Mang e Ba T’uf ni nge Rin’ e Piin Kristiano e Ngiyal’ Ney?

TIN riyul’ e Kristiano e ngiyal’ ney e darur uned ko ngongolen e am. Mang fan? Ya yad be folwok rok Jesus. I weliy murung’agen ni gaar: “Gathi gag e girdi’ nu fayleng.” Miki weliy murung’agen pi gachalpen ni gaar: “Gathi yad girdien e fayleng.” (John 15:19; 17:14) Mu lemnag boch i fan ni piin Kristiano e thingar dab ra uned ko ngongolen e am.

1. Tin nrayog ni nge rin’ e girdi’ e bay e gin nra mus riy. Ke yog e Bible ni girdi’ e dabiyog rorad ma dariy mat’awrad ni ngar gagiyegniged yad. I yog Jeremiah ni profet ni gaar: ‘Dariy be’ ni ir e ga’ ko gin nge sor e yafos rok ngay; dariy be’ ni bay gafan e yafos rok u pa’.’​—Jeremiah 10:23.

Bod rogon e girdi’ ni dabiyog ni nge furuy pon ni nge changeg ni bod reb e arche’, ere ku dabiyog rorad ni ngar gagiyegniged yad. I weliy David Fromkin, ni be’ ni ma fil murung’agen chepin e girdi’ kakrom ni be tamilangnag ni bay e gin ni nge mus e pi am riy ni gaar: “Pi am e bay e girdi’ riy ni dawor ra flontgad ma bay boch ban’en ni dabiyog rorad ma pi n’en ni yad ma nameg e der ma dugil. Bay gelngirad machane bay e gin ni nge mus riy.” (The Question of Government) Ere aram fan ni be ginangdad e Bible ni dabi pagan’dad ngak e girdi’.​—Psalm 146:3.

2. Pi kan nib kireb e yad ma magawonnagdad. Nap’an ni ognag Satan e fayleng ngak Jesus ni nge gagiyegnag, ma dabisiy ni manang Jesus ni bay gelngin Satan ni nge rin’ ban’en ni aram rogon. Boch nga tomuren, me pining Jesus Satan ni ir e en “ni be gagiyegnag e girdi’ nu roy u  fayleng”. Boch e duw nga tomuren me weliy apostal Paul murung’agen Satan ni ir “fare kan nib kireb nu roy u fayleng.” (John 14:30; 2 Korinth 4:4) I yol Paul ngak e pi walag ni Kristiano ni gaar: “Ya gadad be cham ngak gelngin e kan nib kireb, ni pi kan ni yad e yad be gagiyeg, nge gelngin e kan u lan e lang ko ngiyal’ ney nib talumor.” (Efesus 6:12) Boor e girdi’ e darur nanged ni pi kan nib kireb ney e yad be gagiyegnag e fayleng. Ere bochan ni kad nanged e re n’ey, ma uw rogon ni ngad lemnaged ngongolen e am?

Mu lemnag e re n’ey: Pi am nu fayleng e be gagiyegnagrad e pi kan nib kireb ni ba gel gelngirad ni bod rogon reb e bowoch ni be girngiy e gireng nib gel. Pi tayugang’ ko am e mo’maw’ rorad ni ngar togopuluwgad ko pi kan nib kireb ni bod rogon e pi sala ko fare bowoch ni ba mo’maw’ rorad ni ngar thilyeged rogon e gireng ko day. Pi kan nib kireb ney e yad be nameg ni ngar magawonnaged gadad ma ngar ‘gafgowniged e fayleng.’ (Revelation 12:12) Ere kemus ni taa be’ ni aram Jehovah Got e ba gel gelngin ngak Satan nge pi moonyan’ rok ma rayog rok ni nge chuweg e magawon rodad.​—Psalm 83:18; Jeremiah 10:7, 10.

3. Kemus ni Gil’ilungun Got e be pagan’ e tin riyul’ e Kristiano ngay. Manang Jesus nge pi gachalpen ni bay ngal’an ni ra sunumeg Jehovah reb e am u tharmiy nra gagiyegnag e fayleng ni ga’ngin. Ke yog e Bible ni ireram Gil’ilungun Got ma Jesus e ir e kan dugliy ni nge mang Pilung riy. (Revelation 11:15) Bochan ni Gil’ilungun Got e bay rogon ngak gubin e girdi’ ma aram fan ni fanay Jesus “fare Thin Nib Fel’ ni murung’agen e gagiyeg rok Got” ni nge mang kenggin e machib rok. (Luke 4:43) Miki fil ngak pi gachalpen ni ngar meybilgad ni nge lungurad: ‘Nge yib gil’ilungum ngomad,’ [NW]. Mang fan? Ya bochan ni tan e re Gil’ilungun nem ma tin nib m’agan’ Got ngay e ra lebug u tharmiy nge fayleng.​—Matthew 6:9, 10.

Ere mang e ra buch ko pi am ko girdi’? Ke yog e Bible ni pi am ney u “fayleng ni polo’” e yira thangrad. (Revelation 16:14; 19:19-21) Faanra ba mich u wan be’ ni Gil’ilungun Got e ra chuweg e pi am nu fayleng ma ba fel’ ni nge dabi un ko ngongol rorad. Ya faanra rin’ ni aram rogon ma aram e ke togopluw ku Got.

Bochan nder ma un e tin riyul’ e Kristiano ko ngongolen e am, ma re n’ey e gathi be yip’ fan ni dubrad ni ngar pied e ayuw ko pi binaw ni yad be par riy. Mu lemnag e fulweg ni bay ko bin migid e article.

[Blurb on page 6]

Pi Mich rok Jehovah e be pagan’rad ko Gil’ilungun Got ma gathi am ko girdi’