¿Imatan ruwananku kay tiempopi cristianokuna?

CHEQAQ cristianokunaqa Jesús hinan mana politicapi chaqrukunkuchu. Jesusqa sut’itan nirqan: ‘Ñoqapas manan kay pachamantachu kani’, nispa. Qatikuqninkunatataq nirqan: ‘Manan kay pachaqchu kankichis’, nispa (Juan 15:19; 17:14). Ichaqa, ¿imanaqtinmi cristianokuna mana politicapi chaqrukunankuchu?

1. Runaqa manan tukuy atiyniyoqchu. Biblia nisqan hina runaqa manan pay kikintapas kamachikuyta atinchu. Profeta Jeremiaspa nisqan hina, “runaqa manan yachakunchu imayna kanantapas” (Jeremías 10:23).

Runaqa manan phalananpaq hinachu kamasqa karqan, chhaynallataqmi kamachinanpaqpas. David Fromkin nin: “Gobiernokunaqa runakunallan kanku, chayraykun pantaq kanku, manan allintaqa kamachinkumanchu”, nispa (The Question of Government [Gobiernoq ruwayninkuna]). ¡Chaychá Bibliaqa niwanchis kay gobiernokunapi ama hap’ipakunanchista! (Salmo 146:3.)

2. Millay espiritukunaqa pakallamantan kamachikamushanku. Saqraqa mana iskayaspan Jesusman munachirqan kay pachaq atiyninta kamachikuynintawan. Chaymi Saqrata nirqan: “Kay pachapi kamachikuq qollanan”, nispa. Apóstol Pablopas nillarqantaqmi: ‘Kay pacha kamachiq dios’, nispa (Juan 14:30; 2 Corintios 4:4). Iñiqmasinkunatapas nirqanmi: “Manan runawanchu maqanakunchis [...] kay laqhayaq pachapi kamachikuqkunawanmi, hanaqkunapi kaq mana allin espiritukunawanmi”, nispa (Efesios 6:12). Arí, kay pachata kamachikuqkunaqa millay espiritukunan, paykunan runakunaq qhepanpi kashanku pakallamanta kamachikamuspa. Chayta yachaspa, ¿imatan cristianokuna yuyaykunanku politicamanta?

Chayta entiendenapaq kaypi yuyaykusun: Politicakunaqa huch’uy botekuna hinan kallpawan phawaq mayowan aysachikushanku, chay kallpaqa millay espiritukunan. Chay botekunata apaq runakunaqa manan ima ruwaytapas  atinkumanchu phawashaq unu apaqtinqa, chhaynallataqmi politicapi runakunapas manan ima ruwaytapas atinkuchu chay millay espiritukunaq contranpi. Chay supaykunaqa runakunaq waqllinantapunin munanku, sasachakuykunapi ñak’ariykunapi tarikunankutawan (Apocalipsis 12:12). Chaykunataqa Jehová Diosllan tukuchiyta atinman, payllan supaykunamanta Saqramantapas aswan atiyniyoq. (Salmo 83:18; Jeremías 10:7, 10).

3. Cheqaq cristianokunaqa Diospa Gobiernonmantan kanku. Jesuspa qatikuqninkunaqa yacharqankun huk Gobiernota Dios hanaq pachapi hatarichinanta, chhaynapi kay pachata kamachimunanpaq, chaymi Diospa Gobiernon. Biblia nin Jesucristota Jehová Dios chay gobiernopi kamachikuqta churasqanta (Apocalipsis 11:15). Chaymi Jesusqa Diospa gobiernonmanta “allin willakuykunata” predicarqan (Lucas 4:43). Qatikuqninkunatapas yachachirqanmi chayta mañakunankupaq: “Qhapaqsuyuyki [Gobiernoyki] hamuchun”, nispa. Chay Gobiernopiqa Diospa munayninmi ruwakunqa kay pachapi imaynan hanaq pachapi ruwakushanña hinata (Mateo 6:9, 10).

Chhaynaqa, ¿imapitaq kay pacha gobiernokunari tukunqa? Biblian willan “kay pachantinpi” politicakuna chinqachisqa kananta (Apocalipsis 16:14; 19:19-21). Chaymi Diospa Gobiernonpi confiaqkunaqa mana politicakunaman hap’ipakunkuchu. Sichus chaykunata yachashaspa politicapi yanapakunman chayqa, Diospa enemigonmanmi tukupunkuman.

Cristianokunaqa manan politicapi chaqrukunkuchu, ¿chayraykuchu tiyasqanku cheqaspi manaña imapipas yanapakunkuman? Qatimuqpi chayta kutichisun.

[7 paginapi willakuy]

Testigokunaqa Diospa Gobiernonmanta kasqankuraykun mana politicakunapi chaqrukunkuchu