Ũmũthĩ Akristiano Magĩrĩirũo Gwĩka Atĩa?

AKRISTIANO a ma ũmũthĩ matiĩingĩragia ũteti-inĩ. Nĩkĩ? Nĩ ũndũ marũmagĩrĩra kĩonereria kĩa Jesu. Akĩaria igũrũ rĩake we mwene, Jesu oigire ũũ: ‘Ndirĩ wa gũkũ thĩ.’ Narĩo igũrũ rĩgiĩ arũmĩrĩri ake, akiuga ũũ: ‘Inyuĩ mũtirĩ a gũkũ thĩ.’ (Johana 15:19; 17:14) Ta wĩcirie itũmi imwe cia Akristiano kwaga gũkorũo makĩingĩria ũteti-inĩ.

1. Ũhoti wa andũ nĩ ũrĩ mĩhaka. Bibilia yugaga atĩ andũ matirĩ ũhoti o na kana kĩhooto gĩa kwĩyatha. Mũnabii Jeremia aandĩkire ũũ: ‘Gũtirĩ mũndũ wa gũkũ thĩ ũngĩhota kũrũngĩrĩria makinya make njĩra-inĩ ĩrĩa yerekeire.’—Jeremia 10:23.

O ta ũrĩa andũ matombirũo marĩ na ũhoti wa kũmbũka o ene, no taguo matombirũo ũndũ mangĩhota kwĩyatha. Akĩonania ũrĩa ũhoti wa thirikari ũrĩ mĩhaka, mwandĩki wa historĩ David Fromkin oigire ũũ: “Thirikari ithondekagwo nĩ andũ; na kwoguo nĩ ihĩtagia na mĩoroto yacio ya ihinda rĩũkĩte kaingĩ ndĩkinyanagĩra. Nĩ ikoragwo na hinya, no nĩ hinya ũrĩ mĩhaka.” (The Question of Government) Nokĩo Bibilia ĩtũkaanagia ũhoro-inĩ wĩgiĩ kũiga mwĩhoko witũ harĩ andũ!—Thaburi 146:3.

2. Mbũtũ cia maroho mooru ũmũthĩ nĩ irĩ ũhoti. Rĩrĩa Shaitani eeragĩra Jesu wathani wa thĩ, Jesu ndaaregire atĩ Mũcukani aarĩ na ũhoti wa kũmũhe mothamaki mothe ma thĩ. Ma nĩ atĩ, thutha-inĩ, Jesu eetire Shaitani “mũnene wa gũkũ thĩ.” Mĩaka ĩigana ũna thutha ũcio, mũtũmwo Paulo aataarĩirie atĩ Shaitani nĩ ‘ngai ya gũkũ thĩ.’ (Johana 14:30; 2 Akorintho 4:4) Paulo aandĩkĩire Akristiano arĩa angĩ ũũ: “Kũgiana gwitũ . . . nĩ gwa kũgiana na mothamaki, o na mahinya, o na arĩa maathanaga thĩ ĩno ĩĩ na  nduma, o na mbũtũ cia maroho moru me kũrĩa igũrũ.” (Aefeso 6:12) Mbũtũ cia maroho moru nĩcio kũna ciathanaga thĩ ĩno, o na gũtuĩka itionekaga na maitho. Ũndũ ũcio wagĩrĩirũo gũtũma tũkorũo na mawoni marĩkũ kwerekera ũteti?

Ta wĩcirie ngerekano ĩno: O ta ũrĩa marikabu nyinyi itindĩkagwo nĩ huho irĩ na hinya iria-inĩ, no taguo thirikari cia gĩũteti cia andũ itongoragio nĩ mbũtũ irĩ na hinya cia maroho moru. Na o ta ũrĩa atwarithia a marikabu icio matarĩ ũndũ mangĩhota gwĩka huho icio, noguo ateti matangĩhota kũgarũra ũgucania wa mbũtũ icio irĩ hinya cia maroho moru. Muoroto wa mbũtũ icio nĩ gũthũkia andũ biũ na gũtũma thĩ ‘ĩkorũo na haaro.’ (Kũguũrĩrio 12:12) Nĩ ũndũ ũcio, ũgarũrũku wa ma no ũrehirũo nĩ mũndũ ũrĩ na ũhoti ũkĩrĩte wa Shaitani na ndaimono ciake. Ũrĩa ũngĩhota gwĩka ũguo no Jehova Ngai.—Thaburi 83:18; Jeremia 10:7, 10.

3. Akristiano a ma merutagĩra harĩ Ũthamaki wa Ngai wiki. Jesu na arutwo ake nĩ maamenyaga atĩ harĩ ihinda rĩgaakinya, Ngai ahande thirikari kũrĩa igũrũ ya gwathaga thĩ yothe. Bibilia ĩtaga thirikari ĩyo Ũthamaki wa Ngai na ĩkonania atĩ Jesu Kristo nĩwe ũtuĩtwo Mũthamaki wayo. (Kũguũrĩrio 11:15) Tondũ Ũthamaki ũcio ũhutagia andũ othe-rĩ, nĩkĩo Jesu aatuire ‘ũhoro-ũrĩa-mwega wa ũthamaki wa Ngai’ ũndũ ũrĩa mũnene ũrutani-inĩ wake. (Luka 4:43) Ningĩ nĩ aarutire arutwo ake mahoyage ũũ: “Ũthamaki waku ũũke.” Nĩkĩ? Nĩ ũndũ rungu rwa Ũthamaki ũcio, gũtirĩ kĩndũ gĩkaagiria wendi wa Ngai wĩkwo igũrũ o na gũkũ thĩ.—Mathayo 6:9, 10.

Kwoguo-rĩ, nĩ ũndũ ũrĩkũ ũrĩkora thirikari cia andũ? Bibilia ĩcokagia ĩkoiga atĩ thirikari cia ‘mabũrũri mothe’ ma thĩ nĩ ikaaniinwo. (Kũguũrĩrio 16:14; 19:19-21) Mũndũ angĩkorũo etĩkĩtie na ma atĩ Ũthamaki wa Ngai ũkiriĩ kũniina mathondeka mothe ma gĩũteti ma andũ, gũtirĩ hĩndĩ angĩnyita mathondeka macio mbaru. Ningĩ-rĩ, angĩĩrutanĩria kũnyita mbaru thirikari cia andũ iria cierekeire gũthira, angĩkorũo akĩng’ethanĩra na Ngai.

Ona gũtuĩka Akristiano a ma matiĩingĩragia thĩinĩ wa ũteti-rĩ, hihi ũguo nĩ kuuga atĩ matirũmbũyagia ũthii wa na mbere wa itũũra rĩao? Ta rora macokio marĩa monanĩtio gĩcunjĩ-inĩ kĩrĩa kĩrũmĩrĩire.

[Mbica karatathi ka 6]

Aira a Jehova merutanagĩria kũnyita mbaru Ũthamaki wa Ngai, no ti ũgarũrũku wa gĩũteti