Kiris-nebã manesem segd n yɩɩ wãn ne politikã?

KIRIS-NEB hakɩkã pa kẽesd b toog politikã pʋgẽ ye. Bõe yĩnga? Bala, b rɩkda a Zezi togs-n-taare. A Zezi yeelame tɩ yẽ “ka dũniyã rẽnda,” la t’a karen-biisã me “ka dũniyã rẽnd ye.” (Zã 15:19; 17:14) Bɩ d gom bũmb kẽer sẽn kɩt tɩ kiris-nebã pa segd n kẽes b toog politikã pʋgẽ wã yelle.

1. Ninsaalbã tõog tara koaka. Biiblã yeelame tɩ ninsaalbã pa tõe n wilg b mens sore, la tɩ b pa tar sor n na n maan dẽ me ye. Yelbũn 20:24 yeta woto: “Yaa Zusoabã n wilgd ned sore. Ninsaal na n yɩɩ wãn n bãng a sore?”

Wa Wẽnnaam sẽn pa naan ninsaalbã tɩ b tõe n yɩg wa liuuli wã, a pa naan-b tɩ b tõe n wilg b mens sor tɩ zems me ye. Kʋdemd yɛl-mit a David Fromkin sebr a ye (La Question du gouvernement [ãngil.]) pʋgẽ, a goma goosneema-rãmbã tõog sẽn tar koakã yelle, n yeel woto: “Goosneema-rãmbã sẽn yaa ninsaalbã, b wae n tudgdame. Sẽn paase, b pa mi n kaoosdẽ ye. B tara tõogo, la b tõogã tara koaka.” Dẽnd pa lingr la Biiblã sẽn sagend-d tɩ d ra teeg ninsaalã ye.—Yɩɩl Sõamyã 146:3.

2. Malɛg-wẽnsã tara pãng nebã zugu. A Sʋɩtãan sẽn wa n pʋlem a Zezi dũniyã naamã, a Zezi pa kɩɩs t’a Sʋɩtãan tõe n kõo yẽ dũniyã soolem fãa ye. A Zezi wa n pʋd n boola a Sʋɩtãan tɩ “dũniyã naaba.” Yʋʋm a wãn poore, tʋm-tʋmd a Poll yeelame t’a Sʋɩtãan yaa “dũni-kãngã wẽnnaam.”  (Zã 14:30; 2 Korẽnt dãmba 4:4) A Poll yeela a tẽed-n-taas woto: “Tõnd zabr . . . yaa ne sɩ-wẽns buud fãa sẽn be yĩngri, la bãmb dĩm-dãmba, la pãens rãmba, la lik soaadbã sẽn so pãng masã.” (Efɛɛz rãmba 6:12) Baa ninsaalbã wʋsg sẽn pa mi wã, yaa sɩ-wẽnsã bɩ malɛg-wẽnsã n so dũniyã. Woto segd n kɩtame tɩ tõnd tall tags-bʋg ne politikã?

Malɛg-wẽnsã tara dũniyã politikã n lengdẽ, wa batayo-bil sẽn be mogr sẽn gudg zug tɩ sebgã tar-a n lengdẽ. Wala sẽn wẽnd-b batayo kãngã sẽn pa tõe n gɩdg ko-pɛmã la sebgã, politikã rãmb me pa tõe n gɩdg malɛg-wẽnsã ye. Malɛg-kãensã maooda ne b pãng fãa sẽn na yɩl tɩ ninsaalbã lebg wẽns tɩ tɩɩm kae, la b wat ne “toog” dũniyã zugu. (Wilgri 12:12) Dẽnd yaa ned pãng sẽn yɩɩd a Sʋɩtãan ne a zĩn-dãmbã bal n tõe n kɩt tɩ toeeng zĩndi. Yẽ soabã yaa Wẽnnaam a Zeova. *—Yɩɩl Sõamyã 83:19; Zeremi 10:7, 10.

3. Kiris-neb hakɩkã teenda Wẽnnaam Rĩungã bala. A Zezi ne a karen-biisã ra miime tɩ wakat ning Wẽnnaam sẽn yãkã sã n da ta, a na n lugla goosneema saasẽ, t’a soog tẽngã gilli. Biiblã boola goosneem-kãng tɩ Wẽnnaam Soolem bɩ a Rĩungu, la a wilg tɩ b yãka a Zezi Kirist t’a yaa Rĩungã rĩma. (Wilgri 11:15) A Zezi ra gomda “Wẽnnaam soolem koe-noogã” yell n yɩɩda, bala, a wata nebã nafr yĩnga. (Luk 4:43) A leb n wilga a karen-biisã tɩ b pʋʋs tɩ “[Wẽnnaam] soolem wa.” Bõe yĩnga? Bala a sã n wa, Wẽnnaam daabã na n sɩd maana saasẽ la tẽngã zugu.—Matɩe 6:9, 10.

La woto wã, bõe n na n paam ninsaalbã goosneema-rãmbã? Biiblã wilgame tɩ b na n sãama dũniyã tõr goosneema-rãmbã. (Wilgri 16:14; 19:19-21) Ned sã n sɩd tẽed tɩ ka la bilfu, Wẽnnaam Rĩungã na n sãama politik siglsã fãa, yaa vẽeneg t’a pa na n teel sigl-kãens ye. A sã n baas n teend goosneem-kãensã sẽn na n sãamã, yaa Wẽnnaam la a kɩɩsda.

Rẽ yĩnga, kiris-neb hakɩkã sẽn pa kẽesd b toog politikã pʋgẽ wã, wilgdame tɩ b pa rat n tʋm zĩig ning b sẽn vɩ wã neb neer yĩng bɩ? Y na n yãa sok-kãngã leoor sõsg ning sẽn pʋgdã pʋgẽ.

[Tẽngr note]

[Goam sẽn tar pãnga seb-neng a 6]

A Zeova Kaset rãmbã teenda Wẽnnaam Rĩungã, b pa teend ninsaalbã politik ye