Bula ena Gauna Vakaivolatabu​—Dauteitei

“E kaya [o Jisu] vei iratou nona tisaipeli: ‘Io, e levu sara na ka me tamusuki, ia era lewe lailai ga na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.’”​—MACIU 9:37, 38.

E DAU vakamacalataka o Jisu na ivakarau ni iteitei kei na iyaya e vakayagataki kina me vakavulica eso na ivakavuvuli bibi. (Maciu 11:28-30; Marika 4:3-9; Luke 13:6-9) Na cava na vuna? Baleta ni a bula o Jisu ena vanua ni teitei. E levu na dau vakarogoci koya era se muria tiko ga na ivakarau ni iteitei e sega ni bau veisau me vica vata na senitiuri. Era kila vinaka na ivakatautauvata me baleta na ka era dau cakava e veisiga. E matata vinaka tu vei Jisu na ivakarau ni nodra bula e veisiga kei na ka era kauaitaka, qai tarai ira sara ga na ka e vakavulica.​—Maciu 7:28.

Me rawa nida kila vinaka na yaga ni vosa vakatautauvata i Jisu kei na so tale na itukutuku ena iVolatabu, e vinaka meda kila toka eso na itukutuku me baleta e dua na dauteitei ena imatai ni senitiuri, na itei e tea, na iyaya e vakayagataka, kei na ituvaki dredre e sotava.

Raitayaloyalotaka mada na ka e dau cakava na dauteitei. Wilika na tikinivolatabu e sega ni lavetaki, qai raica na ka o vulica kina.

Gauna ni Kakaburaki

E duri tu ena mata ni katuba na dauteitei, taqomaka toka na matana mai na serau ni siga me vakararai, qai ceguva na cagi batabata. Na uca sa vakamalumutaka tu na qele, sa kena gauna me caka kina na siviyara. E colata na dauteitei nona isiviyara kau me gole yani ina iteitei.

Ena taqara na ivua ena domo ni bulumakau  qai usoraka ena matanimoto me siviyara. E kelia na qele vatuvatu na batinisiviyara kaukamea. E sega ni vukica na qele, e seuta ga qai kelia na ikeli lalai se wenisiviyara (1). Ni bale ina imatau se na imawi, ena saga na dauteitei me dodonu tiko ga na wenisiviyara, ena sega ni rai i muri de na qai veigoleyaki na siviyara. (Luke 9:62) Na vanua me siviyarataka me kua ni sivia na kena iyalayala, qai vakayagataka vakavinaka na vanua sa cuki oti qori.

Ni sa cuki vinaka tu na were, sa kena gauna me kaburaki na itei. Ena tara na dauteitei ena dua na ligana na taga parile, qai kaburaka tiko na itei na ligana kadua (2). Ena qarauna na dauteitei me kua ni lutu na itei ena vanua ena muria, me lutu ga ena “qele vinaka.”—Luke 8:5, 8.

Ni oti na kakaburaki, so tale na ka ena leqataka. Ena vesuka na dauteitei ena nona bulumakau na taba ni kau vakavotona me yarataka takoso ina were. Era vakasosa na manumanu vuka nira tokia tiko na itei ni bera ni buluta na qele. Oti sa na qai vakayagataka na piki (3) me vakamalumutaka na qele, me kauta tani tale ga na co ca ena rawa ni vakamatea na itei ni bera ni matua.​—Maciu 13:7.

Gauna ni Tatamusuki

Oti e vica na vula, sa qai tau na uca. Era suaigelegele tu na varile matua ena gauna qori, kena ibalebale sa matua vinaka tu na were.​—Joni 4:35.

E dau osooso na dauteitei kei na nona vuvale ena gauna ni tatamusuki. Ena kumuna na dautatamusuki na vu ni witi ena ligana imawi qai musuka ena isele takelo na ligana imatau (4). Eso tale era binia na witi mera vesuvesuka vata (5), qai usani ena asa se qiqi (6) me kau ina buturara ni samusamu ena koro.

Dua na ka na katakata ni matanisiga, era cegu vakalekaleka na lewe ni vuvale ena ruku ni vunilolo. Era veidredrevaki ra qai veitalanoa nira kana madrai, covuata sigani, olive, lolo sigani, kei na resini. Oti era sa qai sorova na gunu wai mai na vure.​—Vakarua 8:7.

Era kumuna tiko na dauvakatotomi na ivovo ni witi ena dua na were voleka (7). Eso vei ira qori era dravudravua qai sega na nodra qele.​—Vakarua 24:19-21.

Ni kau na witi ina buturara ni samusamu ena  koro, era dau tuvana na dauteitei na ibinibini witi era vesuvesu vata tu ena dua na vanua cere qai kaukaua. Sa qai vakayagataki na bulumakau me dreta wavoki na isamuyara bibi me qaqia na witi (8). (Vakarua 25:4) E dau tu ena ruku ni isamuyara na vatu gagata kei na tiki ni kaukamea me musuka na witi.

Sa qai dau waraka na dauteitei me liwa na cagi ena yakavi. (Ruci 3:2) Ni dromu na siga, e dau biuta na mataiva kau se “isivi ni cebuceburaki” (9), ena ruku ni witi sa samu oti qai ceburaka e macawa. (Maciu 3:12) E dau qeqera na witi qai cagina tani na qana. Ena vakayagataka tiko na mataiva kau me yacova ni sa ceburaki kece na witi.

Ni kida na mataka, eratou tekivu tawasea na witi na watina na dauteitei kei ratou na luvena yalewa (10). Eratou na kurea tiko na ivakadewa e sinai tu kina na witi kei na vatu lalai. Ena lutu na parile ena basikete, qai biu tani na benu. Dua na ka na levu ni witi e tamusuki, era sa qai maroroya na tamata cakacaka eso na witi ena saqa (11). Oti sa qai maroroi na kena vo ena qara.

E duri vakadodonu ena dela ni buturara ni samusamu na dauteitei me vakadre ni sa oca, qai vakaraica na were era wavokita tu na koro. E marau ni raica nira sa robota tu na were na tolonicovuata, e vakaraitaka qori ni sa vakayacori e dua na cakacaka levu. E vakaraici ira na cakacaka tu ena loganivaini, loga ni olive, pomekaraneti kei na vunilolo. E yaloyalo mai e dua e cukicuki toka ena dua na were voleka. Ena tei kina na kiukaba, bini, dal, kakana draudrau e vaka na iboi ni varasa (leek), chickpeas, kei na varasa. E cegu vakalailai na dauteitei, rai i lomalagi qai masu vakalekaleka mai vu ni lomana me vakavinavinakataka vua na Kalou na isolisoli totoka e dau vakarautaka.​—Same 65:9-11.

[iYaloyalo ena tabana e 28-30]

(Raica na ivola)