniona ti naan-anay a makabalbaliw iti kasasaad ti lubong. Dayta ni Jehova a Dios.​—Salmo 83:18; Jeremias 10:7, 10.

3. Ti laeng Pagarian ti Dios ti suportaran dagiti pudno a Kristiano. Ammo ni Jesus ken dagiti adalanna a mangipasdekto ti Dios iti maysa a gobierno idiay langit a mangituray iti intero a daga. Inawagan ti Biblia dayta kas Pagarian ti Dios ken imbagana a ni Jesu-Kristo ti nadutokan nga Ari. (Apocalipsis 11:15) Dayta a Pagarian ket pagsayaatan ti amin a tao, isu a “ti naimbag a damag ti pagarian ti Dios” ti kangrunaan nga insuro ni Jesus. (Lucas 4:43) Insurona pay nga ikararag dagiti adalanna: “Umay koma ti pagariam.” Apay? Agsipud ta babaen iti dayta a Pagarian, sigurado a matungpal ti pagayatan ti Dios idiay langit ken ditoy daga.​—Mateo 6:9, 10.

Anianto ngarud ti mapasamak kadagiti gobierno ti tao? Kuna ti Biblia a madadaelto dagiti gobierno iti “intero a mapagnaedan a daga.” (Apocalipsis 16:14; 19:19-21) No ti maysa nga indibidual talaga a patienna nga asidegen nga ikkaten ti Pagarian ti Dios ti amin a napolitikaan a sistema, rumbeng laeng a dina suportaran dagita. Arigna busbusorenna ti Dios no suportaranna dagitoy a gobierno ti tao a naikeddeng a madadael.

Nupay saan a makiramraman iti politika dagiti pudno a Kristiano, kayatna kadi a sawen a saanda nga interesado a mangpasayaat iti komunidad a pagnanaedanda? Ammuem ti sungbat iti sumaruno nga artikulo.

[Blurb iti panid 7]

Okupado dagiti Saksi ni Jehova a mangsupsuporta iti Pagarian ti Dios, imbes nga iti napolitikaan a reporma