KRISTIANNAN berdadero djawe no ta partisipá den polítika. Dikon nò? Pasobra nan ta imitá Hesus. El a bisa tokante su mes: “Ami no ta parti di mundu.” I el a bisa tokante su siguidónan: “Boso no ta parti di mundu.” (Huan 15:19; 17:14) Laga nos wak algun motibu pakiko kristiannan no mester mete den polítika.

1. Hende su kapasidat ta limitá. Beibel ta deklará ku hende no tin e kapasidat ni e derecho di goberná su mes. Profeta Yeremías a skirbi: “No ta keda na hende pa dirigí su pasonan.”—Yeremías 10:23.

Meskos ku Dios no a krea hende pa move su brasanan i bula manera para, e no kre’é pa goberná su mes ku éksito tampoko. Papiando tokante e limitashonnan di gobièrnu, e historiadó David Fromkin a bisa: “Gobièrnunan ta konsistí di ser humano; p’esei nan ta inkliná na frakasá i nan futuro ta insigur. Nan ta ehersé sierto poder, pero esei ta limitá.” (The Question of Government) Pues, ta di komprondé pakiko Beibel ta spièrta nos pa no pone nos konfiansa den hende!—Salmo 146:3.

2. Aktualmente forsanan spiritual di maldat ta ehersé influensia. Ora Satanas a ofresé Hesus poder pa goberná mundu, Hesus no a nenga ku Diabel tabatin e outoridat pa ofres’é tur e reinonan di mundu. De echo, na un otro okashon, Hesus a yama Satanas “e gobernante di mundu.” Algun aña despues, apòstel Pablo a deskribí Satanas komo “e dios di e mundu akí.” (Huan 14:30; 2 Korintionan 4:4) Pablo a skirbi su rumannan kristian: “Nos lucha [ta] kontra  gobernante di mundu di e skuridat akí, kontra forsanan spiritual di maldat den lugánan selestial.” (Efesionan 6:12) Tras di esenario, forsanan spiritual di maldat ta e berdadero gobernantenan di e mundu akí. Ki efekto esei mester tin riba nos punto di bista di polítika?

Pensa riba e komparashon akí: Meskos ku koriente fuerte di laman ta hala boto chikitu bai kuné, asina forsanan spiritual poderoso di maldat ta hala e sistemanan polítiko humano bai kuné den un sierto direkshon. I meskos ku nabegante den e boto chikitunan ei no por hasi nada pa kambia e koriente fuerte, asina polítikonan tampoko no por hasi nada pa kambia e influensia di e forsanan spiritual poderoso ei. E forsanan akí ta desididu pa korumpí hende kompletamente i kousa “ai” pa e tera. (Revelashon 12:12) Pues, ta un persona mas poderoso ku Satanas i su demoñonan so por trese berdadero kambio. Anto e Persona ei ta Yehova Dios mes. *—Salmo 83:18, NW; Yeremías 10:7, 10.

3. Kristiannan berdadero ta leal na un solo gobièrnu: e Reino di Dios. Hesus i su disipelnan tabata sa ku na e debido tempu Dios mes lo a establesé un gobièrnu den shelu ku lo a goberná henter e tera. Beibel ta yama e gobièrnu akí e Reino di Dios i ta revelá ku Hesukristu a keda nombrá komo su Rei. (Revelashon 11:15) Komo ku e Reino ta toka bida di tur hende, Hesus a hasi “e bon notisia di e Reino di Dios” e tema prinsipal di su siñansa. (Lukas 4:43) Tambe el a siña su disipelnan pidi den orashon: “Laga bo Reino bini.” Dikon? Pasobra bou di e Reino ei, Dios su boluntat lo sosodé sigur, tantu den shelu komo riba tera.—Mateo 6:9, 10.

Kiko lo bai pasa anto ku e gobièrnunan formá pa hende? Segun Beibel, e gobièrnunan “di henter e tera habitá” lo ser destruí. (Revelashon 16:14; 19:19-21) Si un persona di bèrdat ta kere ku e Reino di Dios ta serka di eliminá tur sistema polítiko formá pa hende, lógikamente lo e no apoyá e sistemanan polítiko ei. De echo, si e ta purba di sostené e gobièrnunan formá pa hende i destiná pa destrukshon, lo e ta tumando un posishon kontra Dios.

[Nota]

[Komentario na página 6]

Testigunan di Yehova aktivamente ta promové e Reino di Dios, no reformanan polítiko