Moris iha tempu Bíblia nian—Toʼos-naʼin

“[Jesus] dehan ba eskolante sira: ‘Toʼos boot duni, maibé serbisu-naʼin uitoan. Neʼe duni imi harohan ba toʼos-naʼin atu haruka serbisu-naʼin sira ba nia toʼos.’”—MATEUS 9:37, 38.

JESUS sempre uza ai-knanoik kona-ba toʼos-naʼin sira-nia atividade no sasán neʼebé sira uza iha toʼos atu hanorin buat ruma neʼebé importante. (Mateus 11:28-30, MF; Marcos 4:3-9; Lucas 13:6-9) Tanbasá? Tanba Jesus moris iha tempu neʼebé ema maioria mak toʼos-naʼin. Ema barak neʼebé rona Jesus nia hanorin mak tuir tradisaun kona-ba halo toʼos husi sira-nia beiʼala sira-nia tempu. Sira komprende kedas kuandu Jesus koʼalia kona-ba sira-nia moris loroloron nian. Jesus komprende sira-nia situasaun no hatene dalan neʼebé sira hanoin, no Jesus nia hanorin book sira-nia moris.—Mateus 7:28.

Ita bele komprende diʼak liu Jesus nia ai-knanoik sira no istória seluk iha Bíblia, se ita hatene kona-ba toʼos-naʼin sira-nia moris iha tempu uluk. Porezemplu, fini saida mak sira kuda, sasán toʼos nian saida deʼit mak sira uza, no susar saida deʼit mak sira hasoru.

Hanoin toʼok nuʼudar toʼos-naʼin ida bá atu serbisu iha ninia toʼos. Lee eskritura sira, no haree saida mak ita bele aprende.

Tempu atu kari

Nuʼudar loro-matan saʼe iha dadeer, toʼos-naʼin hamriik iha ninia odamatan no dada iis ho anin neʼebé fresku. Nia uza liman hodi hanetik ninia matan husi loro-matan nia naroman. Udan halo  ona rai sai mamar. Tempu atu fila rai toʼo ona. Nuneʼe, nia hiʼit sarua no nia bá serbisu iha ninia toʼos.

Toʼos-naʼin lori ninia karau sira no kesi sira hamutuk. Nia baku karau sira-neʼe hodi sira komesa dada sarua no halo serbisu. Sarua fila rai neʼebé toos, maibé iha leten deʼit hodi halo liña (1). Toʼos-naʼin presiza kuidadu hodi liña neʼebé nia halo nafatin loos, nuneʼe nia la bele haree ba kotuk. (Lucas 9:62) Tanba nia la bele tama iha ema seluk nia toʼos, nia presiza uza didiʼak rai neʼebé nia iha.

Agora toʼos iha ona liña sira no prontu atu kari fini. Entaun, toʼos-naʼin lori saku kiʼik neʼebé nakonu ho fini sevada, no nia komesa kari fini sira (2). Nia kuidadu hodi fini la monu iha rai neʼebé toos maibé monu deʼit iha “rai diʼak”.—Lucas 8:5, 8.

Kuandu kari hotu tiha, toʼos-naʼin presiza taka fini sira ho rai. Nia foti ai-sanak sira neʼebé iha ai-tarak no uza karau sira atu dada ai-sanak sira-neʼe hodi taka fini iha ninia toʼos. Maibé antes toʼos-naʼin taka fini hotu ho rai, manu sira mai atu han fini balu. Tempu balu liu tiha, toʼos-naʼin uza enxada (3) atu fila rai no fokit duʼut neʼebé bele hanehan fini atu sai boot.—Mateus 13:7.

Tempu atu koʼa

Fulan balu liu tiha, no udan komesa tau. Sevada isin neʼebé tasak ona book an bá-mai, no halo toʼos haree mutin tanba prontu ona atu koʼa.—Joao 4:35, MF.

Tempu koʼa mak tempu neʼebé okupadu ba toʼos-naʼin no ninia família. Sira neʼebé serbisu atu koʼa, kaer hamutuk sevada nia kain no uza sabit atu koʼa (4). Sira seluk futu hamutuk kain sira (5), no tuirmai uza kuda-burru ka karrosa (6) atu lori ba fatin liri sevada nian.

Meiudia ona, loro-matan naroman makaʼas no haree hanesan kabuar mutin iha lalehan neʼebé kór-azúl. Toʼos-naʼin ho ninia família deskansa uitoan iha ai-figeira nia mahon. Sira hamnasa no koʼalia nuʼudar sira han hamutuk. Sira han paun, fini sira neʼebé sona, azeitona, ai-fuan figu neʼebé maran no uvas-maran. Ikusmai sira hemu bee fresku husi bee-matan.—Deuteronômio (Ulangan) 8:7.

Iha toʼos neʼebé besik, iha ema balu neʼebé hili  restu sira (7). Ema sira-neʼe mak ema kiak neʼebé la iha toʼos rasik.—Deuteronômio 24:19-21.

Tuirmai, iha fatin atu liri sevada, toʼos-naʼin halo lekar sevada iha rai. Nia uza karau atu dada ai-kabelak todan neʼebé tau hamutuk no karau dada ai-kabelak neʼe bá-mai hodi hanehan sevada (8). (Deuteronômio 25:4) Fatuk kroʼat sira no besi neʼebé tau iha ai-kabelak neʼe nia okos, ajuda atu hasai musan sira husi kain.

Toʼos-naʼin hein toʼo anin rai-nakaras nian komesa huu. (Rute [Rut] 3:2) Kuandu anin komesa huu, toʼos-naʼin uza kanuru ka garfu boot neʼebé halo ho ai (9), atu hisik sevada ba anin. (Mateus 3:12, MF) Musan sira monu iha rai maibé kain no boen sira, anin lori sai. Toʼos-naʼin kontinua halo nuneʼe toʼo hotu.

Iha dadeer-saan, toʼos-naʼin nia feen no oan-feto sira komesa peneira (10). Sira doko peneira neʼebé nakonu ho musan no foʼer. Kuandu sira doko, sevada musan monu ba raga maibé foʼer neʼebé hela sira soe. Tanba sira-nia toʼos buras sira koʼa barak. Serbisu-naʼin tau musan balu iha kusi (11). Kuandu kusi sira nakonu ona, sira tau musan restu iha fatin neʼebé sira rai fini.

Iha fatin atu liri sevada, toʼos-naʼin hamriik hodi halo loos nia kotuk neʼebé kole. Nia foti nia matan hodi hateke ba toʼos sira neʼebé haleʼu nia. Nia kontente atu haree toʼos neʼebé fó fuan barak, neʼe hatudu katak ninia serbisu makaʼas hetan rezultadu diʼak. Nia haree serbisu-naʼin sira neʼebé tau matan ba sira-nia toʼos-uvas, ai-oliveira, romaun, no ai-figeira. Ninia viziñu neʼebé serbisu hela iha nia toʼos kiʼik, hasaʼe liman hodi kumprimenta nia. Viziñu neʼe kuda modo sira hanesan pepinu, fore, koto, no liis oioin. Toʼos-naʼin para uitoan, hateke ba leten hodi haree ba lalehan no halo orasaun ho laran, hatoʼo agradese ba Maromak tanba prezente diʼak hotu neʼebé Nia fó.—Salmo (Mazmur) 65:9-11.

 [Dezeñu iha pájina 28-30]

 (Haree livru)