Tika Iketo Deyo I Kom Nyom, Mic Mua Ki Bot Lubanga?

“Rwot [Jehovah] omiwu wunong ot, wek ngat acel acel i kinwu obed gire i ot pa cware.”​—RUTH 1:9.

MI LAGAM PI LAPENY MAGI:

Pingo lutic pa Lubanga me kare macon gubedo ki woro i kom mic me nyom mua ki bot Lubanga?

Wan watwero ngeyone nining ni Lubanga keto cwinye me neno kit dano ango ma wayero me anyoma?

Tira mene me Baibul madok i kom nyom ma itye ki pulan me tic kwede i kwoni?

1. Tit kong kit ma Adam owinyo kwede i kare ma kimine dako.

 “MAN aye cogo mua i cogona kikome, ki ringo bene mua i ringona kikome; gibilwongo nyinge ni Dako, pien gikwanyo ki i kom Laco.” (Acak. 2:23) Man aye lok pa Adam, laco mukwongo. Cwiny Adam pud dong obedo yom me nongo dako! I kare ma Jehovah oweko Adam onino matek adada, ci En ocweyo dako man maleng-ngi ki i kom cogo laknget laco-ni. Adam ocako nyinge ni Kawa. Lubanga oribo jo aryo man ma cwinygi yom-mi inyom. Kit macalo Jehovah otiyo kwede ki cogo laknget Adam me cweyo dakone, oweko gin onongo gitye ki wat maber ma pe pore ki pa co ki mon ma ginyomme i kare-ni.

2. Pingo co ki mon pol kare ginyikke ki luwotgi?

² Pi ryekone ma lapore pe-ni, Jehovah oketo i cwiny dano mar mamwonya ma bedo i kin laco ki dako​—kit mo ma nyiko co ki mon wek gubedo kacel. World Book Encyclopedia waco ni: “Laco ki dako ma gunyomme gibedo ki gen me ribbe i buto dok gibedo ki mar i kingi calo laco ki dako matwal.” Man pe tye gin manyen bot jo pa Jehovah.

GIN GUBEDO KI WORO PI MIC ME NYOM

3. Icaka onongo dako nining?

³ Abraim ma obedo laco ma lagen otero nyom calo gin ma pire tek. Man oweko en ooro laticce ma loyo jami ducu me cito i Mecopotamia me yenyo dako pi Icaka. Lega ma laticce olego okelo adwogi maber. Labeka ma odoko dako ma Icaka onongo maro adada-ni onongo obedo ngat ma lworo Lubanga dok bene obedo i kin jo ma Jehovah onongo biweko lakwar pa Abraim wok ki i doggolane. (Acak. 22:18; 24: 12-14, 67) Omyero pe dong wamok ki i labol man ni,  ka ngat moni paro piwa ada ci en dong twero doko lakub kin dano wek gunyomme kadi pe gipenye me timone. I kare ni, dano gimoko tamgi pigi kekengi me yero ngat ma gimito nyomone. Ki lok ada, nyom pe timme i polo, ento Lubanga konyo Lukricitayo i yo man ki mukene i kwogi ka gulego pi tirane kun cwiny maleng aye telogi.​—Gal. 5:18, 25.

4, 5. Gin ango ma miyo imoko ni anyaka me Culam gin ki lakwat-ti onongo wigi orwatte?

⁴ Anyaka maleng me Culam i Icrael me kare macon-ni onongo pe mito ni luwote gudiye me bedo ngat acel i kin mon mapol pa Kabaka Solomon. En owacci: “Eno ba wun anyira Jerucalem, amito wukwonge bota ni pe wubitemme me coyo nyo tugo mar ma i cwinya nio ka awinyo ki i cwinya.” (Wer. 8:4, NW) Nyako me Culam-mi ki awobi ma lakwat-ti onongo wigi orwatte. Ki mwolo, en owaco ni: “An acal ki ature ma i bar Caron nyo lenga ma aturene kwar ma maro twi i nota.” Ento awobi ma lakwat-ti odok iye ni: “Nyako ma amaro-ni rom ki ature lenga ma odongo i kin okuto, i kin anyira luwote.” (Wer. 2:1, 2) Pud dong onongo gimare ya!

⁵ Pien nyako me Culam ki awobi ma lakwat-ti onongo gimaro Lubanga, nyomgi onongo bibedo matek adada. Ki lok ada, anyaka me Culam-mi owaco ki lakwat ma en maro-ni ni: “Itinga i badi macalo gin ma meri kikome; pien mar tek calo to, ki nyeko bene ger calo lyel. Meny calo leb mac ma lyel. Leb mac ma lyel ki teko makato ducu. Pe tye pii mo kadi opong madit ma twero balo mar woko, kadi lalele ma mol matek pe twero mwonyo mar woko. Ento ka dano mo otemo wilo mar ki lonyone ducu ma en tye kwede i ode, jo gibicaye matek makato.” (Wer. 8:6, 7) Ka latic pa Jehovah mito moko tamme me nyom, pe myero en obedo ki tam me nongo cwak ma kit man ki bot lawote ma gibinyomme kwede-ni?

LUBANGA KETO CWINYE I KOM NGAT MA IYERO

6, 7. Wan watwero ngeyone nining ni Lubanga keto cwinye me neno kit dano ango ma wayero me anyoma?

⁶ Jehovah keto cwinye me neno kit dano ango ma ibiyero me anyoma. Madok i kom jo Kanaan, Lubanga ociko jo Icrael ni: “Pe wunyomme kwedgi kun wumiyo anyirawu bot awobegi nyo wunyomo anyiragi ki awobewu. Pien gibiloko cwiny awobewu woko, pe dok gibilubo kora, ento gibiworo lubanga mogo mukene; ci miyo kiniga mako Rwot [Jehovah] i komwu, en bityekowu woko oyot.” (Nwo. 7:3, 4) I nge mwaki miya mapol Ejira lalamdog owaco botgi ni: “Wun wuturo cik pa Lubanga omiyo wukelo alii wumedo i kom bal alii pa jo Icrael pi nyomo mon ma gin lurok.” (Ejira 10:10) Dok bene lakwena Paulo owaco bot Lukricitayo luwote ni: ‘Cik gengo dako ka pud cware tye kwo, ento, ka cware dong oto woko, ci en bedo ki kare me nyomme ki laco mo mukene ma cwinye mito, ma tye i kin jo pa Rwot keken.’​—1 Kor. 7:39.

⁷ Ka ngat mo ma odyere me tic pi Jehovah onyomo ngat ma pe Lakricitayo, man nongo obedo tim me jemo i kom Lubanga. Luicrael me kare pa Ejiragi-ca pe gubedo lugen “pi nyomo mon ma gin lurok.” Ginacoya tito ka maleng kit dano ango ma myero Lakricitayo onyom, dok bene bedo bal me temme me gengo ngewa pe me lubo cik man. (Ejira 10:10; 2 Kor. 6:14, 15) Lakricitayo mo ma onyomo ngat ma pe laye nyuto lanen marac dok pe nyuto pwoc pi yub me nyom ma Lubanga aye oketo. Donyo i ribbe ma kit meno i nge nongo batija twero weko ngat  meno keng mot me tic i kin jo pa Lubanga. Dok bene pe opore me bedo ka lega me nongo cwak kun bene kitungcel ibedo ka bako dogi ni: ‘Jehovah, aturo cikki akaka. Ento kadi bed kumeno dong tim ber igo laa-ni i koma.’

JEHOVAH NGEYO MABER LOYO

8. Tit tyen lok mumiyo omyero walubu tira pa Lubanga ma lubbe ki nyom.

⁸ Ngat ma oyubo macin moni nongo ngeyo maber kit ma gin meno tiyo kwede. Ka ce mitte ni gican dul kome kacel en twero miyo ngec kit ma myero kican kwede kakare. Ento mono ka ce wakwero winyo tamme-ni ci watiyo ki tamwa kono? Adwogine twero bedo marac​—kadi bed macin-ni gire twero tic. Dong ka ni myero wanyomme i yo ma weko wabedo ki yomcwiny, omyero walubu tira ma a ki bot Jehovah, Ngat ma ocako te yub me nyom.

9. Pingo Jehovah omiyo mic me nyom?

⁹ Jehovah ngeyo jami ducu maber ma kwako dano ki dong nyom. En oketo i cwiny dano miti me buto wek gubed ki kare me ‘nywal dok gunya.’ (Acak. 1:28) Lubanga niang kit ma dano winyo kwede ka gitye kengi, dok ma peya en ocweyo dako mukwongo, En owaco ni: “Pe ber dano obed kene; abitimo lakony ma romme.” (Acak. 2:18) Jehovah tye ki ngec muromo ma lubbe ki yomcwiny ma tye i kin jo ma gunyomme.​—Kwan Carolok 5:15-18.

10. Gin ango ma myero odor wat macok ma tye i kin Lukricitayo ma gunyomme?

¹⁰ Pi bal ki roc ma walako ki bot Adam ma onongo labal-li, nyom ducu i kare-ni tye ki roc. I kin lutic pa Jehovah, jo munyomme gitwero bedo ki yomcwiny ka gilubo gin ma Lok pa Lubanga waccigi. Me labolle, nen kong tira ma Paulo omiyo ma lubbe ki wat macok ma tye i kin laco ki dako. (Kwan 1 Jo Korint 7:1-5.) Ginacoya pe nyuto ni jo munyomme myero kingi orwatte ka gimito nongo latin keken. Wat macok kit meno konyo me kweyo cwiny dok cobo miti me kom. Ento cwiny Lubanga pe bedo yom ka pe kitimo man i yo mupore. Wageno ni co ki mon ma Lukricitayo gibitero lok man ma pire tek-ki ki woro dok man miyo ngat acel acel nyuto mar kikome ki lawote. Myero pe gutim gin mo keken ma cwero cwiny Jehovah.

11. Mot ango ma Ruth onongo pi timo jami i yo ma Jehovah cwako?

¹¹ Nyom myero obed ka ma dano ginongo iye mar ento pe cwercwiny ki tic ma bedo calo gidiyo dano adiya iye. Tutwalle paco pa Lakricitayo aye myero obed ka ma dano ginongo iye kuc kacel ki yweyo. Nen kong gin mutimme  mwaki maromo kine ka 3,000 angec i kare ma dato mo muteggi ma nyinge Naomi kacel ki mon wote Orupa gin ki Ruth, onongo gitye ka a ki i Moab kun gicito i lobo Judaya. Naomi okwayo mon magi matino-ni me dok bot lutugi. Ruth ma en nya jo Moab omoko liking i kom Naomi, obedo lagen i kom Lubanga me ada dok bene kicuko cwinye ni ‘Jehovah ma en Lubanga pa Icrael ka ma en oringo olaro i te bwome-ni, bimine mot muromo maber!’ (Ruth 2:12) Ki pwoc madit pi mic me nyom mua ki bot Lubanga, Ruth odoko dako pa Boaj, pien laconi obedo dano ma onongo woro Jehovah. Ka kicero Ruth i lobo manyen, cwinye bibedo yom me niang ni ebedo i kin mege madito pa Yecu Kricito. (Mat. 1:1, 5, 6; Luka 3:23, 32) Timo jami i yo ma Jehovah cwako pud dong okelle twon mot madit ya!

TIRA MA KONYO WEK KUC OBED TYE I NYOM

12. Ngat moni twero nongo tira ma konyo i nyom kikwene?

¹² Ngat ma ocako te yub me nyom tittiwa gin ma myero wange ma lubbe ki nyom ma kuc tye iye. Pe tye dano mo ma ngeyo loyo Jehovah. Baibul kare ducu loko lok ada, dok bene yo acel keken ma ngat moni twero miyo kwede tira ma konyo i kom nyom aye ka ce en tiyo ki rwom me kwo ma tye i Ginacoya. Me labolle, lakwena Paulo ocoyo pi teko pa cwiny maleng ni: “Pi meno, laco acel acel i kinwu myero omar dakone macalo maro kom kekene, ki dako bene myero onen ni eworo cware.” (Ep. 5:33) Pe tye gin mo kany ma Lakricitayo muteggi i yo me cwiny pe twero niang. Ento lapeny ma tye aye ni, Tika gin gibitic ki Lok pa Jehovah? Omyero guti kwede ka ce gitero nyom calo mic mua ki bot Lubanga. *

13. Adwogi ango ma twero bino pi kwero lubo tira ma i 1 Petero 3:7?

¹³ Laco ma Lakricitayo myero oter dakone i yo me mar. Lakwena Petero ocoyo ni: “Kit meno bene, wun co wubed ki monwu ki niang maber, kun wumiyo deyo bot dako macalo lawoti ma kome pe tek, pien gin bene ginywako kica pa Lubanga kwedwa ma en aye kelo kwo. Kumeno gin mo pe ma bigengo legawu.” (1 Pet. 3:7) Ka laco pe keto tira pa Jehovah i tic, ci legane pe kibigamone. Man weko kwo me cwiny pa laco meno gin ki dakone pe twero bedo maber, dok kelo peko madit calo daa ki dong tim mogo me gero.

14. Adwogi ango ma dako ma lamar twero kelone bot jo me ode?

¹⁴ Dako ma lubo tira ma tye i Lok pa Jehovah kacel ki tela pa cwiny maleng twero weko pacone bedo ki kuc kacel ki yomcwiny. Laco ma lworo Lubanga miyo jami me kom, gwoko dakone i yo me cwiny dok nyutte mar. Dako mito mar ki bot cware ento en myero otim jami ma weko cware marre. Carolok 14:1 waco ni, ‘Dako maryek miyo gang bedo maber ki kuc, ento dako ma laming keto gang woko, Baibol pa Katoli.’ Dako maryek dok ma lamar timo jami mapol ma kelo kuc ki yomcwiny bot jo me ode. En  bene nyuto pwoc madit atika pi mic me nyom mua ki bot Lubanga.

15. Iromo titone ningo tira ma wakwano i Jo Epeco 5:22-25?

¹⁵ Co ki mon ma giweko margi cung i kom kit ma Yecu omaro kwede kacokkene, ginyuto bene pwoc pi mic me nyom mua ki bot Lubanga. (Kwan Jo Epeco 5:22-25.) Jo ma gunyomme pud dong ginongo mot madit ka gimarre ki mar kikome dok pe giweko awaka, tim tinotino me bedo ka ling alinga, nyo tim mogo ma pe gupore pi Lukricitayo balo nyomgi!

NGAT MO PE MYERO OPOK KINGI

16. Pingo Lukricitayo mukene gibedo ma wigi nono?

¹⁶ Kadi bed jo mukene gitye ki pulan me nyomme i kare mo anyim, lutic mukene pa Jehovah gibedo ma wigi nono pien pe gunongo ngat mo mupore pigi ki pi Jehovah. Jo mukene gitye ki mot me bedo ma wigi nono, man minigi kare me keto cwinygi me tic pi Jehovah labongo gin mo ma dwoyo tamgi. Bedo ma wi nono myero obed ma rwatte ki cik pa Jehovah.​—Mat. 19:10-12; 1 Kor. 7:1, 6, 7, 17.

17. (a) Lok ango ma Yecu oloko i kom nyom ma myero wiwa pe owil iye? (b) Ka ce cwiny Lakricitayo mo ocako pukke i kom dako nyo cwar ngat mukene, gin ango ma myero en otim oyotoyot?

¹⁷ Kadi bed wanyomme nyo pe, wan ducu myero wiwa pe owil i kom lok ma Yecu owaco ni: “Pud pe wukwano lok ma wacci, cakke i acakki piny Lacwec ocweyogi co ki mon? Dok owaco ni, ‘Pi tyen lok man dano biweko wonne ki minne ci moko i kom dakone, gin aryo-nu gicako doko kom acel’? Kit meno pe dong gibedo kom aryo ento kom acel. Pi meno gin ma Lubanga oribo kacel, dano pe opok kingi.” (Mat. 19:4-6) Ka cwinyi pukke i kom dako nyo cwar ngat mukene meno obedo bal. (Nwo. 5:21) Ka Lakricitayo ocako bedo ki miti ma kit meno, en myero otim gin mo oyotoyot me kwanyo woko miti marac-ci, kadi bed meno bikelo bote arem cwiny pien cwiny me abor odongo i cwinye. (Mat. 5:27-30) Pire tek ni myero watim gin mo me rwenyo cwiny man marac-ci kun wadiyo miti ma bino pi cwiny me bwola.​—Jer. 17:9.

18. In iwinyo ni myero wanen mic me nyom mua ki bot Lubanga-ni nining?

¹⁸ Kadi wa jo ma gitye ki ngec manok nyo pe gingeyo Lubanga Jehovah kacel ki micce mamwonya me nyom bene dong gunyuto olo to woro i kom wat ma tye i kin jo munyomme. Wan ma dong wadyere bot Jehovah “Lubanga ma layomcwiny,” myero wabed ki yomcwiny pi micce ducu dok wanyut ni watye ki pwoc madit atika pi mic me nyom mua ki bot Lubanga.​—1 Tem. 1:11, NW.

[Lok ma tye piny]

[Peny me Kwan]

[Boro buk i pot karatac 12]

Nyom ma kuc tye iye keto deyo i kom Jehovah dok bene twero kelo yomcwiny madit bot jo me ot

[Cal ma tye i pot karatac 11]

Ruth onyuto pwoc pi nyom, mic mua ki bot Lubanga

[Cal ma tye i pot karatac 13]

Tika inyutu ni itye ki pwoc pi nyom, mic mua ki bot Lubanga?