Kasi Ŵakhristu Ŵakwenera Kunjilirapo pa Ndyali?

ŴAKHRISTU ŵaunenesko ŵakucitako yayi ndyali. Cifukwa wuli? Cifukwa ŵakulondezga Yesu. Yesu wakati: ‘Nili ku cigaŵa ca caru cara.’ Pakuyowoya vya ŵasambiri ŵake wakati: “Muli cigaŵa ca caru cara.” (Yohane 15:19; 17:14) Wonani vifukwa vinyake ivyo Ŵakhristu ŵakulekera kunjilirapo pa ndyali.

1. Ŵanthu mbakupeleŵera. Baibolo likuti ŵanthu ŵalije wenelero wa kujiwusa ŵekha. Nchimi Yeremiya yikalemba kuti: “Nkhwa munthu uyo wakwenda cara kurunjika mendero ghake.”—Yeremiya 10:23.

Mwaciyelezgero, munthu wakalengeka kuti wadukenge mucanya nga nkhayuni yayi, ntheura pera wakalengeka kuti wajiwusenge yekha yayi. Pakuyowoya za kupeleŵera kwa maboma, munthu munyake wakusanda mdauko David Fromkin wakati: “Maboma ngakupangika na ŵanthu, ntheura ngakutondeka ndipo ghakulutilira yayi. Ŵakuyezga kuwusa kweni ŵakulutilira yayi.” (The Question of Government) Lekani Baibolo likuticenjezga kuti tileke kugomezga ŵanthu.—Salmo 146:3.

2. Mizimu yiheni ndiyo yikuwusa. Apo Satana wakakhumbanga kupa Yesu maufumu ghose gha caru, Yesu wakasuska yayi kuti Dyabulosi wali na mazaza gha kumupira maufumu agha. Nakuti pamasinda, Yesu wakati Satana ni “muwusi wa caru.” Vilimika vikati vyajumphapo mpositole Paulosi wakalongosora kuti Satana ni “ciuta wa mgonezi uno.” (Yohane 14:30; 2 Ŵakorinte 4:4) Paulosi wakalembera Ŵakhristu ŵanyake kuti: “Tikulimbana . . . na ŵamazaza, na ŵawusi ŵa caru ca cisi ici, ndiposo mawumba gha mizimu yiheni mu malo ghakucanya.” (Ŵaefeso 6:12) Nangauli ŵanthu ŵanandi ŵakumanya yayi, kweni mizimu yiheni ndiyo yikuwusa caru ici. Kasi fundo iyi yingatovwira wuli pa umo tikwenera kuwonera ndyali?

Wonani ciyelezgero ici: Nga umo maboti ghacokoghacoko ghangayeghekera na cimphepo cankhongono pa nyanja, maboma gha ŵanthu nagho ghakuyegheka na nkhongono za mizimu yiheni. Nga umo awo ŵakwendeska maboti ŵangatondekera kukanizga cimphepo, ŵandyali nawo palije ico ŵangacita kuti ŵimikane na nkhongono  za mizimu yiheni. Mizimu yiheni yaŵikapo mtima kuti yipuluske ŵanthu na kwambiska ‘masoka pa caru.’ (Uvumbuzi 12:12) Ntheura, munthu yekha uyo wali na nkhongono kuluska Satana na viŵanda vyake ndiyo wangasintha vinthu. Munthu uyu ni Yehova Ciuta.—Salmo 83:18; Yeremiya 10:7, 10.

3. Ŵakhristu ŵaunenesko ŵakukhozgera Ufumu wa Ciuta pera. Yesu na ŵasambiri ŵake ŵakamanyanga kuti pa nyengo yakutemeka, Ciuta wazamukhazikiska boma kucanya kuti lizakawuse caru cose capasi. Baibolo likuti boma ili ni Ufumu wa Ciuta ndipo likuvumbura kuti Yesu Khristu ndiyo ŵali kusoleka kuŵa Themba. (Uvumbuzi 11:15) Pakuti Ufumu uwu ukukhwaska ŵanthu wose, ntheura “makani ghawemi gha ufumu wa Ciuta” ndiwo ukaŵa mutu wa ivyo Yesu wakasambizganga. (Luka 4:43) Wakasambizgaso ŵasambiri ŵake kulomba kuti: “Ufumu winu wize.” Cifukwa wuli? Cifukwa Ufumu uwu ndiwo uzamufiska khumbo la Ciuta kucanya na pa caru capasi.—Mateyu 6:9, 10.

Ipo kasi nchivici cizamucitikira maboma gha ŵanthu? Baibolo likuzgora kuti maboma “gha caru cose,” ghazamuparanyika. (Uvumbuzi 16:14; 19:19-21) Usange munthu wakugomezga nadi kuti Ufumu wa Ciuta uzamuwuskapo ndyali zose, nchakumanyikwirathu kuti wangakhozgera yayi ndyali. Nakuti para wangakhozgera maboma agho ghaparanyikenge, ndikuti wakususkana na Ciuta.

Pakuti Ŵakhristu wakunjilirapo yayi pa ndyali, kasi cikung’anamura kuti ŵakukhumba yayi kuti vinthu viŵe makora mu vikaya vyawo? Zgoro lili mu nkhani yakulondezgapo.

[Mazgu Ghakukhozgera pa peji 7]

Ŵakaboni ŵa Yehova ŵakukhozgera Ufumu wa Ciuta pera, ndyali yayi