Duzu A Ɔwɔ Kɛ Keleseɛnema Yɛ Ye Ɛnɛ A?

NƆHALƐ Keleseɛnema mɔɔ wɔ ɛkɛ ɛnɛ la, ɛnva bɛ nwo ɛnwula maanyɛlɛ nu. Kɛmɔti ɛ? Ɔluakɛ bɛdi Gyisɛse neazo ne anzi. Ɔhanle ɔ nwo edwɛkɛ kɛ: “Menle ɛtane ewiade ye ɛdeɛ.” Ɔhanle ye wɔ ye ɛdoavolɛ ne mɔ anwo kɛ: “Bɛnle ɛtane ewiade ye ɛdeɛ.” (Dwɔn 15:19; 17:14) Suzu ninyɛne bie mɔ mɔɔ ɔti ɔnle kɛ Keleseɛnema fa bɛ nwo wula maanyɛlɛ nu la anwo nea.

1. Sonla tumi le ekyii. Baebolo ne ka kɛ menli ɛnlɛ tumi anzɛɛ nwolɛ adenle mɔɔ bɛfa bɛnea bɛ nwo zo a. Ngapezonli Gyɛlɛmaya hɛlɛle kɛ: “Sonla ɔdaye ɔnlɛ ɔ nwo; sonla ɔdaye ɔnlɛ ye ngoane zo tumi.”—Gyɛlɛmaya 10:23.

Kɛmɔ bɛambɔ menli kɛ bɛdu la, zɔhane ala a bɛambɔ bɛ kɛ bɛnlea bɛ nwo zo a. Tetedwɛkɛ kɛlɛvolɛ David Fromkin hanle vanenle ninyɛne mɔɔ arane ɛngola ye yɛ la anwo kɛ: “Menli a ka bɔ nu yɛ arane a; ɛhye ati bɛnli munli yɛɛ bɛ anyelazo noko ɛnli munli. Bɛlɛ tumi ɛdeɛ, noko ɔle ekyii bie ala.” (The Question of Government) Ɔmbɔ ɛhɔne a Baebolo ne bɔ yɛ kɔkɔ kɛ yɛmmafa yɛ rɛle yɛwula sonla nu la!—Edwɛndolɛ 146:3.

2. Sunsum ɛtane ne mɔ a gyi ɔ nzi a. Mekɛ mɔɔ Seetan hanle kɛ ɔbamaa Gyisɛse ayɛ ewiade sievolɛ la, Gyisɛse anga kɛ Abɔnsam ɛngola ɛnva ewiade arelemgbunlililɛ kɔsɔɔti ɛmmaa ye. Mekɛ bie bɔbɔ Gyisɛse vɛlɛle Seetan kɛ “mɔɔ sie ɛtane ewiade ɛhye la.” Ɛvolɛ dɔɔnwo pɛle nu la, ɛzoanvolɛ Pɔɔlo vɛlɛle Seetan “ewiade ɛhye nyamenle.” (Dwɔn 14:30; 2 Kɔlentema 4:4) Pɔɔlo hɛlɛle ɔ gɔnwo mɔ Keleseɛnema kɛ: “Yɛ nee . . . ewiade amra mɔɔ sie ɛnɛ mekɛ ye awozinli nu amra, yɛɛ sunsum nu anwuma ɛlɔnema amumuyɛ yɛɛ yɛ nee bɛ ɛlɛko a.” (Ɛfɛsɛsema 6:12) Menli ɛnze kɛ sunsum ɛtane ne mɔ a ɛlɛdi ewiade ye  azo a. Kɛzi ɔwɔ kɛ nɔhalɛ edwɛkɛ ɛhye ka adwenle mɔɔ yɛlɛ ye wɔ maanyɛlɛ nwo la ɛ?

Suzu ndonwo ɛhye anwo nea: Kɛmɔ saa nyevile ne ɛlɛse a ɔkola ɔkpa ɛlɛne ngyikyi ɔkɔ la, zɔhane ala a sunsum ɛtane ne mɔ noko fa bɛ tumi ne di gyima wɔ alesama maanyɛlɛ ngyehyɛleɛ ne azo a. Yɛɛ kɛmɔ menli mɔɔ ka ɛlɛne ɛngola ɛnyɛ nyevile ne mɔɔ se la anwo ɛhwee la, zɔhane ala a maanyɛlɛma noko ɛngola ɛnyɛ tumi mɔɔ sunsum ɛtane ne mɔ lɛ ye wɔ bɛ nwo zo la anwo ɛhwee a. Sunsum ɛtane zɔhane mɔ ɛsika bɛ bo kɛ bɛsɛkye alesama adwenle na bɛlɛmaa ngyegyelɛ ara azɛlɛ ye azo. (Yekile 12:12) Zɔhane ati, awie mɔɔ lɛ tumi tɛla Seetan nee ye sunsum ɛtane ne mɔ la a bahola amaa nzenzaleɛ kpalɛ ara a. Ahenle zɔhane a le Gyihova Nyamenle mumua ne. *—Edwɛndolɛ 83:18; Gyɛlɛmaya 10:7, 10.

3. Nyamenle Belemgbunlililɛ ne angomekye a nɔhalɛ Keleseɛnema gyi ɔ nzi a. Ɛnee Gyisɛse nee ye ɛzoanvolɛ ne mɔ ze kɛ Nyamenle bava arane bie azie anwuma yeamaa yeanlea azɛlɛ ye kɔsɔɔti azo wɔ ye mekɛ nloa. Baebolo ne fɛlɛ arane ɛhye Nyamenle Belemgbunlililɛ na ɔmaa ɔda ali kɛ Gyisɛse Kelaese a bɛkpa ye kɛ zolɛ Belemgbunli a. (Yekile 11:15) Kɛmɔ zɔhane Belemgbunlililɛ ne fane alesama kɔsɔɔti anwo la ati, Gyisɛse manle “Edwɛkpa ne mɔɔ fane Nyamenle Belemgbunlililɛ ne anwo la” yɛle ye ngilehilelɛ titile. (Luku 4:43) Eza ɔhilehilele ye ɛzoanvolɛ ne mɔ kɛ bɛyɛ asɔne kɛ: “Wɔ belemgbunlililɛ ɛrɛla.” Duzu ati ɔ? Ɔluakɛ wɔ zɔhane Belemgbunlililɛ ne abo, bɛbayɛ Nyamenle ɛhulolɛdeɛ wɔ anwuma nee aze.—Mateyu 6:9, 10.

Duzu a bado arane mɔɔ menli ɛhyehyɛ la ɛ? Baebolo ne bua kɛ bɛbazɛkye arane mɔɔ wɔ “ewiade la amuala.” (Yekile 16:14; 19:19-21) Saa awie die di amgba kɛ ɔnrɛhyɛ, Nyamenle Belemgbunlililɛ ne baye maanyɛlɛ ngyehyɛleɛ mɔɔ menli ɛhyehyɛ la avi ɛkɛ a, ɛnee nrɛlɛbɛ wɔ nu kɛ ɔbahwe ɔ nwo yeavi bɛ nwo. Yemɔti, saa awie bɔ mɔdenle kɛ ɔdi arane mɔɔ alesama ɛhyehyɛ mɔɔ bɛbazɛkye ye la anzi a, ɛnee ɔkile kɛ ɔlɛko yeatia Nyamenle.

Ɔnva nwo kɛ nɔhalɛ Keleseɛnema ɛnva bɛ nwo ɛnwulowula maanyɛlɛ nu la, asoo ɛhye kile kɛ bɛngulo kɛ maanle mɔɔ bɛde nu la yɛ boɛ ɔ? Suzu mualɛ mɔɔ bɛva bɛmaa wɔ edwɛkɛ mɔɔ doa zo la anu la anwo.

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 6]

Gyihova Alasevolɛ bɔ Nyamenle Belemgbunlililɛ ne nolo na tɛ maanyɛlɛ mɔɔ bɛkulo kɛ bɛyɛ ye boɛ la ɔ