Taro na Dauwiliwili . . .

Era Bau Vakaitavi ena Politiki na Lotu vaKarisito ena iMatai ni Senitiuri?

▪ Ni bera ni lako i lomalagi o Jisu, e vakamatatataka sara ga vei ratou nona tisaipeli na sala me ratou vakayacora kina nodratou cakacaka vakaitalatala, ia e sega ni bau vakasalataki ratou ena ka vakapolitiki. (Maciu 28:18-20) Eratou tomana tiko ga na tisaipeli na ivakavuvuli e tukuna taumada o Jisu: “Ni solia vei Sisa na ka e nei Sisa, vua na Kalou na ka e nona na Kalou.”​—Marika 12:17.

E vukei ratou vakacava na imuri i Jisu na ivakavuvuli qori me ratou kua ni vakavuravura dina ga ni ratou tiko kina? Eratou na kila vakacava na ka e dodonu me nona na matanitu se nei Sisa, kei na ka me nona na Kalou?

E raica na yapositolo o Paula ni veisaqasaqa kei na ivakavuvuli i Jisu na nona vakaitavi e dua ena politiki. E tukuna na ivola Beyond Good Intentions—A Biblical View of Politics: “Ni lewenivanua e Roma o Paula, a vakayagataka na veika e vakarautaka na matanitu me baleta na nona kisi ni veilewai, ia a sega ni tokona eso tale na sasaga ni matanitu.”

Na cava e vakasalataki ira kina na tacina lotu vaKarisito o Paula? E tomana na ivola e tukuni e cake: “E sega ni bau cavuti na veileti vakapolitiki ena nona ivola vei ira na vakabauta ena siti rogo me vakataki Korinica, Efeso, kei na nona ivola mada ga vei ira e Roma.” E tukuni tale ga kina ni o Paula “e vakarota na talairawarawa ena matanitu, ia e sega ni bau cavuta ena levu na ivola e vola mera usuraka na lewe ni lotu na nodra nanuma ena ka mera cakava na veiliutaki.”​—Roma 12:18; 13:1, 5-7.

O ira na lotu vaKarisito era bula ni oti e vica sagavulu na yabaki nona mate o Paula, era dei tu ga ena nodra solia ga na ka e nona na Kalou kei na ka e nona na matanitu. Era dau doka na veiliutaki vakapolitiki ia era na sega ga ni vakaitavi kina. E vakamacalataka na Beyond Good Intentions me baleti ira na lotu vaKarisito oya: “Era vakabauta ni nodra itavi mera doka na matanitu e veiliutaki, ia era sega vakadua ni vakabauta na lotu vaKarisito taumada mera vakaitavi ena veika vakapolitiki.”

Ia e yaco na veisau ni oti e rauta na 300 na yabaki nona mate o Karisito. E tukuna na daunicioloji o Charles Villa-Vicencio: “Ni veisau na ituvatuva vakapolitiki ena gauna a veiliutaki kina o Constantine, e kena irairai nira vakaitavi e levu na lotu vaKarisito ena cakacaka vakamatanitu kei na mataivalu, ra qai ciqoma na itutu vakapolitiki.” (Between Christ and Caesar) Na cava a qai yaco? Ni cava na ikava ni senitiuri S.K., e sa takalevu ena veivanua e qali e Roma na nodrau duavata o lotu kei politiki.

Nikua, e levu na lotu era tukuna nira imuri i Karisito era se uqeti ira tiko ga na nodra lewenilotu mera vakaitavi ena politiki. Ia o ira na lotu qori era sega ni vakatotomuri Karisito se vakatotomuria na nodra ivakaraitaki na lotu vaKarisito ena imatai ni senitiuri.