Ifyo Imikalile Yali Kale—Shibulimi

“[Yesu] aebele abasambi bakwe ati: ‘Cine cine, umulimo wa kulobolola ukalamba, lelo ababomfi bena nabacepa. E ico, lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.’”—MATEO 9:37, 38.

PA KUSAMBILISHA amasambililo ayacindama, ilingi Yesu alebomfya ifilangililo ifyalelanda pa nshila shalekanalekana isha kuliminamo e lyo ne fisolobelo balebomfya. (Mateo 11:28-30; Marko 4:3-9; Luka 13:6-9) Mulandu nshi alebomfesha ifi ifilangililo? Pantu uko aleikala abantu balelima sana. Abengi abalekutika kuli ena balebomfya inshila sha kuliminamo isho ne fikolwe fyabo fyalebomfya. Baleumfwa ifyo alebasambilisha nga abomfya icilangililo ca fintu baishibe. Alishibe ifyo imikalile yabo yali, kabili ifyo alebafunda fyalebafika pa mutima.—Mateo 7:28.

Kuti twaishiba bwino ifyo ifilangililo fya kwa Yesu na malyashi yambi aya mu Baibolo yacindama nga twaishibako fimo pali bashibulimi ba mu nshita ya batumwa, pa filimwa balelima, ifyo balebomfya mu bulimi, na mafya balekwata.

Elenganyeni shibulimi alebomba imilimo yakwe iyalekanalekana. Mulebelenga na malembo ayalimo no kumona ifyo mwingasambililako.

Inshita ya Kulimba

Shibulimi aiminina pa mwinshi wa ng’anda yakwe. Akasuba e lyo kaletula fye, e co abika icisansa pa mpumi yakwe pantu akasuba kalemusanika mu menso. Umwela uwatalala ulenunkila bwino pantu imfula nailoka no mushili uwakosele naunaka. Ni nshita ya kutendeka ukulima.  Abuula plao ya mbao abika pa kubeya, alungama kwi bala.

Abuula ing’ombe ashikulikila kwi koli kabili ashikunkisha pa kuti shitendeke ukulima. Icilimi ca cela ica kuli plao e cilelima umushili wa mabwe. Plao tailetikula umushili, lelo ileimba fye utumikolwa (1). Shibulimi naikatisha plao pa kuti apange utumikolwa utwaololoka, talelolesha ku numa, pantu plao kuti yalola kumbi. (Luka 9:62) Afwile ukulima fye mu ncende yakwe iyo bamupeela no kuibomfya bwino.

Apo nalima ibala, nomba ni nshita ya kuti atendeke ukutanda imbuto. Shibulimi nasenda umufuko wa mbuto sha ngano ku kuboko kumo, e lyo ukuboko kumbi alekubilako imbuto (2). Pa kukuba imbuto, nabikako amano, alekuba fye pa “mushili uusuma” te mu mbali ya nshila umuli umushili uwakosa.—Luka 8:5, 8.

Pa numa ya kutanda imbuto, shibulimi atendeka ukushiikapo. Abuula imisambo ya myunga aikulikila ku ng’ombe ishili kwi koli e lyo shatendeka ukuikulanya mwi bala. Kuli ne fyuni ifilelya imbuto isho bashilashiika. Ilyo ingano shakulako, shibulimi abuula ica kutukwilako umushili (3) pa kuti afumyemo ifyani ifingatabilila ingano.—Mateo 13:7.

Inshita ya Kulobolola

Imyeshi yapitapo, imfula nayo yaloka, mu kuya kwa nshita imitwe ya ngano yapya, kabili amabala yabuuta na tuutu.—Yohane 4:35.

Shibulimi no lupwa lwakwe balapamfiwa sana inshita ya kulobolola nga yafika. Uuleseepa aikata ingano ku kuboko kwakwe ukwa ku kuso e lyo ukwa kulyo e ko ekatile icikwakwa ica kuseepelako (4). Bambi balelonganika ingano no kushikaka mu myanshi (5), no kushibika pa mpunda nelyo mu cikocikala (6) pa kuti bashitwale uko aba mu mushi bapumina ingano.

Akasuba nakabalika icine cine kabili takuli na makumbi. Ulupwa lwaya mu kutuushako panono mu cintelelwe ca mukunyu. Baleshimika ilyashi, ukuseka, balelya no mukate, imbuto ishasalulwa, amaolife, imikunyu ayauma ne fimamantwa fya myangashi. Cilya bapwisha ukulya, banwenapo na menshi ya mu kamfukumfuku.—Amalango 8:7.

 Mwi bala ilili mupepi, muli abaletolelesha ingano (7). Bamo bapiina kabili tabakwata impanga ya kulimamo.—Amalango 24:19-21.

Pa numa, shibulimi aya apo bapumina ingano apalundumana, no kusalanganya ingano shakwe. Lyena akulika ica kusokwelako ku ng’ombe na sho shatendeka ukushisokola (8). (Amalango 25:4) Amabwe ayatwa ne fyela ifyaba ku ca kupuminako fileputula imitwe ya ngano.

Shibulimi nomba atendeka ukulolela ukuti icungulo cifike ilyo kuba umwela uwingi. (Ruti 3:2) Lilya caba icungulo, atunkula foloko ya cimuti, nelyo “ica kwelelako” (9), mu mwiina wa ngano isho apumine no kutendeka ukuulusha. (Mateo 3:12) Ingano shileponena pa nshi, e lyo imisungu yena ileululuka. Ifi fine e fyo atwalilila ukucita mpaka ingano shonse shapwa.

Cilya bwaca, abakashi ba kwa shibulimi na bana abanakashi batendeka ukwela (10). Balepunga ingano ishisakene no tumabwe. Ingano shileponena mu miseke, e lyo ifisooso balefipoosa. Ala balobolola ingano ishingi nga nshi. Ababomfi babika ingano shimo mu mitondo (11). E lyo ishashala bashibika mu matala.

Shibulimi aiminina apa kupumina ingano, ayolola, kabili alolesha amabala ayashingulwike umushi. Umutima wakwe wasekelela ilyo alolesha amabala umo asombwele ingano, icilelangilila fye ukuti nabombesha. Alolesha abalebombela mu mabala ya myangashi, mu mabala ya miolife, amapomegranate e lyo ne mikunyu. Umwina mupalamano uulelima mu kalibala kakwe aka pa ng’anda aimya ukuboko, amuposha. Mwi bala lya uyu mwina mupalamano mukaba ifibimbi, ilanda, cilemba, liiki, intongwe na kanyense. Shibulimi akutumana, e lyo ainwina amenso mu muulu, no kupepa kuli Lesa ukufuma pa nshi ya mutima, ukumutasha pa fya bupe ifisuma ifyo apeela abantu.—Amalumbo 65:9-11.

[Ifikope pe bula 28-30]

(Moneni muli magazini)