Oityi Ovakristau Hono Vesukisa Okulinga?

OVAKRISTAU votyotyili hono kavelipake mopulitika. Omokonda yatyi? Omokonda valandula ongeleka ya Jesus. Oe wapopile konthele yae muene okuti: “Ame hilingi onthele youye.” Apopi konthele yovalanduli vae okuti: “Kavalingi onthele youye.” (João 15:19; 17:14) Tala omahunga amwe alekesa omokonda yatyi Ovakristau vehelipakela mopulitika.

1. Ounongo wovanthu kauhi. Ombimbiliya ipopia okuti ovanthu vetupu ounongo nepondolo liokulitumina. Omuuli Jeremia wahoneka okuti: “Ovanthu kavetyivili okuviukisa onondyila mbavo.”—Jeremias 10:23.

Ngetyi ovanthu vahalingilwe opo vanthanane ngoviila, tupu kavalingilwe opo velitumine. Omuhipululi David Fromkin wapopia konthele yovatumini vehetyivili okutumina okuti: “Ovatumini ovanthu ovakuankhali, moluotyo valinga oviponyo, iya outumini wavo kautualako apeho. Vatumina umwe, mahi, kavetyivili okutumina nawa.” (The Question of Government) Otyo Ombimbiliya itulondolela opo tuhayumbe onthumbi movanthu!—Salmo 146:3.

2. Vahongiliyua no noandyu onombi. Etyi Satanasi aavela Jesus outumini wouye, Jesus kapopile okuti Eliapu litupu epondolo liokumuavela omauhamba aeho ouye. Tyotyili, konyima, Jesus waihana Satanasi okuti “omutumini wouye.” Etyi palamba omanima amwe, apostolu Paulu wapopile Satanasi okuti “o huku youye uno.” (João 14:30; 2 Coríntios 4:4) Paulu wahonekelele ovakuatate vae Ovakristau okuti: “Tuna ovilwa ovinene nomautumini, novatumini  venthiki liouye uno, onoandyu onombi keulu.” (Efésios 6:12) Ovanthu ovanyingi kavetyii okuti ovatumini vouye uno vekahi nokuhongiliyua no noandyu onombi. Moluotyo, oñgeni tuna okutala opulitika?

Soka kuetyi: Ngetyi onowato ononthutu mbutahua nomeva elunga ena ononkhono, ovatumini vopulitika vahongiliyua no noandyu onombi mbuna epondolo. Iya ngetyi ovatahi vo nowato ombo vehetyivili okutepulula ononkhono mbomeva, tupu, ovatumini vopulitika kavetyivili okulityilika ehongiliyo lio noandyu ombo onombi mbepondolo. Onoandyu ombo, mbatokola okunyona ovanthu aveho, nokuveetela ononkhumbi. (Revelação 12:12) Ngotyo, epiluluko liotyotyili malietua vala nomunthu wike una vali epondolo tyipona Satanasi novilulu viae. Omunthu oo, o Jeova Huku.—Salmo 83:18; Jeremias 10:7, 10.

3. Ovakristau votyotyili vayumba vala onthumbi Mouhamba wa Huku. Jesus novalongwa vae ankho vetyii okuti momuvo wanakua, Huku makavialeka outumini keulu maukatumina oohi aiho. Ombimbiliya iihana outumini oo okuti Ouhamba wa Huku, nokulekesa okuti Ohamba youhamba oo, o Jesus Kristu. (Revelação 11:15) Mokonda Ouhamba oo maukuatesako ovanthu aveho, otyipuka tyakolela vali Jesus alingile, okuivisa “onondaka onongwa Mbouhamba wa Huku.” (Lucas 4:43) Tupu, walongesile ovalongwa vae okulikuambela okuti: “Ouhamba wove uye.” Omokonda yatyi? Omokonda Ouhamba oo, maukalinga ehando lia Huku keulu no pohi.—Mateus 6:9, 10.

Iya, oityi matyikaenda noutumini wovanthu? Ombimbiliya ikumbulula okuti ovatumini “vo ohi aiho” mavakaipawa. (Revelação 16:14; 19:19-21) Inkha omunthu utavela okuti tyilityili Ouhamba wa Huku maukahanyako ovatumini aveho vopulitika, tyotyili melityilika okulipaka kumwe navo. Haunene, inkha ukuatesako ovatumini ovo, matyilekesa okuti ukahi nokuanya Huku.

Mokonda Ovakristau votyotyili kavelipake mopulitika, otyo tyilekesa okuti kavalingi natyike opo vakuateseko ovanthu potyilongo vakala? Tala ekumbululo monthele ilandulako.

[Ehangununo liolutalatu pefo 6]

Onombangi mba Jeova vaamena nombili Ouhamba wa Huku, kavelipake mopulitika