▪ Una pa mosaka sa langit, si Jesus naghatag sa iyang mga tinun-an ug tin-awng sugo kon unsaon pagtuman ang ilang ministeryo, apan wala siya maghisgot ug politika. (Mateo 28:18-20) Busa, ang iyang mga tinun-an padayong nagsunod sa prinsipyong gihatag ni Jesus una pa niana: “Ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.”—Marcos 12:17.

Sa unsang paagi kana nga prinsipyo nakatabang sa mga sumusunod ni Jesus sa pagkinabuhi sa kalibotan apan dili bahin niana? Giunsa nila pagtino kon unsay iya sa Estado, o kang Cesar, ug unsay iya sa Diyos?

Giisip ni apostol Pablo ang pag-apil-apil sa politika ingong paglapas sa prinsipyong gilatid ni Jesus. “Gigamit ni Pablo ang iyang katungod ingong Romanong lungsoranon sa pagpangayog proteksiyon sa hudisyal nga proseso, apan wala gayod siya modapig sa politikal nga mga isyu sa iyang adlaw,” matod sa librong Beyond Good Intentions—A Biblical View of Politics.

Unsang mga giya ang gihatag ni Pablo sa iyang isigka-Kristohanon? Ang maong libro midugang: “Ang iyang sulat sa mga magtutuo sa dagkong siyudad sama sa Corinto, Efeso, ug bisan sa Roma wala maghisgot ug politikal nga mga isyu.” Kini nag-ingon usab nga si Pablo “nagsugo nga magpasakop sa gobyerno, apan wala gayod siya maghisgot sa iyang mga sulat ug bisag usa na lang ka polisa nga angayng iduso sa kongregasyon ngadto sa publikong mga institusyon.”—Roma 12:18; 13:1, 5-7.

Ang mga Kristohanon nga nagkinabuhi mga dekada human mamatay si Pablo nagsunod gihapon sa mga prinsipyo bahin sa ilang obligasyon sa Diyos ug sa Estado. Sila nagmatinahoron sa gobyerno apan wala mag-apil-apil sa politika. Ang librong Beyond Good Intentions nagkomento bahin nila: “Bisag nagtuo sila nga obligado silang motahod sa awtoridad, ang unang mga Kristohanon wala mag-apil-apil sa politika.”

Apan mga 300 ka tuig human mamatay si Kristo, nausab ang kahimtang. Ang teologong si Charles Villa-Vicencio nag-ingon: “Sa dihang giusab ang sistema sa politika ilalom ni Constantino, dayag nga daghang Kristohanon ang misugod pagtrabaho sa mga ahensiya sa gobyerno, nagsundalo, ug naghupot ug politikal nga katungdanan.” (Between Christ and Caesar) Unsay resulta? Sa kataposan sa ika-4 nga siglo C.E., kana nga panagsagol sa relihiyon ug politika nahimong relihiyon sa Estado sa Imperyo sa Roma.

Karon, daghang relihiyon nga nag-angkong nagsunod kang Kristo ang padayong nag-awhag sa mga membro sa pag-apil sa politika. Hinunoa, ang maong mga relihiyon wala magsundog kang Kristo, ni magsunod sa panig-ingnan sa unang-siglong mga Kristohanon.