¿Tuku xlitlawatkan kstalaninanin Cristo xala uku?

CHUNA la tlawalh Jesús kstalaninanin ni makgtanukgo kpolítica. Jesús liwana wa: «Nkit, mpi na ni xala katuxawat [o kakilhtamaku]». Na kawanilh kstalaninanin: «Ni xala katuxawat wixin» (Juan 15:19; 17:14). Pero ¿tuku xlakata kstalaninanin Cristo ni xlimakgtanutkan kpolítica?

1. Latamanin ni kgalhikgo lhuwa litliwakga. Biblia kinkawaniyan pi latamanin nila xakstu mapakgsinankgo. Palakachuwina Jeremías wa, «ni lakgchan chatum chixku xakstu napulalin xtatukit» (Jeremías 10:23).

Chuna la latamanin ni katlawaka xlakata tlan xkgoskgolh, nachuna ni katlawaka xlakata tlan xmapakgsinankgolh. Historiador David Fromkin wa pi xtamapakgsin latamanin lhuwa tuku nila tlawakgo chu wan: «Tamapakgsin nema anan, lakchixkuwin tlawakgonit chu xlakata min kilhtamaku akgtsankgakgo, nila putum tlan kakitaxtuni. Ni kgalhikgo putum litliwakga» (The Question of Government [Takgalhskinin xlakata mapakgsinanin]). ¡Wa xlakata Biblia kinkawaniyan pi ni kalipawaw latamanin! (Salmo 146:3.)

2. Espíritus nema nitlan likatsikgo tsekg skujmakgolh. Akxni Satanás wanilh Jesús pi xʼama maxki putum tamapakgsin xalak kakilhtamaku, Jesús ni wanilh pi nila xmaxkilh tamapakgsin. Atanu kilhtamaku Jesús wa pi Akgskgawini «ntlanka puxku xala yunu nkatuxawat». Titaxtulh makgapitsi kata apóstol Pablo limapakuwilh «malana katuxawat» (Juan 14:30; 2 Corintios 4:4). Kmaktum carta Pablo kawanilh xnatalan: «Ntalatlawayaw laktlanka napuxkun xla kapakglhtuta [o xalak kapukswa] ntu anan yunu nkatuxawat, chu lilhuwa ni lakwan spiritu ntu lamakgo  nkaunin» (Efesios 6:12). Wa xlakata tiku xaxlikana mapakgsikgo uma kakilhtamaku wa nixatlan espíritus tiku tsekg skujmakgolh. ¿La kamakgtaya uma kstalaninanin Cristo xlakata la naʼakxilhkgo política?

Akgtum liʼakxilhtit. Tamapakgsin xla política xtachuna la laktsu lanchas nema kaxwatalin chuchut: uma kilhchanima espíritus nema ni tlan likatsikgo. Chu chuna la tiku linkgo uma laktsu lanchas nila tuku tlawakgo xlakata ni nakaxwatalin chuchut, políticos na nila tuku tlawakgo xlakata nitu nakamatlawikgo nixatlan espíritus. Umakgolh demonios liwana lakapastakkgonit nakamatlawikgo tuku nitlan latamanin chu nakamakgapatikgo (Apocalipsis [Revelación] 12:12). Wa xlakata, kajwatiya chatum tiku kgalhi tlakg litliwakga nixawa Satanás chu xdemonios tlan nalakgpali tuku nitlan lama. ¿Tiku uma? Jehová Dios (Salmo 83:18; Jeremías 10:7, 10).

3. Xaxlikana kstalaninanin Cristo kaj tatayakgo xTamapakgsin Dios. Jesús chu kstalaninanin xkatsikgo pi xʼama chan kilhtamaku akxni Dios xʼama wili akgtum tamapakgsin kʼakgapun chu xʼama mapakgsinan unu kKatiyatni: xTamapakgsin Dios. Biblia wan pi mapakgsina nema Jehová laksaknit wa Jesucristo (Apocalipsis 11:15). Xlakata Jesús xkatsi pi uma tamapakgsin xʼama kamakgtaya latamanin, lu liskujli xlakata nalichuwinan «xatlan tamakatsinin xla xtapakgsin Dios» (Lucas 4:43). Na kamasiyanilh kstalaninanin naskinkgo akxni xtlawakgolh oración: «Kamilh milimapakgsin». ¿Tuku xlakata? Xlakata akxni natawila Tamapakgsin, xtalakaskin Dios natatlawa kKatiyatni chuna la tatlawama kʼakgapun (Mateo 6:9, 10).

Pero ¿tuku nakaʼakgspula mapakgsinanin xalak kakilhtamaku? Biblia kinkawaniyan pi nakamasputukan tuku lakkaxwilikgonit políticos «xlikatlanka nkatuxawat» (Apocalipsis 16:14; 19:19-21). Wa xlakata putum tiku kanajlakgo pi xTamapakgsin Dios nakamasputu mapakgsinanin ni lipawankgo tuku lakkaxwilikgonit políticos. Chu tiku nakatataya maski katsi pi nakamasputukan, xtalamakgasitsin Dios nalitaxtu.

Pero maski kstalaninanin Cristo ni makgtanukgo kpolítica, ¿wamputun uma pi ni makgtayanankgo xlakata tlakg tlan natawila kachikinin niku wilakgolh? Kʼartículo nema aku mima natamasta xtakgalhtin uma takgalhskinin.

[Tuku wan página 6]

Xtatayananin Jehová ni makgtanukgo kpolítica xlakata tatayakgo xTamapakgsin Dios